Ɨɨn se yo mii xa n‑kida‑s
16
Ijan dada n‑jaʼan ka Jesús tnuʼu yaʼa nuu se dakuaʼa‑ia.
Xiaʼan‑ia:
—N‑xio ɨɨn se n‑yɨndaʼa xaxii ɨɨn se kuika.
N‑kutnuʼu xa xidoyaʼu‑s xaxii se kuika jan juaʼan chi ña n‑yɨndaʼa vaʼa‑s.
2 Nu n‑teku se kuika jan,
te n‑kana ñaʼa‑s.
Xiaʼan‑s:
“N‑teku‑r xa kida‑n.
Jaʼan nuu‑r nde n‑kida‑n tvini‑r xiʼin xaxii‑r chi ma kuu ka xa kɨndaʼa‑n.”
3 Nu n‑yaʼa xa n‑xijan tnuʼu ñaʼa se ijan,
te n‑jaʼan mee n‑jaʼan ɨɨn se yɨndaʼa xaxii‑s:
“¿Nax kada‑ro chi ma taxi ka xtoʼo‑ro tniu kada‑ro?
Ña ndaku‑ro xa kate‑ro.
Januu xa kajan ndaʼu‑ro.
4 An n‑kixdɨkɨ‑ro nax kada‑ro hora ma juetniu ñaʼa ka‑s xa na kuaʼa na juemani ñaʼa ñayiu hora na jɨʼɨn‑ro veʼe‑i.”
5 Ijan dada n‑kana‑s ɨɨn xiʼin ɨɨn se tau nuu se kuika jan.
N‑xijan tnuʼu‑s se kiʼna nuu:
“¿Nadaa tau‑n nuu xtoʼo‑ro?”
6 Te n‑jaʼan se ijan:
“Koon mil litro aciti tau‑da.”
Xiaʼan‑s nuu‑s:
“Juʼun tutu yodotnuni xa tau‑n ya.
Nkoo.
Dama número.
Tenee uu mil litro.
Yachi”,
kuu‑s,
xiaʼan‑s.
7 Te n‑xijan tnuʼu‑s se kuu uu:
“¿Nadaa tau‑n nuu xtoʼo‑ro.”
Te n‑jaʼan‑s:
“Oko uxi ɨɨn yodo maquila trɨu.”
Te xiaʼan‑s:
“Juʼun tutu yodotnuni xa tau‑n ya.
Dama número yodotnuni.
Tenee oko oʼon maquila”,
kuu‑s,
xiaʼan‑s.
8 Nu n‑teku se kuu xtoʼo‑s xa n‑kida‑s,
te xiaʼan‑s nuu‑s xa io vaʼa ni xa n‑kida‑s xaxeʼe xa kaxi ini‑s.
ʼDaa n‑jaʼan‑ia chi ñayiu ma kutuu andɨu te ña jandixa‑i Ianyuux,
ɨnuu mii ka‑i xa kada‑i xa niʼi‑i tvini dada ñayiu jandixa‑ia.
9 Ndoñuʼu xa juñaʼa nga‑n tvini ñayiu na kuaʼa na kutuu mani‑n xiʼin‑i,
te kɨu na jɨn ndɨʼɨ xaxii‑n,
kueka ñaʼa Ianyuux xa kutuu‑n xiʼin‑ia nɨkava nɨkuita.
10 Nuxa xaku ni xa xnevaʼa‑n te vaʼa ñunuu‑n xijan,
dani vaʼa junuu koio‑n nux kueʼe na koo,
ko nux itaʼu ni xaxii‑n io te ña kuaʼa‑n junuu koio‑n,
dani ma kuaʼa‑n junuu koio‑n xijan nux kueʼe na koo.
11 Nux ña xñunuu vaʼa‑n xaxii‑n xiʼin tvini‑n io ñuñayiu,
ma kuaʼa‑n junuu vaʼa koio‑n xa taxi Ianyuux.
12 Nux ñayo‑n ndee vaʼa xaxii se nuu kidatniu‑n,
mayo taxi taʼu‑n te ma koo xaxii‑n.
13 Ñayo se xinokuechi io uu xtoʼo chi nuu uu‑s na koo,
jini uʼu‑s ɨɨn‑s,
te juemani‑s ɨnka‑s;
a kada‑s ntdaa xa juini ɨɨn‑s,
te jini uʼu‑s ɨnka‑s.
Dɨuni mayo‑n ndaku junukuechi‑n nuu Ianyuux nux mee ni xa kadatniu‑n xa koo xaxii‑n te ña tuu nax kada‑n xaxeʼe Ianyuux —kuu Jesús,
xiaʼan‑ia.
14 N‑ka xakundee se fariseu xyɨtnaʼa nuu ñayiu xyuku ijan Jesús xa n‑ka teku‑s tnuʼu ijan chi se fariseu,
yo unu kajan ini‑s tvini.
15 Xiaʼan Jesús nuu‑s:
—Mee‑n ka jaʼan‑n nuu ñayiu xa vaʼa‑n,
ko Ianyuux xini janda kuu anu‑n.
Ɨɨn xa xani ini ñayiu ñuñayiu xa xiniñuʼu ka,
xijan xini uʼu Ianyuux.
Ñayiu dandoo tnaʼa
16 ʼNde tiempo n‑kixi Moisés xiʼin nde tiempo n‑kixi Sua,
taxnuni ley n‑chidotnuni Moisés.
Nde na n‑ka xo tuu se n‑ka jaʼan tnuʼu Ianyuux nuu ñayiu xiʼin nde na n‑xo tuu Sua,
nde daa,
taxnuni ley n‑chidotnuni‑s.
Na n‑kixi Sua,
n‑jaʼan‑s nuu ñayiu nax io xa kada‑i xa kɨu tnaʼa‑i nuu ñayiu ka jandixa xa taxnuni Ianyuux nuu‑i.
Ñayiu kɨu tnaʼa nuu ñayiu ijan,
juexa ka kɨu tnaʼa‑i.
17 Jɨn tnaʼa tnuʼu Ianyuux yodotnuni xa naa andɨu xiʼin ñuñayiu;
naka tnuʼu‑ia n‑chidotnuni Moisés ma ku jɨn tnaʼa.
18 ʼNux dandoo ɨɨn seyɨɨ ñadɨʼɨ‑s te natnundaʼa‑s xiʼin ɨnka ñadɨʼɨ,
kida‑s kuechi.
Dɨuni kuechi kuu nux natnundaʼa ɨɨn seyɨɨ xiʼin ñadɨʼɨ n‑dandoo ñaʼa yɨɨ‑ña.
Ɨɨn se kuika xiʼin se nani Lázaro
19 ʼN‑xio ɨɨn se yo kuika.
Vaʼa n‑xo ndixi‑s.
N‑xo xiʼno‑s daʼma tndee kueʼe xiʼin daʼma linu yaʼu.
Ndɨkɨu ndɨñuu n‑xo xaxi vaʼa‑s,
te n‑xo kudɨ ini‑s.
20 Dɨuni n‑xio ɨɨn se n‑xo nani Lázaro.
N‑kundaʼu n‑kukee‑s.
N‑xo xantuu ñaʼa ñayiu yatni yeʼe se kuika jan,
te n‑xo xo nukoo‑s ijan.
N‑xiñi ndɨʼyɨ teʼyu nituʼu ñɨɨ‑s.
21 N‑xo kojon‑s te yo n‑xo kuu anu‑s xa kaxi‑s tila xiʼin ndeyu n‑xo junkoio yuʼu mexa se kuika jan xa kaxi‑s xa xikojuiin xa kojon‑s.
Ndaʼu n‑yaʼa‑s.
N‑ka xo nayuu ti‑ina ñɨɨ‑s nuu n‑xiñi ndɨʼyɨ.
22 N‑xiʼí se n‑kundaʼu jan,
te xndeka ñaʼa ángel,
ia ka xinokuechi nuu Ianyuux,
juaʼan nuu tuu Abraham.
Dɨuni n‑xiʼí se kuika,
te n‑xe konduxi‑s.
23 Juaʼan‑s andea,
te yo vichi ndaʼu yaʼa‑s.
N‑ndakoto niʼni‑s ɨɨn nuu dujun,
te xika n‑xini‑s Lázaro.
Nukoo‑s yatni nuu nukoo Abraham.
24 Xee n‑kana se n‑xo tuu kuika jan.
Xiaʼan‑s nuu Abraham:
“Dito Ta Abraham,
kundaʼu ini ñaʼa‑n.
Tundaʼa‑n Lázaro na kixi‑s na datnɨɨ‑s dɨkɨ ndaʼa‑s nuu ndute,
te nadandoyo‑s nuu yaa‑da xa na ndiko chi yo ndeʼe ndaʼu yaʼa‑da nuu yañuʼu yaʼa.”
25 Te n‑jaʼan Abraham nuu se n‑xo tuu kuika:
“¿Ñatu najaʼan‑n xa vaʼa n‑xo tuu ndoʼo ñuñayiu,
te Lázaro ndaʼu n‑xo tuu‑s?,
ko yaʼa tuvii tuvaʼa‑s,
te ndoʼo ndaʼu yaʼa‑n.
26 Daxa ma kuu xa yaʼa Lázaro do dian xa xee‑s chi yo kunu.
Ña kuaʼa xa yaʼa ñayiu do dian,
ni ña kuaʼa xa yaʼa ñayiu dian do yaʼa”,
kuu Abraham,
xiaʼan‑s nuu se n‑xo tuu kuika.
27 “Nuxa daa kuu,
Dito,
xijan taʼu‑da nuu‑n xa na tundaʼa‑n‑sɨ na nuʼu‑s veʼe taa‑da
28 chi io oʼon ka ñani‑da.
Na juñaʼa‑s nax yaʼa ñayiu kida ná ka kida‑s na ñaʼa kixi‑s yaʼa nuu yo ndaʼu ka yaʼa ntdaa daña”,
kuu‑s,
xiaʼan‑s.
29 “Ka kaʼu‑s libru Moisés,
ka kaʼu‑s libru se n‑ka jaʼan tnuʼu Ianyuux nuu ñayiu.
Na jandixa‑s tnuʼu ijan”,
kuu Abraham,
xiaʼan‑s.
30 “Ñaʼa,
Dito,
ma jandixa koio‑s,
ko nux ɨɨn se n‑nandoto na nuʼu ijan te jaʼan‑s tnuʼu Ianyuux nuu‑s natu ini koio‑s xa ka kida‑s”,
kuu‑s,
xiaʼan‑s.
31 “Nux ña xnini‑s tnuʼu n‑chidotnuni Moisés xiʼin tnuʼu se n‑ka jaʼan tnuʼu Ianyuux nuu ñayiu,
dani ma jandixa koio‑s Ianyuux nux na jini‑s ɨɨn se n‑nandoto”,
kuu Abraham,
xiaʼan‑s kuu Jesús,
xiaʼan‑ia nuu se fariseu.