5 Ey 25 abꞌil skꞌinal naj Joaquim yet jix oc naj yin reyal, 11 abꞌil jix yakꞌ reyal bꞌey Jerusalén. Caw pena jix yute sbꞌeybꞌal sattaj Jehová. 6 Jaxa naj Nabucodonosor, sreyal Babilonia jix jul yakꞌ jowal yetoj naj, jix kꞌal-le ey naj yetoj chꞌen cadena tol bronce cꞌal eloj, jix yiꞌontoj bꞌey Babilonia. 7 Jix yiꞌontoj Nabucodonosor tuꞌ wan mitxꞌkꞌabꞌe yet stemplo Jehová, jix yaon octoj bꞌey yul stemplo sdiosal bꞌey Babilonia.

8 Jaꞌ jantaj to skꞌaneal naj Joaquim cꞌal spena bꞌeybꞌal, cꞌal tzet jix yunne, jatuꞌ tzꞌibꞌebꞌilcan bꞌey yul an yuunal skꞌaneal ebꞌ sreyal Israel cꞌal ebꞌ yet Judá. Jaxa jun scꞌaal chi yij Joaquín jix oc can yin reyal sqꞌuexeloj.

9 Jaꞌ yet jix ẍaꞌon el yich naj Joaquín yakꞌon reyal, ey 18 abꞌil skꞌinal naj; oxebꞌ xꞌaaw yetoj laonebꞌ cꞌu jix yakꞌ reyal bꞌey Jerusalén, caw pena jix yute sbꞌeybꞌal sattaj Jehová.

10 Jaꞌ yet bꞌabꞌel xꞌaaw yet jun abꞌil tuꞌ, jix yalon naj rey Nabucodonosor tol chi iꞌletoj bꞌey Babilonia, yetoj wan mitxꞌkꞌabꞌe tol caw ey stool bꞌey stemplo Jehová. Jix yaon oc Sedequías, yican Joaquín yin reyal bꞌey Judá, cꞌal bꞌey Jerusalén.

11 Jaꞌ naj Sedequías tuꞌ, ey 21 abꞌil skꞌinal yet jix oc naj yin reyal, 11 abꞌil jix yakꞌ reyal bꞌey Jerusalén. 12 Caw pena cꞌal jix yute sbꞌeybꞌal sattaj Jehová. Ma sjije tzet jix yal Jeremías, naj ẍejabꞌ Dios. 13 Ian jix yiꞌel sbꞌa yalan ẍejbꞌanil naj rey Nabucodonosor, jaꞌton jun bꞌey jix yakꞌ can stiꞌ, tol junne oj yute snaꞌbꞌal yetoj. Junelne tol jix yakꞌ pitbꞌoj el snaꞌbꞌal, ma xa yal scꞌul jix oc yin jijemal tet Jehová, sDiosal Israel.

14 Yetoj cꞌal pax oj, jaꞌ masanil ebꞌ yaaw yeoc bꞌey Judá, ebꞌ yakꞌomal xaambꞌal, yetoj masanil ebꞌ conobꞌ, jix oc cꞌal ian yunen spenail ebꞌ. Jaꞌ sbꞌeybꞌal wanxa nación chi sbꞌeybꞌalne ebꞌ, catuꞌ jix yetnentoj stemplo Jehová ebꞌ, jaꞌton jun sicꞌbꞌil can el yu bꞌey Jerusalén. 15 Jaꞌ Jehová sDiosal ebꞌ yetoj smam icham, jaꞌ jix tenchanen cꞌal ebꞌ yu ebꞌ yakꞌomal servil, yutol caw ey scamcꞌulal yibꞌan sconobꞌ, cꞌal yin scalubꞌal. 16 Jaꞌ ebꞌ tuꞌ, tucꞌal jix tzeele ebꞌ ẍejabꞌ Dios yu ebꞌ, cꞌal sbꞌuchwa ebꞌ yin ebꞌ, cꞌam niꞌoj yeloc apnoj ebꞌ ẍejabꞌ Dios yul sat ebꞌ, masantaꞌcꞌal jix tit sjowal scꞌul Naj yibꞌan sconobꞌ, ma xa oc tucan sjowal scꞌul Dios.

17 Jaꞌ Jehová jix chejontej naj sreyal ebꞌ Caldeo yakꞌon jowal yin ebꞌ, jix tejle cam ebꞌ achꞌe yetoj chꞌen espada bꞌey sattaj eltoj templo, cꞌamxa cꞌal smimancꞌulal yin ebꞌ achꞌe cꞌal yin ebꞌ kꞌopo, tam wal yin ebꞌ icham ánima tol cꞌamxa yip. Jaꞌ Jehová jix aon oc masanil ebꞌ yul skꞌabꞌ jun rey tuꞌ. 18 Masanil wan mitxꞌkꞌabꞌe yet stemplo Dios, wan mimej cꞌal wan niẍtej, cꞌal jantaj bꞌeomal ey bꞌey templo, cꞌal masanil sbꞌeomal naj rey yetoj yet ebꞌ eyoc yin yaawilal yetoj, jix yiꞌtoj naj rey Nabucodonosor bꞌey Babilonia. 19 Jix snuslecan tzꞌaꞌ stemplo Dios yu ebꞌ Caldeo, jix smakꞌon ey wejlabꞌoj smuroal conobꞌ Jerusalén ebꞌ, jix yaon oc skꞌakꞌal mimej na ebꞌ bꞌey spalacio naj rey, jix smakꞌon can poꞌo masanil tzetyetal ey stool ebꞌ.

20 Jix lawi tuꞌ xin, jaꞌ bꞌey Babilonia jix iꞌle cantoj ebꞌ ma cam xol jowal tuꞌ. Jix oc can ebꞌ tuꞌ yin yakꞌomaloj servil tet naj rey Nabucodonosor, yetoj cꞌal tet ebꞌ yicꞌaal, masantaꞌcꞌal yet jix yiꞌ wal yip jun nación chi yij Persia. 21 Queywal tuꞌ jix yun yiꞌon sbꞌa tzet jix chejle yal naj Jeremías, jun ẍejabꞌ Dios. Queytuꞌ jix yun xew txꞌotxꞌ txꞌotxꞌ; ma xacꞌal oc mulnail sat txꞌotxꞌ yin 70 abꞌil, yajbꞌan eycantoj ebꞌ ánima yin yakꞌomal servil bꞌey conobꞌ Babilonia.

22 Jaꞌ yet bꞌabꞌel abꞌil yoc naj Ciro yin reyal bꞌey Persia, jix yunen can el skꞌane Jehová albꞌilcan el yu jun ẍejabꞌ chi yij Jeremías. Jaꞌ Jehová jix kꞌanabꞌ el yin snaꞌbꞌal naj rey Ciro, yet chi yakꞌon tzꞌibꞌele jun chejbꞌanile yul masanil snación, 23 jix yalon jaxca tiꞌ: Jaꞌ Jehová sDiosal satcan, jaꞌ jix aon oc masanil nación bꞌey sat txꞌotxꞌ txꞌotxꞌ tiꞌ yul jin kꞌabꞌ. Jaꞌ jix alon ey jin tol chin waꞌne a junoj templo bꞌey Jerusalén bꞌey yul yet Judá. Yu tuꞌ xin, yal cꞌal mactxequel jex sconobꞌ Jehová jex tiꞌ, colwa ojabꞌ Jehová je Diosal je yetoj. Jaꞌ tinaniꞌ asiꞌwej tituꞌ, ẍi toj naj rey Ciro tuꞌ.