N‑kakuneʼe Jesús ñayiu ka dandoo tnaʼa
19
Nu n‑xinokava xa n‑jaʼan Jesús,
te n‑ka kee‑da xiʼin‑ia Galilea.
N‑ka kixi‑da xiʼin‑ia yatni yuʼu ndute xika deʼva Jordán distrito Judea.
2 Kueʼe ñayiu n‑ka xe kuitandijun ñaʼa,
te n‑ndadavaʼa‑ia ñayiu ka kuʼu.
3 Ijan n‑ka xee se fariseu xa kajan tnuʼu‑s‑ia xa kototnuni‑s‑ia.
Ka xiaʼan‑s:
—¿Io ley Ianyuux jaʼan xa io vaʼa xa dandoo ɨɨn seyɨɨ ñadɨʼɨ‑s te kadakutu‑s tutu xa dandoo‑s‑ña xaxeʼe xa n‑kida‑ña ɨɨn xa ña n‑tna ini‑s a?
4 Te n‑jaʼan‑ia:
—¿Nax kuu xa ña ka kaʼu‑n nuu yodotnuni xa na n‑kidavaʼa Ianyuux ñayiu,
n‑kidavaʼa‑ia seyɨɨ xiʼin ñadɨʼɨ xa kutuu‑s nduu‑s?
5 Dɨuni yodotnuni xa n‑jaʼan‑ia:
“Xijan kuu xa dandoo solteru tadɨʼɨ‑s te xe kotuu‑s xiʼin ñadɨʼɨ‑s.
Kuenda kɨu idii nga ñayiu n‑ka nduu‑s.”
6 Ñatuka ka kuu‑s uu ñayiu chi n‑ka nduu‑s idii nga ñayiu.
Xaxeʼe xa Ianyuux n‑danitnaʼa ñaʼa,
xijan kuu xa maxku yoo kada xa dandoo tnaʼa ñayiu n‑ka tnundaʼa —kuu Jesús,
xiaʼan‑ia.
7 Ijan dada n‑ka xijan tnuʼu ka‑s‑ia:
—Nuxa daa io,
¿nakuenda n‑taʼu tniu Moisés xa ɨɨn se dandoo ñadɨʼɨ‑s,
na kadakutu‑s tutu yodotnuni xa dandoo‑s‑ña,
te ma kuneʼe kuenda ka‑s‑ña?
8 Xiaʼan‑ia nuu‑s:
—Xaxeʼe xa unu loko‑n,
xijan kuu xa n‑xejoon Moisés xa dandoo koio‑n ñadɨʼɨ‑n,
ko ñadu duʼa n‑kuu xa kiʼna nuu.
9 Ruʼu jaʼan xa nux ña n‑kidakuechi davaʼa nga ñadɨʼɨ io yɨɨ xiʼin ɨnka seyɨɨ,
te kadakutu yɨɨ‑ña tutu xa dandoo‑s‑ña te natnundaʼa‑s xiʼin ɨnka ñadɨʼɨ,
kada‑s kuechi —kuu Jesús.
10 Ijan dada ka xiaʼan daña,
se dakuaʼa ñaʼa‑ia:
—Nux kuechi kuu xa dandoo ɨɨn seyɨɨ ñadɨʼɨ‑s,
vaʼa ka nux maxku koo ñadɨʼɨ‑s.
11 N‑jaʼan Jesús:
—Ñadu ntdaa ñayiu kutnuni ini tnuʼu yaʼa,
chi mee ni ñayiu chindee ñaʼa Ianyuux kutnuni ini.
12 Kueʼe se n‑kakuneʼe io,
te ña ka kukajan ini‑s ñadɨʼɨ chi daa vaxi‑s.
Dava‑s n‑ka ndada neʼe ñaʼa se n‑ka ndada neʼe ñaʼa xa maxku kukajan ini‑s ñadɨʼɨ.
Dava‑s xndedi ini xa maxku kada‑s yɨka kuechi xaxeʼe xa jaʼan‑s nuu ñayiu nax io xa kada‑i xa kɨu tnaʼa‑i nuu ñayiu taxnuni Ianyuux nuu‑i nde andɨu,
chi daa juini‑s.
Se kutnuni ini tnuʼu yaʼa,
na jandixa‑s.
N‑xijan taʼu Jesús nuu Ianyuux xaxeʼe sekuechi xiʼin dichi kuechi
13 Ijan dada xndeka ñayiu sekuechi xiʼin dichi kuechi n‑ka xee nuu Jesús xa kajan ndodo‑ia ndaʼa‑ia dɨkɨ‑i,
te kajan taʼu‑ia nuu Ianyuux xaxeʼe‑i.
Daña,
se n‑dakuaʼa ñaʼa‑ia,
n‑ka kanandee‑da ñayiu ijan xaxeʼe xa daa n‑ka kida‑i.
14 Te n‑jaʼan Jesús nuu‑da ntdaa‑da:
—Daa na kandeka naʼi ñayiu sekuechi xiʼin dichi kuechi kixi nuu‑r te maxku dadaʼan koio‑n‑yɨ,
chi ñayiu n‑ka kɨu tnaʼa nuu ñayiu ka jandixa xa taxnuni Ianyuux nuu‑i kuu ná kuu dichi kuechi xiʼin sekuechi.
15 N‑xinokava xa n‑xajan ndodo‑ia ndaʼa‑ia dɨkɨ sekuechi xiʼin dichi kuechi jan.
Ijan dada n‑kee‑ia.
Juaʼan‑ia,
te xndijun‑da‑ia juaʼan.
N‑ndatnuʼu Jesús xiʼin ɨɨn se kuika
16 Nu n‑xee‑ia ɨɨn nuu n‑xee‑ia te n‑xee ɨɨn se n‑xee ijan.
N‑jaʼan‑s:
—Maestru,
¿nax io xa kada‑da xa kundito‑da nɨkava nɨkuita?
—kuu‑s,
xiaʼan‑s.
17 N‑jaʼan‑ia nuu‑s:
—¿Nakuenda xijan tnuʼu ñaʼa‑n ruʼu nax kuu xavaʼa?
Ianyuux xini xijan chi mee dii ni‑ia vaʼa.
Nux juini‑n xa kutuu‑n xiʼin‑ia nɨkava nɨkuita,
jandixa xa n‑taʼu tniu‑ia —kuu‑ia,
xiaʼan‑ia.
18 Xiaʼan‑s nuu‑ia:
—¿Ndeda ley‑ia u?
Xiaʼan Jesús:
—Maxku kaʼni‑n ndɨyɨ.
Maxku kava‑n xiʼin ñadɨʼɨ ñatu kuu ñadɨʼɨ‑n.
Maxku duʼu‑n.
Maxku jaʼan vete‑n nuu juxtixia.
19 Koo‑n xañuʼu nuu tadɨʼɨ‑n.
Juemani ñayiu ná xemani‑n mee‑n —kuu‑ia,
xiaʼan‑ia.
20 Xiaʼan se jan:
—Ntdaa xaʼa jandixa‑da vaxi.
¿Nax ka ndoñuʼu‑da xa kada‑da?
21 Xiaʼan ntuku‑ia:
—Nux juini‑n xa maxku kundido kutau ka‑n kuechi n‑kida‑n,
juan nuʼu veʼe‑n,
diko‑n ntdaa xaxii‑n,
dakexio‑n tvini niʼi‑n nuu ñayiu ka kundaʼu te kada Ianyuux xa kutu kuika‑n andɨu.
Ijan dada kixi‑n te nkuitandijun ñaʼa‑n.
22 Nu n‑teku‑s xijan,
yo n‑kukoʼyo ini‑s,
chi yo kueʼe xaxii‑s io te juan nuʼu‑s.
23 Te n‑jaʼan Jesús nuu ntdaa daña se dakuaʼa ñaʼa‑ia:
—Xa xaxeʼe xa ndaʼu yaʼa ñayiu kuika xa kɨu tnaʼa‑i nuu ñayiu taxnuni Ianyuux nuu‑i,
xaku ni‑i ndaku xa kɨu tnaʼa‑i.
Xandaa xakuiti daa yaʼa.
24 Na jaʼan ntuku‑r:
“Va yachi ka yaʼa ɨɨn kɨtɨ kuu camello yau yɨkɨ nakiku dada xa kɨu tnaʼa ɨɨn ñayiu kuika nuu ñayiu taxnuni Ianyuux nuu‑i” —kuu Jesús,
n‑jaʼan‑ia.
25 Nu n‑ka teku daña,
se dakuaʼa ñaʼa‑ia tnuʼu yaʼa,
te n‑ka yuʼu anu‑da xaxeʼe xa ñatu n‑ka xani ini‑da xa daa jaʼan‑ia.
Ka xiaʼan tnaʼa‑da:
—Nux ñatu ka nanitaʼu ñayiu kuika,
naka ñayiu ka kundaʼu ku nanitaʼu.
26 N‑nukondeʼa ñaʼa Jesús te n‑jaʼan‑ia:
—Ña yoo kuaʼa xa kada‑i xijan,
ko Ianyuux na ɨɨn xa ma kuaʼa‑ia xa kada‑ia —kuu‑ia.
27 Xiaʼan Spedru nuu‑ia:
—Maestru,
naʼa‑n xa ntdaa daña n‑ka dandoo xaxii‑da,
te n‑ka xe kuitandijun ñaʼa‑da.
Te,
¿nax niʼi koio‑da u?
28 N‑jaʼan Jesús nuu‑da ntdaa‑da:
—Xandaa xakuiti xa kɨu na nukavatuu ñuñayiu xee,
kunukoo ruʼu,
Ia kuu ñayiu,
nuu silla nuu taxnuni‑r xa ndukaʼnu‑r.
Te dani ndoʼo,
se dakuaʼa‑r kunukoo koio‑n nuu nɨn uxi uu silla xa taxnuni koio‑n,
te ndadandaa koio‑n kuechi daʼya dana nɨn uxi uu xixitna‑ro ka kuu daʼya yɨɨ Israel.
29 Ñayiu n‑dandoo veʼe‑i,
a n‑dandoo‑i ñani‑i a kuʼa‑i,
a taa‑i a dɨʼɨ‑i a daʼya‑i,
a ñuʼu‑i xaxeʼe ruʼu,
kueʼe xa n‑ka dandoo‑i,
ko kueʼe ka niʼi‑i nuu Ianyuux.
Ntdaa‑i nandoto te kutuu‑i xiʼin Ianyuux nɨkava nɨkuita.
30 Kueʼe ñayiu kunuu vitna,
nduu‑i ñayiu dakuu nga.
Ñayiu dakuu nga io vitna,
nduu‑i ñayiu ndandɨʼɨ na xee kɨu.