9
N‑jaʼan Jesús:
—Xandaa kuu xa jaʼan‑r.
Dava ñayiu nujuiin yaʼa,
ma kuú‑i nde jini‑i xa taxnuni Ianyuux.
Jini koio‑i xa Ia kunxaʼnu ka kuu‑ia te taxnuni‑ia ñuñayiu.
San Marcos 9:1-32
N‑ka xo ndeʼa se dakuaʼa Jesús xadiñu‑ia
2 Nuu iñu kɨu,
ndeka Jesús Spedru xiʼin Jacobo xiʼin Sua juaʼan.
Ndruni ni‑s ndeka ñaʼa‑ia juaʼan,
nde dɨkɨ yuku dujun.
Ijan nɨni xndeʼa‑s,
te n‑nadama Ianyuux Jesús.
Danaa,
diñu xa diñu nuu‑ia,
te diñu xa diñu ñɨɨ‑ia.
3 Ná kaa yuʼa yodo dɨkɨ tnduu kaa daʼma‑ia.
Kuixi xa kuixi,
te diñu xa diñu.
Ña tuu ni ɨɨn xa kɨyɨ ná kɨyɨ daʼma‑ia hora ijan.
4 Danaa,
n‑nujuiin ndi Elías xiʼin ndi Moisés ijan.
Ndatnuʼu‑s xiʼin Jesús.
5 N‑jaʼan Spedru nuu Jesús:
—Maestru,
¡naka vaʼa xa tuu‑ro yaʼa!
Na kadavaʼa koio‑da uni veʼe todo.
Ɨɨn veʼe mee‑n,
ɨɨn veʼe Moisés,
ɨɨn veʼe Elías.
6 Chi ña n‑kutnuni ini Spedru nax n‑jaʼan‑s,
chi yo n‑ka yuʼu‑s,
ndruni‑s.
7 Ijan nuu vikó,
te n‑chidaʼu ñaʼa vikó jan ntdaa‑s.
Xiti vikó jan n‑ka teku‑s tnuʼu:
—Se yaʼa kuu Daʼya mani‑r.
Kunini koio‑n nax jaʼan‑s.
8 Hora ijan ni n‑ka xo ndeʼa‑s nituʼu lado ijan,
ko ña n‑ka xini ka‑s ni Elías ni Moisés.
Menga Jesús nujuiin xiʼin‑s ijan.
9 Nɨni ka nuu‑s yuku,
te n‑taʼu tniu‑ia xa maxku najani‑s ni ɨɨn nuu ñayiu nax n‑ka xini‑s.
Nde na yaʼa xa nandoto Se kuu ñani tnaʼa ñayiu,
dada najani koio‑s ntdaa xa n‑ka xini‑s.
10 Xijan kuu xa ña n‑ka jaʼan‑s ni ɨɨn.
Diko ni n‑xijan tnuʼu tnaʼa‑s nax juini kachi xa kuú‑ia te nandoto‑ia.
11 N‑ka xijan tnuʼu‑s Jesús:
—¿Nakuenda ka jaʼan se tuʼa vaʼa tnuʼu n‑chidotnuni Moisés xa io xa kiʼna ka Elías ndixi?
12 N‑xiaʼan‑ia:
—Xandaa kuu xa kiʼna ka ndixi Elías xa ndadavaʼa‑s ntdaa.
Te jaʼan tnuʼu Ianyuux xa kueʼe vida yaʼa Se kuu ñani tnaʼa ñayiu,
te jaʼan ñayiu xa ña ndoñuʼu ñaʼa‑i.
13 Ko jaʼan‑r nuu mee‑n xa xá n‑ndixi Elías.
Te n‑ka kida ñayiu Elías ntdaa xa n‑ka juini mee‑i.
Nani yodotnuni tnuʼu Ianyuux,
dani n‑ka kida‑i‑sɨ.
N‑ndadavaʼa Jesús ɨɨn seluchi
14 Juan nuʼu Jesús xiʼin ndruni se dakuaʼa‑ia,
nde nuu xtuu dava ka se dakuaʼa‑ia.
Ijan n‑ka xini‑s kueʼe xa kueʼe ñayiu naduku nduu nuu‑s.
Se tuʼa vaʼa tnuʼu n‑chidotnuni Moisés,
n‑ka jantnaʼa tnuʼu‑s xiʼin se dakuaʼa Jesús.
15 Na n‑ka xini ñayiu jan Jesús,
te n‑ka yuʼu‑i.
N‑ka kendava‑i juaʼan‑i nuu‑ia,
te n‑ka jaʼan‑i xa vanga takuu‑ia.
16 N‑xijan tnuʼu‑ia‑i:
—¿Nax ka jantnaʼa tnuʼu‑n xiʼin‑s?
17 Te ɨɨn se nujuiin meʼñu ñayiu jan n‑jaʼan:
—Maestru,
ndeka‑da daʼya yɨɨ‑da vaxi nuu‑n.
Ñuʼu ñaʼa tachi uʼu,
te ña jaʼan‑s.
18 Davaʼa nga nuu tnɨɨ ñaʼa‑i,
te dajane ñaʼa‑i nuu ñuʼu.
Xido t‑iñu yuʼu‑s,
te xax ndodo tnaʼa nuʼu‑s,
te ndeʼe nduyutnu‑s.
Xá n‑xijan‑da nuu se dakuaʼa‑n xa kineʼe‑s‑yɨ,
ko ña n‑ka kuaʼa‑s.
19 N‑jaʼan Jesús:
—Ñayiu ña jandixa ka kuu‑n.
¿Nada ka kɨu io xa kutuu‑r xiʼin‑n?
¿Nada ka kɨu io xa kundetu kuee‑r xaxeʼe‑n?
N‑xiaʼan‑ia nuu taa seluchi jan:
—Taxi‑s.
20 Te ndeka‑s seluchi nuu‑ia.
Hora n‑xini tachi uʼu Jesús,
loko ndeʼe n‑daxiyɨʼɨ‑i‑sɨ.
N‑ndua seluchi nuu ñuʼu,
te n‑tuniʼna‑s,
te n‑xido t‑iñu yuʼu‑s.
21 N‑xijan tnuʼu Jesús taa seluchi jan:
—¿Nada kuia n‑kuu kuʼu‑s kueʼe yaʼa?
N‑jaʼan taa seluchi:
—Nde na luchi‑s.
22 Kueʼe vuelta n‑dajane ñaʼa‑i nuu ñuʼu koko a nuu ndute,
xa kaʼni ñaʼa‑i.
Ko nux kuaʼa‑n,
chindee ñaʼa‑n xaxeʼe‑s.
Kundau ini ñaʼa‑n,
mee‑da xiʼin mee‑s.
23 N‑xiaʼan Jesús:
—Nux kuaʼa‑n xa jandixa‑n.
Nuu ñayiu jandixa Ianyuux,
kuaʼa‑ia xa kada‑ia ntdaa.
24 N‑kana taa seluchi jan:
—¡Jandixa‑da!
Chindee ñaʼa‑n xa na jandixa ka‑da.
25 N‑xini Jesús xa ka taka kueʼe xa kueʼe ka ñayiu ijan,
te n‑kudeen‑ia nuu tachi uʼu jan.
N‑jaʼan‑ia:
—Tachi uʼu doʼo,
tachi uʼu ña jaʼan,
taʼu tniu ñaʼa mee‑r.
¡Ta kee seluchi de!
Te maxku ndɨu ka‑n‑sɨ.
26 N‑kana xee tachi uʼu jan,
te n‑kida‑i xa n‑xiyɨʼɨ ka seluchi,
te n‑kee‑i.
Katuu seluchi ná katuu ndɨyɨ,
te n‑ka jaʼan kueʼe ñayiu jan xa n‑xiʼí‑s.
27 Ko n‑tnɨɨ Jesús ndaʼa‑s,
te n‑ndoneʼe‑ia‑s.
Ijan n‑ndojuiin‑s.
28 Ijan dada n‑kɨu Jesús veʼe,
te n‑ka xijan tnuʼu se dakuaʼa‑ia:
—¿Nakuenda ña n‑ka kuaʼa‑da xa kineʼe‑da tachi uʼu seluchi jan?
29 N‑xiaʼan‑ia:
—Uʼu kuu xa kineʼe koio‑n tachi uʼu yaʼa.
Io xa kajan taʼu‑n,
te ma kaxi‑n xa kuneʼe ii‑n,
dada ndaku‑n.
Vuelta kuu uu n‑jaʼan Jesús xa io xa kuú‑ia
30 Ijan n‑kee‑ia xiʼin se dakuaʼa‑ia,
te n‑yaʼa‑ia xiʼin‑s distrito Galilea.
Te ña n‑juini‑ia xa jini ñaʼa ñayiu ijan.
31 Chi n‑dakuaʼa‑ia se dakuaʼa‑ia.
N‑xiaʼan‑ia:
—Ɨɨn seyɨɨ,
diko‑s Se kuu ñani tnaʼa ñayiu nuu se kaʼni‑s.
Kaʼni koio‑s‑sɨ,
te nuu uni kɨu nandoto‑s.
32 Ko se dakuaʼa‑ia,
ña n‑ka kutnuni ini‑s tnuʼu‑ia.
Te n‑ka yuʼu‑s xa kajan tnuʼu‑s‑ia.
Se dakuaʼa Jesús, n‑ka jantnaʼa tnuʼu‑s ndeda ɨɨn‑s kunxaʼnu ka
33 N‑xee‑ia xiʼin‑s ñuu nani Capernaum.
Na n‑xo tuu‑ia veʼe,
n‑xijan tnuʼu‑ia‑s:
—¿Nax n‑ka jantnaʼa tnuʼu‑n ichi?
San Marcos 9:33-50
34 Ko ña n‑ka jaʼan‑s ni ɨɨn.
Chi ichi n‑ka jantnaʼa tnuʼu‑s ndeda mee‑s kunxaʼnu ka.
35 N‑nukoo Jesús ijan,
te n‑kana‑ia n‑uxi uu se dakuaʼa‑ia,
te n‑xiaʼan‑ia‑s:
—Ɨɨn ñayiu,
nux juini‑i xa kunxaʼnu ka‑i,
io xa ku kuu‑i ná kuu ñayiu ndijun daʼu ni nga nuu ntdaa ñayiu.
Io xa junukuechi‑i nuu ntdaa ñayiu.
36 N‑tnɨɨ Jesús ndaʼa ɨɨn seluchi nujuiin ijan.
N‑xantuu‑ia‑s meʼñu ntdaa‑s,
te n‑nundee‑ia‑s.
N‑jaʼan‑ia:
37 —Ɨɨn ñayiu,
nux kueka vaʼa‑i idini seluchi,
kuu ná kuu seluchi yaʼa,
xaxeʼe mee‑r,
dani kueka ñaʼa vaʼa‑i mee‑r tuku.
Te nux kueka vaʼa‑i mee‑r,
dani kueka vaʼa‑i Ia n‑tundaʼa ñaʼa mee‑r vaxi.
N‑jaʼan Jesús: “Ɨɨn seyɨɨ, nux ña xini uʼu ñaʼa‑s, dani chindee ñaʼa‑s”
38 N‑xiaʼan Sua:
—Maestru,
n‑ka xini‑da ɨɨn se kineʼe tachi uʼu ñuʼu anu ñayiu.
N‑jaʼan‑s xa kineʼe‑s‑yɨ xiʼin xa taxnuni mee‑n,
ko ña kunduu‑s xiʼin‑ro.
N‑ka taʼu tniu‑da‑s xa maxku duʼa kada ka‑s,
chi ña kunduu‑s xiʼin‑ro.
39 Ko n‑jaʼan Jesús:
—Maxku jaʼan ka‑n xa maxku kada‑s.
Chi ɨɨn seyɨɨ,
nux kada‑s milagru xiʼin xa taxnuni mee‑r,
te dada ma kuaʼa‑s xa yachi kuiʼa jaʼan ñaʼa‑s mee‑r.
40 Chi ɨɨn seyɨɨ,
nux ña xini uʼu ñaʼa‑s,
dani chindee ñaʼa‑s.
41 Davaʼa nga ñayiu taxi ɨɨn yaxi ndute mee‑n,
xaxeʼe mee‑r,
te chiyaʼu‑r‑yɨ.
Xandaa kuu xa jaʼan‑r.
Nux taxi‑i idini yaxi ndute na koʼo mee‑n xaxeʼe xa kunduu‑n xiʼin Cristu,
nuncas ma kuita xa niʼi‑i taʼu‑i.
“Maxku kada koio ka‑n xa uʼu”
42 ʼƗɨn seluchi jandixa ñaʼa mee‑r,
nux kada ɨɨn ñayIu xa kada‑s kuechi,
te vaʼa ka xa n‑ka dakeé seyɨɨ ñayiu jan nuu ndute kaʼnu n‑kuu.
Vaʼa ka xaxeʼe ñayiu jan nux ɨɨn yodo molinu,
ɨɨn yodo yo vee,
ñuʼu dujun‑i,
te dakeé koio‑s‑yɨ nuu ndute kaʼnu,
te kuú‑i n‑kuu.
43 Nux na kada ndaʼa‑n xa kada‑n kuechi,
kaʼnde‑n.
Vaʼa ka xaxeʼe‑n xa idini ndaʼa‑n koo,
te kɨu‑n nuu kutuu vaʼa‑n kuia ma jɨn ndɨʼɨ,
dada xa io nduu ndaʼa‑n,
te jɨʼɨn‑n andea nuu ñuʼu koko nuncas ma ndaʼva.
44 Andea ma kuú tndaku ka xaxi kuñu ñayiu,
te nuncas ma ndaʼva ñuʼu.
45 Nux na kada xeʼe‑n xa kada‑n kuechi,
kaʼnde‑n.
Vaʼa ka xaxeʼe‑n,
xa idini xeʼe‑n koo,
te kɨu‑n nuu kutuu vaʼa‑n kuia ma jɨn ndɨʼɨ,
dada xa io nduu xeʼe‑n te dakeé ñaʼa‑ia andea nuu ñuʼu koko nuncas ma ndaʼva.
46 Andea ma kuú tndaku ka xaxi kuñu ñayiu,
te nuncas ma ndaʼva ñuʼu.
47 Nux na kada nduchi nuu‑n xa kada‑n kuechi,
tava‑n.
Vaʼa ka xaxeʼe‑n,
xa idini nduchi nuu‑n koo,
te kɨu‑n nuu taxnuni Ianyuux,
dada xa io nduu nduchi nuu‑n te dakeé ñaʼa‑ia andea.
48 Andea ma kuú tndaku ka xaxi kuñu ñayiu,
te nuncas ma ndaʼva ñuʼu.
49 ʼChiʼi‑ro ñɨɨ́ ntdaa xa doko‑ro nuu Ianyuux.
Ná kuu ñɨɨ́ jan kuu xa kueʼe vida yaʼa‑n ñuñayiu yaʼa.
Dɨuni ná kuu ñuʼu koko,
kuu xa kueʼe vida yaʼa koio‑n ñuñayiu yaʼa.
50 Ná kuu ñɨɨ́ kuu mee‑n.
Vaʼa xiniñuʼu ñɨɨ́.
Ko nux ñatuka ede,
¿nax kada‑n xa nduu ede ɨnka vuelta?
Xijan kuu xa,
io xa ku kuu koio mee‑n ná kuu ñɨɨ́ vaʼa,
ñɨɨ́ ede,
nɨni xtuu‑n ñuñayiu yaʼa.
Io xa kutuu mani‑n ɨɨn‑n xiʼin ɨnka‑n.