N‑jaʼan Jesús xa ma ndoo ka ni ɨɨn yuú veñuʼu Jerusalén
13
Na n‑kee Jesús veñuʼu Jerusalén,
te n‑jaʼan ɨɨn se dakuaʼa‑ia:
—Maestru,
¡kundeʼa‑n!
¡Naka naʼnu yuú veñuʼu yaʼa!
¡Naka kaʼnu veñuʼu yaʼa,
te naka vili kaa!
San Marcos 13:1-27
2 N‑jaʼan Jesús:
—¿Ndeʼa‑n veñuʼu kaʼnu,
veñuʼu vili kaa ya u?
Yaʼa ma ndoo ka ni ɨɨn yuú xa kava ndodo tnaʼa xiʼin ɨnka yuú.
Ntdaa jungoio.
Naxa koo antecas xa jɨn ndɨʼɨ ntdaa xa io
3 Ijan dada,
nukoo‑ia dɨkɨ Yuku Yutnu Olivo,
te ndeʼa ndaa‑ia nde nuu katuu veñuʼu Jerusalén.
Naʼi ni n‑ka xijan tnuʼu Spedru xiʼin Jacobo xiʼin Sua xiʼin Ndrixi nuu‑ia:
4 —Jaʼan‑n nakɨu koo tnuʼu n‑jaʼan‑n.
Jaʼan‑n na seña koo,
xa jɨn tnaʼa ná io ná juaʼan tnuʼu yaʼa.
5 Te n‑kixeʼe Jesús xa juña tnuʼu‑ia nuu‑s:
—Koo koio cuedado,
xa maxku dandaʼu ñaʼa ni ɨɨn ñayiu.
6 Kixee kueʼe se jaʼan xa io xa jandixa koio‑n mee‑s.
Jaʼan koio‑s xa Cristu kuu‑s,
te duʼa koo xa dandaʼu‑s kueʼe ñayiu.
7 ʼTeku koio‑n xa jantnaʼa ñayiu,
te tekutnuʼu koio‑n xa jantnaʼa ka‑i,
ko maxku kɨ ini‑n,
te maxku yuʼu‑n.
Io xa duʼa yaʼa,
ko ta xinokava ka ntdaa xa io.
8 Jantnaʼa koio ñuu xiʼin ñuu,
se kunxaʼnu ka xiʼin se kunxaʼnu ka.
Koo xa kixi ñutnaa ndeʼe.
Te kixi tnama,
xa kojon koio ñayiu ñuu xiʼin ñuu.
Duʼa kixeʼe xa kueʼe xa kueʼe vida yaʼa koio ñayiu ñuñayiu.
Kuu ná kuu xa kixeʼe kueʼe ñadɨʼɨ xa uʼu kaku daʼya‑ña.
9 ʼKo mee‑n,
koo koio‑n cuedado.
Kandeka ñaʼa koio‑s jɨʼɨn nuu juxtixia,
te xiti veñuʼu kuechi janñaʼa koio‑s.
Xaxeʼe mee‑r ku nujuiin‑n nuu se taxnuni xiʼin se kunxaʼnu ka.
Hora ijan,
jaʼan ndaa‑n nuu‑s xaxeʼe‑r.
10 Duʼa koo,
chi antecas xa xinokava ntdaa xa io,
te io xa juña tnuʼu koio se jandixa ñaʼa mee‑r tnuʼu vaʼa Ianyuux nuu ntdaa ñayiu ñuñayiu.
11 Na kandeka ñaʼa‑s jɨʼɨn nuu juxtixia,
maxku kɨ ini‑n na tnuʼu jaʼan‑n.
Hora ijan ni,
davaʼa nga tnuʼu taxi Ianyuux,
te jaʼan‑n.
Ñadu mee‑n jaʼan,
chi jaʼan Espíritu Ii.
12 Kandeka ɨɨn seyɨɨ ñani‑s jɨʼɨn nuu juxtixia,
xa kaʼni ñaʼa koio‑s.
Dɨuni kandeka ɨɨn seyɨɨ daʼya mee‑s jɨʼɨn,
xa kaʼni ñaʼa koio‑s.
Kuxee ini koio ñayiu nuu taa‑i,
nuu dɨʼɨ‑i.
Kandeka koio ñayiu taa‑i,
dɨʼɨ‑i jɨʼɨn nuu juxtixia,
xa kaʼni ñaʼa koio‑s.
13 Jini uʼu ñaʼa koio ntdaa ñayiu mee‑n,
xaxeʼe xa jandixa ñaʼa‑n mee‑r.
Ko nux kundee ini‑n,
xa jandixa ñaʼa naʼi‑n mee‑r,
nde na xee xa kuú‑n,
te dakaku ñaʼa Ianyuux mee‑n,
xa ma kuú‑n xiʼin kuechi‑n.
14 ʼKundeʼa koio‑n ɨɨn xa yo kuiʼa kaa,
ɨɨn xa ñatu ii,
nujuiin xiti veñuʼu Jerusalén.
Hora ijan dandoo Ianyuux veñuʼu ñayiu Israel,
xa ma kutuu ka‑ia xiti veñuʼu ijan.
Se n‑xian tnuʼu tnuʼu Ianyuux nuu ñayiu,
se nani Daniel,
n‑xo kakuneʼe‑s xa duʼa koo.
Hora na kundeʼa koio‑n xa kuiʼa kaa nujuiin nuu maxku ku nujuiin,
io xa kunu koio ñayiu xtuu Judea,
jɨʼɨn‑i yuku.
(Te ndeda‑n ka kaʼu tnuʼu yodotnuni yaʼa,
io xa kutnuni ini‑n tnuʼu yaʼa.)
15 Te se yodotuu dɨkɨ veʼe‑s,
maxku nuu‑s xa ndɨu‑s veʼe‑s,
xa tnɨɨ‑s ni ɨɨn.
16 Se kidatniu nuu ñuʼu‑s,
maxku jɨn nujeʼen‑s doo‑s.
17 ¡Naka ndaʼu ñadɨʼɨ ñuʼu daʼya xiʼin ñadɨʼɨ dakadi daʼya kɨu ijan!
18 Kajan taʼu koio‑n nuu Ianyuux,
xa maxku juun dau ndeʼe hora na junu koio‑n.
19 Chi kɨu ijan,
kueʼe xa kueʼe vida yaʼa koio ñayiu.
Nde kiʼna nuu,
na n‑kidavaʼa Ianyuux ntdaa xa io,
xiʼin nde vitna,
nuncas ña n‑kuu xa yaʼa ñayiu kueʼe vida ná yaʼa‑i kɨu ijan.
Ni ma kada ka Ianyuux ɨnka vuelta.
20 Nux ña n‑xaʼnde Xtoʼo‑ro Ianyuux kɨu ijan n‑kuu,
te ma kaku ni ɨɨn ñayiu.
Ko xaxeʼe ñayiu mee‑ia,
ñayiu n‑kaxí dɨɨn‑ia,
xaxeʼe mee‑i,
xá n‑xaʼnde‑ia kɨu ijan.
21 ʼKɨu ijan,
nux jaʼan ɨɨn ñayiu:
“Jira,
yaʼa tuu Cristu”,
a “Jira,
ijan tuu‑ia”,
te maxku jandixa koio‑n xa ka jaʼan‑i.
22 Chi kix koio se dandaʼu ñayiu,
se jaʼan xa mee‑s kuu Cristu,
se jaʼan xa xian tnuʼu‑s tnuʼu Ianyuux nuu ñayiu,
ko ña ndaa.
Kada koio‑s milagru xa dandaʼu‑s ñayiu.
Nux n‑kuaʼa n‑kuu,
dandaʼu‑s nde mee ñayiu n‑kaxí dɨɨn Ianyuux,
ko duʼa ma kuaʼa‑s xa kada‑s.
23 Xijan kuu xa,
koo koio‑n cuedado.
Xá n‑jaʼan‑r nax koo,
antecas xa xetnaʼa.
Ndixi Se kuu ñani tnaʼa ñayiu
24 ʼKɨu ijan,
na yaʼa xa kueʼe xa kueʼe vida yaʼa koio ñayiu,
ijan dada ma ndii ka ngandii,
ma ndii ka yoo.
25 Jungoio chudini nde andɨu,
te nɨʼɨ ntdaa xa io andɨu.
26 Te ijan kundeʼa koio ntdaa ñayiu Se kuu ñani tnaʼa ñayiu.
Ndixi‑ia xiti vikó.
Kundeʼa koio ntdaa ñayiu xa Ia kunxaʼnu ka kuu‑ia,
kundeʼa koio‑i xa taxnuni mee‑ia nuu ntdaa ñayiu ñuñayiu.
27 Te ijan tundaʼa‑ia ángel,
ia ka xinokuechi nuu mee‑ia.
N‑koon lado ñuñayiu,
dataka‑ia ñayiu n‑kaxí dɨɨn Ianyuux.
Nde dɨkɨ ñuñayiu xiʼin nde xeʼe ñuñayiu,
dataka‑ia‑i.
28 ʼIo xa dakuaʼa koio‑n nax dakuaʼa ñaʼa yutnu higo.
Hora nandɨdɨ‑tnu te xe nane ndaʼa yute‑tnu,
xini‑n xa vax nduyatni dau.
San Marcos 13:28-37
29 Mee‑n tuku.
Hora jini koio‑n xa yaʼa nani n‑jaʼan‑r,
io xa kutnuni ini koio‑n xa xá n‑xee kɨu xa jɨn tnaʼa ntdaa xaʼa.
Kuu ná kuu xa xá nujuiin Se kuu ñani tnaʼa ñayiu yeʼe.
30 Xandaa xakuiti jaʼan‑r xa ma kuú koio ñayiu yaʼa,
nde na yaʼa ntdaa xa n‑jaʼan‑r.
31 Vax ndɨʼɨ andɨu xiʼin ñuñayiu,
ko nuncas ma jɨn ndɨʼɨ tnuʼu mee‑r.
32 ʼKo nakɨu,
nahora yaʼa ntdaa xaʼa,
ña xini ni ɨɨn ñayiu.
Ni ángel,
ia ka xinokuechi nuu Ianyuux,
ña ka xini‑ia nakɨu koo.
Ni mee Daʼya Yɨɨ Ianyuux ña xini.
Idini Ianyuux,
meni mee‑ia naʼa nakɨu yaʼa ntdaa xaʼa.
33 ʼXijan kuu xa,
koo koio‑n cuedado.
Kundeʼa vaʼa‑n,
te kajan taʼu naʼi‑n.
Chi ña xini‑n nakɨu yaʼa xaʼa.
34 Kuu ná kuu xa juaʼan xika ɨɨn seyɨɨ.
Antecas xa kee‑s veʼe,
n‑tetutniu‑s se ka xinokuechi nuu‑s.
Nuu dɨɨn n‑tetutniu‑s ɨɨn ɨɨn‑s natniu kada koio‑s.
Se ndee yeʼe,
n‑taʼu tniu‑s xa vaʼa na kundeʼa‑s.
35 Xijan kuu xa kundeʼa vaʼa koio mee‑n.
Chi ña xini‑n nahora ndixi xtoʼo veʼe.
Xañini,
a niu,
a hora kana liʼi,
a neʼe datne.
36 Koo koio‑n cuedado,
nada danaa ndixi‑ia,
te naniʼi ñaʼa‑ia ka kidi‑n.
37 Nani jaʼan‑r nuu mee‑n,
dani jaʼan‑r nuu ntdaa ñayiu.
¡Kundito koio‑n!