N‑ndadavaʼa Jesús ɨɨn se ñuʼu ñaʼa Kuiña
14
N‑xee ɨɨn sabado,
te n‑jaʼan ɨɨn se fariseu taxnuni Jesús xa kaxdini‑ia xiʼin‑s,
te n‑xee‑ia veʼe‑s xa kaxdini‑ia.
Nɨni tuu‑ia ijan,
n‑ka xo ndeʼa se n‑ka taka ijan nu nax kida‑ia xa na kuaʼa na tekuechi‑s‑ia.
2 Ijan nujuiin ɨɨn se ñuʼu ñaʼa Kuiña.
3 Xaxeʼe xa n‑tu ini Jesús nax n‑ka xani ini se ka tuʼa vaʼa tnuʼu n‑chidotnuni Moisés xiʼin se fariseu xyuku ijan,
n‑xijan tnuʼu‑ia‑s:
—¿Io vaʼa xa ndadavaʼa‑ro ñayiu kuʼu kɨu kuu sabado a ñaʼa u?
4 Ni ɨɨn ña tuu nax n‑ka jaʼan se ijan.
N‑tnɨɨ Jesús se kuʼu jan,
te n‑ndadavaʼa‑ia‑s,
te n‑jaʼan‑ia xa na nuʼu‑s veʼe‑s.
5 Te xiaʼan‑ia nuu se fariseu:
—Nux kekava daʼya yɨɨ‑n a ngutu‑n xiti yau kɨu kuu sabado,
ña xndetu‑n chi ka xe nutava‑n‑sɨ juini kɨu sabado kuu.
¿Ndaa a ñaʼa u?
—kuu Jesús,
xiaʼan‑ia nuu se ijan,
ɨɨn ɨɨn‑s.
6 Ñayo‑s niʼi tnuʼu jaʼan‑s.
Ñayiu jɨʼɨn viko tnundaʼa
7 Nu n‑xini‑ia xa ka kaxí se n‑ka xee ijan nuu kunukoo koio‑s nuu ka xko nukoo se ndandɨʼɨ ka,
xiaʼan‑ia nuu‑s:
8 —Hora na jɨʼɨn koio‑n viko tnundaʼa,
maxku nkoo koio‑n nuu kaxko nukoo se ndandɨʼɨ xa na ñaʼa xee ɨnka se ndandɨʼɨ ka dada ndoʼo viko jan.
9 Nkueka se n‑jaʼan ñaʼa ndoʼo se ndandɨʼɨ ka jan,
te xee‑s nuu nukoo‑n,
te jaʼan‑s nuu‑n:
“Xikojuiin na nkoo se yaʼa nuu nukoo‑n.”
Nux daa na yaʼa‑n kujanuu‑n,
te jɨʼɨn‑n.
Nkoo‑n nuu ka xko nukoo se dakuu nga.
10 Maxku daa kada‑n.
Nux na jaʼan ñaʼa ɨɨn se kida viko te hora na xee koio‑n viko jan,
nkoo koio‑n nuu ka xko nukoo ñayiu dakuu nga,
ijan te xee se n‑jaʼan ñaʼa,
te kachi‑s nuu‑n ɨɨn ɨɨn‑n:
“Dito,
juaʼan‑n.
Nkoo‑n nuu xtuu ñayiu ndandɨʼɨ ka.”
Najuen tnuʼu ñaʼa‑s nuu ntdaa ñayiu xyuku ijan.
11 Ñayiu najuen tnuʼu mee‑i,
nduu‑i ñayiu dakuu nga,
te kujanuu‑i.
Ñayiu xko kida ná kida ñayiu dakuu nga,
najuen tnuʼu ñaʼa ñayiu —kuu‑ia,
xiaʼan‑ia.
12 Te xiaʼan‑ia nuu mee ni se n‑jaʼan ñaʼa:
—Hora na kada‑n viko,
maxku jaʼan‑n ñayiu kumani xiʼin‑n.
Maxku jaʼan‑n ñani‑n,
kuʼa‑n.
Maxku jaʼan‑n ñayiu kutnaʼa xiʼin‑n.
Maxku jaʼan‑n ñayiu kuika io yatni xiʼin‑n chi dani na jaʼan ñaʼa mee‑i.
13 Maxku duʼa kada koio‑n;
hora na kada‑n ɨɨn viko kaʼnu,
jaʼan‑n ñayiu ka kukee ka kundaʼu,
ñayiu n‑ka nduneʼe,
ñayiu ka xika yakua,
ñayiu kuaa du.
14 Kudɨ ini‑n chi ña tuu nax nataxi ñayiu ijan.
Niʼi‑n taʼu‑n kɨu na nandoto ñayiu vaʼa.
Ñayiu ñatu n‑ka juini xa jɨʼɨn‑i viko ɨɨn se n‑jaʼan ñaʼa
15 Nu n‑teku ɨɨn se yɨtnaʼa nuu ñayiu xyuku ijan,
te xiaʼan‑s:
—Naka taʼu ñayiu kaxi koʼo nuu taxnuni Ianyuux.
16 Te xiaʼan Jesús:
—N‑xio ɨɨn se n‑kida tuʼa kueʼe ndeyu xa kaxdeʼñu kueʼe ñayiu n‑jaʼan‑s.
17 N‑xee hora kaxdeʼñu koio‑s,
te n‑tundaʼa se kida viko jan se xinokuechi nuu‑s xa duʼa na juñaʼa‑s nuu ñayiu n‑jaʼan‑s:
“Juan xee‑n chi xa io tuʼa xa kaxdeʼñu‑n.”
18 Ntdaa se ijan ña n‑ka juini xa jɨʼɨn koio‑s.
Xiaʼan se kiʼna nuu nuu se xinokuechi jan:
“N‑xeen‑r ñuʼu te ndoñuʼu xa nkoto‑r.
Juñaʼa‑n nuu se kida viko xa na taxkanu ini‑s chi ma kuu xa xee‑r”,
kuu‑s,
xiaʼan‑s.
19 Xiaʼan se kuu uu:
“Oʼon tayu ngutu n‑xeen‑r,
te io xa nkoto‑r‑tɨ.
Juñaʼa‑n nuu‑s xa na taxkanu ini‑s chi ma kuu xa xee‑r.”
20 Xiaʼan ɨnka ntuku se n‑jaʼan se kida viko:
“Dijan n‑tnundaʼa‑r,
te ma kuu xa xee‑r.”
21 Te n‑xiko se xinokuechi jan,
te n‑najani‑s nuu xtoʼo‑s xa n‑ka jaʼan se ijan.
Yo n‑kiti ini xtoʼo‑s jan,
te xiaʼan‑s nuu‑s:
“Yachi.
Juaʼan ichi kaʼnu,
ichi kuechi xiti ñuu,
te jaʼan‑n ñayiu ka kukee ka kundaʼu,
ñayiu n‑ka nduneʼe,
ñayiu kuaa,
ñayiu xika yakua du.”
22 N‑kee‑s.
Juaʼan ntuku‑s.
Ijan dada n‑naxee‑s,
te xiaʼan‑s:
“Dito,
xa n‑kida‑da xa n‑taʼu tniu‑n,
ko ta chitu ka veʼe‑n”,
kuu‑s,
xiaʼan‑s nuu xtoʼo‑s.
23 Te xiaʼan ntuku xtoʼo‑s jan nuu‑s:
“Juaʼan ichi kaʼnu.
Juaʼan ichi yuʼu ñuu,
te kandeka juexa‑n ñayiu kixi xa na chitu veʼe‑r.
24 Kaxdeʼñu koio‑i,
ko se ña n‑ka juini xa kixi‑s,
mayo‑s kaxkoʼo viko‑r.
Ni itaʼu ndeyu‑r ma juñaʼa‑r xa kaxi‑s” —kuu Jesús,
xiaʼan‑ia.
Nuxa ñatu ede ñɨɨ́ ñatu xiniñuʼu
25 N‑ndee Jesús veʼe se fariseu jan,
te juaʼan‑ia nuu io xa jɨʼɨn‑ia.
Kueʼe ñayiu xndijun ñaʼa juaʼan,
te n‑ngokoo‑ia xa kundeʼa‑ia ñayiu jan,
te n‑jaʼan‑ia nuu‑i:
26 —Se juini xa nkuitandijun ñaʼa‑s,
nux dani kukajan ini‑s taa‑s,
dɨʼɨ‑s,
ñadɨʼɨ‑s,
daʼya‑s,
ñani‑s,
kuʼa‑s;
ma kuu xa dakuaʼa‑r‑sɨ.
Dani ma kuu xa dakuaʼa‑r‑sɨ nux ma dandoo‑s xa kukajan ini mee‑s.
27 Nux ña io tuʼa‑n xa kuu koio‑n kuenda kɨu se doko curuxi‑s xa nkuitakaa dika‑s xaxeʼe‑r,
na io tuʼa ruʼu,
ma kuu xa dakuaʼa ñaʼa‑r.
28 Se juini xa kadavaʼa‑s veʼe iñu uxa piso,
kiʼna ka juen tnuʼu‑s nadaa njuʼun‑s xa kuaʼa veʼe dujun jan xa na daxinokava‑s
29 na ñaʼa tava‑s cimientu,
te ma kuu daxinokava‑s,
te kuekundee ñaʼa ñayiu xndeʼa ñaʼa.
30 Te juñaʼa tnaʼa‑i:
“Se yaʼa n‑kixeʼe‑s xa kadavaʼa‑s veʼe‑s,
ko ña n‑kuu xa daxinokava‑s.”
31 Dani ɨɨn se taxnuni,
nux ñu ini‑s xa jantnaʼa‑s xiʼin ntnaʼa ka taxnuni‑s,
kiʼna ka kani ini‑s nux ndaku‑s xiʼin uxi mil soldado‑s nuu ɨnka se taxnuni io oko mil soldado.
32 Nux tu ini‑s xa ma ndaku‑s xiʼin uxi mil soldado‑s,
tundaʼa‑s ɨɨn soldado xa kada ɨnuu‑s xa kutuu mani naʼi koio‑s.
33 Dani ndoʼo,
ɨɨn ɨɨn‑n,
ma ndaku‑n xa nkuitandijun ñaʼa‑n nux ma dandoo‑n ntdaa xaxii‑n.