Io xa ku kajan‑ro nuu Ianyuux xa taxi‑ia ɨɨn xa taxi‑ia
18
Te n‑jaʼan‑ia ɨnka ntuku tnuʼu nuu ñayiu dakuaʼa‑ia jan.
N‑jaʼan‑ia xa ndɨkɨu ndɨñuu io xa ku kajan taʼu koio‑i nuu Ianyuux;
te maxku kande ini‑i.
Na koo ndaa koo kuiti anu‑i hora ku kajan taʼu koio‑i.
Xiaʼan‑ia:
2 —Ɨin ñuu n‑xio ɨɨn juexi ña n‑xo yuʼu nuu Ianyuux,
ni ña n‑xio‑s xañuʼu nuu ñayiu.
3 Dɨuni n‑xio ñadɨʼɨ n‑xiʼí yɨɨ ñuu ijan,
te n‑xo xeʼen‑ña nuu‑s xa n‑xo xiaʼan‑ña:
“Kana‑n te xini uʼu ñaʼa,
te dayaʼa‑n‑te juxtixia xa maxku kada ñaʼa ka‑te ná kida ñaʼa‑te.”
4 Ña n‑juini‑s xa chindee‑s‑ña,
te naʼa n‑kuu.
Ijan dada n‑jaʼan mee,
n‑jaʼan ɨɨn‑s:
“Juini ña yuʼu‑ro nuu Ianyuux te ña io‑ro xañuʼu nuu ñayiu,
5 ko xa maxku ñaʼa kixi ka ñá yaʼa xa datnaʼa ñaʼa‑ña,
te xee xa ma kundee ka ini‑ro na dayaʼa naʼi‑ro se ijan juxtixia”,
kuu‑s,
n‑jaʼan‑s.
6 ʼKundeʼa koio nax n‑jaʼan juexi loko jan,
se n‑dayaʼa se ijan juxtixia.
7 Daa kida Ianyuux.
Ndadandaa‑ia kuechi ñayiu kuiʼa kida ñayiu n‑kaxi‑ia nux ka xijan taʼu‑i nduu xakuaa.
Chindee‑ia‑i,
te ña kukuee‑ia.
8 ¿Ka xani ini‑n xa kɨu na ndixi ruʼu,
Ia kuu ñayiu,
koo ka ñayiu kukanu ini ñaʼa u?
Te ñayo‑i n‑jaʼan.
Uu se n‑ka xijan taʼu nuu Ianyuux
9 Ijan dada n‑jaʼan Jesús ɨnka ntuku tnuʼu xa dakuaʼa‑ia ñayiu ka xani ini xa yo vaʼa‑i,
te ña ka xe ini‑i dava ka ñayiu:
10 —Uu seyɨɨ n‑ka xeʼen veñuʼu Jerusalén xa kajan taʼu‑s nuu Ianyuux.
Ɨɨn‑s kuu se fariseu.
Ɨnka‑s kuu se xijan tvini nandajan gobierno.
11 N‑jaʼan mee n‑jaʼan ɨɨn se fariseu nuu nujuiin‑s xa n‑xijan taʼu‑s.
N‑jaʼan‑s:
“Taa‑ro Ianyuux,
nakutaʼu‑da xa ñatu kuu‑da ñaduʼu,
ñatu loko‑da,
ñatu xkaa‑da xiʼin ñayiu ña n‑tnundaʼa xiʼin‑da ná ka kida dava ka ñayiu.
Dɨuni ñatu kuu‑da ná kuu se xijan tvini nandajan gobierno nujuiin yaʼa.
12 Daña xko ndite‑da uu kɨu xa neʼe ii‑da ntnaʼa una kɨu.
Ntnaʼa uxi xa niʼi‑da nataxi‑da ɨɨn”,
kuu‑s,
xiaʼan‑s.
13 Xika xika ni nujuiin se xijan tvini nandajan gobierno.
Ñatu n‑kuu ini‑s xa ndakoto niʼni‑s andɨu xaxeʼe xa n‑kune ini‑s,
ko n‑katu‑s pechu‑s,
te n‑jaʼan‑s nuu Ianyuux:
“Taa‑ro Ianyuux,
taxkanu ini‑n xa n‑kida‑da kueʼe kuechi;
kundaʼu ini ñaʼa‑n”,
kuu‑s,
xiaʼan‑s.
14 N‑taxkanu ini Ianyuux se kuu uu,
ko ɨnka se jan,
ñaʼa.
Ñayiu ka najuen tnuʼu mee‑i,
xee kɨu kujanuu‑i te kune ini‑i,
ko ñayiu ka xani ini xa ñatu ndandɨʼɨ‑i nuu Ianyuux,
vichi najuen tnuʼu ñaʼa‑ia —kuu‑ia,
xiaʼan‑ia.
Parábola del Fariseo y el Recolector de Impuestos
N‑kida ii Jesús sekuechi xiʼin dichi kuechi
15 N‑ka xo kandeka ñayiu sekuechi xiʼin dichi kuechi n‑ka xo xeʼen nuu Jesús xa kajan ndodo‑ia ndaʼa‑ia dɨkɨ‑s,
ko nu n‑ka xini se dakuaʼa‑ia,
te n‑ka kudeen‑s nuu ñayiu jan.
16 N‑kana Jesús‑sɨ,
te xiaʼan‑ia nuu‑s:
—Juejoon koio xa na kandeka ñayiu sekuechi xiʼin dichi kuechi kixi nuu‑r,
te maxku dadaʼan koio‑n chi kuenda kɨu sekuechi xiʼin dichi kuechi ka kuu ñayiu jandixa xa taxnuni Ianyuux nuu‑i.
17 Ñayiu ma jandixa xa taxnuni Ianyuux nuu‑i ná ka jandixa sekuechi xiʼin dichi kuechi tnuʼu‑ia,
ma kuu xa kɨu tnaʼa‑i nuu ñayiu taxnuni‑ia nuu‑i —kuu‑ia,
xiaʼan‑ia.
N‑ndatnuʼu Jesús xiʼin ɨɨn se yo kuika
18 N‑xee ɨɨn se taxnuni nuu‑ia.
Xiaʼan‑s:
—Maestru,
yo vaʼa‑n.
¿Nax io xa kada‑da xa kundito‑da nɨkava nɨkuita andɨu?
19 Xiaʼan Jesús:
—¿Nakuenda jaʼan‑n xa vaʼa‑r?
Ña yoo ñayiu vaʼa.
Mee ni Ianyuux vaʼa.
20 Xa xini‑n ley n‑chidotnuni Moisés jaʼan xa:
“Maxku kava‑n xiʼin ñadɨʼɨ ñatu kuu ñadɨʼɨ‑n.
Maxku kaʼni‑n ndɨyɨ.
Maxku duʼu‑n.
Maxku jaʼan vete‑n nuu juxtixia.
Koo‑n xañuʼu nuu tadɨʼɨ‑n.”
21 Te xiaʼan‑s:
—Nde na luchi‑da jandixa‑da ntdantuʼu xaʼa.
22 Te xiaʼan Jesús:
—Juini ka‑i ɨɨn xa kada‑n.
Diko‑n ntdaa xaxii‑n,
te dakexio‑n tvini niʼi‑n nuu ñayiu ka kundaʼu,
te kada Ianyuux xa kutuu kuika‑n andɨu.
Ijan dada kixi‑n,
te nkuitandijun ñaʼa‑n.
23 Nu n‑teku‑s tnuʼu ijan,
n‑kukoʼyo ini‑s chi yo vichi kueʼe xaxii‑s io.
24 Xaxeʼe xa n‑xini Jesús xa n‑kukoʼyo ini‑s n‑jaʼan‑ia:
—Xaxeʼe xa ndaʼu yaʼa ñayiu kuika xa kɨu tnaʼa‑i nuu ñayiu ka jandixa xa taxnuni Ianyuux nuu‑i,
xaku ni‑i ndaku xa kɨu tnaʼa‑i.
25 Yachi ka yaʼa ɨɨn kɨtɨ kuu camello ɨɨn yau yɨkɨ nakiku dada xa kɨu tnaʼa ɨɨn ñayiu kuika nuu ñayiu jandixa xa taxnuni Ianyuux nuu‑i —kuu Jesús,
xiaʼan‑ia.
26 Ijan dada n‑ka jaʼan ñayiu n‑ka teku tnuʼu n‑jaʼan‑ia:
—Nux ñatu nanitaʼu ñayiu kuika,
naka ñayiu ka kundaʼu ku nanitaʼu.
27 Te xiaʼan Jesús:
—Ñayo kuaʼa xa kada‑i xijan,
ko ntdandituʼu xa ñatu kuaʼa ñayiu xa kada‑i kida Ianyuux.
28 Xiaʼan Spedru nuu‑ia:
—Maestru,
naʼa‑n xa ntdaa daña n‑ka dandoo ntdaa xaxii‑da,
te n‑ka xe kuitandijun ñaʼa‑da.
Te xiaʼan Jesús:
29 —Xandaa xakuiti nux n‑dandoo‑n veʼe‑n a n‑dandoo‑n ñadɨʼɨ‑n a ñani‑n a kuʼa‑n a tadɨʼɨ‑n a daʼya‑n xa jaʼan‑n nuu ñayiu nax io xa kada‑i xa kɨu tnaʼa‑i nuu ñayiu taxtnuni Ianyuux nuu‑i,
30 kueʼe ka niʼi ndoʼo ñuñayiu yaʼa dada xa n‑ka dandoo‑n.
Nani seyɨɨ dani ñadɨʼɨ,
kutuu koio‑n xiʼin Ianyuux nɨkava nɨkuita.
N‑kakuneʼe ntuku Jesús xa kuú‑ia
31 Ijan dada n‑kineʼe dɨɨn‑ia uxi uu se dakuaʼa‑ia jan,
te xiaʼan‑ia nuu‑s:
—Vitna kuu xa jɨʼɨn‑ro Jerusalén xa na jɨn tnaʼa tnuʼu n‑ka chidotnuni se n‑ka jaʼan tnuʼu Ianyuux nuu ñayiu xa yaʼa ruʼu,
Ia kuu ñayiu.
32 Diko ñaʼa se nación mee‑ro nuu se ña ka kuu se Israel.
Kuekundee ñaʼa koio‑s.
Kuiʼa jaʼan ñaʼa koio‑s.
Tudɨɨ ñaʼa‑s.
33 Janñaʼa‑s chirrión ñɨɨ.
Ijan dada kaʼni ñaʼa‑s,
ko nandoto‑r kɨu kuu uni.
34 Ñayo‑s n‑kutnuni ini tnuʼu n‑jaʼan‑ia.
Ña n‑xiaʼan Ianyuux xaxtnuni xa kutnuni ini‑s xa n‑jaʼan‑ia.
Jesús Predice Su Muerte y Resurrección
N‑ndadavaʼa Jesús ɨɨn se kuaa ñuu Jericó
35 N‑nujunu ichi‑ia xiʼin‑s.
N‑kuyatni‑ia xiʼin‑s Jericó.
Ijan io ɨɨn se kuaa nukoo yuʼu ichi xa xijan ndaʼu‑s.
36 N‑teku‑s xa kueʼe ñayiu ka yaʼa,
te n‑xijan tnuʼu‑s nuu nax kuu.
37 Te n‑ka jaʼan ñayiu xyuku ijan:
—Jesús Nazaret yaʼa yaʼa.
38 Te xee n‑kana‑s.
Xiaʼan‑s:
—Dito,
Ta Jesús,
Daʼya Dana David kundaʼu ini ñaʼa‑n.
39 N‑ka kanandee ñaʼa ñayiu xndodo nuu,
te n‑ka jaʼan‑i xa maxku kana ka‑s,
ko xee ka n‑kana‑s.
Xiaʼan‑s:
—Dito,
Ta Jesús Daʼya Dana David,
kundaʼu ini ñaʼa‑n.
40 N‑nujuiin Jesús,
te n‑taʼu tniu‑ia xa kandeka ñayiu se kuaa jan xee nuu‑ia.
N‑kuyatni‑s‑ia te n‑jaʼan‑ia nuu‑s:
41 —¿Nax juini‑n xa kada ñaʼa‑r?
Te xiaʼan‑s nuu Jesús:
—Dito,
kada‑n xa na nukondeʼa‑da.
42 Te xiaʼan Jesús nuu‑s:
—Na nukondeʼa‑n.
Xaxeʼe xa kukanu ini ñaʼa‑n,
n‑ndvaʼa‑n —kuu‑ia,
xiaʼan‑ia.
43 Danaa n‑nukondeʼa‑s,
te n‑xe kuitandijun‑s Jesús.
Nɨni ndijun‑s‑ia najuen tnuʼu‑s Ianyuux.
Dani n‑ka najuen tnuʼu ntdaa ñayiu n‑xini xijan Ianyuux.
Sanación de Bartimeo