Io xa taxkanu ini‑ro ñayiu n‑kida ñaʼa ɨɨn xa n‑kida ñaʼa‑i
17
Ijan dada xiaʼan Jesús nuu ñayiu dakuaʼa‑ia:
—Xandaa xakuiti kixi ñayiu kada xa kada ɨnka ñayiu kuechi.
Naka ndaʼu yaʼa‑i.
2 Vaʼa ka nuu na kudukundee ɨɨn yodo molino dujun ɨɨn ñayiu daa kada te dakekava ñaʼa ɨnka ñayiu nuu mar te kuú‑i dada xa kada‑i xa kada ɨɨn seluchi yɨtnaʼa nuu ñayiu xyuku yaʼa kuechi.
3 ʼKani ini vaʼa koio nax kada‑n.
Nux kida ñaʼa ɨɨn ñayiu jandixa Ianyuux ɨɨn xa kida ñaʼa‑i kanandee‑n‑yɨ.
Nux natu ini ñayiu jan xa n‑kida‑i kuechi,
taxkanu ini‑n‑yɨ.
4 Juini uxa vuelta ɨɨn kɨu na kada ñaʼa ñayiu jan ɨɨn xa kada ñaʼa‑i,
ko nux na jaʼan‑i nuu‑n:
“Taxkanu ini‑n xa n‑kida ñaʼa‑da.
Natu ini‑da xa daa n‑kida ñaʼa‑da.
Ma duʼa ka kada‑da”,
te taxkanu ini‑n‑yɨ —kuu Jesús,
xiaʼan‑ia.
Desdicha Hacia Aquellos que Hagan Pecar a Otros
5 Ijan dada ka xiaʼan se dakuaʼa‑ia:
—Dito,
kada‑n xa kukanu ini koio ka‑da Ianyuux.
6 Te xiaʼan Jesús,
Ia kuu Xtoʼo‑ro,
nuu‑s:
—Nux kukanu ini‑n Ianyuux,
juini itaʼu lii kukanu ini‑n‑ia nani kuu ɨɨn ndɨjɨn maxtaxa,
juñaʼa‑n nuu tnuneñu yaʼa:
“Ta kane te ndeé‑n nuu mar”,
te jandixa ñaʼa‑tnu.
7 ʼNux n‑kidatniu ɨɨn se xinokuechi nuu‑n xiʼin nkutu‑n a n‑xeʼen‑s kuʼu xiʼin tkachi‑n te n‑naxee‑s te n‑ndɨu‑s veʼe‑n,
mayo‑n juñaʼa nuu‑s:
“Yachi.
Neʼe.
Nkoo nuu mexa xa kaxdini‑n.”
8 Mayo‑n jaʼan duʼa chi juñaʼa‑n nuu‑s:
“Kada tuʼa mee‑n xa kadavaʼa‑n xa kax xa koʼo‑r.
Na yaʼa xa kaxi‑r,
te kaxi‑n.”
9 Ma jaʼan‑n xa n‑kutaʼu‑n nuu se ijan xaxeʼe xa n‑kida‑s xa n‑taʼu tniu‑n.
10 Dani hora na kada‑n tniu Ianyuux,
te hora na daxinokava‑n ntdaa xa n‑taʼu tniu‑ia nuu‑n,
te juñaʼa tnaʼa koio‑n:
“Ñatu n‑ka xinokuechi vaʼa‑ro chi diko ni xa io xa kada‑ro,
xijan ni n‑ka kida‑ro chi io ka tniu‑ia kada‑ro n‑kuu.”
Kachi koio‑n —kuu Jesús,
xiaʼan‑ia.
N‑ndadavaʼa Jesús uxi se ka tnaʼa kueʼe teʼyu ñɨɨ
11 N‑tnɨɨ ntuku‑ia ichi juaʼan Jerusalén.
N‑yaʼa‑ia Galilea xiʼin Samaria.
12 N‑kɨu‑ia ɨɨn ñuu luchi.
Ijan n‑xe juntnaʼa‑ia xiʼin uxi se ka tnaʼa kueʼe teʼyu ñɨɨ.
Xika xnii‑s.
13 Xee n‑ka kana‑s.
Ka xiaʼan‑s nuu Jesús:
—Maestru,
kundaʼu ini ñaʼa‑n.
14 Nu n‑xini‑ia‑s,
n‑jaʼan‑ia nuu‑s:
—Juaʼan.
Dandeʼa koio‑n mee‑n dutu xa na jini koio‑s xa n‑ka ndvaʼa‑n.
Nɨni juaʼan koio‑s n‑ka ndvaʼa‑s.
15 Nu n‑xini ɨɨn‑s xa n‑ndvaʼa‑s,
te n‑xiko‑s,
te xee n‑kana‑s.
Xee n‑nakuetu‑s nuu Ianyuux.
16 Te n‑naxee‑s nuu Jesús.
N‑xe juiin xiti‑s xeʼe‑ia te xiaʼan‑s nuu‑ia xa n‑kutaʼu‑s.
Se Samaria kuu‑s.
17 Xiaʼan Jesús nuu ñayiu xyuku ijan:
—¿Ñadu uxi‑s n‑ka n‑ndvaʼa u?
¿Nde io ka ɨɨ́n‑s?
18 Ñayo‑s n‑ka xiko xa jaʼan‑s nuu Ianyuux xa n‑ka kutaʼu‑s.
Mee ni se toʼo yaʼa n‑xiko —kuu Jesús,
xiaʼan‑ia.
19 Te xiaʼan Jesús nuu se n‑nangondita:
—Ndojuiin te juan nuʼu.
Xaxeʼe xa kukanu ini‑n Ianyuux n‑ndvaʼa‑n.
Kachitnuʼu ñaʼa Jesús xa taxnuni Ianyuux
20 Nu n‑xika kɨu,
te n‑ka xijan tnuʼu se fariseu Jesús nakɨu tundaʼa Ianyuux se taxnuni nuu‑s.
Te n‑jaʼan Jesús nuu‑s:
—Ñadu ɨɨn xa ndeʼa‑ro kuu nuu taxnuni Ianyuux.
21 Hora na kakuneʼe ñayiu xa taxnuni Ianyuux,
ma jaʼan‑i:
“Kundeʼa koio xa yaʼa tuu se taxnuni nuu‑ro.”
Dɨuni ma jaʼan koio‑i:
“Ijan tuu se taxnuni nuu‑ro”,
chi anu ñayiu kuu nuu taxnuni Ianyuux.
22 Te xiaʼan Jesús nuu ñayiu dakuaʼa‑ia:
—Xee kɨu ku kuu anu‑n xa kundeʼa koio‑n xa taxnuni ruʼu,
Ia kuu ñayiu,
ko ma kuu xa jini ñaʼa koio‑n.
23 Te jaʼan ɨɨn ñayiu:
“Ijan taxnuni‑ia.”
“Yaʼa taxnuni‑ia”,
kachi ɨnka ñayiu.
Maxku nkuitandijun‑n‑yɨ
24 chi ma duʼa yaʼa chi na kuu xa xeyeʼe taxa nde xeʼe andɨu xiʼin nde ɨnka xeʼe andɨu,
ku kuu na ndixi ruʼu,
Ia kuu ñayiu,
25 ko ta xee ka kɨu chi kiʼna nuu io xa ndeʼe kada uʼu ñaʼa ñayiu io vitna,
te io xa jaʼan‑i xa ña ndoñuʼu ñaʼa‑i.
26 Ná n‑yaʼa na n‑xo tuu Noé ñuñayiu yaʼa kɨu na ndixi ruʼu,
Ia kuu ñayiu.
27 N‑ka xo xaxi ñayiu.
N‑ka xo xiʼi‑i te n‑ka xo datnundaʼa tnaʼa‑i tiempo ijan.
Ntdaa xijan n‑ka kida‑i nde kɨu n‑kɨu Noé xiti barcu.
Daa n‑ndindodo ndute nituʼu ñuñayiu,
te n‑ka naa ntdandituʼu ñayiu ijan.
28 Dani n‑yaʼa Sodoma tiempo n‑xo tuu Lot.
N‑ka xo xaxi ñayiu kɨu ijan.
N‑ka xo xiʼi‑i.
N‑ka xo xeen‑i.
N‑ka xo diko‑i.
N‑ka xo xitu‑i ñuʼu.
N‑ka xo kidavaʼa ñayiu n‑ka xio kɨu ijan veʼe du.
29 Kɨu n‑kee Lot Sodoma n‑juun ñuʼú xiʼin azufri nde andɨu,
te n‑ka naa ntdandituʼu ñayiu ñuu ijan.
30 Daa kuu na ndixi ruʼu,
Ia kuu ñayiu.
31 Ñayiu iin ndodo dɨkɨ veʼe‑i kɨu ijan,
maxku ndɨu‑i veʼe‑i xa kineʼe‑i xaxii‑i.
Ñayiu kidatniu nuu ñuʼu‑i,
maxku nuʼu‑i veʼe‑i xa kineʼe‑i xaxii‑i.
32 Maxku ndunaa koio‑n xa n‑yaʼa ñadɨʼɨ Lot.
33 Dani ndoʼo,
nux diko ni mee ni‑n xemani‑n,
dakuita‑n anu‑n.
Nux juñaʼa‑n vida‑n nuu tniu Ianyuux,
kutuu‑n nɨkava nɨkuita xiʼin‑ia.
34 Xakuaa ijan kava kaʼnu uu ñayiu ɨɨn ni xito.
Ɨɨn‑i kandeka ñaʼa Ianyuux jɨʼɨn.
Ɨɨn‑i dandoo‑ia.
35-36 Kɨu ijan ku ndiko tayu uu ñadɨʼɨ.
Ɨɨn‑ña kandeka ñaʼa Ianyuux jɨʼɨn andɨu.
Ɨnka‑ña dandoo‑ia —kuu‑ia,
xiaʼan‑ia.
37 Nu n‑ka teku ñayiu xijan,
te n‑ka xijan tnuʼu‑i‑ia:
—¿Ndexu yaʼa xaʼa,
Dito?
Te xiaʼan‑ia nuu‑i:
—Ná ka xko yuku ñau nuu katuu ɨɨn kɨtɨ n‑xiʼí,
daa kuyuku koio ñayiu nuu‑r na ndixi‑r —kuu‑ia,
xiaʼan‑ia.