N‑dama nuu Jesús, te n‑koko daʼma niʼno‑ia
17
Nu n‑yaʼa iñu kɨu,
te ndeka dɨɨn Jesús Spedrua,
xiʼin Jacobo xiʼin Sua,
ñani Jacobo juaʼan koio ɨɨn yuku dujun.
2 Te n‑dama ñɨɨ‑ia.
Te n‑ndii nuu‑ia ná ndii ngandii.
N‑ndukuixi daʼma‑ia,
te koko ná koko ɨɨn xa datnuni.
3 Dana ini n‑ka xini‑s Moisés xiʼin Elías xa ka ndantuʼu‑s xiʼin Jesús.
4 Te n‑jaʼan Spedru nuu‑ia:
—Dito,
naka vaʼa xa n‑kixee‑ro yaʼa.
¿Vatuka xa kadavaʼa‑da uni veʼe yutnu vixi a?
Ɨɨn ku kuu veʼe‑n,
ɨnka ku kuu veʼe Moisés,
te ɨnka ku kuu veʼe Elías.
5 Nɨni jaʼan‑s te n‑ndixi vikó nuʼu nde nuu ñuʼu te n‑ka daʼu‑s nuu vikó jan.
Te n‑jaʼan Ianyuux xiti vikó jan:
—Ia yaʼa kuu Daʼya Yɨɨ mani‑r.
Yo kudɨ ini‑r xa kida‑ia tniu‑r.
Kunini koio xa jaʼan‑ia.
6 Nu n‑ka teku ndruni se ndeka‑ia juaʼan tnuʼu ijan,
te n‑ka xe juiin xiti‑s,
chi yo ndeʼe n‑ka yuʼu‑s.
7 N‑xe tuʼa Jesús nuu xnii xiti‑s.
N‑tnɨɨ ñaʼa‑ia,
te xiaʼan‑ia nuu‑s:
—Ndojuiin koio.
Maxku yuʼu‑n.
8 N‑ka ndonenuu‑s te ña n‑ka xini ka‑s Moisés xiʼin Elías.
Mee nga Jesús n‑ndoo xiʼin‑s.
9 Nɨni vax nuu koio‑s xiʼin‑ia yuku,
n‑jaʼan‑ia nuu‑s:
—Maxku ñaʼa jaʼan koio‑n nuu ñayiu xa dijan n‑ka xini‑n.
Nde na nandoto ruʼu,
Ia kuu ñayiu,
dada jaʼan koio‑n.
10 Te n‑ka xijan tnuʼu‑s‑ia:
—Nux mee‑n kuu Ia kuu ñayiu,
¿nakuenda ka jaʼan se ka tuʼa vaʼa ley n‑chidotnuni Moisés xa io xa kiʼna ka Elías ndixi?
11 Xiaʼan Jesús nuu‑s:
—Ndaa xa se n‑xo kuu ná n‑xo kuu Elías,
kiʼna ka‑s n‑kida xa natu ini ñayiu xa n‑ka kida‑i kuechi.
Dɨuni n‑kida‑s xa n‑ka nduu‑i ñayiu vaʼa anu.
12 Xandaa xa xá n‑ndixi‑s,
ko ña n‑ka xini ñayiu jundu n‑kuu‑s.
N‑ka kida ñaʼa ñayiu davaʼa nga xa n‑ka juini‑i xa kada‑i‑sɨ.
Vax kuyatni kɨu dani kada uʼu ñaʼa ñayiu ruʼu,
Ia kuu ñayiu —kuu Jesús,
xiaʼan‑ia.
13 Ijan dada n‑ka kutnuni ini‑s xa Sua n‑kakuneʼe‑ia.
N‑ndadavaʼa Jesús seluchi tnaʼa kueʼe xiyɨʼɨ
14 N‑naxee‑ia xiʼin‑s nuu xyuku dava ka daña xiʼin ñayiu n‑ka taka,
te n‑xe tuʼa ñaʼa ɨɨn se n‑xe tuʼa ñaʼa,
te n‑xe juiin xiti‑s nuu‑ia.
15 N‑jaʼan‑s:
—Dito,
kundaʼu ini‑n daʼya yɨɨ‑da chi kueʼe xiyɨʼɨ tnaʼa‑s.
Yo ndaʼu kuu‑s.
N‑kukueʼe vuelta ndua niʼno‑s nuu nuʼu,
nuu ndute du.
16 Ndeka‑da‑s n‑kixi nuu se dakuaʼa‑n,
ko ñayo‑s n‑ndaku xa ndadavaʼa‑s‑sɨ.
17 Te n‑jaʼan Jesús nuu‑da ɨɨn ɨɨn‑da:
—Ndoʼo,
ñayiu io vitna,
ñatu ka kukanu ini ñaʼa vaʼa‑n.
Unu loko‑n.
¿Nadaa ka kɨu ndoñuʼu xa kutuu‑ro?
¿Kuiti nadaa ka kɨu nadaa ka ñuu kundee ini‑r?
Ijan dada xiaʼan‑ia nuu se ndeka daʼya‑s n‑xee:
—Juan kueka daʼya‑n.
18 Te n‑kudeen Jesús nuu xaloko ñuʼu ñaʼa,
te n‑kee‑i anu‑s.
Hora ijan ni n‑ndvaʼa seluchi ijan.
19 Ijan dada juaʼan dɨɨn koio‑da xiʼin‑ia,
te n‑ka xijan tnuʼu‑da‑ia:
—¿Nakuenda ña n‑ka ndaku‑da xa kineʼe‑da xaloko jan?
20-21 Te n‑jaʼan Jesús nuu‑da ntdaa‑da:
—Ña n‑ka ndaku‑n xaxeʼe xa ña ka kukanu ini‑n Ianyuux.
Nux xandaa xakuiti ka kukanu ini‑n‑ia,
juini ñatu ka kukanu ini vaʼa‑n‑ia,
nux juñaʼa‑n nuu tnduu yaʼa:
“Xiko juiin.
Juaʼan ɨnka lado.”
Te xiko juiin.
Nux xandaa xakuiti ka kukanu ini‑n‑ia,
ndaku‑n xa kada‑n davaʼa nga milagru —kuu‑ia,
n‑jaʼan‑ia.
22 Ijan dada n‑ka ndixi‑da xiʼin‑ia distrito Galilea.
Ijan n‑jaʼan ntuku‑ia nuu‑da ntdaa‑da:
—Xá kuyatni xa kada ɨɨn se kada xa tnɨɨ ñaʼa juxtixia ruʼu,
Ia kuu ñayiu.
23 Kaʼni ñaʼa‑s,
te kɨu kuu uni nandoto‑r —kuu Jesús.
Nu n‑ka teku‑da xa n‑jaʼan‑ia,
yo vichi n‑ka tnau ini‑da.
N‑xiaʼan Jesús tvini kuu xiʼin veñuʼu
24 N‑ka nangondita‑da xiʼin‑ia Capernaum.
Ijan xtuu se ka xijan tvini kuu xiʼin veñuʼu.
N‑ka xijan tnuʼu‑s Spedru:
—¿Xiaʼan maestru‑n tvini kuu xiʼin veñuʼu‑ro a?
25 N‑jaʼan Spedru:
—Joon —kuu‑s,
xiaʼan‑s.
Ijan dada n‑kɨu Spedru xiʼin Jesús veʼe‑ia,
te kiʼna ka‑ia n‑jaʼan.
N‑xijan tnuʼu‑ia‑s:
—Simón,
¿Nax xani ini‑n?
Se taxnuni nuu ñayiu ñuñayiu,
¿jundu nuu ka xijan‑s tvini?
¿Ka xijan‑s tvini nuu ñayiu ñuu‑s a ka xijan‑s tvini nuu ñayiu ɨnka ñuu a?
26 Xiaʼan Spedru:
—Ka xijan‑s tvini nuu ñayiu ɨnka ñuu.
Xiaʼan Jesús nuu‑s: