N‑kɨu Jesús ñuu nani Jerusalén
11
Te n‑kuyatni Jesús,
xiʼin se dakuaʼa‑ia,
ñuu Jerusalén.
N‑xee‑ia xiʼin‑s ñuu nani Betfagé xiʼin ñuu nani Betania.
Ñuu jan katuu ndiʼi xeʼe Yuku Yutnu Olivo.
Ijan n‑tundaʼa Jesús uu se dakuaʼa‑ia juaʼan‑s.
San Marcos 11:1-14
—Juaʼan koio ñuu katuu ichi jɨʼɨn‑ro.
Hora na kɨu‑n ñuu ijan,
te jini‑n ɨɨn burru luchi ndijun ijan.
Ni ɨɨn ñayiu ta kodo ka‑tɨ.
Ndaxi‑n‑tɨ,
te kandeka‑n‑tɨ kixi.
3 Nux xijan tnuʼu ñayiu jan nakuenda ndaxi‑n‑tɨ,
te jaʼan‑n xa Xtoʼo‑n ndoñuʼu‑tɨ te ma kukuee‑ia xa natundaʼa‑ia‑tɨ.
4 Juaʼan‑s,
te n‑naniʼi‑s ɨɨn burru luchi ndijun yatni yeʼe ijan.
Nujuiin‑tɨ ichi yata veʼe.
N‑ka nandaxi‑s‑tɨ.
5 Dava ñayiu xnii ijan,
n‑ka xijan tnuʼu‑i:
—¿Nakuenda ka ndaxi‑n burru de?
¿Nax ka kida‑n?
6 N‑ka jaʼan‑s nax n‑taʼu tniu Jesús,
te n‑ka xejoon‑i xa kandeka‑s‑tɨ jɨʼɨn.
7 Xndeka‑s‑tɨ juaʼan nuu Jesús.
N‑ka xajan‑s doo‑s yata‑tɨ,
te n‑yodo‑ia‑tɨ.
8 Te kueʼe ñayiu,
n‑ka xajan‑i doo‑i ichi nuu n‑xika‑ia.
Dava‑i n‑xaʼnde ndaʼa yutnu kuii,
te n‑ka xajan‑i‑tnu nuu ichi.
Duʼa n‑ka xio‑i xañuʼu nuu Jesús.
9 Xee n‑ka kana ñayiu xndodo nuu nuu Jesús.
Te dɨuni xee n‑kana ñayiu xndijun Jesús.
N‑ka jaʼan‑i:
—¡Hosanna!
¡Na kada Ianyuux xa kutuu vaʼa se vaxi yaʼa!
¡Xiʼin xa taxnuni Ianyuux vaxi‑s!
10 ¡Na kada Ianyuux xa taxnuni se vaxi yaʼa,
ná n‑taxnuni taxaʼnu tnetnu‑ro David!
¡Hosanna!
¡Na kutaʼu‑ro Ianyuux!
11 N‑kɨu Jesús Jerusalén,
te n‑kɨu‑ia veñuʼu.
N‑xini‑ia ntdaa xa io ijan,
te xá vax kunee.
Xijan kuu xa n‑kee‑ia,
juaʼan‑ia xiʼin n‑uxi uu se dakuaʼa‑ia ñuu nani Betania.
N‑jaʼan uʼu Jesús nuu yutnu higo
12 Kɨu kuu uu n‑ndee‑ia xiʼin se dakuaʼa‑ia Betania,
te n‑kojon‑ia.
13 N‑xini xika‑ia ɨɨn yutnu higo.
Io ndaʼa kuii‑tnu.
N‑kuyatni‑ia‑tnu,
xa niʼi‑ia xavidi‑tnu xa kaxi‑ia.
Na n‑xee‑ia xeʼe yutnu,
ña n‑niʼi‑ia ni ɨɨn xavidi‑tnu.
Meni ndaʼa‑tnu io.
Chi ta juun ka ndeʼa‑tnu.
14 N‑jaʼan‑ia nuu yutnu jan:
—Maxku juun ka ni ɨnka xavidi.
Maxku kaxi ka ni ɨɨn ñayiu xavidi‑n nɨkava nɨkuita.
Te n‑ka teku se dakuaʼa‑ia nax n‑jaʼan‑ia.
N‑kineʼe Jesús se ka xeen xiʼin se ka diko
15 Na n‑naxee‑ia xiʼin se dakuaʼa‑ia Jerusalén,
n‑kɨu‑ia veñuʼu kaʼnu,
te n‑kixeʼe‑ia xa kineʼe‑ia se ka xeen xiʼin se ka diko ijan.
N‑dajane‑ia mexa se ka dama tvini,
xiʼin silla se ka diko data.
San Marcos 11:15-33
16 Ña n‑xejoon‑ia xa ni ɨnka ñayiu maxku kaneʼe ndatniu‑i yaʼa veñuʼu kaʼnu.
17 N‑kixeʼe‑ia xa dakuaʼa‑ia ñayiu ijan.
N‑xiaʼan‑ia:
—¿Ñadu yodotnuni xa veʼe Ianyuux kuu veʼe nuu kuaʼa ntdaa ñayiu xa kajan taʼu‑i nuu‑ia u?
Ko mee‑n ka kida xa veʼe Ianyuux kuu ná kuu yau ñaduʼu.
18 N‑ka tekutnuʼu dutu ka taxnuni,
xiʼin se ka tuʼa vaʼa tnuʼu n‑chidotnuni Moisés,
nax n‑jaʼan Jesús,
te n‑ka nduku‑s mudu xa kaʼni‑s‑ia.
Chi n‑ka yuʼu‑s nuu‑ia,
xaxeʼe xa n‑dakuaʼa‑ia kueʼe xa kueʼe ñayiu,
te n‑ka tna ini‑i tnuʼu‑ia.
19 Na n‑kunee,
te n‑kee Jesús,
xiʼin se dakuaʼa‑ia,
ñuu Jerusalén.
Xá n‑yichi yutnu higo
20 Neʼe datne,
n‑ka nayaʼa ntuku‑s nuu nukoo yutnu higo jan,
te n‑ka xini‑s xa nde yoʼo‑tnu n‑yichi.
21 N‑najaʼan Spedru tnuʼu Jesús,
te n‑xiaʼan‑s‑ia:
—¡Maestru,
jira!
N‑kida uʼu‑n yutnu higo ya,
te n‑yichi‑tnu.
22 N‑jaʼan Jesús:
—Io xa jandixa koio‑n Ianyuux.
23 Xandaa kuu xa jaʼan‑r.
Nux jaʼan ɨɨn ñayiu nuu yuku yaʼa,
xa na dita Ianyuux yuku ya te na dakeé‑ia nuu ndute kaʼnu,
te duʼa koo.
Io xa maxku jaʼan‑i xiʼin anu‑i,
nux duʼa koo a ñaʼa.
Io xa jandixa‑i xa koo ná n‑jaʼan‑i,
te duʼa koo.
24 Xijan kuu xa,
jaʼan‑r xa ntdaa xa xijan taʼu‑n,
io xa jandixa‑n xa xá n‑tnɨɨ‑n xa xijan‑n,
te tnɨɨ‑n.
25 Hora xijan taʼu‑n,
io xa taxkanu ini‑n ndeda ɨɨn ñayiu n‑kida xa uʼu nuu mee‑n.
Te dada taxkanu ini ñaʼa Taa‑r,
Ianyuux tuu andɨu,
ntdaa kuechi mee‑n.
26 Ko nux ma taxkanu ini mee‑n nuu ñayiu,
te ma taxkanu ini Taa‑r,
Ianyuux tuu andɨu,
kuechi mee‑n tuku.
¿Jundu n‑taxnuni xa n‑kida Jesús ntdaa xa n‑kida‑ia?
27 Ɨnka vuelta n‑naxee Jesús xiʼin se dakuaʼa‑ia Jerusalén.
Xikonuu‑ia xiti veñuʼu kaʼnu.
Ijan n‑ka xee dutu ka taxnuni,
xiʼin se ka tuʼa vaʼa tnuʼu n‑chidotnuni Moisés,
xiʼin sexaʼnu ka taxnuni nuu ñayiu Israel.
28 N‑ka xijan tnuʼu‑s‑ia:
—¿Jundu n‑taxnuni xa kida‑n ntdaa xa kida‑n?
¿Jundu xiʼin xa taxnuni kida‑n xaʼa?
29 N‑jaʼan Jesús:
—Dani mee‑r,
kajan tnuʼu ñaʼa‑r ɨɨn tnuʼu.
Nux na jaʼan koio‑n,
te jaʼan mee‑r jundu n‑taxnuni xa duʼa kida‑r.
30 —N‑xijan tnuʼu‑ia‑s— ¿Jundu n‑tundaʼa Sua Bautista?
¿Ianyuux a ñayiu a?
Kachitnuñaʼa‑n.
31 Se ijan n‑ka kixeʼe xa xijan tnuʼu‑s:
—Nux jaʼan‑ro xa n‑tundaʼa Ianyuux Sua,
te jaʼan se yaʼa:
“Xijan kuu xa,
¿nax kuu xa ña n‑ka jandixa‑n‑sɨ?”
32 Ko nux jaʼan‑ro xa n‑tundaʼa seyɨɨ Sua,
te,
¿nax koo?
Chi n‑ka yuʼu‑s nuu kueʼe xa kueʼe ñayiu xyuku ijan,
chi n‑ka jandixa ntdaa ñayiu xa xandaa kuu xa Sua n‑kuu se xian tnuʼu tnuʼu Ianyuux nuu‑i.
33 Xijan kuu xa n‑ka xiaʼan‑s nuu Jesús:
—Ña ka xini‑r.
N‑jaʼan Jesús:
—Dani mee‑r,
ma jaʼan‑r jundu n‑taxnuni xa kida‑r xaʼa.