N‑kɨu Jesús Jerusalén
21
N‑ka kuyatni‑da xiʼin Jesús Jerusalén xiʼin ñuu nani Betfagé.
Katuu ñuu jan Xeyuku Tnu Olivo.
Ijan n‑tundaʼa‑ia uu se dakuaʼa‑ia juaʼan ijan.
2 Xiaʼan‑ia nuu‑s nduu‑s:
—Juaʼan koio ñuu ndeʼa ñaʼa yaʼa.
Na kɨu koio‑n ñuu ijan jini koio‑n ɨɨn burra ndijun io daʼya.
Nandaxi koio‑n‑tɨ te kandeka‑n‑tɨ kixi.
3 Nux jundu jaʼan:
“¿Nakuenda xa daa ka kida‑n?”,
te juñaʼa koio‑n:
“Ia kuu Xtoʼo‑ro,
ndoñuʼu kɨt yaʼa,
te natundaʼa‑ia‑tɨ ndixi nunuu ka” —kuu Jesús,
xiaʼan‑ia.
4 Duʼa n‑xetnaʼa xa n‑jaʼan Ianyuux nuu se n‑jaʼan nuu ñayiu xa n‑jaʼan Ianyuux.
N‑chidotnuni‑s:
5 Juaʼan koio Sión,
te juñaʼa‑n nuu ñayiu ijan:
“Kundeʼa xa vaxi se taxnuni nuu‑n.
Kuu‑s ná kuu ñayiu kundaʼu kukee chi daʼya ɨɨn burra yodo‑s vaxi.”
6 Ijan dada juaʼan‑s nduu‑s,
te n‑ka kida‑s ná n‑taʼu tniu‑ia.
7 Xndeka‑s burra xiʼin daʼya‑tɨ n‑ka naxee nuu Jesús.
N‑ka xajan‑s daʼma‑s yata‑tɨ,
te n‑ka dakaa‑s‑ia‑tɨ.
8 Kueʼe ñayiu n‑ka taka ijan.
Dava‑i n‑ka xajan daʼma‑i ichi xa jɨn ndodo burru yodo‑ia jan;
dava ka‑i n‑ka xaʼnde daʼnda yutnu te n‑ka xajan‑i‑tnu ichi juaʼan‑ia.
9 N‑ka kana ñayiu xndijun ñaʼa xiʼin ñayiu xndodo nuu nuu‑ia:
Na ndadakaʼnu‑ro daʼya dana David.
Naka taʼu se n‑tundaʼa ñaʼa Ianyuux xa vaxi‑s.
Na ndadakaʼnu‑ro Ianyuux,
Ia taxnuni nuu ntdaa ñayiu.
10 Nu n‑ka kɨu‑da xiʼin‑ia Jerusalén kueʼe ka ñayiu n‑ka taka xa kundeʼa‑i nax yaʼa,
te ndeʼe ka kuvaa‑i.
Ka xijan tnuʼu tnaʼa‑i:
—¿Jundu kuu se yaʼa?
11 Ka xiaʼan ñayiu xndijun ñaʼa:
—Se yaʼa kuu Jesús.
Se Nazaret kuu‑s.
Se distrito Galilea kuu‑s.
Se kachi tnuʼu ñaʼa xa n‑jaʼan Ianyuux kuu‑s —ka kuu‑i,
ka xiaʼan‑i.
N‑xijun Jesús ñayiu ka najueen ka nadiko xyuku nukeñuʼu Jerusalén
12 N‑kɨu Jesús veñuʼu Jerusalén,
te n‑xijun‑ia se ka najueen ka nadiko xtuu nukeñuʼu jan.
N‑ngoneʼe‑ia mexa ka xetniu se ka nadama tvini ñayiu ka xeʼen ijan.
Dɨuni n‑ngoneʼe‑ia silla se ka diko data.
13 Te n‑jaʼan‑ia nuu‑s:
—Yodotnuni tnuʼu Ianyuux:
“Veñuʼu nuu io xa kajan taʼu ñayiu nuu‑r kuu veñuʼu yaʼa,
te veʼe‑r kuu.”
Dɨuni yodotnuni tnuʼu‑ia:
“Ka xetniu‑n veʼe Ianyuux ná ka xetniu ñaduʼu yau kava.”
—Kuu‑ia.
14 N‑ka xee ñayiu kuaa xiʼin ñayiu ka xika yakua veñuʼu jan,
te n‑ndadavaʼa‑ia‑i.
15 N‑ka xini dutu ka kunxaʼnu xiʼin se ka tuʼa vaʼa ley n‑chidotnuni Moisés xa n‑kida Jesús kueʼe milagru.
Dɨuni xa n‑ka teku‑s xa ka kana sekuechi xiti veñuʼu jan:
“Na ndadakaʼnu‑ro Ia kuu daʼya dana David.”
Xijan kuu xa n‑ka kiti ini‑s.
16 Te n‑ka jaʼan‑s nuu Jesús:
—¿Ña teku‑n xa ka kana sekuechi yaʼa u?
Te n‑jaʼan Jesús:
—Joon,
teku‑r.
¿Ñayo‑n n‑ka kaʼu nuu yodotnuni xa:
“Ndadakaʼnu ñaʼa koio sekuechi xiʼin dichi kuechi xiʼin daʼya ka xadi a”?
17 Te n‑dandoo‑ia‑s.
Ijan dada n‑ka ndee‑da xiʼin‑ia Jerusalén.
Juaʼan‑da xiʼin‑ia ñuu Betania,
te n‑ka ndoo‑da xiʼin‑ia ijan.
Tnu higo ñatu n‑juun ndeʼa
18 Neʼe datne kɨu kuu uu n‑ka ngondita ntuku‑da xiʼin‑ia Jerusalén te n‑kojon‑ia.
19 N‑xini‑ia ɨɨn tnu higo yu ichi te n‑xe tuʼa‑ia‑tnu.
Ni ɨɨn higo ñatu n‑niʼi‑ia chi ñatu n‑juun.
Xijan kuu xa n‑jaʼan‑ia nuu‑tnu:
—Ma uun ka juun higo‑n.
Te danaa n‑yichi‑tnu.
20 Nu n‑ka xini daña,
se dakuaʼa ñaʼa‑ia xa n‑yaʼa,
te n‑ka yuʼu anu‑da.
Te ka xiaʼan‑da:
—Naka yachi n‑yichi‑tnu.
21 Te n‑jaʼan Jesús nuu‑da ntdaa‑da:
—Xandaa xakuiti xa nux idii vuelta na kukanu ini‑n Ianyuux te ma jɨn tnɨɨ anu‑n,
ñadu mee ni xa n‑kida‑r tnu higo kuaʼa‑n xa kada koio‑n chi nux na juñaʼa koio‑n tnduu yaʼa:
“Xiko juiin.
Juan keé nuu mar”,
te daa kuu.
22 Davaʼa nga xa kajan‑n nuu Ianyuux taxi‑ia nux idii vuelta n‑ka kukanu ini‑n‑ia —kuu Jesús,
n‑jaʼan‑ia.
N‑ka xijan tnuʼu se Israel Jesús nuu jundu n‑tetutniu ñaʼa
23 N‑kɨu‑ia veñuʼu Jerusalén te n‑dakuaʼa‑ia ñayiu.
Nɨni dakuaʼa‑ia‑i n‑ka xee dutu ka taxnuni xiʼin sexaʼnu ka taxnuni nuu ñayiu Israel.
Te n‑ka xijan tnuʼu‑s‑ia:
—¿Jundu n‑tetutniu ñaʼa xa kada‑n xa kida‑n?
¿Jundu n‑taxtutniu ñaʼa xa kida‑n xaʼa?
24 N‑jaʼan Jesús nuu‑s:
—Dani ruʼu,
na kajan tnuʼu ñaʼa‑r ɨɨn xa kajan tnuʼu ñaʼa‑r.
Nux na jaʼan‑n nuu‑r xa kajan tnuʼu ñaʼa‑r te jaʼan‑r nuu‑n jundu n‑tundaʼa ñaʼa xa duʼa kida‑r.
25 ¿Jundu n‑tetutniu Sua xa n‑dajuendute‑s ñayiu?
¿N‑tetutniu ñaʼa Ianyuux a n‑tetutniu ñaʼa ñayiu a?
—kuu‑ia,
xiaʼan‑ia nuu‑s.
Te n‑ka ndatnuʼu‑s.
Ka xiaʼan tnaʼa‑s:
—Nux na juñaʼa‑ro “Ianyuux n‑tetutniu ñaʼa”,
te kachi‑s nuu‑ro:
“¿Nakuenda ña n‑ka jandixa‑n‑sɨ?”
26 Xa maxku ndandita ñayiu xyuku yaʼa nuu‑ro maxku jaʼan‑ro nuu‑s xa ñayiu n‑tetutniu Sua,
chi ntdantuʼu ñayiu ka jandixa xa Sua n‑kuu se n‑jaʼan tnuʼu Ianyuux nuu ñayiu —kuu‑s,
ka xiaʼan tnaʼa‑s.
27 Te ka xiaʼan‑s nuu‑ia:
—Ña ka xini‑r.
Xiaʼan ntuku‑ia:
—Dani ruʼu ma jaʼan‑r jundu n‑tetutniu ñaʼa xa duʼa kada‑r.
N‑kakuneʼe Jesús uu daʼya yɨɨ ɨɨn se n‑xo xitu uva
28 Te xiaʼan‑ia ɨnka xa xiaʼan‑ia nuu‑s:
—N‑xio ɨɨn se n‑xio uu daʼya yɨɨ.
N‑jaʼan‑s nuu ɨɨn‑s:
“Juan kadatniu ndoʼo nuu ñuʼu tnu uva‑r vitna.”
29 Te xiaʼan se ijan nuu taa‑s:
“Ñaʼa,
ma nkadatniu‑da ijan.”
Juini daa n‑jaʼan‑s,
ko n‑natu ini‑s te n‑xe kadatniu naʼi‑s.
30 Dani n‑jaʼan‑s nuu ɨnka daʼya yɨɨ‑s.
N‑jaʼan se ijan nuu taa‑s:
“Joon,
Tata,
na jɨʼɨn‑da”,
kuu‑s,
xiaʼan‑s,
ko ña n‑xeʼen‑s.
31 ¿Nax ka kachi‑n?
¿Ndeda ɨɨn‑s n‑kida xa n‑juini taa‑s?
—kuu Jesús.
Ka xiaʼan‑s:
—Se kiʼna ka n‑teku xa n‑jaʼan taa‑s.
Xiaʼan Jesús nuu‑s:
—Na jaʼan ndaa‑r xa kueʼe ka se ka xijan tvini nandajan gobierno xiʼin ñadɨʼɨ ka diko mee‑ña kɨu tnaʼa nuu ñayiu ka jandixa xa taxnuni Ianyuux nuu‑i dada ndoʼo.
32 N‑jaʼan Sua nuu‑n nax io xa jandixa‑n xa maxku kundido kutau ka‑n kuechi n‑ka kida‑n.
N‑ka jandixa se ka xijan tvini nandajan gobierno xiʼin ñadɨʼɨ diko mee‑ña xijan,
ko mee‑n ñaʼa.
Juini n‑ka teku‑n xijan,
ña n‑ka natu ini‑n xa n‑ka kida‑n kuechi ni ña n‑ka jandixa‑n xa n‑jaʼan‑s.
Se loko n‑ka xo xitu ñuʼu tnu uva ɨɨn se kuu xtoʼo ñuʼu
33 ʼKunini koio ɨnka ntuku tnuʼu kandee na jaʼan‑r.
N‑xio ɨɨn se n‑dandee tnu uva nuu ñuʼu‑s.
N‑xani‑s yuʼa xa n‑chikurali‑s ñuʼu tnu uva jan.
N‑kidavaʼa‑s ɨɨn nuu kiʼni‑s ndudi uva jan.
Dɨuni n‑kidavaʼa‑s ɨɨn veʼe dujun.
Te n‑xiaʼan‑s ñuʼu‑s se kundee xiʼin‑s tnu uva jan.
Ijan dada juaʼan‑s ɨɨn nuu xika.
34 N‑xee yoo xichi uva,
te n‑tundaʼa‑s se ka xinokuechi nuu‑s xa na jɨn nukaʼnde dava‑s xiʼin se xndee xiʼin‑s tnu uva uva n‑juun jan.
35 Nu n‑ka xee‑s ijan,
te n‑ka tnɨɨ ñaʼa se xndee xiʼin‑s tnu uva jan.
N‑ka jani‑s dava‑s.
Dava‑s n‑ka xaʼni ñaʼa‑s.
Dava‑s n‑ka jani‑s yuú.
36 Ijan dada n‑tundaʼa se kuu xtoʼo ñuʼu jan kueʼe ka ntuku se ka xinokuechi nuu‑s dada xakiʼna nuu te dani n‑ka kida ñaʼa se xndee xiʼin‑s tnu uva jan.
37 Ndijun nga n‑tundaʼa‑s daʼya yɨɨ‑s xa na jɨʼɨn‑s nuu se ijan xa na kaʼnde‑s xiʼin‑s uva jan,
te n‑jaʼan mee n‑jaʼan ɨɨn‑s:
“Koo koio‑s xañuʼu nuu daʼya yɨɨ‑ro.”
38 Nu n‑ka xini se xndee xiʼin‑s tnu uva jan xa n‑kuyatni daʼya yɨɨ‑s ijan,
te ka xiaʼan tnaʼa‑s:
“Dɨu‑s kendoo xiʼin ñuʼu taa‑s.
Neʼe koio na kaʼni‑ro‑s na kuaʼa na ndoo‑ro xiʼin taʼu‑s.”
39 Te n‑ka kineʼe ñaʼa‑s yuʼu ñuʼu tnu uva jan,
te n‑ka xaʼni ñaʼa‑s.
40 Na nangondita xtoʼo ñuʼu tnu uva jan,
¿Nax kada‑s se xndee xiʼin‑s tnu uva jan?
—kuu Jesús,
xiaʼan‑ia.
41 Te ka xiaʼan dutu ka taxnuni xiʼin sexaʼnu ka kunxaʼnu n‑ka xee ijan:
—Kaʼni‑s se unu loko ijan.
Ma kundaʼu ini‑s‑sɨ.
Juñaʼa ntuku‑s ñuʼu‑s ɨnka se kundee xiʼin‑s tnu uva jan.
Se ijan na kaʼnde dava xiʼin‑s uva yoo tnɨɨ koio‑s —kuu‑s,
ka xiaʼan‑s nuu Jesús.
42 Te xiaʼan‑ia nuu‑s:
—¿Ta kaʼu koio ka‑n tnuʼu Ianyuux duʼa yodotnuni a?:
Ná kuu yuú ña xe ini se ka kidavaʼa veʼe kuu‑s.
Yuú ña n‑ka xe ini se ijan n‑ndunuu yɨtnɨɨ nama veʼe.
N‑kida Ianyuux,
Ia kuu Xtoʼo‑ro,
xa na jini‑ro xa ña uu n‑xini‑ro.
43 Xaxeʼe xa duʼa yaʼa ma taxnuni koio ka‑n nuu ñayiu ka jandixa xa taxnuni Ianyuux nuu‑i,
te kada‑r xa ñayiu ña ka kuu ñayiu Israel taxnuni nuu ñayiu kɨu tnaʼa nuu ñayiu ka jandixa xa taxnuni Ianyuux nuu‑i.
Ñayiu ijan kada xa taʼu tniu‑r.
44 Ñayiu na jungava ndodo nuu yuú ijan,
kukuechi‑i,
te nux junkava ndodo ñaʼa yuú jan,
dandiʼi ñaʼa‑i —kuu Jesús,
xiaʼan‑ia.
45 Nu n‑yaʼa n‑ka xo nini dutu ka kunxaʼnu xiʼin se fariseu tnuʼu ijan,
te n‑ka kutnuni ini‑s xa dɨu‑s n‑kakuneʼe ñaʼa Jesús.
46 Te n‑ka nduku ini‑s xa tnɨɨ‑s‑ia te kandeka‑s‑ia jɨʼɨn nuu juxtixia xa tekuechi neñuu‑s‑ia,
ko n‑ka yuʼu‑s nuu ñayiu xyuku ijan chi ka jandixa‑i xa tnuʼu Ianyuux jaʼan‑ia.