2 —Kuenda kɨu ɨɨn se kunxaʼnu kida viko xa tnundaʼa daʼya‑s kuu Ianyuux xa taxnuni‑ia nde andɨu.

N‑xio ɨɨn se n‑kunxaʼnu n‑kida viko xa n‑tnundaʼa daʼya‑s.

3 N‑tundaʼa se ijan se ka xinokuechi nuu‑s xa na jɨn juña tnuʼu‑s ñayiu n‑jaʼan‑s xa xá io hora jɨʼɨn koio‑i viko jan,

ko ñayo‑i n‑ka juini xa jɨʼɨn koio‑i viko‑s.

4 Ijan dada n‑tundaʼa ntuku‑s dava ka se ka xinokuechi nuu‑s xa na juñaʼa koio ntuku‑s ñayiu ijan xa na jɨʼɨn naʼi koio‑i viko tnundaʼa jan.

Dɨuni xiaʼan‑s xa na juñaʼa‑s xa xá io tuʼa ntdandituʼu xa kaxdeʼñu koio‑i.

Dɨuni juñaʼa‑s xa xá n‑xaʼni‑s nkutu naʼnu xiʼin ncerru xndandee.

5 Te duʼa n‑ka xe juña tnuʼu se ka xinokuechi nuu‑s ñayiu ijan,

ko ñayo‑i n‑ka chinuu ntuku.

Nudɨɨn n‑ka kee‑i,

ka xeʼen‑i.

Ɨɨn‑s juaʼan nuu ñuʼu‑s.

Ɨnka‑s juan jueen xa nadiko‑s.

6 Dava ñayiu n‑jaʼan se n‑kunxaʼnu jan,

n‑ka tnɨɨ se ka xinokuechi nuu‑s xa n‑ka kida uʼu ñaʼa‑i te n‑ka xaʼni ñaʼa‑i.

7 Yo n‑kiti ini se n‑kunxaʼnu jan,

te n‑tundaʼa‑s soldado‑s xa na nkaʼni‑s ñayiu n‑ka xaʼni se n‑ka xinokuechi nuu‑s.

Dɨuni n‑ka teñuʼu‑s ñuu‑i.

8 Ijan dada xiaʼan‑s nuu dava ka se ka xinokuechi nuu‑s:

“Xá io tuʼa ndeyu viko tnundaʼa,

ko xaxeʼe xa ñatuka natau xa kixi ñayiu n‑jaʼan‑r viko‑r ma yoo‑i kixi.

9 Juaʼan koio nuu nujuntnaʼa ichi yuʼu ñuu,

te jaʼan koio‑n davaʼa nga ñayiu juntnaʼa xiʼin‑n xa na kixi koio‑i viko tnundaʼa kida‑r”,

kuu‑s,

xiaʼan‑s.

10 Te n‑ka kee se ka xinokuechi nuu‑s;

ka xeʼen‑s.

Xndeka‑s ntdaa ñayiu n‑ka niʼi‑s n‑ka xee,

nuu ñayiu vaʼa,

nuu ñayiu loko,

te n‑chitu veʼe nuu kuu viko tnundaʼa.

N‑ka nukoo ñayiu nuu mexa xa kaxi‑i ndeyu.

11 N‑xo ndeʼa se kunxaʼnu jan ñayiu xtuu nuu mexa‑s,

te n‑chinuu‑s xa ɨɨn se nukoo yumexa‑s,

ñatu niʼno‑s daʼma ka xkuiʼno ñayiu hora ka xeʼen‑i viko tnundaʼa.

12 N‑jaʼan‑s nuu‑s:

“¿Janda n‑kɨkɨu‑n yaʼa xa ña tuu na daʼma viko tnundaʼa niʼno‑n?”,

kuu‑s,

xiaʼan‑s.

Te ña tuu nax n‑jaʼan se ijan.

13 Ijan dada n‑jaʼan se kunxaʼnu jan nuu se ka xinokuechi nuu‑s:

“Duku koio nduu ndaʼa nduu xeʼe‑s,

te jɨn dajane koio‑n‑sɨ nuu nee xa nee.

Ijan ndeʼe ndaʼi‑s te ndeʼe kiti ini‑s nuu Ianyuux”,

kuu se kunxaʼnu jan,

n‑jaʼan‑s.

14 Daa ka kuu ñayiu ka teku tnuʼu Ianyuux.

Kueʼe‑i ka teku tnuʼu‑ia,

ko xaku ni‑i kaxí niʼno‑ia xa kutuu‑i nuu tuu‑ia —kuu Jesús,

xiaʼan‑ia nuu‑s.

15 Ijan dada n‑ka ndee se fariseu xiʼin dutu ka taxnuni xa ka nuʼu koio‑s,

te n‑ka kida ɨnuu‑s janda kada koio‑s xa daka niʼno‑s Jesús.

16 Ijan dada n‑ka tundaʼa‑s se ka dakuaʼa‑s xiʼin se partido Herodes nuu Jesús.

Ka xiaʼan se ijan:

—Maestru,

ka xini‑da xa ndaa jaʼan‑n nuu ntdaa ñayiu te najanu ichi‑n‑yɨ ichi Ianyuux,

te ñatu kaxí‑n ñayiu chi ɨnuu kuu ini vaʼa‑n nuu‑i ntdaa‑i.

17 ¿Nax xani ini‑n?

¿Io vaʼa xa najuñaʼa‑ro tvini nandajan César a ñaʼa u?

—kuu‑s,

ka xiaʼan‑s nuu‑ia.

18 N‑kutnuni ini Jesús xa xaloko ka juini‑s.

Xijan kuu xa xiaʼan‑ia nuu‑s:

—Ka kida nga‑n xa vaʼa‑n.

¿Nakuenda ka xitotnuni ñaʼa‑n?

19 Dandeʼa ñaʼa ɨɨn tvini roma.

Te n‑ka dandeʼa‑s‑ia tvini ijan.

20 Nu n‑xini Jesús tvini jan te n‑xijan tnuʼu‑ia‑s:

—¿Jundu nuu ndenee nuu tvini yaʼa?

¿Jundu dɨu ndenee?

21 Ka xiaʼan‑s:

—Nuu César.

Dɨu César.

Xiaʼan‑ia nuu‑s:

—Ate,

najuñaʼa koio César xa nandajan‑s te juñaʼa koio‑n Ianyuux xa io xa najuñaʼa‑n‑ia.

22 Nu n‑ka teku‑s xaʼa n‑ka yuʼu‑s chi ñatu n‑ka xani ini‑s xa daa jaʼan‑ia.

Te n‑ka dandoo‑s‑ia.

23 Kɨu ijan ni n‑ka xee se saduceu nuu Jesús.

Ka jaʼan se yaʼa nuu ñayiu xa ñayo ndɨyɨ nandoto.

N‑ka jaʼan‑s nuu‑ia:

24 —Maestru,

n‑chidotnuni Moisés:

“Nux na kuú ɨɨn seyɨɨ te ña n‑xio daʼya‑s xiʼin ñadɨʼɨ‑s,

io xa natnundaʼa ñani‑s xiʼin ñadɨʼɨ‑s xa na koo daʼya‑ña xiʼin ñani‑s te kuenda kɨu daʼya se n‑xiʼí jan ku kuu daʼya ijan.”

25 N‑xio ɨɨn se n‑xio uxa tnaʼa ñani‑s.

Sexaʼnu n‑tnundaʼa xiʼin ñadɨʼɨ‑s,

te ñayo na daʼya‑s n‑xio xiʼin‑ña te n‑xiʼí‑s.

N‑natnundaʼa ñadɨʼɨ‑s xiʼin ñani‑s.

26 Daa ni n‑yaʼa ñani‑s.

Daa ni n‑yaʼa ɨnka ñani‑s.

Ntdaa‑s n‑ka tnundaʼa xiʼin ñá ijan,

te n‑ka xiʼí‑s.

27 Ijan dada ndijun nga mee‑ña n‑xiʼí.

28 ¿Ndeda ɨɨn‑s ñadɨʼɨ ku kuu‑ña na nandoto ñayiu n‑ka xiʼí?,

chi ntdaa‑s n‑kuu yɨɨ‑ña —ka kuu‑s,

n‑ka xijan tnuʼu‑s Jesús.

29 Xiaʼan Jesús nuu‑s:

—Ka jaʼan lilu‑n.

Ña ka xini‑n tnuʼu Ianyuux xyodotnuni,

ni ña ka xini‑n nax kuaʼa Ianyuux xa kada‑ia.

30 Na xee kɨu nandoto ñayiu n‑ka xiʼí io xa kutuu andɨu ma datnundaʼa tnaʼa‑i,

ni ma kuú‑i ɨnka vuelta chi kutuu koio‑i ná xtuu ángel,

ia ka xinokuechi nuu Taa‑ro Ianyuux andɨu.

31 Tnuʼu Ianyuux yodotnuni kakuneʼe xa ndaa xa nandoto ñayiu n‑ka xiʼí.

¿Ñatu n‑ka kaʼu‑n xijan u?

Duʼa yodotnuni:

32 “Kuu‑r Ianyuux Abraham,

kuu‑r Ianyuux Isaac,

kuu‑r Ianyuux Jacob.”

Ñatu ndeka‑ia ndɨyɨ chi ndeka‑ia ñayiu xndito —kuu‑ia,

xiaʼan‑ia.

33 N‑ka teku ñayiu xyuku ijan tnuʼu‑ia te n‑ka yuʼu anu‑i xa daa n‑jaʼan‑ia.

34 N‑xaʼnu Jesús tnuʼu se saduceu te ña n‑ka jaʼan ka‑s.

Nu n‑ka teku se fariseu xijan,

te n‑ka nataka‑s nuu Jesús.

35 Abogado kuu ɨɨn‑s.

Se kuu abogado jan n‑xijan tnuʼu‑ia ɨɨn xa n‑xijan tnuʼu‑s‑ia xa kototnuni‑s‑ia.

36 Xiaʼan‑s:

—Maestru,

¿ndeda ɨɨn ley Ianyuux ndandɨʼɨ ka?

37 Te n‑jaʼan‑ia nuu‑s:

—Io xa juemani koio‑n Ianyuux,

Ia kuu Xtoʼo‑n,

xiʼin nde yɨkɨ,

nde tuchi‑n.

38 Ley yaʼa ndandɨʼɨ ka.

39 Ɨnka ley ndandɨʼɨ kuu xaʼa:

“Io xa juemani koio‑n ñanitnaʼa‑n ná ka xemani‑n mee‑n.”

40 Nux na jandixa koio‑n nduu ley Ianyuux yaʼa,

ndaku‑n xa jandixa koio‑n ntdantuʼu ley n‑chidotnuni Moisés xiʼin ntdantuʼu xa n‑chidotnuni se n‑ka jaʼan tnuʼu Ianyuux nuu ñayiu —kuu Jesús.

41 Ijan dada n‑xijan tnuʼu‑ia dava ka se fariseu n‑ka nataka nuu‑ia:

42 —¿Jundu kuu Cristu ka xani ini‑n?

¿Jundu daʼya dana kuu‑ia?

Ka xiaʼan‑s nuu Jesús:

—Daʼya dana David kuu‑s.

43 Xiaʼan‑ia nuu‑s:

—N‑jaʼan David xa Xtoʼo‑s kuu Cristu na n‑keé ñaʼa Espíritu Ianyuux.

¿Ñatu ke ini koio‑n nax n‑kutnuni ini‑s na daa n‑jaʼan‑s a?

Duʼa n‑chidotnuni‑s:

46 Ni ɨɨn tnuʼu ñayo ka‑s n‑ka jaʼan nuu‑ia.

Ñayo ka‑s n‑kuyɨɨ xa kajan tnuʼu‑s‑ia.