Soltera n‑ka xani ini vaʼa xiʼin soltera ñatu n‑ka xani ini vaʼa
25
1-2 ʼNá n‑ka yaʼa uxi soltera ta jini ka seyɨɨ,
daa yaʼa koio ñayiu taxnuni Ianyuux nuu‑i xa dava‑i n‑ka xani ini lilu te dava‑i n‑ka xani ini vaʼa.
Xneʼe soltera jan candil‑yɨ juaʼan nuu nanitnaʼa koio‑i xiʼin noviu.
3 Oʼon dichi n‑ka xani ini lilu,
xneʼe‑i candil‑yɨ juaʼan,
ko ña n‑kaneʼe koio‑i aciti olivo jɨʼɨn xa dandee‑i candil‑yɨ jan.
4 Oʼon dichi n‑ka xani ini vaʼa,
xneʼe‑i aciti olivo xiʼin candil‑yɨ juaʼan.
5 N‑kukuee noviu jan xa xee‑s nuu nanitnaʼa‑s xiʼin dichi ka kuu soltera ya,
te n‑ka kuu nuu‑i xa kidi te n‑ka kidi‑i.
6 Nu n‑kuu niu dava,
dana ini n‑ka kana ñayiu:
“Vaxi noviu.
Na jɨn tnaʼa koio‑ro‑i.”
7 N‑ka ndokoo soltera jan te n‑ka dita‑i nuu xá n‑kayu yuʼa candili‑i.
Te n‑ka natnuu‑i.
8 Dichi n‑ka xani ini lilu,
n‑ka jaʼan‑i nuu dichi n‑ka xani ini vaʼa:
“Taxi koio xaku aciti olivo‑un chi vax ndaʼva candili‑r ɨɨn ɨɨn‑r.”
9 Te n‑ka jaʼan dichi n‑ka xani ini vaʼa:
“Ma taxi koio‑r chi ma kendita xa juetniu‑ro ntdaa‑ro.
Vaʼa ka nuu juaʼan koio nuu kuyaʼu aciti olivo te jueen koio‑un xa juetniu koio‑un”,
ka kuu dichi ijan,
ka xiaʼan‑i.
10 Nɨni juan jueen koio dichi ijan aciti n‑xee noviu jan ijan.
Ndeka‑s soltera n‑ka kida tuʼa aciti jan juaʼan veʼe nuu io viko‑s.
Te n‑nakadɨ‑s yeʼe.
11 N‑ka kukuee soltera n‑ka xani ini lilu xa jɨʼɨn‑i nuu kuu viko.
Nu n‑ka xee‑i ijan n‑ka kana‑i:
“Dito,
Dito,
najaan‑n yeʼe xa na xe kɨu koio‑da.”
12 Te xiaʼan‑s nuu dichi ka kuu soltera jan:
“Ña xini ñaʼa‑r,”
kuu‑s,
n‑xiaʼan‑s.
13 Xa maxku duʼa yaʼa koio‑n kada tuʼa koio‑n mee‑n chi ña ka xini‑n na kɨu,
na hora ndixi‑r.
N‑kakuneʼe Jesús tvini kuu talento
14-15 ʼDɨuni taxnuni Ianyuux ná taxnuni ɨɨn se taxnuni.
N‑kana ɨɨn se taxnuni se ka xinokuechi nuu‑s,
te n‑xiaʼan‑s tvini xa dakanduu koio‑s.
Ɨɨn‑s n‑xiaʼan‑s oʼon talento.
Ɨnka‑s n‑xiaʼan‑s uu talento,
te ɨnka‑s n‑xiaʼan‑s ɨɨn talento.
N‑xiaʼan‑s según janda kuaʼa koio‑s dakanduu‑s tvini.
Ijan dada xika juaʼan‑s.
16 Se n‑niʼi oʼon talento jan,
n‑niʼi ka‑s oʼon talento xa n‑dadɨkɨ‑s xiʼin tvini ijan.
17 Dani n‑kida se n‑tnɨɨ uu talento jan,
te n‑niʼi ka‑s uu talento.
18 Se n‑niʼi ɨɨn talento ni,
tuku n‑kida‑s.
N‑xate‑s ɨɨn yau nuu ñuʼu‑s te n‑chinduxi‑s tvini xtoʼo‑s.
19 Naʼa n‑xeʼen xtoʼo‑s ɨɨn ɨɨn‑s.
Ijan dada n‑naxee‑s xa kada‑s cuenta nuu nadaa tvini n‑ka niʼi koio‑s.
20 Se n‑tnɨɨ oʼon talento jan,
neʼe ka‑s oʼon talento naxee nuu xtoʼo‑s,
te xiaʼan‑s:
“Dito,
na oʼon talento n‑dadɨkɨ‑da yaʼa.
Te yaʼa io oʼon ka talento n‑niʼi‑da.”
21 Xiaʼan xtoʼo‑s nuu‑s:
“Naka vaʼa.
Vaʼa n‑xinokuechi‑n chi vaʼa‑n.
Juini xaku ni tvini n‑yɨndaʼa‑n,
ko xaxeʼe xa vaʼa n‑dakanduu‑n tvini‑r,
kueʼe xa kɨndaʼa‑n.
Na kɨu‑ro veʼe,
te na kaxi na koʼo‑ro,
te kada‑ro xadɨ ini.”
22 Ijan dada n‑xee se n‑tnɨɨ uu talento jan,
te xiaʼan‑s:
“Dito,
na uu talento n‑dadɨkɨ‑da yaʼa,
te yaʼa io uu ka talento n‑niʼi‑da.”
23 Xiaʼan xtoʼo‑s nuu‑s:
“Naka vaʼa.
Vaʼa n‑xinokuechi‑n.
Juini xaku ni tvini n‑yɨndaʼa‑n,
ko xaxeʼe xa vaʼa n‑dakanduu‑n tvini‑r kueʼe xa kɨndaʼa‑n.
Na kɨu‑ro veʼe,
te na kaxi na koʼo‑ro,
te kada‑ro xadɨ ini.”
24 Se n‑tnɨɨ ɨɨn ni talento,
neʼe‑s n‑naxee,
te xiaʼan‑s:
“Dito,
xini‑da xa ma kachi ini‑n.
Nataxtnaʼa‑n xa ña n‑dakeé‑n.
Dɨuni nakueka‑n xa ña n‑dadaʼu‑n.
25 N‑chinduxi‑da tvini‑n chi n‑yuʼu‑da nuu‑n.
Na tvini‑n yaʼa”,
kuu‑s,
xiaʼan‑s.
26 Te n‑jaʼan se kuu xtoʼo‑s jan:
“Lilu‑n.
Ña kuaʼa‑n junukuechi‑n,
te kudi‑n.
Ando xá naʼa xa nataxtnaʼa‑r xa ña n‑dakeé‑r,
te dɨuni nakueka‑r xa ña n‑dadaʼu‑r.
27 ¿Nakuenda ña n‑xe chiʼi‑n tvini‑r bancu xa kɨu na nxee‑r nakueka‑r tvini n‑taxi‑r xiʼin daʼya‑i?”,
kuu‑s,
xiaʼan‑s nuu se xinokuechi jan.
28 Te xiaʼan‑s nuu se xnii yatni:
“Tnɨɨ koio tvini‑s te juñaʼa se n‑xiaʼan‑r oʼon talento
29 chi ñayiu xnevaʼa kueʼe,
kueʼe ka niʼi‑i.
Ñayiu itaʼu nevaʼa,
dita ñayiu ntdaa xa nevaʼa‑i.
30 Se yaʼa xa ña n‑kuaʼa‑s junukuechi‑s nuu‑r,
dajane‑s nuu nee xa nee nuu ndeʼe ndaʼi‑s te ndeʼe kiti ini‑s”,
kuu se kuu xtoʼo jan,
xiaʼan‑s nuu se ijan.
Ndadandaa Ianyuux kuechi ñayiu ñuñayiu
31 ʼNa ndixi ruʼu,
Ia kuu ñayiu,
te ndeʼe ndii‑r te kunukoo‑r silla nuu taxnuni‑r.
Ndixi‑r xiʼin ángel,
ia ka xinokuechi nuu Ianyuux.
32 Nataka koio ntdantuʼu ñayiu nuu‑r te kineʼe dɨɨn‑r ñayiu vaʼa nuu ñayiu loko ná kida ɨɨn ñayiu xa kineʼe dɨɨn‑i tkachi nuu nchiva.
33 Janyuku‑r ñayiu kuu ná kuu tkachi diñi kuaʼa‑r te janyuku‑r ñayiu kuu ná kuu nchiva diñi datni‑r.
34 Ijan dada jaʼan ruʼu,
Ia taxnuni nuu dava ka‑n:
“Ta kindeʼe koio chi n‑kida Taa‑ro Ianyuux xa taʼu kuu koio‑n.
Nu n‑kidavaʼa‑ia ñuñayiu,
n‑kida tuʼa‑ia nuu taxnuni koio‑n.
Xijan kuu taʼu‑n
35 chi n‑ka taxi‑n xa n‑xaxi‑r na n‑kojon‑r.
N‑yichi‑r ndute te n‑ka taxi‑n xa n‑xiʼi‑r.
Ñayiu toʼo n‑kuu‑r te n‑ka jaʼan ñaʼa‑n veʼe‑n.
36 Ñatu daʼma‑r n‑xio te n‑ka taxi‑n daʼma.
N‑kuʼu‑r te n‑ka xo ndeka ñaʼa‑n.
N‑yɨndiʼu‑r vekaa,
te n‑ka xitoniʼni ñaʼa‑n.”
37 Ijan dada jaʼan ndoʼo xiʼin dava ka ñayiu n‑kida Ianyuux xa n‑ka nduu‑n ñayiu ñatu ka xndido xtau kuechi n‑ka kida‑n:
“Ña naʼa‑da xa n‑kojon‑n te n‑taxi‑da xa n‑xaxi‑n.
Ña naʼa‑da xa n‑yichi‑n ndute te n‑taxi‑da xa n‑xiʼi‑n.
38 Ña naʼa‑da xa setoʼo n‑kuu‑n te n‑jaʼan ñaʼa‑da veʼe‑da.
Ña naʼa‑da xa ña n‑xio daʼma‑n te n‑taxi‑da daʼma.
39 Ña naʼa‑da xa n‑kuʼu‑n.
Dɨuni ña naʼa‑da xa n‑yɨndiʼu‑n vekaa te n‑xe kotoniʼni ñaʼa‑da.”
40 Te kachi ruʼu,
Ia taxnuni nuu‑n ntdaa‑n:
“Xaxeʼe xa duʼa n‑ka kida‑n xaxeʼe ñayiu yo n‑ka kundaʼu ndeka‑r,
kuenda kɨu mee‑r n‑ka kida ñaʼa‑n.
Xa ndaa kuu xa jaʼan‑r ya.”
41 ʼÑayiu kunujuiin diñi datni‑r,
Jaʼan‑r nuu‑i:
“Xikojuiin koio.
N‑jaʼan Taa‑r xa jɨʼɨn koio‑n nuu nuʼu koko nɨkava nɨkuita nuu n‑xani ini‑ia xa niʼi Satanás xiʼin ntdaa ángel ndeka‑i taʼu‑i
42 chi n‑kojon‑r te ña n‑taxi‑n xa kaxi‑r.
N‑yichi‑r ndute,
te ña n‑ka taxi‑n xa koʼo‑r.
43 Setoʼo n‑kuu‑r te ña n‑jaʼan ñaʼa‑n veʼe‑n.
Ñatu daʼma‑r n‑xio,
te ña n‑taxi‑n daʼma.
N‑kuʼu‑r te n‑yɨndiʼu‑r vekaa,
ko ña n‑xitoniʼni ñaʼa‑n.”
44 Ijan dada jaʼan koio‑i nuu‑r:
“Ña xnaʼa‑da xa ña n‑chindee ñaʼa‑da hora n‑kojon‑n a n‑yichi‑n ndute a setoʼo n‑kuu‑n a n‑xio vichi‑n a n‑kuʼu‑n,
ni ñatu xnaʼa‑da xa n‑yɨndiʼu‑n vekaa,
te ñatu n‑xe kotoniʼni ñaʼa‑da.”
45 Te jaʼan‑r nuu‑i:
“Xaxeʼe xa ña n‑chindee‑n ni ɨɨn ñayiu,
ni ñayiu ka kundaʼu ka,
kuenda kɨu ña n‑ka chindee ñaʼa‑n.”
46 Dava‑n jɨʼɨn nuu ndaʼu yaʼa koio‑n nɨkava nɨkuita,
ko dava‑n,
jɨʼɨn nuu kutuu koio‑n xiʼin Ianyuux nɨkava nɨkuita chi ka jandixa‑n xa taʼu tniu Ianyuux —kuu Jesús,
n‑jaʼan‑ia nuu‑da ntdaa‑da.