Ndeda ñayiu ku kuu ñayiu ndandɨʼɨ ka
18
Hora ijan n‑ka xetuʼa ntdaa‑da‑ia,
te n‑ka xijan tnuʼu‑da‑ia:
—¿Ndeda‑da ku kuu se ndandɨʼɨ ka nuu taxnuni Ianyuux?
—Nux xandaa xakuiti ma ku kuu‑n ná ka kuu sekuechi xiʼin dichi kuechi,
ma kuu xa kɨu tnaʼa‑n nuu ñayiu taxnuni‑ia nuu‑i.
4 Xijan kuu xa ndeda‑n ka kuu nuu dava ka ñayiu ná ka kuu sekuechi nuu tadɨʼɨ‑s xa ka xeyuʼu ka xendetu‑s,
ku kuu‑n ñayiu ndandɨʼɨ ka nuu taxnuni Ianyuux.
5 Ñayiu na xe ini seluchi yaʼa xaxeʼe xa n‑taʼu tniu‑r xa xe ini‑i‑sɨ kuenda kɨu xe ini ñaʼa‑i mee‑r.
6 ʼÑayiu na kada xa kada ɨɨn seluchi kukanu ini ñaʼa yaʼa kuechi,
vaʼa ka nuu na kudukundee ɨɨn yodo molinu dujun‑i,
te dakekava ñaʼa ɨnka ñayiu nuu kunu mar te kuú‑i dada xa dajaʼan‑i‑sɨ xa kada‑i kuechi.
7 Naka ndaʼu yaʼa ñayiu ka kida xa kida ñayiu kukanu ini ñaʼa kuechi.
Daa vaxi xa daa kada‑i ñayiu kukanu ini ñaʼa,
te naka ndaʼu yaʼa ñayiu ijan.
8 Xijan kuu xa nux xaxeʼe ndaʼa‑n a xaxeʼe xeʼe‑n kida‑n kuechi,
kaʼnde‑n te dajane‑n,
chi vaʼa ka nux ma koo ka ɨɨn ndaʼa‑n a ɨɨn xeʼe‑n te kundito‑n nɨkava nɨkuita nuu tuu Ianyuux dada xa keé‑n xiʼin nduu ndaʼa‑n nduu xeʼe‑n nuu nuʼu ku koko nɨkava nɨkuita.
9 Nux nduchi nuu‑n kida xa kida‑n kuechi xaxeʼe xa ndeʼa‑n ɨɨn xa ndeʼa‑n,
tava koio nduchi nuu‑n te dajane‑n,
chi vaʼa ka xa jɨʼɨn‑n nuu kundito‑n nɨkava nɨkuita nuu tuu Ianyuux xiʼin idii ni nduchi nuu‑n dada xa keé‑n xiʼin nduu nduchi nuu‑n nuu nuʼu koko.
Tkachi n‑xita
10-11 ʼCuedado koo koio‑n xa maxku jini uʼu koio‑n sekuechi yaʼa chi ángel sekuechi yaʼa xtuu yatni nuu Taa‑ro Ianyuux,
te chindee‑ia‑s.
Xtuu‑ia andɨu nuu xndeʼa‑ia Ianyuux ntdantuʼu kɨu.
12 Chinuu koio xa na najani‑r na kutnuni ini‑n.
Nux io ɨɨn se io ɨɨn cientu tkachi te na kuita ɨɨn‑tɨ yuku,
te dandoo‑s koon diko xaun koon kɨt ndeka‑s,
te jɨn nunduku‑s kɨtɨ n‑xita.
13 Yo kuvete‑s na naniʼi‑s‑tɨ.
Ndeʼe ka kudɨ ini‑s xaxeʼe idii kɨt ijan dada xaxeʼe koon diko xaun koon kɨtɨ ña n‑ka xita.
14 Daa kuu Taa‑ro Ianyuux,
Ia tuu andɨu,
ñatu kuu ini‑ia xa keé ni ɨɨn seluchi andea.
Nax io xa kada‑ro ñayiu n‑kida ñaʼa ɨɨn xa n‑kida ñaʼa‑i
15 ʼNux kida ñaʼa ɨɨn ñayiu jandixa Ianyuux ɨɨn xa n‑kida ñaʼa‑i kandeka dɨɨn‑n‑yɨ jɨʼɨn ɨnka lado,
te juñaʼa‑n nuu‑i xa n‑kida‑i kuechi.
Nux na kunini‑i xa jaʼan‑n,
ndumani‑n xiʼin‑i.
16 Nux ma ke ini‑i xa jaʼan‑n,
kandeka‑n ɨɨn a uu ka ñayiu jɨʼɨn nuu‑i te juñaʼa ntuku‑n nuu‑i xa n‑kida ñaʼa‑i.
Duʼa yodotnuni tnuʼu Ianyuux:
“Na jaʼan‑n nuu ñayiu n‑kida ɨɨn kuechi xa n‑kida‑i ɨɨn kuechi,
kandeka‑n uu a uni ñayiu jɨʼɨn nuu‑i xa ku kuu‑i testiu‑n na kuaʼa na jandixa ñaʼa‑i.”
17 Nux ma chinuu‑i tnuʼu jaʼan koio‑n,
dataka‑n dava ka ñayiu ka kukanu ini ñaʼa ruʼu,
te juña tnuʼu‑n‑yɨ.
Nux dani ma jandixa‑i xa jaʼan ñayiu ijan,
na ku kuu naʼi‑i ná ka kuu ñayiu ña ka xini ley Ianyuux.
Dɨuni ku kuu naʼi‑i ñayiu kida kuechi ná ka kuu se ka xijan tvini nandajan gobierno.
18 Ntdaa ñayiu ñatu ñu ini Ianyuux xa yaa‑i nuu Kuiʼna xa jɨʼɨn‑i andɨu,
ma dayaa koio‑n‑yɨ nuu Kuiʼna tuku xa jɨʼɨn‑i andɨu.
Ntdaa ñayiu xá ñu ini Ianyuux xa yaa‑i nuu Kuiʼna xa jɨʼɨn‑i andɨu,
dani ndoʼo,
dayaa koio‑n‑yɨ nuu Kuiʼna xa jɨʼɨn‑i andɨu.
19 Najaʼan ntuku‑r nuu‑n nux na kada ɨnuu‑n xa kajan taʼu koio‑n nuu Ianyuux,
Ia tuu andɨu,
xa kada‑ia ɨɨn xa juini koio‑n,
daa kada‑ia juini uu ni‑n na kajan taʼu koio.
20 Juini uni ni‑n a uu ni‑n xtuu ɨɨn nuu xtuu‑n xaxeʼe xa n‑tundaʼa ñaʼa‑r,
kutuu‑r nuu kutuu‑n —kuu Jesús,
n‑jaʼan‑ia nuu‑da ntdaa‑da.
Se xinokuechi ñatu n‑taxkanu ini ɨnka se n‑xo tau tvini nuu‑s
21 Ijan dada n‑xe tuʼa Spedru Jesús te n‑xijan tnuʼu‑s‑ia:
—Maestru,
¿nadaa vuelta io xa taxkanu ini‑da ñayiu ka jandixa ñaʼa ndixi nux kida ñaʼa‑i ɨɨn xa kida ñaʼa‑i?
¿Uxa vuelta taxkanu ini‑da‑i a?
22 Xiaʼan Jesús nuu‑s:
—Ñaʼa,
ñadu uxa ni vuelta taxkanu ini‑n‑yɨ chi kueʼe cientu vuelta taxkanu ini‑n‑yɨ.
23 ʼKuenda kɨu ɨɨn se kunxaʼnu kuu Ia taxnuni nuu ñayiu ñuñayiu.
N‑nukuita ɨɨn se kunxaʼnu kida‑s cuenta xa jini‑s nuu nadaa n‑kuu xtau se ka xinokuechi nuu‑s.
24 N‑kana‑s‑sɨ xa n‑nandajan‑s tvini xtau‑s,
te n‑xee ɨɨn‑s.
Kueʼe millón tau‑s nuu‑s.
25 Ña tuu na xa najuñaʼa‑s,
te n‑taʼu tniu se kunxaʼnu jan xa na kuyaʼu se tau tvini jan xiʼin ñadɨʼɨ‑s,
daʼya‑s,
ntdaa xaxii‑s xa na naniʼi se kunxaʼnu jan tvini‑s.
26 N‑xe juiin xiti se ijan nuu se n‑xiaʼan nuu tvini,
te n‑jaʼan‑s:
“Kundetu kuee‑n.
Kundaʼu ini ñaʼa‑n chi nataxi‑da ntdantuʼu tvini‑n”,
kuu‑s,
xiaʼan‑s.
27 Xaxeʼe xa n‑kundaʼu ini ñaʼa se n‑xiaʼan nuu tvini jan,
ñatu n‑kidayɨka‑s xa nandajan‑s tvini‑s,
ni ɨɨn centau ña n‑najeʼen‑s,
te n‑dayaa‑s se n‑xo tau jan.
28 Te juan nuʼu se n‑xo tau kueʼe millón jan,
te n‑nanitnaʼa‑s xiʼin ɨnka se xinokuechi nuu se kunxaʼnu jan.
Dɨuni tau se ijan nuu‑s,
ko xaku ni tau‑s.
N‑tnɨɨ‑s dujun se ijan.
N‑nukuita‑s dakueʼne‑s‑sɨ te xiaʼan‑s:
“Nataxi xa tau‑n nuu‑r.”
29 N‑xe juiin xiti se ijan nuu‑s te n‑jaʼan‑s:
“Kundetu kuee‑n.
Kundaʼu ini ñaʼa‑n chi nachiyaʼu‑da tvini‑n.”
30 Ñatu n‑juini‑s xa kundetu‑s,
te n‑xe ndeka‑s‑sɨ vekaa.
N‑jaʼan‑s nuu‑s xa nde na nachiyaʼu‑s ntdaa tvini‑s;
ijan dada kee‑s.
31 N‑ka teku dava ka se ka xinokuechi nuu se kunxaʼnu jan xa n‑kida se n‑xo tau kueʼe millón,
te yo vichi n‑ka tnau ini‑s te n‑ka xe juña tnuʼu‑s se kunxaʼnu jan ntdaa xa n‑kuu.
32 Ijan dada n‑kana se kunxaʼnu jan se n‑xo tau tvini nuu‑s.
Xiaʼan‑s:
“Se loko kuu‑n.
Kuiʼa kaa kuiʼa xito‑n.
Ñatu n‑nandajan juexa‑r xa n‑xo tau‑n nuu‑r chi n‑xijan taʼu‑n nuu‑r xa na kundaʼu ini ñaʼa‑r,
te n‑kundaʼu ini ñaʼa‑r.
33 ¿Nakuenda ña n‑kixdɨkɨ‑n xa io xa kundaʼu ini‑n se n‑xo tau tvini nuu‑n na n‑kundaʼu ini ñaʼa ruʼu?”,
kuu‑s,
xiaʼan‑s.
34 N‑kiti ini se kunxaʼnu,
te ndeka‑s‑sɨ juaʼan vekaa xa chindiʼu ñaʼa se xndee vekaa.
Ndeʼe ka kida uʼu se yaʼa se xyɨndiʼu.
Kɨndiʼu‑s nde na nachiyaʼu‑s ntdaa xa tau‑s.
35 Duʼa kada ñaʼa Taa‑ro Ianyuux nux ma taxkanu ini‑n ñayiu n‑kida ñaʼa ɨɨn xa n‑kida ñaʼa‑i —kuu‑ia,
n‑jaʼan‑ia.