N‑jaʼan Jesús xa ndondoo veñuʼu Jerusalén junkoio
24
Ijan dada n‑kee‑ia veñuʼu Jerusalén xa juaʼan‑ia ɨɨn nuu juaʼan‑ia,
te n‑ka xetnaʼa‑da‑ia.
N‑ka daneʼe ndaʼa‑da xa na kundeʼa‑ia veñuʼu xiʼin tɨtnɨ veʼe xndenee tnaʼa xiʼin‑i.
2 Te n‑jaʼan Jesús nuu‑da ntdaa‑da:
—Vaʼa n‑kuaʼa ntdaa xa xndeʼa‑ro ya,
ko xandaa xakuiti ma kava ndodo tnaʼa ka ni ɨɨn yuú n‑kuaʼa veñuʼu yaʼa chi ntdandituʼu junkoio.
3 Te juaʼan koio‑da xiʼin‑ia Yuku Tnu Olivo.
Daa ni kueʼe ñayiu xndijun ñaʼa.
N‑nukoo‑ia ijan te n‑ka xetuʼa‑da‑ia.
N‑ka xijan tnuʼu‑da‑ia:
—Kachitnuʼu ñaʼa‑n na kɨu yaʼa ntdaa xijan.
¿Na seña taxi Taa‑ro Ianyuux xa na kutnuni ini koio‑da xa vax kuyatni kɨu ndixi‑n ñuñayiu,
te naa ñuñayiu?
4 N‑jaʼan Jesús:
—Koo koio‑n cuedado xa maxku dandaʼu ñaʼa se kixi.
5 Kueʼe‑s kixi te jaʼan‑s xa n‑tundaʼa‑r‑sɨ.
Jaʼan‑s:
“Ruʼu kuu Cristu.”
Kueʼe ñayiu dandaʼu koio‑s.
6 Kɨu na teku koio‑n xa jantnaʼa ɨɨn ñuu xiʼin ɨnka ñuu,
te dɨuni teku tnuʼu‑n xa jantnaʼa ɨɨn nación xiʼin ɨnka nación,
maxku ñaʼa chi ini koio‑n.
Maxku kundu ini‑n.
Kiʼna ka io xa yaʼa ntdaa xijan,
ijan dada naa ñuñayiu.
7 Ndandita ɨɨn país nuu ɨnka país.
Jantnaʼa koio soldado ɨɨn se kunxaʼnu xiʼin soldado ɨnka se kunxaʼnu.
Kixi tnama.
Kueʼe vuelta tnaa dava ñuu xndatuu ñuñayiu.
8 Na yaʼa ntdaa xaʼa,
ndaʼu yaʼa koio mee‑n xiʼin dava ka ñayiu ñuñayiu.
Ná yaʼa ñá xajan daʼya yaʼa koio‑n.
9 Kandeka ñaʼa ñayiu jɨʼɨn nuu juxtixia.
Kada uʼu ñaʼa‑s te kaʼni ñaʼa‑s.
Dɨuni jini uʼu ñaʼa ñayiu xaxeʼe xa ka jandixa ñaʼa‑n ruʼu.
10 Tiempu ijan ma kukanu ini ñaʼa ka dava‑n.
Datuu tnaʼa‑n nuu juxtixia te jini uʼu tnaʼa‑n.
11 Tiempu ijan kueʼe se vete kixi.
Jaʼan koio‑s xa kuu‑s se ka jaʼan tnuʼu Ianyuux nuu ñayiu,
ko ña ndaa.
Kueʼe‑n dandaʼu ñaʼa‑s.
12 Xaxeʼe xa yo kuloko ka ñayiu daa,
ma juemani tnaʼa ka dava‑i.
13 Nux dani na kukanu ini ñaʼa‑n xiʼin nux ma kande ini‑n xa kukanu ini ñaʼa‑n,
dakaku ñaʼa‑r.
14 Teku ñayiu nituʼu ñuu tnuʼu‑r na kuaʼa na teku‑i nax io xa kada‑i xa kɨu tnaʼa‑i nuu ñayiu taxnuni Ianyuux nuu‑i.
Tnuʼu vaʼa kuu.
Kiʼna ka daa yaʼa te ijan dada naa ñuñayiu.
15 ʼJini koio‑n xa kineʼe ñayiu ñatu ii ndatniu ii io xiti veñuʼu,
te ma chinuu‑i xa ii xijan.
Jɨn tnaʼa xa n‑chidotnuni Daniel se n‑jaʼan nuu ñayiu xa n‑jaʼan Ianyuux.
16 Ñayiu xtuu Judea kɨu ijan na kunu koio‑i;
jɨʼɨn‑i yuku.
17 Ñayiu iin ndodo dɨkɨ veʼe‑i kɨu ijan,
maxku ndɨu‑i veʼe‑i xa kineʼe‑i xaxii‑i.
18 Ñayiu kidatniu nuu ñuʼu‑i,
maxku nuʼu‑i veʼe‑i xa kineʼe‑i doo‑i.
19 Ndaʼu yaʼa koio ñadɨʼɨ xñuʼu daʼya xiʼin ñadɨʼɨ ka dakadi yɨjɨn kɨu ijan.
20 Kajan taʼu koio nuu Ianyuux xa maxku yaʼa xijan tiempo vixi,
ni kɨu ka ndetatu‑ro
21 chi nux kɨu ijan na yaʼa xaʼa yo ndaʼu ka yaʼa koio ñayiu.
Nde na n‑xe kavatuu ñuñayiu xiʼin nde vitna ñatu uun yaʼa xaʼa.
Na yaʼa xijan,
te ma uu ka duʼa kuu.
22 Nu ma ndadaluchi Ianyuux kɨu ijan n‑kuu,
ni ɨɨn ma yoo kaku,
ko ndadaluchi‑ia kɨu ijan xaxeʼe ñayiu n‑kaxi dɨɨn‑ia xa kaku koio‑i.
23 Tiempu ijan jaʼan koio ñayiu:
“Yaʼa tuu Cristu.”
Jaʼan ɨnka ntuku ñayiu:
“Ijan tuu Cristu.”
Maxku jandixa koio‑n‑yɨ
24 chi kixi se jaʼan xa kuu‑s Cristu xa dandaʼu‑s ñayiu.
Kixi se jaʼan xa se jaʼan tnuʼu Ianyuux nuu ñayiu ka kuu‑s.
Kada Kuiʼna xa kada se ijan kueʼe milagru te kueʼe ñayiu dandaʼu koio‑s nde ñayiu n‑kaxi dɨɨn Ianyuux ku kuu‑s xa dandaʼu‑s,
ko ma ndaku‑s.
25 Kachitnuʼu ñaʼa daʼu ni‑r xa yaʼa.
Kunaʼa koio xa n‑jaʼan‑r nuu‑n.
26 Nux jaʼan ñayiu nuu‑n kɨu ijan,
“Kachitnuʼu ñaʼa‑r xa tuu‑ia nuu ñayo ñayiu io te ñatu nga juun dau”,
maxku jɨʼɨn koio‑n ijan.
A nux na jaʼan ɨnka ñayiu nuu‑n,
“Ɨɨn xiti veʼe yɨvaʼa‑ia”,
maxku jandixa koio‑n‑yɨ
27 chi ma duʼa kada‑r.
Ná kuu xa kee taxa nde nuu kane ngandii te xeyeʼe nde nuu keé ngandii,
daa ku kuu na ndixi ruʼu,
Ia kuu ñayiu.
28 Ná xko yuku ñau nuu katuu ɨɨn kɨtɨ n‑xiʼí,
daa kuyuku koio ñayiu nuu‑r na ndixi‑r.
29 ʼNa yaʼa xa ndaʼu yaʼa ñayiu ntdaa kɨu ijan,
te ijan dada kunee nuu ngandii.
Ma ndii ka yoo.
Junkoio chudini xiʼin ntdaa ka xa io andɨu.
30 ʼIjan dada kada Ianyuux ɨɨn xa ña uun xini ñayiu.
Kueʼe xa kada‑ia andɨu xaxeʼe xa n‑kuyatni kɨu ndixi mee‑r,
Ia kuu ñayiu.
Kundeʼa‑i xa ndixi‑r nuu vikó,
te taxnuni‑r nuu ntaka ñuu ñuñayiu.
Yo ndeʼe ndii‑r.
Ndaʼi ntdantuʼu ñayiu ñuñayiu na jini ñaʼa‑i.
31 Tundaʼa‑r,
ángel,
ia ka xinokuechi nuu‑r,
xa tɨu koio‑ia strompeta xa nadataka‑ia ntdaa ñayiu n‑kaxi dɨɨn Ianyuux.
Nadataka‑ia ntdantuʼu ñayiu io nde nuu keé ngandii xiʼin nde nuu kane ngandii xiʼin nduu lado ka ñuñayiu.
32 ʼXnaʼa‑n xa hora nandɨdɨ tnu higo te ndukuii‑tnu xa vax nduyatni yoo iʼni.
33 Nani ka xini‑n xa vax nduyatni yoo iʼni,
dani jini koio‑n xa vax kuyatni kɨu ndixi‑r na jini‑n xa yaʼa ntdaa xijan chi xijan kuu seña xa daa yaʼa.
34 Xandaa xakuiti ma kuú ndɨʼɨ ñayiu io vitna nde na yaʼa ntdaa xijan.
35 Naa andɨu,
naa ñuñayiu,
ko xa n‑jaʼan‑r ma kuita.
36 ʼÑayo xini na kɨu yaʼa xaʼa,
ni ángel,
ia ka xinokuechi nuu Ianyuux,
ni mee‑r,
Ia kuu Daʼya Yɨɨ‑ia,
ña xini.
Mee ni Taa‑ro Ianyuux naʼa na kɨu daa yaʼa.
37 Nani n‑yaʼa na n‑xo tuu Noé ñuñayiu,
dani yaʼa kɨu na ndixi mee‑r,
Ia kuu ñayiu.
38 Nani n‑yaʼa na n‑kuyatni kɨu n‑ndindodo ndute ñuñayiu,
dani yaʼa kɨu ijan.
N‑ka xo xaxi n‑ka xo xiʼi ñayiu.
N‑ka xo tnundaʼa‑i,
te n‑ka xo datnundaʼa‑i daʼya‑i tiempo ijan.
Ntdaa xijan n‑ka xo kida ñayiu tiempo n‑keé Noé xiti barcu.
39 Ña n‑ka xani ini ñayiu jan xa naa‑i.
Nde kɨu n‑ndindodo ndute nituʼu ñuñayiu dada n‑ka kutnuni ini‑i xa naa koio‑i,
te n‑ka naa‑i ntdaa‑i.
Daa yaʼa ñayiu na ndixi mee‑r,
Ia kuu ñayiu.
40 Tiempu na ndixi‑r,
daa kutuu kaʼnu uu seyɨɨ nuu ñuʼu ka xitu‑s.
Ɨɨn‑s kandeka ñaʼa Ianyuux jɨʼɨn andɨu.
Ɨɨn‑s dandoo‑ia.
41 Uu ñadɨʼɨ ku ndiko kaʼnu.
Ɨɨn‑ña kandeka ñaʼa Ianyuux jɨʼɨn andɨu;
ɨnka‑ña dandoo‑ia.
42 Kunaʼa koio‑n xa ndixi‑r te kundetu ñaʼa‑n chi ña yoo‑n xini na kɨu na hora ndixi ruʼu,
Ia kuu Xtoʼo‑n.
43 Vavaʼa kunini koio xa na jaʼan‑r xa na kutnuni ini koio‑n.
Nu n‑xini ɨɨn seyɨɨ na hora xee ñaduʼu veʼe‑s n‑kuu,
kundito‑s te ma juejoon‑s xa kɨu ñaduʼu jan veʼe‑s xa duʼu‑s xaxii‑s.
44 Xijan kuu xa kada tuʼa koio‑n mee‑n xa koo tuʼa‑n xa jɨʼɨn‑ro andɨu na ndixi‑r chi hora ña xñu ini‑n xa ndixi‑r,
ndixi ruʼu,
Ia kuu ñayiu.
45 ʼKuenda kɨu ɨɨn se yo kaxi ini ka kuu‑n.
N‑xio ɨɨn se yo kaxi ini n‑tetutniu ñaʼa xtoʼo‑s xa taxnuni‑s nuu dava ka se ka xinokuechi nuu‑s.
Vaʼa xinokuechi‑s nuu‑s.
Dɨu se yaʼa dakexio xa kaxi dava ka se ka xinokuechi jan na xee hora.
46 Naka taʼu kuu se ijan hora na naxee xtoʼo‑s chi jini‑s xa n‑kida‑s ntdaa xa n‑taʼu tniu‑s.
47 Tetutniu ñaʼa xtoʼo‑s xa junuu‑s ntdantuʼu xaxii‑s.
Xandaa xakuiti tetutniu ñaʼa‑s.
48 Ko nuxa se xinokuechi nuu‑s yaʼa kuu seloko te jaʼan mee jaʼan ɨɨn‑s:
“Naʼa jɨʼɨn Xtoʼo‑ro,
te kukuee‑s xa nxee‑s.”
49 Kixeʼe‑s xa kani‑s dava ka se ka xinokuechi xiʼin ñá ka xinokuechi nuu xtoʼo‑s,
te kixeʼe‑s kaxi‑s,
koʼo‑s xiʼin se ndeʼe ka xiʼi te xini‑s.
50 Naxee xtoʼo se jan kɨu a hora ña ñu ini‑s xa naxee‑s.
51 Ndeʼe kada uʼu ñaʼa xtoʼo‑s.
Yaʼa‑s na yaʼa se ka kida nga xa vaʼa‑s.
Yo ndeʼe ndaʼi‑s te ndeʼe kiti ini‑s nuu Ianyuux.