N‑kendodo dɨkɨ Sua Bautista
14
Tiempu ijan n‑xite ndodo xa jaʼan Jesús,
te n‑teku Herodes,
se taxnuni xa kida Jesús.
2 N‑jaʼan‑s nuu se ka xinokuechi nuu‑s:
—Dɨu‑s kuu Sua Bautista.
N‑nandoto‑s.
Xijan kuu xa kuaʼa‑s kada‑s milagru —kuu Herodes,
n‑xiaʼan‑s.
3-4 Duʼa n‑kuu xa n‑xiʼí Sua.
N‑tnɨɨ Herodes‑sɨ.
N‑duku ñaʼa‑s te n‑chindiʼu ñaʼa‑s vekaa xaxeʼe xa n‑jaʼan Sua nuu‑s xa ñatu n‑jandixa‑s ley Ianyuux.
Daa n‑jaʼan Sua nuu‑s,
chi tuu‑s xiʼin Herodías,
ñá kuu ñadɨʼɨ ñani‑s,
se nani Slipe.
5 N‑kuu Herodes xa kaʼni‑s Sua,
ko n‑yuʼu‑s xa ndandita koio ñayiu distrito ijan,
chi ka xini‑i xa Sua n‑kuu se jaʼan tnuʼu Ianyuux nuu ñayiu.
6 Kɨu n‑naxee yoo kɨu n‑kaku Herodes,
daa n‑xataxeʼe daʼya dɨʼɨ Herodías nuu se xtuu viko‑s,
te yo n‑tna ini‑s xa xataxeʼe‑i.
7 Xijan kuu xa n‑kida‑s uxi dɨkɨ ndaʼa‑s xa n‑chinaa‑s xa davaʼa nga xa kajan‑i juñaʼa‑s.
8 Te n‑jaʼan dɨʼɨ‑i nuu‑i xa na kajan‑i dɨkɨ Sua.
Te daa xiaʼan‑i nuu Herodes:
—Na kava ndodo dɨkɨ Sua Bautista ɨɨn nuu koʼo,
te taxi‑n —kuu‑i,
xiaʼan‑i.
9-10 Yo n‑tnau ini Herodes,
te n‑chi ini‑s,
ko xaxeʼe xa n‑chinaa‑s xiʼin xaxeʼe xa n‑ka teku se ka xaxdeʼñu xiʼin‑s xa n‑chinaa‑s,
xijan kuu xa n‑taʼu tniu‑s nuu se ka xinokuechi nuu‑s xa na kaʼnde‑s dɨkɨ Sua,
te na juñaʼa koio‑s dɨkɨ‑s dichi ijan.
11 Neʼe ɨɨn‑s koʼo kandodo dɨkɨ Sua n‑naxee,
te n‑xiaʼan‑s‑yɨ,
te neʼe‑i koʼo kandodo dɨkɨ‑s juaʼan nuu dɨʼɨ‑i.
12 Se n‑dakuaʼa Sua n‑ka xe kineʼe ñaʼa‑s vekaa,
te n‑ka xe kuxi ñaʼa‑s.
Ijan dada n‑ka xe juña tnuʼu‑s Jesús xa daa n‑yaʼa.
N‑xiaʼan Jesús xa n‑ka xaxi kueʼe ñayiu
13 Nu n‑teku Jesús xa n‑xiʼí Sua,
te n‑ndeé‑ia barcu.
Mee ni‑ia juaʼan nuu ñayo ñayiu io te ñatu nga juun dau.
Nu n‑ka teku ñayiu xndaxio ñuu ijan xa xá juaʼan‑ia,
te n‑ka xiko nduu‑i yuʼu mar xa xndijun‑i‑ia juaʼan,
te daña,
se n‑dakuaʼa ñaʼa‑ia,
xndijun‑da‑ia juaʼan koio xiʼin ɨnka barcu.
14 Nu n‑kane‑ia barcu,
te n‑xini‑ia kueʼe ñayiu xyuku ijan.
N‑kundaʼu ini‑ia‑i,
te n‑ndadavaʼa‑ia ñayiu ka kuʼu.
15 Nu n‑kundiʼi ngandii,
te n‑ka xetuʼa ntdaa‑da‑ia.
Ka xiaʼan‑da:
—Ñayo ñayiu io yaʼa ka diko xa jueen‑ro xa kaxi‑ro te vax ñini.
Tundaʼa‑n ñayiu ya xa na jɨʼɨn‑i ñuu kuechi xndaxio yatni xa njueen koio‑i xa kaxdini‑i.
16 N‑jaʼan‑ia:
—Ña kidayɨka‑i xa jɨʼɨn koio‑i xa njueen‑i xa kaxi‑i.
Juñaʼa koio xa na kaxi‑i.
17 Te ka xiaʼan‑da:
—Ñatu kueʼe xa xneʼe‑da vaxi xa kaxi‑ro.
Oʼon ni tila xiʼin uu ni chaka.
18 Te n‑jaʼan‑ia:
—Juan jeʼen koio.
19 N‑taʼu tniu‑ia xa na nkoo koio ñayiu jan nuu ite.
N‑tnɨɨ‑ia oʼon tila jan xiʼin nduu chaka jan te n‑nukondeʼa‑ia andɨu te n‑xijan taʼu‑ia nuu Ianyuux.
N‑taʼu dava‑ia tila jan te n‑taxi‑ia ntdaa daña,
se dakuaʼa ñaʼa‑ia,
xa dakexio‑da nuu ñayiu xyuku jan.
20 N‑ka xaxi‑da ntdaa‑da xiʼin ñayiu jan xa nde n‑ka chitu xiti‑da xiʼin‑i.
Te n‑ka nadataka‑da pedazo n‑ka kendoo te n‑ka dachitu‑da uxi uu yɨka.
21 N‑ka xaxi naxa oʼon mil seyɨɨ.
Dɨuni n‑ka xaxi ñadɨʼɨ xiʼin daʼya‑ña,
ko ña n‑ka kaʼu‑da‑ña xiʼin daʼya‑ña.
N‑xika Jesús nuu mar
22 Ijan dada n‑jaʼan‑ia nuu ntdaa mee‑da xa na ndeé koio‑da barcu xa na nangondita koio‑da nɨni xiaʼan‑ia nuu ñayiu xa nangondita koio‑i;
nuʼu‑i veʼe‑i.
Te duʼa n‑ka kida‑da.
23 Nu n‑yaʼa n‑jaʼan‑ia xa ndixi koio ñayiu,
te juaʼan mee ni‑ia yuku xa kajan taʼu‑ia nuu Ianyuux.
Nu n‑kunee dani tuu naʼi‑ia ijan.
24 Xñutuu daña xiti barcu xa ka ndixi‑da.
Nu n‑ka kudava‑da xiʼin barcu nuu mar,
ndeʼe xe kandava barcu nuu ndute,
chi yo ndeʼe kane tachi.
25-26 Antecas xa tuu,
n‑ka xini‑da‑ia xa xika‑ia nuu mar,
te duʼa juan xee‑ia do nuu ka ndixi‑da.
Yo n‑ka yuʼu‑da.
N‑ka xiaʼan tnaʼa‑da xa anu kuu xa n‑ka xini‑da.
Xaxeʼe xa yo n‑ka yuʼu‑da xee n‑ka kana‑da.
27 Dana ini n‑jaʼan‑ia nuu‑da:
—Maxku yuʼu koio‑n.
Maxku chi ini koio‑n.
Mee‑r kuu Jesús.
28 Te xiaʼan Spedru nuu‑ia:
—Maestru,
nu ndaa xa mee‑n kuu Jesús,
kada‑n xa na kaka‑da nuu ndute xa na xetnaʼa ñaʼa‑da.
29 Xiaʼan Jesús nuu‑s:
—Neʼe.
N‑nane Spedru barcu te n‑xika‑s nuu mar te n‑kuyatni‑s nuu‑ia.
30 N‑xini Spedru xa yo kane tachi te ndeʼe xe kandava ndute.
Nu n‑xini‑s xijan,
te n‑yuʼu‑s.
N‑kixeʼe nduxi‑s nuu‑te te xee n‑kana‑s:
—Maestru,
dakaku ñaʼa‑n.
31 Ñama n‑dakaa Jesús ndaʼa‑ia te n‑tnɨɨ‑ia Spedru.
Xiaʼan‑ia nuu‑s:
—Ñatu kukanu ini ñaʼa vaʼa‑n.
¿Nakuenda n‑xe tnɨɨ anu‑n?
32 N‑ndaa‑s xiʼin Jesús barcu.
Dana ini n‑nujuiin tachi xa n‑kane‑i.
33 Nu n‑ndeé‑ia barcu,
n‑ka xe juiin xiti‑da nuu‑ia xa n‑ka ndadakaʼnu‑da‑ia.
Ka xiaʼan‑da:
—Xandaa xakuiti xa dɨu‑n kuu Daʼya Yɨɨ Ianyuux.
34 N‑ka yaʼa‑da xiʼin‑ia xiʼin barcu jan ɨnka lado yuʼu mar,
te n‑ka xee‑da yatni nuu nani Genesaret.
35 N‑ka najini ñayiu ñuu ijan Jesús,
te n‑ka xian tnuʼu‑i ñayiu dava ka ñuu xndatuu yuʼu mar katuu yatni ñuu‑i xa n‑xee Jesús ijan.
Nu n‑ka teku ñayiu ijan xijan,
te xndeka‑i ñayiu ka kuʼu n‑ka xee nuu‑ia.
36 Yo n‑ka xijan taʼu‑i nuu‑ia xa na juejoon‑ia xa juini nga ndɨkɨ xeʼe daʼma‑ia na tnɨɨ‑i.
N‑xejoon‑ia,
te n‑ka ndvaʼa‑i ntdaa‑i.