N‑jaʼan se saduceu xiʼin se fariseu nuu Jesús xa na kada‑ia ɨɨn milagru
16
Ijan n‑ka xee se fariseu xiʼin se saduceu nuu Jesús.
N‑ka juini‑s xa kundeʼa‑s nuu kuaʼa‑ia kada‑ia milagru a ñaʼa.
2 Te xiaʼan‑ia nuu‑s:
—Na juan keé ngandii,
te ka jaʼan‑n:
“Vaʼa ndii tnee chi n‑ndukueʼe xeʼe andɨu.”
3 Datne neʼe ka jaʼan‑n:
“Juun dau ndeʼe te kane tachi vitna chi n‑ndukueʼe andɨu,
te iin vikó.”
Ka kutnuni ini‑n nax yaʼa xaxeʼe xa xndeʼa‑n andɨu,
ko xa xndeʼa‑n seña Ianyuux ña ka kutnuni ini‑n nax yaʼa.
4 Ndoʼo,
ñayiu io vitna,
ka juini‑n xa kada‑r milagru kundeʼa‑n.
Ñayiu loko ka kuu‑n,
chi ka kida‑n yɨka kuechi xiʼin ñadɨʼɨ ña n‑tnundaʼa xiʼin‑n.
Xaxeʼe xijan ma jini koio‑n milagru ka juini‑n xa kundeʼa‑n.
Diko ni jini koio‑n xa yaʼa‑r ná n‑yaʼa Jonás —kuu Jesús,
xiaʼan‑ia.
Ijan dada juaʼan‑ia ɨnka lado yuʼu mar,
te n‑dandoo ñaʼa‑ia.
Levadura se fariseu xiʼin se saduceu
5 Ijan dada juaʼan koio daña,
se dakuaʼa ñaʼa‑ia xiʼin barcu te n‑nanitnaʼa‑da xiʼin‑ia ɨnka lado yuʼu mar jan.
Ijan n‑ka najaʼan‑da xa ña n‑ka neʼe koio‑da tila.
6 Te n‑jaʼan Jesús nuu‑da ntdaa‑da:
—Chinuu koio janda kaa levadura se fariseu xiʼin se saduceu,
te koo koio‑n cuedado.
7 Ka xiaʼan tnaʼa‑da:
—Duʼa jaʼan‑ia xaxeʼe xa ña n‑ka neʼe‑ro tila.
8 Xaxeʼe xa n‑kutnuni ini‑ia xa n‑ka ndatnuʼu‑da,
te n‑jaʼan‑ia:
—¿Nakuenda ka ndatnuʼu‑n xa ña tuu na tila xneʼe‑n?
Naka ña ka kukanu ini ñaʼa‑n.
9 ¿Ta kutnuni ka ini koio‑n a?
¿Ñayo‑n xnaʼa na n‑xio oʼon ni tila na n‑ka xaxi oʼon mil seyɨɨ a?
¿Nax kuu xa ña xnaʼa‑n nadaa yɨka n‑ka dachitu‑n pedazo tila n‑kendoo n‑ka nadataka‑n?
10 ¿Ña xnaʼa‑n na n‑xio uxa ni tila te n‑ka xaxi koon mil seyɨɨ a?
¿Ña xnaʼa‑n nadaa ndoʼo naʼnu n‑ka dachitu‑n pedazo tila n‑kendoo a?
11 ¿Nakuenda ña ka kutnuni ini‑n xa ñadu tila n‑kakuneʼe‑r na n‑jaʼan‑r xa chinuu koio‑n janda kaa levadura se fariseu xiʼin se saduceu te koo koio‑n cuedado?
—kuu‑ia,
n‑jaʼan‑ia.
12 Ijan dada n‑ka kutnuni ini‑da xa tnuʼu kandee n‑jaʼan‑ia.
Ñatu n‑jaʼan‑ia xa chinuu koio‑da janda kaa levadura kɨu tila,
chi xa na chinuu koio‑da xa dakuaʼa se fariseu xiʼin se saduceu te maxku jandixa koio‑da xijan.
N‑jaʼan Spedru nuu Jesús xa dɨu‑ia kuu Cristu
13 Ijan dada juaʼan koio‑da xiʼin Jesús nuu nani Cesarea Filipo.
Nu n‑ka xee‑da ijan,
n‑xijan tnuʼu ñaʼa‑ia ntdaa‑da:
—Ruʼu,
Ia kuu ñayiu,
¿Jundu kuu‑r ka jaʼan ñayiu?
14 Te ka xiaʼan‑da:
—Dava ñayiu ka jaʼan xa Sua Bautista kuu‑n,
dava‑i ka jaʼan xa Elías kuu‑n.
Dava tuku‑i ka jaʼan xa Jeremías a ɨnka se n‑jaʼan nuu ñayiu xa n‑jaʼan Ianyuux kuu‑n.
15 Te n‑jaʼan‑ia nuu‑da ntdaa‑da:
—¿Te ndoʼo,
jundu kuu‑r ka jaʼan‑n nuu ñayiu?
16 Te xiaʼan Simón Pedro:
—Cristu,
Daʼya Yɨɨ Ianyuux ndixa kuu‑n.
17 Te xiaʼan‑ia nuu‑s:
—Taʼu kuu ndoʼo,
Simón,
daʼya yɨɨ Jonás,
ñadu ñayiu n‑kachi tnuʼu ñaʼa xaʼa,
chi Taa‑ro Ianyuux,
Ia tuu andɨu n‑kachi tnuʼu ñaʼa.
18 Ruʼu jaʼan nuu‑n:
Dɨu‑n kuu Spedru te kuenda kɨu toto kuu‑n,
te kuenda kɨu veñuʼu kuu ñayiu ka kukanu ini ñaʼa ruʼu,
te nuu toto jan kadavaʼa‑r veñuʼu‑r.
Kada‑n xa na kukueʼe ka ñayiu kukanu ini ñaʼa.
Juini kuu Kuiʼna xa ma kukanu ini ñaʼa ñayiu,
ko kukanu ini ñaʼa naʼi‑i,
te dananitaʼu‑r‑yɨ.
19 Kada‑r xa jaʼan‑n nuu ñayiu nax io xa kada‑i xa kɨu tnaʼa‑i nuu ñayiu ka jandixa xa taxnuni Ianyuux nuu‑i.
Tnuʼu jaʼan‑n kuu ná kuu ndakaa.
Ntdaa ñayiu ñatu ñu ini Ianyuux xa yaa‑i nuu Kuiʼna xa jɨʼɨn‑i andɨu,
dɨuni ma dayaa‑n‑yɨ nuu Kuiʼna xa jɨʼɨn‑i andɨu.
Ntdaa ñayiu xá ñu ini Ianyuux xa yaa‑i nuu Kuiʼna xa jɨʼɨn‑i andɨu,
dɨuni dayaa‑n‑yɨ nuu Kuiʼna xa jɨʼɨn‑i andɨu —kuu‑ia,
xiaʼan‑ia.
20 Ijan dada n‑jaʼan‑ia nuu‑da ntdaa‑da,
xa maxku jaʼan koio‑da nuu ñayiu xa dɨu‑ia kuu Cristu.
N‑kakuneʼe Jesús xa kuú‑ia
21 Daa n‑kixeʼe Jesús xa kachitnuʼu ñaʼa‑ia ntdaa daña,
se dakuaʼa ñaʼa‑ia nuu nax yaʼa.
N‑jaʼan‑ia xa io xa jɨʼɨn‑ia Jerusalén,
te io xa kada uʼu ñaʼa sexaʼnu ka taxnuni nuu ñayiu país‑ro xiʼin dutu ka taxnuni xiʼin se ka tuʼa vaʼa ley n‑chidotnuni Moisés.
Dɨuni n‑jaʼan‑ia xa io xa kaʼni ñaʼa koio‑s te nandoto‑ia nuu uni kɨu.
22 Te ndeka dɨɨn Spedru Jesús juaʼan ɨɨn lado xa n‑kanandee‑s‑ia xa daa n‑jaʼan‑ia,
te dɨuni xiaʼan‑s:
—Maxku ndiʼa Ianyuux daa yaʼa‑n,
Maestru.
23 N‑ngokoo‑ia,
te n‑nukondeʼa‑ia Spedru te xiaʼan‑ia nuu‑s:
—Xiko juiin,
Satanás,
chi dadaʼan‑n xa kada‑r tniu Ianyuux.
Xani ini‑n ná xani ini ñayiu;
ñatu xani ini‑n ná xani ini Ianyuux.
24 Ijan dada n‑jaʼan‑ia nuu‑da ntdaa‑da:
—Nux ndeda‑n juini xa nkuitandijun ñaʼa‑n,
kande ini koio xa ka kukajan ini‑n,
te jun ini koio‑n xa kuú‑n ná ñu ini ɨɨn se doko curuxi‑s xa nkuitakaa dika‑s.
Ijan dada nkuitandijun ñaʼa koio‑n.
25 Ñayiu ña ka juini xa kuú‑i xaxeʼe‑r,
dakuita‑i anu‑i,
ko ñayiu na kuu xaxeʼe‑r,
kutuu‑i xiʼin Ianyuux nɨkava nɨkuita andɨu.
26 Nux ndeda‑n,
na kunevaʼa ntdaa xa io ñuñayiu dakuita‑n anu‑n,
te ña tuu nax kineʼe‑n.
Juini na diko ɨɨn ñayiu ntdaa xa nevaʼa‑i,
ma kendita tvini‑i xa chiyaʼu‑i xa maxku kuita anu‑i.
27 Ndixi ruʼu,
Ia kuu ñayiu,
te ma kukuee‑r.
Ndixi‑r xiʼin ángel,
ia ka xinokuechi nuu Ianyuux.
Ndii‑r ná ndii Taa‑r Ianyuux.
Kɨu ijan taxi‑r ɨɨn ɨɨn‑n ɨɨn xa taxi‑r segun nax n‑ka kida‑n.
28 Xandaa xakuiti ma kuú dava ndoʼo,
se xtuu yaʼa,
nde na jini‑n xa na kixeʼe ruʼu,
Ia kuu ñayiu,
xa taxnuni‑r nuu‑n.