N‑kida Jesús xa n‑xaxi koon mil ñayiu
8
Kɨu ijan n‑ka taka kueʼe xa kueʼe ñayiu nuu tuu Jesús.
Te ña tuu nax kax koio‑i io.
N‑kana Jesús se dakuaʼa‑ia,
te n‑xiaʼan‑ia:
San Marcos 8:1-21
2 —Kundau ini‑r ñayiu yaʼa.
Xá n‑kuu uni kɨu xtuu‑i xiʼin‑ro yaʼa,
te ña tuu nax kax koio‑i io.
3 Nux tundaʼa‑r‑yɨ nuʼu koio‑i veʼe‑i,
te ma kaxi‑i,
te kuita koio‑i doko ichi,
chi dava‑i yo xika vaxi‑i.
4 N‑ka jaʼan se dakuaʼa‑ia:
—¿Ndexu niʼi‑ro tila xa kax koio‑i?,
chi ñayo ñayiu io yaʼa.
5 N‑xijan tnuʼu‑ia:
—¿Nada tila io?
N‑ka jaʼan‑s:
—Uxa.
6 N‑taʼu tniu‑ia xa na nkoo koio ñayiu nuu ñuʼu ijan.
N‑tnɨɨ‑ia uxa tila jan,
te n‑xiaʼan‑ia xa n‑kutaʼu‑ia nuu Ianyuux.
N‑taʼu dava‑ia tila,
te n‑xiaʼan‑ia nuu se dakuaʼa‑ia,
xa na dakee xio‑s,
xa kax koio ñayiu.
N‑ka dakee xio‑s tila nuu ntdaa ñayiu jan.
7 Dɨuni n‑xio uni koon chaka kuechi.
N‑xiaʼan Jesús xa n‑kutaʼu‑ia nuu Ianyuux,
te n‑jaʼan‑ia xa na dakee xio‑s chaka tuku.
8 Te vaʼa n‑ka xaxi ntdaa ñayiu jan.
Te n‑ka najeʼen se dakuaʼa‑ia pedazu ndoo ka.
Uxa yɨka naʼnu n‑ka dachitu‑s.
9 Te naxa koon mil ñayiu n‑ka xaxi kɨu ijan.
Te n‑tundaʼa Jesús ñayiu jan juan nuʼu koio‑i veʼe‑i.
10 Te n‑keé mee‑ia xiʼin se dakuaʼa‑ia barcu,
te n‑ka xee‑s distrito Dalmanuta.
Se fariseu, n‑ka juini‑s xa kada Jesús ɨɨn milagru
11 Te ijan n‑ka xee se fariseu,
te n‑ka kixeʼe‑s xa jantnaʼa tnuʼu‑s xiʼin Jesús.
N‑ka juini‑s xa kada‑ia ɨɨn milagru,
ɨɨn seña vaxi nde andɨu.
Ka xitotnuni‑s‑ia.
12 N‑xenu ini‑ia,
te n‑jaʼan‑ia:
—¿Nax kuu xa ka xijan ñayiu yaʼa ɨɨn milagru?
Xandaa kuu xa jaʼan‑r.
Nuu ñayiu yaʼa,
ma dandeʼa‑r‑yɨ ni ɨɨn.
13 Te n‑dandoo‑ia se fariseu jan.
Ɨnka vuelta n‑keé‑ia barcu,
te n‑xee‑ia nde ɨnka lado yuʼu ndute kaʼnu jan.
Xa ka kida se fariseu
14 Te n‑ka ndunaa se dakuaʼa‑ia xa kaneʼe‑s tila jɨʼɨn.
Idini tila neʼe‑s xiti barcu jan.
15 Te n‑taʼu tniu Jesús:
—Koo koio cuedado.
Ñatu xiniñuʼu levadura se fariseu,
ni levadura se kunxaʼnu ka Herodes.
16 Te n‑ka jaʼan‑s nuu ɨɨn‑s nuu ɨnka‑s:
—Duʼa jaʼan‑ia xaxeʼe xa ña tuu na tila neʼe‑ro.
17 Te n‑teku Jesús nax n‑ka jaʼan‑s,
te n‑xiaʼan‑ia:
—¿Nax kuu xa ka ndatnuʼu‑n xa ña tuu na tila neʼe‑n?
¿Ta kutnuni ka ini‑n a?
¿Ñatu juini‑n xa kutnuni ini‑n?
18 ¿Io nduchi nuu‑n,
ko ña xndeʼa vaʼa‑n a?
¿Io doʼo‑n,
ko ña xnini vaʼa‑n a?
¿Ñatu xnaʼa‑n nax n‑kuu a?
19 Na n‑taʼu dava‑r oʼon tila,
na n‑ka xaxi oʼon mil seyɨɨ,
te,
¿nada yɨka n‑chitu pedazu ndoo ka n‑ka nakueka‑n?
N‑ka jaʼan‑s:
—Uxi uu.
20 —Te na n‑taʼu dava‑r uxa tila,
na n‑ka xaxi koon mil ñayiu,
te,
¿nada yɨka n‑chitu pedazu ndoo ka n‑ka nakueka‑n?
N‑ka jaʼan‑s:
—Uxa.
21 N‑xiaʼan‑ia nuu‑s:
—Te dani,
¿ta ñaʼa ka kutnuni ini‑n a?
N‑ndadavaʼa Jesús ɨɨn se kuaa ñuu nani Betsaida
22 Te ijan n‑ka xee‑s ñuu nani Betsaida.
Ijan xndeka ñayiu ɨɨn se kuaa nuu tuu Jesús.
N‑ka xijan‑i‑ia xa tenee‑ia ndaʼa‑ia nduchi nuu‑s.
San Marcos 8:22-38
23 N‑tnɨɨ‑ia ndaʼa‑s,
te ndeka‑ia‑s juaʼan nde yuñuu.
Ijan n‑xajan‑ia dɨɨ‑ia nduchi nuu‑s,
te n‑tenee‑ia ndaʼa‑ia nuu‑s.
N‑xijan tnuʼu‑ia‑s:
—¿Nukondeʼa‑n itaʼu a?
24 Ndeʼa‑s,
te n‑jaʼan‑s:
—Ndeʼa‑da seyɨɨ.
Ná xndaa yutnu xndaa‑s,
ko ka xikonuu‑s.
25 Ɨnka vuelta n‑tenee‑ia ndaʼa‑ia nduchi nuu‑s,
te n‑kida‑ia xa nukondeʼa‑s.
N‑ndvaʼa‑s,
te nukondeʼa kaxi‑s ntdaa,
nde xika.
26 N‑tundaʼa‑ia‑s xa nuʼu‑s veʼe‑s.
N‑xiaʼan‑ia:
—Maxku ndɨu‑n ñuu katuu yaʼa vitna.
Maxku najani‑n nuu ni ɨɨn ñayiu yaʼa nax n‑kuu.
N‑jaʼan Spedru xa Jesús kuu Ia n‑tundaʼa Ianyuux
27 Te n‑kee Jesús xiʼin se dakuaʼa‑ia juaʼan‑ia ntdaa ñuu kuechi xndatuu yatni Cesarea Filipo.
Ichi ijan n‑xijan tnuʼu‑ia se dakuaʼa‑ia:
—¿Ndese kuu‑r ka jaʼan ñayiu?
28 N‑ka jaʼan‑s:
—Ka jaʼan‑i xa Sua Bautista kuu‑n.
Ka jaʼan ɨnka ñayiu xa Elías kuu‑n.
Te ɨnka‑i ka jaʼan xa ɨɨn se xian tnuʼu tnuʼu Ianyuux nuu ñayiu xá n‑kuu kueʼe kuia kuu‑n.
29 N‑xijan tnuʼu‑ia:
—Te mee‑n,
¿ndese kuu‑r ka jaʼan mee‑n?
N‑xiaʼan Spedru:
—Ndixi kuu Cristu.
Ia n‑tundaʼa Ianyuux kuu‑n.
30 N‑taʼu tniu‑ia nuu‑s xa maxku jaʼan koio‑s nuu ni ɨɨn ñayiu jundu kuu‑ia.
N‑xio xa kuú Jesús
31 Te n‑kixeʼe‑ia xa dakuaʼa‑ia‑s xa Se kuu ñani tnaʼa ñayiu,
io xa kueʼe vida yaʼa‑s.
N‑jaʼan‑ia xa ma jandixa ñaʼa sexaʼnu ka taxnuni nuu ñayiu Israel.
Ni dutu ka taxnuni,
ni se ka tuʼa vaʼa tnuʼu n‑chidotnuni Moisés,
ma jandixa ñaʼa koio‑s.
N‑jaʼan‑ia xa kaʼni ñaʼa koio‑s,
te nuu uni kɨu nandoto‑ia.
32 Kaxi n‑jaʼan‑ia.
Xijan kuu xa n‑kee dɨɨn Spedru xiʼin‑ia juaʼan‑s,
te n‑kixeʼe‑s xa kudeen‑s nuu‑ia,
chi ña n‑juini‑s xa duʼa koo.
33 Ko n‑nkonenuu Jesús te n‑nukondeʼa‑ia se dakuaʼa‑ia,
te n‑kudeen‑ia nuu Spedru.
N‑xiaʼan‑ia:
—¡Xiko juiin,
Satanás!
Ñatu chinuu‑n xa juini Ianyuux.
Diko ni xa xani ini seyɨɨ xani ini mee‑n vitna.
34 N‑kana‑ia kueʼe ñayiu jan xiʼin se dakuaʼa‑ia,
te n‑xiaʼan‑ia:
—Ɨɨn seyɨɨ,
nux juini‑s xa kunduu‑s xiʼin mee‑r,
ma kuaʼa kada‑s xa juini mee‑s.
Kuu ná kuu xa doko‑s curuxi nuu kuú‑s.
Io xa kande ini‑s xa juini mee‑s,
xa kada‑s ná kida mee‑r.
35 Davaʼa nga ñayiu juini xa kada‑i xa juini mee‑i,
ma kutuu vaʼa‑i.
Ko nux kande ini‑i xa juini mee‑i,
xa jandixa ñaʼa‑i mee‑r te juña tnuʼu‑i tnuʼu vaʼa Ianyuux nuu ñayiu,
te kutuu vaʼa‑i.
36 Chi,
¿nax vaʼa nux niʼi ɨɨn ñayiu ntdaa xa io ñuñayiu,
ko duʼa chiyaʼu‑i ntdaa xa kuu‑i xiʼin nde anu‑i dakuita‑i?
37 Chi,
¿nax juñaʼa‑i xa najueen‑i anu‑i?
Ña tuu.
38 Ná kuu ñadɨʼɨ dandoo yɨɨ‑ña kuu ñayiu xtuu vitna.
Meni xa uʼu ka kida‑i.
Ɨɨn seyɨɨ,
nux kujanuu‑s xaxeʼe mee‑r xiʼin tnuʼu‑r nuu ñayiu yaʼa,
te dani kujanuu mee‑r xaxeʼe mee‑s,
hora na ndixi‑r xiʼin xa taxnuni Taa‑r.
Se kuu ñani tnaʼa ñayiu kuu‑r,
te ndixi‑r xiʼin ángel,
ia ka xinokuechi nuu Ianyuux.