Maxku kada ni ɨɨn ñayiu xa dandoo tnaʼa ɨɨn seyɨɨ xiʼin ñadɨʼɨ‑s
10
Ijan n‑kee Jesús,
te n‑xee‑ia distrito Judea nde ɨnka lado deʼva Jordán.
N‑ka taka kueʼe xa kueʼe ñayiu ijan,
te ɨnka vuelta n‑kixeʼe Jesús xa dakuaʼa‑ia‑i.
San Marcos 10:1-31
—¿Vatuka xa dandoo ɨɨn seyɨɨ ñadɨʼɨ‑s,
a ñaʼa u?
3 N‑xiaʼan‑ia:
—¿Nax n‑taʼu tniu Moisés?
4 N‑ka xiaʼan‑s:
—N‑xejoon Moisés xa kadavaʼa ɨɨn seyɨɨ ɨɨn tutu xa dandoo‑s ñadɨʼɨ‑s.
5 N‑xiaʼan Jesús:
—Xaxeʼe xa unu xee ini‑n n‑kidavaʼa Moisés tnuʼu taʼu tniu yaʼa.
6 Ko kiʼna nuu,
na n‑kidavaʼa Ianyuux ntdaa xa io,
“n‑kidavaʼa‑ia seyɨɨ xiʼin ñadɨʼɨ”.
7 “Xijan kuu xa dandoo seyɨɨ taa‑s,
dɨʼɨ‑s,
xa kutuu‑s xiʼin ñadɨʼɨ n‑tnundaʼa xiʼin‑s.
8 Te mee‑s xiʼin ñadɨʼɨ‑s,
nduu‑s xiʼin‑ña,
kuu idini ñayiu.
Ñatuka kuu‑s uu ñayiu,
chi idini ñayiu n‑nduu‑s.”
9 N‑kida Ianyuux xa idini ñayiu ka kuu‑s,
te xijan kuu xa maxku kada ni ɨɨn ñayiu xa dandoo tnaʼa‑s.
10 Ɨnka vuelta xiti veʼe,
n‑ka xijan tnuʼu se dakuaʼa Jesús nax juini kachi tnuʼu n‑jaʼan‑ia.
11 N‑xiaʼan‑ia:
—Nux dandoo ɨɨn seyɨɨ ñadɨʼɨ‑s,
te natnundaʼa‑s xiʼin ɨnka ñadɨʼɨ,
kida‑s kuechi nuu ñadɨʼɨ kiʼna nuu.
12 Te nux dandoo ɨɨn ñadɨʼɨ yɨɨ‑ña,
te natnundaʼa‑ña xiʼin ɨnka seyɨɨ,
dɨuni kida‑ña kuechi tuku.
N‑jaʼan Jesús: “Juejoon koio‑n xa kix koio sekuechi, dichi kuechi nuu mee‑r”
13 Te ijan xndeka ñayiu sekuechi xiʼin dichi kuechi nuu Jesús,
xa kajan ndodo‑ia ndaʼa‑ia dɨkɨ‑s.
Ko se dakuaʼa‑ia n‑ka kudeen nuu ñayiu jan.
14 Na n‑xini Jesús nax ka kida se dakuaʼa‑ia,
n‑kiti ini‑ia.
N‑xiaʼan‑ia:
—Juejoon xa na kix naʼi sekuechi,
dichi kuechi nuu mee‑r,
maxku kudeen ka‑n nuu ñayiu de.
Chi ná kuu sekuechi,
dichi kuechi yaʼa,
da kuu ñayiu kutuu vaʼa nuu taxnuni Ianyuux.
15 Xandaa kuu xa jaʼan‑r.
Io xa ku kuu koio ñayiu ná kuu sekuechi,
dichi kuechi yaʼa.
Ndeda ɨɨn ñayiu ma juejoon xa taxnuni Ianyuux anu‑i,
nuncas ma kuaʼa‑i xa kutuu vaʼa‑i xiʼin Ianyuux.
16 N‑nundee‑ia sekuechi xiʼin dichi kuechi jan,
te n‑xajan ndodo ndaʼa‑ia dɨkɨ‑s,
te n‑xiaʼan‑ia:
—Na kada Ianyuux xa kutuu vaʼa koio‑n ntdaa‑n.
N‑ndatnuʼu Jesús xiʼin ɨɨn se kuika
17 Na n‑kee Jesús xa jɨʼɨn‑ia,
te xino ɨɨn seyɨɨ vaxi ichi ijan.
N‑xe juiin xiti‑s nuu Jesús,
te n‑xijan tnuʼu‑s:
—Maestru vaʼa,
¿nax kada‑da xa niʼi‑da xa kutuu‑da xiʼin Ianyuux kuia ma jɨn ndɨʼɨ?
18 N‑xiaʼan Jesús:
—¿Nakuenda jaʼan‑n xa vaʼa mee‑r?
Ni ɨɨn ñayiu ña vaʼa.
Idini Ianyuux vaʼa.
19 Vaʼa xini‑n tnuʼu n‑taʼu tniu Moisés:
“Maxku kaʼni‑n ndɨyɨ.
Maxku dandoo‑n ñadɨʼɨ‑n xa kidi‑n xiʼin ɨnka ñadɨʼɨ.
Maxku duʼu‑n.
Maxku tekuechi‑n ñayiu tnuʼu ña ndaa.
Maxku dandaʼu‑n ñayiu.
Koo xañuʼu nuu taa‑n,
nuu dɨʼɨ‑n.”
20 N‑xiaʼan‑s:
—Maestru,
ntdaa xaʼa kida‑da nde na luchi‑da.
21 Ndeʼa Jesús se ijan,
te n‑xemani‑ia‑s,
te n‑jaʼan‑ia:
—Idinga xa io xa kada‑n.
Juaʼan,
te diko‑n ntdaa xaxii‑n,
te juñaʼa‑n nuu ñayiu kundaʼu.
Te niʼi‑n xa vaʼa ka andɨu.
Neʼe,
te doko‑n curuxi,
ná doko ɨɨn seyɨɨ curuxi‑s xa kuitakaa‑s,
te kunduu‑n xiʼin mee‑r.
22 Ko se ijan,
na n‑teku‑s tnuʼu Jesús,
te yo n‑kukoʼyo ini‑s.
Tnau ini‑s juaʼan‑s,
chi kueʼe xaxii‑s io.
23 Ndeʼa Jesús nuu ntdaa se dakuaʼa‑ia xtuu ijan,
te n‑xiaʼan‑ia:
—Naka uʼu kuaʼa se kuika xa xee‑s nuu taxnuni Ianyuux.
24 Te n‑ka yuʼu se dakuaʼa‑ia xaxeʼe tnuʼu‑ia.
Ɨnka vuelta n‑jaʼan‑ia:
—Daʼya‑r,
naka uʼu kuaʼa ñayiu nevaʼa kueʼe xaxii‑i,
xa kɨu‑i nde nuu taxnuni Ianyuux.
25 Yo uʼu xa yaʼa kɨtɨ nani camello yau yɨkɨ kiku,
ko uʼu ka xa kɨu ɨɨn se kuika nde nuu taxnuni Ianyuux.
26 Loko n‑ka yuʼu se dakuaʼa‑ia.
N‑ka xijan tnuʼu tnaʼa‑s:
—Xijan kuu xa,
¿jundu kuaʼa xa dakaku‑i mee‑i,
xa ma jɨʼɨn‑i andea?
27 N‑nukondeʼa Jesús se ijan,
te n‑xiaʼan‑ia:
—Meni mee ñayiu,
ña kuaʼa‑i xa dakaku‑i mee‑i,
ko Ianyuux,
joon,
kuaʼa‑ia xa dakaku‑ia‑i.
Chi ntdaa xa kuaʼa Ianyuux xa kada‑ia.
28 N‑kixeʼe Spedru xa jaʼan‑s nuu‑ia:
—Mee‑da,
n‑ka dandoo‑da ntdaa,
xa kunduu‑da xiʼin mee‑n.
29 N‑xiaʼan Jesús:
—Xandaa kuu xa jaʼan‑r.
Ɨɨn seyɨɨ,
nux n‑dandoo‑s veʼe‑s a ñani‑s a kuʼa‑s a dɨʼɨ‑s a taa‑s a ñadɨʼɨ‑s a daʼya‑s a xaxii‑s,
xaxeʼe mee‑r xiʼin xaxeʼe tnuʼu Ianyuux,
te kueʼe ka natnɨɨ‑s.
30 Nde ɨɨn cientu ka veʼe,
ñani‑s,
kuʼa‑s,
dɨʼɨ‑s,
daʼya‑s,
xaxii‑s natnɨɨ‑s,
juini ka kida uʼu ñaʼa ñayiu mee‑s.
Antecas xa ndixi mee‑r,
natnɨɨ‑s ntdaa xijan,
te na ndixi‑r,
kutuu vaʼa‑s xiʼin Ianyuux kuia ma jɨn ndɨʼɨ.
31 Kueʼe ñayiu xndodo nuu vitna,
ko kɨu ijan dɨu‑i nukuitandijun koio.
Te ñayiu xndijun koio vitna,
dɨu‑i nujuindodo nuu koio kɨu ijan.
Vuelta kuu uni n‑jaʼan Jesús xa io xa kuú‑s
32 Te ka xika Jesús xiʼin se dakuaʼa‑ia juaʼan ichi xe xee nde ñuu Jerusalén.
Ndodo nuu Jesús,
te n‑ka yuʼu se dakuaʼa‑ia.
Xndijun‑s‑ia,
te n‑ka yuʼu‑s.
Ɨnka vuelta ndeka dɨɨn‑ia n‑uxi uu se dakuaʼa‑ia juaʼan,
te n‑kixeʼe‑ia xa jaʼan‑ia nuu‑s nax yaʼa‑ia.
San Marcos 10:32-52
—Vitna,
jɨn xee‑ro Jerusalén,
te diko ɨɨn seyɨɨ Se kuu ñani tnaʼa ñayiu,
nuu dutu ka taxnuni,
xiʼin se ka tuʼa vaʼa tnuʼu n‑chidotnuni Moisés.
Taʼu tniu koio‑s xa kuú Se kuu ñani tnaʼa ñayiu,
te kandeka ñaʼa‑s jɨʼɨn nuu ñayiu ña ka kuu ñayiu Israel.
34 Kada koio ñayiu ña ka kuu ñayiu Israel xa januu,
te tudɨɨ ñaʼa koio‑i.
Chirrión ñɨɨ janñaʼa‑i,
te kaʼni ñaʼa‑i.
Ko nuu uni kɨu,
nandoto‑s.
Jacobo xiʼin Sua, n‑xijan‑s xamani Jesús
35 Ijan dada,
n‑ka kuyatni Jacobo xiʼin Sua nuu Jesús.
Daʼya yɨɨ Zebedeo ka kuu‑s.
Te n‑ka jaʼan‑s:
—Maestru,
ka juini‑da xa kada ñaʼa‑n davaʼa nga xa kajan‑da nuu‑n.
36 N‑xiaʼan‑ia:
—¿Nax ka juini‑n xa kada‑r xaxeʼe‑n?
37 N‑ka jaʼan‑s:
—Juejoon‑n xa ɨɨn‑da nkoo ndaʼa kuaʼa‑n,
te ɨnka‑da nkoo ndaʼa datni‑n,
hora na taxnuni‑n.
38 N‑xiaʼan‑ia:
—Ña ka kutnuni ini‑n nax ka xijan‑n.
¿Kuaʼa‑n xa kueʼe vida yaʼa koio mee‑n,
ná kueʼe vida yaʼa mee‑r a?
Xa kueʼe vida yaʼa mee‑r,
kuu ná kuu xa koʼo‑r ɨɨn taxa ñuʼu ɨɨn xa yo ndeʼe ua.
Kuu ná kuu xa dajuendute ñaʼa se diko ñaʼa.
¿Kuaʼa‑n xa kundee ini mee‑n,
nux duʼa koo a?
39 N‑ka xiaʼan‑s:
—Joon,
kuaʼa‑da.
N‑xiaʼan Jesús nuu‑s:
—Xandaa kuu xa kueʼe vida yaʼa koio mee‑n,
ná kueʼe vida yaʼa mee‑r.
Nani kada ñaʼa koio‑s mee‑r,
dani kada ñaʼa koio‑s mee‑n.
Kuu ná kuu xa kada koio‑s xa koʼo‑n ɨɨn xa ua,
te kuu ná kuu xa dajuendute ñaʼa koio‑s mee‑n tuku.
40 Ko ma jaʼan mee‑r jundu nkoo ndaʼa kuaʼa‑r,
te jundu nkoo ndaʼa datni‑r.
Ntdaa xá io tuʼa,
te mee Taa‑r jaʼan jundu nkoo ijan.
41 Na n‑ka teku uxi ka‑s nax n‑ka xijan Jacobo xiʼin Sua nuu Jesús,
te n‑ka kixeʼe‑s xa kiti ini‑s nuu‑s.
42 N‑kana Jesús uxi ka se ijan xa xee koio‑s nuu‑ia,
te n‑xiaʼan‑ia:
—Xini‑n nax ka kida se taxnuni nuu ñayiu ña ka kuu ñayiu Israel.
Io xa koo koio ntdaa ñayiu xañuʼu nuu‑s.
Ka kunuu‑s nuu ñayiu.
Se kunxaʼnu ka ñayiu ña ka kuu ñayiu Israel,
yo ndeʼe ka taʼu tniu‑s nuu ñayiu.
43 Ko mee‑n,
maxku duʼa kada koio‑n.
Ndeda ɨɨn‑n juini xa kunxaʼnu ka‑n,
io xa junukuechi‑n nuu ntdaa‑n.
44 Ndeda ɨɨn‑n juini xa juindodo nuu‑n nuu ntdaa‑n,
io xa kadatniu duʼa‑n nuu dava ka‑n.
45 Nde Se kuu ñani tnaʼa ñayiu,
ña n‑kixee‑s xa junukuechi ñayiu nuu mee‑s.
Chi n‑kixee‑s xa junukuechi mee‑s nuu ñayiu.
N‑kixee‑s xa chiyaʼu‑s kuechi ñayiu.
Kuú mee‑s,
xa maxku kuú koio ñayiu xiʼin kuechi‑i.
N‑ndadavaʼa Jesús se kuaa nani Bartimeo
46 Ijan n‑kee‑ia,
te n‑xee‑ia xiʼin se dakuaʼa‑ia ñuu nani Jericó.
Ijan n‑ndee‑ia xiʼin se dakuaʼa‑ia,
te kueʼe xa kueʼe ñayiu.
Ɨɨn xio ichi ijan nukoo ɨɨn seyɨɨ nani Bartimeo.
Daʼya yɨɨ Timoteo kuu‑s.
Se kuaa kuu‑s,
te xijan ndaʼu‑s ñayiu ka yaʼa ichi ijan.
47 Na n‑teku‑s xa yaʼa Jesús,
se Nazaret,
ichi ijan,
n‑kixeʼe‑s xa kana xee‑s.
N‑jaʼan‑s:
—¡Jesús,
daʼya dana se kunxaʼnu ka David,
kundau ini ñaʼa‑n!
48 N‑ka kudeen kueʼe ñayiu jan nuu‑s,
xa maxku kana ka‑s,
ko niʼi ka n‑kana xee‑s:
—¡Daʼya dana se kunxaʼnu ka David,
kundau ini ñaʼa‑n!
49 Nujuiin Jesús,
n‑xiaʼan‑ia:
—Kana‑s,
na kixi‑s.
N‑ka kana‑s se kuaa.
N‑ka jaʼan‑s:
—Koo kaʼnu anu‑n.
Chi kana ñaʼa‑ia mee‑n.
—¿Nax juini‑n xa kada‑r xaxeʼe‑n?
N‑xiaʼan se kuaa:
—Maestru,
juini‑da xa nukondeʼa‑da.
52 N‑xiaʼan Jesús nuu‑s:
—Juan nuʼu veʼe‑n.
Xaxeʼe xa jandixa ñaʼa‑n,
n‑ndvaʼa‑n vitna.
Hora ijan ni n‑nukondeʼa‑s,
te n‑xe kuitandijun‑s Jesús juaʼan ichi.