Tnuʼu loko ka jaʼan ñayiu kida xa kuu‑i ñayiu loko
15
Ijan dada n‑ka xee se fariseu xiʼin se ka tuʼa vaʼa ley n‑chidotnuni Moisés nuu Jesús.
Se Jerusalén ka kuu‑s.
N‑ka jaʼan‑s nuu‑ia:
2 —¿Nakuenda ña ka jandixa se dakuaʼa‑n xa n‑ka taʼu tniu xixitna‑ro?
Ña ka jandixa‑s xijan,
chi ña ka nandaʼa‑s na ka xaxi‑s dita.
3 Xiaʼan Jesús nuu‑s:
—Ka jandixa‑n xa n‑taʼu tniu xixitna‑n,
te ka kuxee ini‑n nuu Ianyuux.
4 N‑taʼu tniu Ianyuux:
“Najuen tnuʼu koio tadɨʼɨ‑n”,
te “ñayiu na jan kuiʼa taa‑i a dɨʼɨ‑i,
na kaʼni ñaʼa juxtixia.”
5 Nux jaʼan ɨɨn se jaʼan nuu tadɨʼɨ‑s:
“Chindee ñaʼa‑da n‑kuu,
ko ntdaa xa io xa taxi‑da n‑doko‑da nuu Ianyuux”,
6 te ka jaʼan‑n xa ñatu kidayɨka‑i xa chindee‑s tadɨʼɨ‑s.
Duʼa kuu xa ña ka chinuu‑n ley Ianyuux xaxeʼe xa ka dakuaʼa‑n ñayiu xa n‑taʼu tniu xixitna‑n.
7 Ka kida nga‑n xa vaʼa‑n.
Xaxeʼe xa daa ka kida‑n,
vitna n‑xetnaʼa xa n‑jaʼan Isaías.
8 Duʼa n‑chidotnuni‑s xa n‑jaʼan Ianyuux:
Ñayiu Israel ka jaʼan xa ka najuen tnuʼu ñaʼa‑i,
ko ka jaʼan ni nga‑i chi ñatu daa kuu anu‑i.
Ña ka xe ini ñaʼa‑i.
9 Ñatu kee xa ka ndadakaʼnu ñaʼa‑i,
chi ka jandixa‑i ley n‑ka xani ini mee‑i.
Duʼa n‑jaʼan Isaías —kuu Jesús,
n‑jaʼan‑ia.
10 Ijan dada n‑kana‑ia ñayiu xyuku ijan,
te xiaʼan‑ia nuu‑i:
—Kunini koio xa jaʼan‑r na kuaʼa na kutnuni ini‑n nax kuu xa jaʼan‑r.
11 Ñadu xa keé xiti ñayiu kida xa kuu‑i ñayiu loko,
chi tnuʼu ka jaʼan‑i kida xa kuu‑i ñayiu loko.
12 Ijan dada n‑ka xe tuʼa‑da‑ia,
te ka xiaʼan‑da nuu‑ia:
—¿N‑tu ini‑n xa n‑ka tuyɨka se fariseu xaxeʼe tnuʼu n‑jaʼan‑n a?
13 Te n‑jaʼan‑ia nuu‑da ntdaa‑da:
—Kuenda kɨu ɨɨn xa xaʼnu nuu ñuʼu te ñatu xiniñuʼu kuu ntdantuʼu xa ñatu n‑taʼu tniu Taa‑ro Ianyuux,
Ia tuu andɨu.
Tnuʼu‑ro xijan chi ña xiniñuʼu.
14 Maxku chinuu‑n xa n‑ka tuyɨka‑s.
Kuenda kɨu se kuaa ndeka ɨnka se kuaa juaʼan ɨɨn nuu juaʼan‑s ka kuu‑s.
Nux ndeka ɨɨn se kuaa ɨnka se kuaa juaʼan ɨɨn nuu juaʼan‑s,
nduu‑s kekava —kuu Jesús,
n‑jaʼan‑ia.
15 Te xiaʼan Spedru nuu‑ia:
—Kachi tnuʼu ñaʼa‑n nax kuu ntdaa xa dijan n‑najani‑n.
16 Te n‑jaʼan Jesús nuu‑da ntdaa‑da:
—¿Ta yoo ka‑n kutnuni ini koio xa daa nga dakuaʼa ñaʼa‑r vaxi a?
17 ¿Ta keé ini koio ka‑n xa ntdaa xa xaxi‑ro kojon‑ro te keé‑i xiti‑ro a?
Ijan dada juun xiti‑ro.
18 Ñadu xaʼa kida xa kuu ñayiu ñayiu loko,
chi tnuʼu kee yuʼu‑i kida xa kuu‑i ñayiu loko,
chi xijan ñuʼu anu‑i.
19 Xa ñuʼu anu‑i kida xa kuiʼa ka jaʼan‑i xiʼin xa ka xaʼni tnaʼa‑i.
Xijan kida xa kidakuechi ɨɨn seyɨɨ xiʼin ñadɨʼɨ ña kuu ñadɨʼɨ‑s.
Xijan kida xa ka duʼu tnaʼa ñayiu.
Xijan kida xa ka jaʼan ñayiu tnuʼu vete nuu juxtixia.
Dɨuni xijan kida xa ka jan kuiʼa tnaʼa ñayiu.
20 Xijan kida xa kuu‑i ñayiu loko,
ko ñadu xa ña ka nandaʼa ñayiu na ka xaxi‑i kida xa kuu‑i ñayiu loko —kuu Jesús,
n‑jaʼan‑ia nuu‑da ntdaa‑da.
Ñá toʼo n‑kukanu ini Jesús
21 Ijan dada n‑ka kee‑da xiʼin‑ia ijan.
Juaʼan koio‑da xiʼin‑ia ɨɨn distrito ñatu yɨndaʼa Israel nuu katuu ñuu nani Tiro xiʼin Sidón.
22 N‑xe tuʼa ɨɨn ñá distrito ijan Jesús.
Ñá Cananea kuu‑ña:
—Dito —kuu‑ña,
n‑kana‑ña.
Te xiaʼan‑ña:
—Te kuu daʼya dana David,
kundaʼu ini ñaʼa‑n.
Xaloko ñuʼu anu daʼya dɨʼɨ‑da.
Yo ndeʼe kida uʼu ñaʼa‑i.
23 Ni ɨɨn tnuʼu,
ña n‑jaʼan‑ia nuu‑ña.
N‑ka xetuʼa ntdaa daña‑ia,
te tɨtnɨ vuelta n‑ka jaʼan‑da nuu‑ia:
—Taʼu tniu‑n nuu ñá yaʼa xa na nuʼu‑ña veʼe‑ña,
chi ndijun ñaʼa‑ña te kana‑ña.
24 Ijan dada n‑jaʼan Jesús nuu‑ña:
—N‑tundaʼa ñaʼa Ianyuux xa vaxi‑r xa dakuaʼa‑r mee ni ñayiu Israel.
Ka kuu‑i na ka kuu tkachi n‑ka xita.
25 N‑xe tuʼa ka ñá ijan‑ia te n‑xe juiin xiti‑ña nuu‑ia.
Xiaʼan‑ña:
—Dito,
ndadavaʼa‑n daʼya‑da.
26 N‑jaʼan Jesús tnuʼu kandee nuu‑ña:
—Ñatu io vaʼa xa tnɨɨ‑ro tila dichi kuechi,
te juñaʼa‑ro ti ina.
27 Dɨuni n‑jaʼan‑ña tnuʼu kandee nuu‑ia:
—Ndaa jaʼan‑n,
Dito,
ko na ka xaxi ñayiu tila,
te ka xaxi ti ina pedazo tila jungoio kaʼa mexa‑i —kuu‑ña,
xiaʼan‑ña.
28 Ijan dada xiaʼan Jesús nuu‑ña:
—Xandaa xakuiti xa kukanu ini ñaʼa‑n.
Na yaʼa na juini‑n de.
Hora ijan ni n‑ndvaʼa daʼya dɨʼɨ‑ña.
N‑xiaʼan Jesús xa kaxi kueʼe ñayiu
29 N‑ka ndee‑da xiʼin‑ia ijan,
te n‑ka xee ntuku‑da xiʼin‑ia yuʼu mar Galilea.
Ijan dada n‑ka xee‑da xiʼin‑ia ɨɨn yuku,
te n‑nukoo‑ia ijan.
30 Kueʼe ñayiu xndeka ñayiu ka kuʼu n‑ka xee nuu‑ia.
Xndeka‑i ñayiu ña kuu kaka,
ñayiu kuaa,
ñayiu n‑ka ndakuneʼe,
ñayiu ña kuu jaʼan,
xiʼin dava ka ñayiu ka tnaʼa ɨnka kueʼe n‑ka xee.
N‑ka xajan tuu‑i‑yɨ nuu‑ia te n‑ndadavaʼa ñaʼa‑ia.
31 N‑ka xini ñayiu xa n‑jaʼan ñayiu ña n‑kuu jaʼan.
N‑ka xini‑i xa n‑ndvaʼa ñayiu n‑ka ndakuneʼe.
N‑ka xini‑i xa n‑ka ndvaʼa ñayiu n‑ka xika yakua xiʼin xa n‑ka nukondeʼa ñayiu n‑kuaa.
Te n‑ka ndadakaʼnu‑i Ianyuux,
chi ndeka‑ia‑i xaxeʼe xa ka kuu‑i ñayiu Israel.
Nu n‑ka xini‑i ntdaa xa n‑kuu,
n‑ka yuʼu anu‑i.
32 Ijan dada n‑kana ñaʼa Jesús ntdaa daña,
se dakuaʼa ñaʼa‑ia.
Te n‑jaʼan‑ia:
—Ndaʼu ñayiu xyuku yaʼa,
chi n‑kuu uni kɨu xtuu‑ro xiʼin‑i,
te ñatu nax kaxi koio‑i.
Xaxeʼe xa ña tuu nax ka xaxi‑i,
ñatu kuu ini‑r xa taʼu tniu‑r nuu‑i xa nangondita‑i;
nuʼu‑i veʼe‑i na ñaʼa kuita‑i ichi nuʼu‑i —kuu Jesús.
33 Te ka xiaʼan‑da nuu‑ia:
—¿Ndexu niʼi koio‑da tila kaxi ntdaa ñayiu yaʼa xa chitu xiti‑i,
chi ña yoo ñayiu io yaʼa?
34 Te n‑xijan tnuʼu ñaʼa‑ia:
—¿Nadaa tila xneʼe‑n u?
Te ka xiaʼan‑da:
—Uxa xiʼin xaku ni chaka.
35 Te n‑taʼu tniu‑ia nuu ñayiu xa na nkoo koio‑i nuu ñuʼu.
36 N‑tnɨɨ‑ia uxa tila xiʼin chaka,
te n‑xijan taʼu‑ia nuu Ianyuux.
N‑taʼu‑ia tila jan,
te n‑taxi‑ia daña ɨɨn ɨɨn‑da te n‑ka dakee xio‑da nuu ñayiu jan.
37 N‑ka xaxi‑da ntdaa‑da xiʼin‑i xa nde n‑ka chitu xiti‑da xiʼin‑i.
Te n‑ka nadataka‑da pedazo kuechi n‑ka kendoo.
N‑ka dachitu‑da uxa ndoʼo naʼnu.
38 N‑ka xaxi koon mil seyɨɨ.
Dɨuni n‑ka xaxi ñadɨʼɨ xiʼin daʼya‑ña,
ko ña n‑ka kaʼu‑da‑ña xiʼin daʼya‑ña.
39 N‑jaʼan‑ia nuu ñayiu xa xá io hora nuʼu koio‑i.
N‑ka n‑ndeé‑da xiʼin‑ia barcu,
te juaʼan koio‑da xiʼin‑ia nuu nani Magdala.