2 —Nani n‑kuu Moisés maestru,

dani ka kuu se ka tuʼa vaʼa tnuʼu n‑chidotnuni‑s xiʼin se fariseu maestru.

3 Xijan kuu xa ntdaa xa taʼu tniu‑s kada koio‑n te jandixa koio‑n‑sɨ,

ko maxku kada‑n xa ka kida‑s chi tuku ka jaʼan‑s xa kada‑s te tuku ka kida‑s.

4 Kuenda kɨu ɨɨn xa yo vee ndido ñayiu kuu xa ka taʼu tniu‑s nuu‑n.

Ka duku‑s xa yo vee jan,

te ka taʼu tniu‑s xa kuido koio‑n,

ko mee‑s ñatu ka xido‑s,

ni xa kajuʼun ɨɨn dɨkɨ ndaʼa‑s xijan ña kuu.

5 Ka kida ndɨka‑s tutu yodotnuni tnuʼu Ianyuux xndenee teʼu‑s.

Ka kida nani ka‑s chate daʼma ka xkuiʼno‑s na xijan taʼu‑s nuu Ianyuux.

Xa na kundeʼa ñaʼa ni ñayiu ka kida‑s xijan.

6 Yo ka tna ini‑s xa kunukoo‑s nuu silla ka xko nukoo ñayiu ndandɨʼɨ hora ka xaxdeʼñu‑s ɨɨn nuu kuu viko.

Yo ndeʼe ka tna ini‑s xa kunukoo yatni‑s nuu ka xko nukoo se jaʼan ndodo nuu ñayiu xyuku xiti veñuʼu kuechi.

7 Yo ka tna ini‑s xa koo ñayiu xañuʼu nuu‑s nuu yaʼu.

Yo ka tna ini‑s xa jaʼan ñayiu nuu‑s:

“Maestru.”

8 Ko ndoʼo,

maxku juejoon koio‑n xa jaʼan ñayiu nuu‑n:

“Maestru”,

chi ñani‑n kuu tnaʼa xiʼin ñayiu ka kukanu ini ñaʼa ruʼu te idii ni maestru‑n io.

9 Maxku jaʼan‑n nuu ɨɨn ñayiu:

“Ndixi kuu Taa ñayiu ñuñayiu”,

chi idii ni Taa‑ro ntdaa‑ro io.

Andɨu tuu‑ia.

10 Maxku juejoon koio‑n xa jaʼan ñayiu:

“Kuu‑n Maestru ñayiu ñuñayiu”,

chi Maestru‑i kuu ñaʼa ruʼu,

Ia kuu Cristu.

11 Se na junukuechi nuu koio‑n ku kuu se ndandɨʼɨ ka.

12 Ñayiu najuen tnuʼu mee‑i,

nduu‑i ñayiu dakuu nga te kujanuu‑i.

Ñayiu xko kida na kida ñayiu dakuu nga,

najuen tnuʼu ñaʼa ñayiu —kuu Jesús,

n‑jaʼan‑ia nuu‑da ntdaa‑da xiʼin nuu ñayiu xyuku ijan.

13-14 Ijan dada xiaʼan‑ia nuu se ka kunxaʼnu:

—Ndaʼu yaʼa koio ndoʼo,

se ka kuu maestru xiʼin se fariseu chi unu loko‑n.

Ka kida nga‑n xa vaʼa‑n.

Ka dadaʼan‑n xa maxku kɨu tnaʼa koio ñayiu nuu ñayiu ka jandixa xa taxnuni Ianyuux nuu‑i.

Juini juini‑i xa kɨu tnaʼa koio‑i nuu ñayiu ijan,

ko ka dadaʼan‑n,

te ni mee‑n ña kɨu tnaʼa koio nuu‑i.

15 ʼNdaʼu yaʼa koio mee‑n,

se ka tuʼa vaʼa ley n‑chidotnuni Moisés xiʼin mee‑n,

se fariseu.

Ka kida nga‑n xa vaʼa‑n.

Ka xeʼen‑n ñuu xndatuu ɨnka lado yuʼu mar xa dakuaʼa koio‑n toʼo xa na jandixa koio‑i ná ka jandixa mee‑n.

Nani ka xeʼen‑n do nuu mar,

dani ka xeʼen‑n do nuu ñuʼu yichi xa dakuaʼa‑n ñayiu ijan.

Ka kida‑n xa kueʼe ka kuechi ka kida ñayiu ka dakuaʼa‑n jan dada mee‑n.

16 ʼNdaʼu yaʼa koio mee‑n chi ka kuu‑n na ka kuu se kuaa xndeka ñayiu juaʼan ɨɨn nuu juaʼan‑i.

Ka jaʼan‑n:

“Ñayiu chinaa xaxeʼe veñuʼu,

ña tuu na tnuʼu vete kuu nux ña xetnaʼa tnuʼu‑i,

juini n‑kida‑i uxi dɨkɨ ndaʼa‑i,

ko ñayiu chinaa xaxeʼe oro io veñuʼu,

nux ña xetnaʼa tnuʼu‑i,

kida‑i kuechi chi vete‑i”,

ka kuu‑n.

17 Ka jaʼan lilu‑n.

Ná kuu ñayiu kuaa ka kuu‑n.

Ndandɨʼɨ ka veñuʼu nuu n‑nduu ii oro jan dada oro io xiti veñuʼu jan.

18 Dɨuni ka jaʼan‑n:

“Ñayiu chinaa xaxeʼe altar veñuʼu,

nux ña xetnaʼa tnuʼu‑i,

ña tuu na kuechi kuu,

juini n‑kida‑i uxi dɨkɨ ndaʼa‑i,

ko nux ka chinaa‑i xaxeʼe kɨtɨ ka doko‑i nuu altar te ña xetnaʼa tnuʼu‑i,

kuechi kuu xijan”,

ka kuu‑n.

19 Ná kuu ñayiu kuaa ka kuu‑n.

Ndandɨʼɨ ka altar nuu n‑nduu ii ntdaa xa n‑ka doko‑n dada ɨɨn xa ka doko‑n chi nuu altar jan n‑nduu ii xijan.

20 Ñayiu ka chinaa altar,

ñadu altar ni ka chinaa‑i hora ka kida‑i uxi dɨkɨ ndaʼa‑i chi dɨuni ka chinaa‑i ntdantuʼu xa ka doko‑i nuu altar.

21 Tuu Ianyuux xiti veñuʼu Jerusalén.

Xijan kuu xa na ka kida ñayiu uxi dɨkɨ ndaʼa‑i xa ka chinaa‑i veñuʼu,

ka kakuneʼe‑i Ianyuux chi ka jaʼan‑i:

“Nandiʼa Ianyuux.”

22 Ñayiu ka chinaa xaxeʼe andɨu,

dɨuni chinaa‑i silla nukoo Ianyuux xa taxnuni‑ia.

Dɨuni ka kakuneʼe ñayiu ijan Ianyuux chi ka jaʼan‑i:

“Nandiʼa Ianyuux.”

23 ʼNdaʼu yaʼa koio mee‑n,

se ka tuʼa vaʼa ley n‑chidotnuni Moisés xiʼin se fariseu.

Ka kida nga‑n xa vaʼa‑n.

Ntnaʼa uxi nuʼne mino castila ka niʼi‑n,

ka najuñaʼa‑n ɨɨn Ianyuux.

Dɨuni daa ka najuñaʼa‑n anís xiʼin comino.

Maxku nujani‑n xa kada‑n xavaʼa yaʼa.

Juini ka kida‑n xavaʼa yaʼa,

ko ña ka jandixa‑n ɨɨn xa ndandɨʼɨ ka.

Ñatu dayaʼa‑n juxtixia ñayiu ka kida kuechi,

te ka kidandaa‑n kuechi ñayiu ña tuu nax kida.

Ñatu ka kundaʼu ini‑n dava ka ñayiu.

Ñatu ka kukanu ini‑n Ianyuux.

Maxku daa ka kada‑n;

jandixa koio xa taʼu tniu‑ia.

24 Ka kuu‑n ná kuu se kuaa xndeka ñayiu juaʼan ɨɨn nuu juaʼan‑s.

Ka chinuu‑n kuechi luchi kuu ná kuu ɨɨn kɨtlavichi luchi ñuʼu nuu ndute kida ɨnka ñayiu.

Ka dakeé niʼni ñayiu ndute ñuʼu kɨtlavichi jan ɨɨn daʼma xa na ñaʼa kojon‑i‑tɨ,

ko ndoʼo,

ñatu dakeé niʼni‑n ndute ñuʼu kɨtɨ kuu camello xa na ñaʼa kojon‑n‑tɨ.

25 ʼNdaʼu yaʼa koio mee‑n,

se ka tuʼa vaʼa ley n‑chidotnuni Moisés xiʼin se fariseu.

Ka kida nga‑n xa vaʼa‑n.

Kuenda kɨu taxa xiʼin koʼo ka kuu‑n.

Io ndoo yata xijan,

ko kuiʼa kaa xa ñuʼu xiti‑i.

Ka duʼu‑n xaxii ñayiu,

te ka kida‑n davaʼa nga xa ka juini mee‑n.

26 Mee‑n,

se fariseu,

ná kuu se kuaa ka kuu‑n.

Kiʼna ka najini‑n xiti koʼo jan xiʼin xiti taxa jan na kuaʼa daa na koo ndoo yata‑i tuku.

27 ʼNdaʼu yaʼa koio mee‑n,

se ka tuʼa vaʼa tnuʼu n‑chidotnuni Moisés xiʼin se fariseu.

Ka kida nga‑n xa vaʼa‑n.

Kuenda kɨu kava nuu xyɨnduxi ndɨyɨ ka kuu‑n.

Nakaʼi ñayiu kava jan te ndukuixi.

Vili kaa yata‑i,

ko kuiʼa kaa xiti‑i chi ñuʼu yɨkɨ ndɨyɨ.

28 Daa ka kuu‑n.

Ka kida nga‑n xa ka kida‑n xavaʼa xa na kundeʼa ñaʼa ñayiu,

ko mee ni xaloko xñuʼu anu‑n.

Ñatu ka jandixa‑n Ianyuux.

29 ʼNdaʼu yaʼa koio mee‑n,

se ka tuʼa vaʼa tnuʼu n‑chidotnuni Moisés xiʼin dava ka se fariseu chi ka kida nga‑n xa vaʼa‑n.

Ka kaan‑n nuu xndaa se n‑ka jaʼan tnuʼu Ianyuux nuu ñayiu.

Ka kidakutu‑n capilla nuu xndaa ñayiu vaʼa.

30 Te ka jaʼan‑n:

“Nu n‑ka xio‑ro tiempo n‑ka xaʼni xixitna‑ro se n‑ka jaʼan nuu ñayiu xa n‑jaʼan Ianyuux,

ma kuatu‑ro xa n‑ka kida‑s.”

31 Xndido tau‑n kuechi‑n xiʼin‑s xaxeʼe xa dɨuni ka xaʼni mee‑n se ka jaʼan tnuʼu Ianyuux nuu ñayiu.

32 Vitna daxinokava koio‑n xa n‑ka kixeʼe‑s xa kada‑s.

33 Daʼya Kuiʼna ka kuu‑n.

Ma kaku‑n na ndadandaa Ianyuux kuechi‑n chi jɨʼɨn koio‑n andea.

34 N‑kuu tɨtnɨ se jaʼan tnuʼu Ianyuux nuu‑n tundaʼa‑r vaxi.

Dɨuni tundaʼa‑r se yo unu kaxi ini xiʼin se ka tuʼa vaʼa tnuʼu n‑chidotnuni Moisés.

Dava‑s kaʼni koio‑n.

Dava‑s katakaa dika‑n.

Dava‑s jani koio‑n chirrión ñɨɨ xiti veñuʼu kuechi‑n.

Dava‑s nkuijun koio‑n ntaka ñuu jɨʼɨn koio‑s.

35 Xaxeʼe xaʼa kundido kutau koio‑n xiʼin xixitna‑n ntdaa ñayiu vaʼa anu n‑ka xaʼni‑s nde tiempo n‑xo tuu Abel xiʼin nde tiempo n‑xo tuu Zacarías,

daʼya yɨɨ Berequías.

Zacarías jan n‑ka xaʼni xixitna‑n meʼñu altar xiʼin veñuʼu.

36 Na jaʼan ndaa‑r xa kundido kutau mee‑n,

ñayiu io vitna ntdaa se ijan —kuu Jesús,

xiaʼan‑ia nuu‑s.

37 Ijan dada n‑nukondeʼa‑ia ñuu Jerusalén.

Te n‑jaʼan‑ia:

—Ndoʼo xa kuu‑n ñayiu Jerusalén,

ka xaʼni‑n se ka jaʼan tnuʼu Ianyuux nuu ñayiu,

te ka jani‑n se n‑tundaʼa ñaʼa Ianyuux yuú.

Naka kueʼe vuelta n‑juini‑r xa kada‑r ná kida chuun xa nadataka‑tɨ daʼya‑t te chiʼi ñaʼa‑t kaʼa ndixi‑t.

Duʼa n‑juini‑r xa kada‑r,

ko ñayo‑n n‑juini.

38 Kunaʼa koio xa mayo ka ñayiu kutuu Jerusalén,

39 ni mayo ka‑n jini ñaʼa nde na xee kɨu jaʼan‑n:

“Naka taʼu Ia n‑natundaʼa ñaʼa Ianyuux xa juan ndixi‑ia ñuñayiu.”

—Kuu‑ia,

xiaʼan‑ia.