Jaꞌ An Libro
ESDRAS
Sley Naj Rey Ciro
1
Jaꞌ yet bꞌabꞌel abꞌil yoc naj Ciro yin reyal bꞌey Persia, jaꞌ Jehová jix kꞌanabꞌ yin snaꞌbꞌal naj rey Ciro, yet watxꞌ chi yun tzet albꞌilcan yu jun ẍejabꞌ Dios chi yij Jeremías. Yuxan jix stzꞌibꞌelecan jun ley, yet chi al-le el tet ebꞌ ánima bꞌey yul snación tuꞌ. 2 Jaꞌ naj Ciro sreyal Persia chi alon jaxca tiꞌ: Jaꞌ Jehová sDiosal satcan, jaꞌ jix jin aon oc yin reyal yibꞌan masanil nacionlaj bꞌey sat txꞌotxꞌ tiꞌ. Jaꞌ jix alon ey jin tol chin waꞌne a jun templo bꞌey Jerusalén yul yet Judá. 3 Yu jun tuꞌ xin, yal cꞌal mactxequel tol sconobꞌ jex Jehová, jaꞌ ojabꞌ Naj chi colwa je yetoj. Jaꞌ tinaniꞌ asiꞌwej bꞌey Jerusalén yul yet Judá yu je caꞌ waꞌnen a stemplo Jehová je Diosal, jaꞌton Naj eyecꞌ bꞌey Jerusalén. 4 Je masanil jex tol ey jexto ecꞌ titiꞌ, tol chi skeꞌ je meltzotoj bꞌey Jerusalén, yet chi too je caꞌ waꞌnen a stemplo Dios. Jaꞌ ebꞌ ánima caan je cawilal tuꞌ, colwa ojabꞌ ebꞌ je yetoj yet chi yaontoj chꞌen oro, chꞌen plata yetoj cꞌal tzettaj yetal ebꞌ, cꞌal noꞌ jobꞌbꞌeal noꞌ, catuꞌ chi yakꞌon cꞌal pax wanojxa saꞌbꞌeal ebꞌ yu swaꞌxubꞌal stemplo Dios bꞌey Jerusalén, ẍi jun chejbꞌanile tuꞌ.Ey Jaywan Ebꞌ Israel Jix Meltzotoj Bꞌey Jerusalén
5 Jix lawi tuꞌ xin, jix yakꞌon lista sbꞌa ebꞌ yaaw yeoc xol ebꞌ yicꞌaal Judá cꞌal xol ebꞌ yicꞌaal Benjamín, yetoj masanil ebꞌ yakꞌomal xaambꞌal cꞌal ebꞌ Levita, jaꞌton tet ebꞌ jix kꞌanabꞌ Jehová yin snaꞌbꞌal, yet chi too ebꞌ bꞌey Jerusalén yu stoo scaꞌ waꞌnen a stemplo Dios ebꞌ. 6 Masanil ebꞌ ánima caan scawilal ebꞌ tuꞌ, caw jix colwa ebꞌ, jix yakꞌ chꞌen oro ebꞌ, chꞌen plata, cꞌal tzettaj yetal ey tet ebꞌ, yetoj noꞌ jobꞌbꞌeal noꞌ, cꞌal tzettaj yetal tol ey stool, jix yakꞌon cꞌal yofrenda ebꞌ tol chi tit yin snaꞌbꞌal. 7 Ey cꞌal pax wan mitxꞌkꞌabꞌe yet stemplo Jehová iꞌbꞌiltej bꞌey Jerusalén yu naj rey Nabucodonosor, ey can octoj yul stemplo sdiosal ebꞌ tuꞌ. 8 Jaꞌ naj Ciro, sreyal Persia jix alon tet naj Mitrídates, naj cꞌubꞌam tumin yeocoj, tol chi yiꞌeltej stzetyetal ebꞌ tuꞌ, catuꞌ chi sbꞌisoni, chi yakꞌon tet naj Sesbasar, jaꞌton naj gobernador yeoc bꞌey Judá. 9 Jaꞌ sbꞌisil wan mitxꞌkꞌabꞌe jix akꞌle meltzo tuꞌ, jaꞌton ebꞌ tiꞌ: Ey 30 chꞌen mimej vaso tol oro cꞌal eloj, 1,000 mimej vaso tol plata cꞌal eloj, 29 chꞌen nawax. 10 Ey 30 niẍtej vaso oro cꞌal eloj, 410 niẍtej vaso tol plata cꞌal eloj, ey mi junojxa 1,000 wanxa mitxꞌkꞌabꞌe. 11 Jaꞌ sbꞌisil wan mitxꞌkꞌabꞌe tuꞌ, ey 5,400 yin masanil. Jaꞌ masanil wan tuꞌ jix yiꞌtoj naj Sesbasar, yet jix tit ebꞌ bꞌey Babilonia, catuꞌ jix too ebꞌ bꞌey Jerusalén.