Xa kee anu ñayiu kida xa ña io ndoo ka anu‑i
7
Nuu tuu Jesús,
n‑ka xee se fariseu xiʼin se tuʼa vaʼa tnuʼu n‑chidotnuni Moisés.
N‑ka kee‑s Jerusalén xa jɨʼɨn‑s nuu tuu Jesús.
San Marcos 7:1-23
2 N‑ka xini‑s xa dava se dakuaʼa Jesús ka xaxi tila hora ñatu io ndoo ndaʼa‑s.
Ña n‑ka nandaʼa‑s xa kuneʼe ii‑s.
Te xijan n‑ka tekuechi ñaʼa se fariseu.
3 Chi se fariseu xiʼin ntdaa ñayiu Israel,
ña xaxi‑s nux ña nandaʼa‑s xa kuneʼe ii‑s.
Ka kida‑s ná io ná juaʼan ntdaa xa n‑xetniu taxaʼnu tnetnu‑s.
4 Hora xeʼen‑s nuyaʼu,
te io xa kuchi ñɨɨ‑s antecas xa kaxi‑s.
Te kueʼe ka io ɨnka xa xetniu‑s.
Najini‑s vasu‑s,
tndoʼo‑s,
kɨdɨ kaa‑s,
yuu‑s,
xa neʼe ii‑s.
5 N‑ka xijan tnuʼu se fariseu xiʼin se tuʼa vaʼa tnuʼu n‑chidotnuni Moisés:
—¿Nakuenda ña ka jandixa se dakuaʼa‑n tnuʼu n‑taʼu tniu taxaʼnu tnetnu‑ro?
¿Nakuenda xa ña io ndoo ndaʼa‑s te ka xaxi‑s?
6 N‑jaʼan Jesús:
—Vaʼa n‑kakuneʼe ñaʼa Isaías mee‑n.
Na n‑xian tnuʼu‑s tnuʼu Ianyuux nuu ñayiu,
n‑kakuneʼe‑s se io ɨɨn xa jaʼan‑s ko ɨnka xa kida‑s:
Jaʼan ñayiu yaʼa xa xemani ñaʼa‑i mee‑r,
ko ña ndaa,
chi ñatu jandixa ñaʼa anu‑i.
7 Ñatu xiniñuʼu xa ndadakaʼnu ñaʼa‑i.
Meni xa taʼu tniu seyɨɨ dakuaʼa‑i ñayiu.
8 N‑ka dandoo‑n tnuʼu taʼu tniu Ianyuux,
te kida‑n xa xetniu seyɨɨ.
Ka najini‑n tndoʼo‑n,
vasu‑n,
te ntdaa ɨnka xa ɨɨn nuu kuu,
ko ñatu ka kida‑n xa juini Ianyuux.
9 ʼÑatu ka chinuu‑n xa taʼu tniu Ianyuux,
xa kada naʼi ka‑n xa xetniu mee‑n.
10 Chi n‑jaʼan Moisés:
“Koo xañuʼu nuu taa‑n,
nuu dɨʼɨ‑n.”
N‑jaʼan‑s:
“Ɨɨn ñayiu,
nux kuiʼa jaʼan‑i taa‑i,
dɨʼɨ‑i,
io xa kaʼni‑n‑yɨ.”
11 Ko jaʼan mee‑n xa ɨɨn seyɨɨ kuaʼa xa ndundeʼe‑s nuu taa‑s,
dɨʼɨ‑s,
te jaʼan‑s:
“Ma kuaʼa‑da xa chindee ñaʼa‑da,
chi ntdaa xa nevaʼa‑da Corbán kuu.”
(Corbán juini kachi:
“Xaʼa kuu ɨɨn xa n‑doko‑da nuu Ianyuux.”)
12 Te ñatu ka xejoon‑n xa kada‑s ni ɨɨn xaxeʼe taa‑s,
dɨʼɨ‑s.
13 Te ka taʼu tniu‑n nuu ñayiu xa kada mee‑i ná kida mee‑n.
Xá n‑ka dandoo‑n tnuʼu taʼu tniu Ianyuux.
Te kueʼe ɨnka xa ɨɨn nuu xiʼin xijan ka kida‑n.
14 Ɨnka vuelta n‑jaʼan Jesús nuu ntdaa ñayiu ijan.
N‑xiaʼan‑ia:
—Kunini koio‑n ntdaa‑n,
te kutnuni ini koio‑n.
15 Ni ɨɨn xa keé xiti ñayiu ma kada xa ñatu neʼe ii ñayiu jan.
Xa kee anu ñayiu,
kida xa ñatu neʼe ii‑i.
16 Xandaa kuu xa io doʼo‑n.
Io xa kunini‑n.
17 N‑dandoo‑ia ñayiu,
te n‑kɨu‑ia veʼe,
te n‑ka xijan tnuʼu se dakuaʼa‑ia nax juini kachi tnuʼu jan.
18 N‑xiaʼan‑ia:
—¿Dani mee‑n tuku,
ñatu ka kutnuni ini‑n a?
¿Ta kutnuni ka ini‑n xa ɨɨn xa xaxi ɨɨn ñayiu ma kuaʼa xa kada xa ma kuneʼe ii‑i a?
19 Ña kɨu xa xaxi‑i nde anu‑i.
Diko ni xiti‑i keé‑i.
Te dada ndexio ñaʼa‑i.
—Xa kee anu ñayiu,
kida xa ña io ndoo ka anu‑i.
21 Nde anu‑i vaxi xa xani ini‑i xa uʼu.
Kidi‑i xiʼin ñayiu ña n‑tnundaʼa xiʼin‑i,
o dandoo tnaʼa‑i,
o kaʼni‑i ndɨyɨ.
22 Duʼu‑i,
o kukajan ini‑i xaxii ɨnka ñayiu,
o xa uʼu kida‑i nuu ɨnka ñayiu.
Dandaʼu‑i ñayiu,
o kida‑i davaʼa nga xa juini mee‑i,
o xini uʼu‑i ɨnka ñayiu.
Jantnuʼu‑i ñayiu,
o najuen tnuʼu‑i mee‑i,
o kuxee ini‑i.
23 Ntdaa xa uʼu kee nde anu ñayiu,
te kida xa ña io ndoo ka anu‑i.
Ɨɨn ñadɨʼɨ n‑jandixa Jesús
24 Ijan n‑kee Jesús juaʼan‑ia distrito Tiro,
distrito Sidón.
Ijan n‑kɨu‑ia ɨɨn veʼe.
Ña n‑juini‑ia xa tekutnuʼu ñayiu xa tuu‑ia ijan,
ko ña n‑kuaʼa xa kɨvaʼa‑ia.
San Marcos 7:24-37
25 Chi yachi n‑tekutnuʼu ɨɨn ñadɨʼɨ xa tuu‑ia ijan.
Ñuʼu tachi uʼu anu daʼya dɨʼɨ‑ña.
N‑xee‑ña nuu tuu Jesús,
n‑xe juiin xiti‑ña nuu‑ia.
26 Te ñadɨʼɨ jaʼan tnuʼu griegu kuu‑ña.
Ñatu kuu‑ña ñadɨʼɨ ñuu Israel,
ñadɨʼɨ Sirofenicia kuu‑ña.
Te n‑xijan‑ña nuu Jesús xa kineʼe‑ia tachi uʼu anu daʼya dɨʼɨ‑ña.
27 N‑xiaʼan‑ia:
—Ditna ka kada‑r xa kax koio ñayiu ñuu Israel.
Ñatu xiniñuʼu,
nux tnɨɨ‑r xa ka xaxi ñayiu mee‑r,
xa dajane‑r nuu ti‑ina.
28 N‑xiaʼan‑ña:
—Joon,
dito.
Ko ti‑ina nukoo kaʼa mexa,
xax koio‑tɨ pedazu kuechi nungoio,
hora ka xaxi dichi kuechi io veʼe.
29 N‑xiaʼan‑ia:
—Xaxeʼe xa duʼa n‑jaʼan‑n,
juan nuʼu veʼe‑n vitna.
Xá n‑kee tachi uʼu anu daʼya dɨʼɨ‑n.
30 Te juan nuʼu‑ña veʼe‑ña.
Na n‑naxee‑ña,
n‑naniʼi‑ña daʼya‑ña.
Kaa‑i nuu xito‑i ndetatu‑i,
chi xá n‑kee tachi uʼu n‑ñuʼu anu‑i.
N‑ndadavaʼa Jesús ɨɨn se ña jaʼan te doʼo‑s
31 N‑kee Jesús distrito Tiro,
te n‑yaʼa‑ia ñuu nani Sidón.
Ijan n‑xikonuu‑ia distrito Decápolis,
xa xee‑ia nde ndute kaʼnu nani Mar Galilea.
32 Ijan xndeka ñayiu ɨɨn se kuʼu nuu tuu‑ia.
Se doʼo kuu‑s,
te dɨuni ñatu jaʼan vaʼa‑s.
N‑ka xijan‑i‑ia xa kajan ndodo‑ia ndaʼa‑ia se kuʼu,
xa ndadavaʼa‑ia‑s.
33 N‑dandoo‑ia ñayiu jan,
te ndeka dɨɨn‑ia se kuʼu juaʼan.
Dɨkɨ ndaʼa‑ia n‑tnɨɨ‑ia yau doʼo‑s,
te xiʼin dɨkɨ ndaʼa‑ia n‑xajan‑ia dɨɨ‑ia yaa‑s.
34 Nukondeʼa‑ia andɨu,
n‑xenu ini‑ia,
te n‑xiaʼan‑ia:
—¡Efata!
(Tnuʼu juini kachi:
¡Na najaan doʼo‑s!)
35 Hora ijan ni n‑ndvaʼa‑s.
N‑teku‑s te n‑ndvaʼa yaa‑s,
te kaxi n‑najaʼan‑s.
36 Te n‑taʼu tniu Jesús xa maxku najani koio ñayiu jan nax n‑kuu.
N‑taʼu tniu‑ia xa maxku jaʼan koio‑i,
ko kueʼe ka n‑ka jaʼan‑i.
37 N‑ka yuʼu‑i te n‑ka kuvete‑i.
N‑ka xiaʼan nuu tnaʼa‑i:
—Vaʼa kida‑ia ntdaa.
Kida‑ia xa nukonini ñayiu doʼo,
te kida‑ia xa najaʼan ñayiu ñatu jaʼan.