Tkachi n‑xita
15
Ndɨkɨu ndɨñuu n‑ka xo xeʼen se n‑ka xo xijan tvini nandajan gobierno xiʼin dava ka ñayiu yo ka kida kuechi nuu n‑xo tuu Jesús xa kunini koio‑i xa n‑xo jaʼan‑ia.
2 Se fariseu xiʼin se ka tuʼa vaʼa tnuʼu n‑chidotnuni Moisés,
kuiʼa n‑ka jaʼan‑s Jesús.
Ka xiaʼan tnaʼa‑s:
—Se yaʼa kumani‑s xiʼin ñayiu ka kida kueʼe kuechi te xko xaxi kaʼnu‑s xiʼin‑i.
3 Xijan kuu xa n‑jaʼan‑ia tnuʼu yaʼa nuu‑s.
Xiaʼan‑ia:
4 —Ñayiu io ɨɨn cientu tkachi te na kuita ɨɨn‑tɨ yuku,
dandoo‑i koon diko xaun koon kɨtɨ ndeka‑i,
te jɨn nunduku‑i kɨtɨ n‑xita jan.
Xaxeʼe xa n‑xita‑tɨ ma kande ini‑i‑tɨ.
5 Na naniʼi‑i‑tɨ,
te kadoko‑i‑tɨ nuʼu veʼe‑i,
te yo kuvete‑i.
6 Na naxee‑i veʼe‑i,
te nadataka‑i ñayiu ka kumani xiʼin‑i xiʼin ñayiu io yatni xiʼin‑i.
Jaʼan‑i nuu‑i:
“Kuvete‑da chi n‑naniʼi‑da tkachi‑da n‑xita”,
xa na kuvete koio‑i tuku.
7 Daa ka kudɨ ini ia xtuu andɨu.
Yo kudɨ ini ka‑ia hora natu ini ɨɨn ñayiu xa n‑ka kida‑i kuechi dada xaxeʼe koon diko xaun koon ñayiu kida xavaʼa chi ña tuu nax n‑ka kida‑i xa ku natu ini‑i.
Tvini kaa n‑xita
8 ʼNux io uxi tvini kaa ɨɨn ñadɨʼɨ te dakuita‑ña ɨɨn,
natnuu‑ña candil te tɨʼu‑ña veʼe‑ña.
Vii nene nanduku‑ña,
9 te hora na naniʼi‑ña,
nadataka‑ña ñayiu kumani xiʼin‑ña xiʼin ñayiu io yatni xiʼin‑ña veʼe‑ña,
te jaʼan‑ña nuu‑i:
“Kuvete‑da chi n‑naniʼi‑da tvini kaa n‑xita.”
Duʼa jaʼan‑ña nuu‑i xa na kuvete koio‑i tuku.
10 Daa ka kudɨ ini ángel,
ia ka xinokuechi nuu Ianyuux,
hora natu ini ɨɨn ñayiu xa n‑kida‑i kuechi.
Se n‑diko taʼu‑s, te n‑datɨu‑s tvini n‑niʼi‑s
11 ʼN‑xio ɨɨn se n‑xio uu daʼya yɨɨ.
12 N‑jaʼan seluchi ka nuu taa‑s:
“Taa‑ro,
kaʼnde dava‑n xaxii‑n xa taxi‑n taʼu‑da.”
Te n‑xiaʼan taa‑s dava xaxii‑s,
dava ñuʼu‑s.
13 Nu n‑kuu jeen kɨu,
te n‑diko seluchi ka jan ñuʼu‑s xiʼin xaxii‑s,
te niʼi‑s tvini xa n‑diko‑s ñuʼu jan xiʼin xaxii‑s,
te juaʼan‑s ñuu xika.
Ijan n‑xetniu‑s ntdaa tvini‑s.
N‑datɨu‑s tvini‑s xa n‑xeen‑s davaʼa nga xa n‑kukajan ini‑s.
14 Nu n‑dandɨʼɨ‑s tvini‑s,
te n‑kuu tnama ñuu ijan,
te n‑ndoñuʼu xa kaxi‑s.
15 N‑xe kajan‑s tniu nuu ɨɨn se ñuteyu ijan,
te n‑tundaʼa ñaʼa‑s nde nuu xetata‑s kuchi xa junuu‑s‑tɨ.
16 Yo n‑kuu anu‑s xa kaxi‑s doo ndichi ka xaxi kuchi jan xa na xikojuiin xa kojon‑s,
ko ñayo n‑xiaʼan.
17 Ijan dada vaʼa n‑najani ini‑s,
te n‑jaʼan mee n‑jaʼan ɨɨn‑s:
“Diko tunga io xa kaxi ntdaa se xinokuechi nuu taa‑ro,
te yaʼa xiʼi‑ro doko.
18 Na nangondita‑ro.
Na nuʼu‑ro veʼe taa‑ro,
te juñaʼa‑ro:
Taa‑ro,
n‑kida‑da kuechi chi n‑kuxee ini‑da nuu Ianyuux,
te n‑kuxee ini‑da nuu ndixi.
19 Vaʼa ka nux maxku jaʼan daʼya ñaʼa ka‑n.
Na nduu‑da se xinokuechi nuu‑n”,
kuu‑s,
n‑xani ini‑s.
20 ʼN‑ndojuiin‑s.
N‑tnɨɨ‑s ichi.
Juan nuʼu‑s veʼe taa‑s.
Nu n‑nduyatni‑s nuu ñuʼu taa‑s,
te xika ka juan nuʼu‑s,
te n‑xini ñaʼa taa‑s.
N‑kundaʼu ini ñaʼa‑s.
N‑kendava‑s.
N‑xetnaʼa ñaʼa‑s,
te n‑nundee ñaʼa‑s.
N‑teyuʼu ñaʼa‑s.
21 Te n‑jaʼan‑s nuu taa‑s:
“Taa‑ro,
n‑kida‑da kuechi chi n‑kuxe ini‑da nuu Ianyuux.
N‑kuxe ini‑da nuu ndixi.
Vaʼa ka maxku jaʼan daʼya ñaʼa ka‑n”,
kuu‑s,
xiaʼan‑s nuu taa‑s.
22 Te n‑jaʼan taa‑s nuu se ka xinokuechi nuu‑s:
“Juan jeʼen koio dijun vaʼa ka,
te dandukutu koio‑n‑sɨ.
Tnaa koio‑n deʼe dɨkɨ ndaʼa‑s.
Chiʼi koio‑n‑sɨ ndixa.
23 Te nkueka koio‑n nserru kandee ka.
Kaʼni koio‑n‑tɨ xa na kaxi‑ro‑t.
Na koo‑ro xadɨ ini
24 chi daʼya yɨɨ‑r yaʼa,
kuenda kɨu ndɨyɨ n‑kuu‑s,
te vitna n‑nandoto‑s.
Ña n‑xini‑ro nuu nde n‑xeʼen‑s,
te n‑naniʼi‑ro‑s”,
kuu taa‑s,
xiaʼan‑s.
Te n‑xio xadɨ ini.
25 ʼDaʼya yɨɨ‑s,
se xaʼnu jan,
n‑xiko‑s.
Juan nuʼu‑s veʼe‑s xa n‑ñutuu‑s nuu ñuʼu‑s.
Nu n‑nduyatni‑s veʼe‑s,
te n‑teku‑s xa ka tɨu música.
N‑teku‑s xa ka xataxeʼe ñayiu xiti veʼe taa‑s.
26 N‑kana‑s ɨɨn se xinokuechi nuu taa‑s,
te n‑xijan tnuʼu‑s nuu nax kuu veʼe taa‑s.
27 Te n‑jaʼan se xinokuechi jan:
“N‑nxee ñani‑n,
Dito.
N‑nxee vaʼa‑s,
n‑nxee ndito‑s.
Xijan kuu xa n‑ka xaʼni‑s ncerru io ndee ka.”
28 N‑kiti ini daʼya yɨɨ xaʼnu ka se ijan,
te ña n‑juini‑s xa ndɨu‑s veʼe taa‑s.
Te n‑xe nukueka ñaʼa taa‑s.
Vivii n‑jaʼan‑s nuu‑s xa na ndɨu‑s.
29 N‑jaʼan‑s nuu taa‑s:
“Mee‑da,
kuia n‑kuu xinokuechi‑da nuu‑n.
Te ni ɨɨn vuelta ña kuxe ini‑da nuu‑n,
ko ta taxi ka‑n juini nga ɨɨn daʼya nchiva xa kaxdɨɨ‑da xiʼin ñayiu ka kumani xiʼin‑da.
30 Se kuu daʼya‑n n‑nxee,
n‑xaxi‑s tvini‑n.
N‑chiyaʼu‑s ñadɨʼɨ n‑kaa xiʼin‑s,
te xaxeʼe‑s n‑xaʼni‑n ncerru kandee ka”,
kuu‑s.
31 Te xiaʼan taa‑s nuu‑s:
“Mee‑n,
ntdantuʼu kɨu tuu‑ro,
te ntdaa xa nevaʼa‑r kuu xaxii‑n.
32 Io vaʼa xa kida‑r viko,
te io xadɨ ini chi se kuu ñani‑n kuenda kɨu ndɨyɨ n‑kuu‑s,
te n‑nandoto‑s.
Ña n‑xini‑ro nuu nde n‑xeʼen‑s,
te n‑naniʼi‑ro‑s”,
kuu‑s,
n‑xiaʼan‑s.