1 Jaxa yet laonebꞌxa cꞌual yoc yet slaonebꞌ xꞌaaw, yet bꞌalonebꞌxa abꞌil yoc naj Sedequías yin reyal, catuꞌ jix apni oc naj rey Nabucodonosor yetoj ebꞌ soldado yakꞌon jowal yin Jerusalén, jix oc joyan ebꞌ yin conobꞌ tuꞌ, jix swaꞌnen ey bꞌulan sbꞌa ebꞌ bꞌey sattaj eltoj conobꞌ tuꞌ, jix swaꞌne a swalubꞌ ebꞌ bꞌey yinlaj smuroal conobꞌ tuꞌ.

2 Joybꞌilxa a jun conobꞌ tuꞌ yu ebꞌ, yet jusluqꞌuebꞌ abꞌil xa yoc naj Sedequías yin reyal.

3 Jaꞌ yet bꞌalonebꞌxa cꞌual yoc yet scan xꞌaaw yet jun abꞌil tuꞌ, caw jix jul jun miman wail bꞌey jun conobꞌ tuꞌ, cꞌamxa niꞌoj tzet watxꞌ chi sloꞌ ebꞌ conobꞌ tuꞌ.

4 Catuꞌ jix sjolontoj jun jolan yin smuroal conobꞌ tuꞌ ebꞌ soldado a Caldeo. Caxcꞌal joybꞌil a conobꞌ tuꞌ yu ebꞌ soldado tuꞌ, jix el cꞌaltaꞌ toj naj rey Sedequías yetoj ebꞌ soldado yet akꞌbꞌalil. Jix eltoj ebꞌ bꞌey snan xol yawo ebꞌ rey, jix ecꞌ eltoj ebꞌ bꞌey jun puerta bꞌey snan xol caabꞌ smuroal conobꞌ tuꞌ, queytuꞌ jix yun yoc ebꞌ yul bꞌe bꞌey jun jobꞌe chi apni bꞌey jaꞌ Jordán.

5 Jaxa pax ebꞌ soldado Caldeo xin, jix too tzajan ebꞌ yintaj ebꞌ, jix michꞌcha naj Sedequías yu ebꞌ bꞌey yacꞌalil conobꞌ Jericó. Jix sajlem cantoj ebꞌ soldado naj Sedequías tuꞌ.

6 Jix mitxꞌle can ey naj rey yu ebꞌ Caldeo tuꞌ, catuꞌ jix yiꞌontoj ebꞌ bꞌey naj sreyal Babilonia eyecꞌ bꞌey Riblá. Jaꞌ tituꞌ jix low xacꞌal yibꞌan Sedequías yu naj rey Nabucodonosor.

7 Sattaj wal naj Sedequías tuꞌ jix tzokꞌle cam ebꞌ yuninal, jal pax naj xin, jix iꞌle eltej sbꞌakꞌ sat naj, jix kꞌal-le ey naj yetoj chꞌen cadena, catuꞌ jix iꞌletoj naj bꞌey Babilonia.

8 Jujebꞌxa cꞌu yet sjoꞌ xꞌaaw yin 19 abꞌil xa yoc naj Nabucodonosor yin reyal bꞌey Babilonia, jix jul naj Nabuzaradán syaawil ebꞌ soldado chi teynen naj rey tuꞌ yetoj ebꞌ soldado bꞌey Jerusalén.

9 Catuꞌ jix snuson can tzꞌaꞌ stemplo Jehová ebꞌ, cꞌal spalacio ebꞌ rey, yetoj cꞌal masanil sna ebꞌ mimej winaj yeocoj.

10 Jix stenon ey ebꞌ soldado a Caldeo masanil smuroal conobꞌ Jerusalén.

11 Jix lawi tuꞌ, jix iꞌletoj ebꞌ ánima jix to colcha can yul conobꞌ tuꞌ yu naj Nabuzaradán, cꞌal ebꞌ jix yaoc sbꞌa yetoj naj rey Nabucodonosor, yetoj cꞌal ebꞌ mulnawom ánima caan tituꞌ.

12 Asanxane ebꞌ caw mebꞌa jix cancan yu naj yet chi mulna ebꞌ yin awo uva cꞌal wanojxa awo chi awlei.

13 Jix smakꞌle poꞌo masanil tzettaj yetal tol bronce ey yul templo, jaxca oy eyoc sattaj templo, cꞌal sbꞌatxlubꞌal yich wan yaliẍ pila yet jaꞌ jaꞌ, cꞌal jun miman pila yu ebꞌ soldado, catuꞌ jix yiꞌontoj chꞌen bronce ebꞌ tuꞌ bꞌey Babilonia.

14 Jix yiꞌontoj sneetal ebꞌ bꞌey chi ey stikꞌakꞌil taan, cꞌal chꞌen lutxꞌbꞌal stzakꞌakꞌ, cꞌal chꞌen iꞌbꞌal el staanil bꞌey chi oc skꞌakꞌal tzejtebꞌal, cꞌal chꞌen mimej cuchara, cꞌal masanil tzetyetal tol bronce chi kꞌanle yet chi oc eyilal tet Jehová.

15 Jix iꞌle cꞌal pax toj wan tzettaj yetal tol oro cꞌal eloj cꞌal chꞌen plata, jaꞌton wan secꞌ, yetoj chꞌen bꞌey chi tzꞌaꞌ incienso sukꞌukꞌi sabꞌ yu naj.

16 Cꞌamxa chi alcha jantaj yalil chꞌen bronce eyoc yin caabꞌ mimej oy yin templo tuꞌ, cꞌal yin jun pila yet jaꞌ jaꞌ, yetoj cꞌal yin wan yich waꞌnebꞌil can yu naj rey Salomón, yu yoc can bꞌey stemplo Jehová.

17 Jaꞌ junjun oy tuꞌ, ecꞌbꞌan waxajebꞌ metro steel. Jaꞌ sjolom wan oy tuꞌ bronce chꞌen cꞌal eloj, ecꞌbꞌan nan scaabꞌ metro yea spimal, jaxa yinlaj sjolom oy tuꞌ txolan cꞌal pax oc yelawil jaxca yili sat teꞌ granada. Jaꞌ wan tuꞌ bronce cꞌal eloj. Laan cꞌal scawxi caabꞌ oy tuꞌ.

18 Jaꞌ naj syaawil ebꞌ soldado chi yij Nebuzaradán, jix yakꞌ mitxꞌle cꞌal pax naj sat yakꞌomal xaambꞌal chi yij Seraías, cꞌal naj Sofonías yet scaabꞌ yakꞌomal xaambꞌal yeocoj, cꞌal oxwan ebꞌ chi teynen bꞌey stiꞌ templo.

19 Jaꞌ bꞌey yul conobꞌ tuꞌ, jix ilcha jun comandante chi ijbꞌan ebꞌ soldado yu, cꞌal pax jowanxa ebꞌ chi akꞌon snaꞌbꞌal naj rey yin junoj kꞌane, yetoj cꞌal pax jun tzꞌibꞌlom chi iꞌon a sbꞌi ebꞌ eyoc yin soldadoal. Ey cꞌal pax junxa 60 ebꞌ ánima caw miman yeloc apnoj yul conobꞌ jix mitxꞌle yu ebꞌ.

20-21 Masanil ebꞌ ánima tuꞌ jix iꞌletoj yu naj Nabuzaradán, sattaj naj sreyal Babilonia, bꞌey conobꞌ Riblá yul yet Hamat. Jaꞌ tituꞌ jix yal naj rey tol chi cam masanil ebꞌ. Queyton tuꞌ jix yun sbꞌejoncan sconobꞌ ebꞌ ánima bꞌey Judá cꞌal xꞌotxꞌ ebꞌ.

22 Jix oc naj Guedalías scꞌaal Ahicam yitxiquin Safán, yin gobernadoral yu naj Nabucodonosor sreyal Babilonia. Jaꞌ jix cancan yilon jantaj to ebꞌ ánima jix can yu bꞌey Judá.

23 Jaꞌ yet jix yabꞌen jun kꞌane tuꞌ ebꞌ syaawil soldado jix to cancan tuꞌ, jix too kꞌanabꞌ ebꞌ yetoj naj Guedalías bꞌey conobꞌ Mizpá. Jaꞌ ebꞌ tuꞌ, jaꞌton Ismael scꞌaal Netanías, Johanán scꞌaal Caréah, Seraías scꞌaal Tanhúmet a conobꞌ Netofá, cꞌal Jaazanías scꞌaal jun winaj a conobꞌ Maacá, jix too cꞌal pax wanxa winaj yetoj ebꞌ.

24 Catuꞌ jix yakꞌon stiꞌ naj Guedalías tet ebꞌ cꞌal tet ebꞌ soldado naj tuꞌ, jix yalon naj jaxca tiꞌ: Cꞌam chex xiw je can yalan ẍejbꞌanil ebꞌ Caldeo tuꞌ, cananwej cꞌal yul jun nación tiꞌ catuꞌ chex oc yalan ẍejbꞌanil naj sreyal Babilonia, yet watxꞌ oj jex elocoj, ẍi naj.

25 Jaxa yet sjuj xꞌaaw xin, jix apni oc naj Ismael scꞌaal Netanías yitxiquin Elisamá, tol yicꞌaal to ebꞌ sreyal Judá yeoc naj. Ey laonwanxa ebꞌ winaj jaꞌjun yetoj, catuꞌ jix makꞌle cam naj Guedalías yu ebꞌ, yetoj ebꞌ a Judea, cꞌal ebꞌ a Caldeo eyecꞌ yetoj bꞌey conobꞌ Mizpá.

26 Yu tuꞌ xin, masanil ebꞌ ánima jix ela ebꞌ bꞌey Egipto yu xiwcꞌulal tet ebꞌ Caldeo. Pilan jix el ebꞌ ánima miman yeloc apnoj, cꞌal ebꞌ cꞌam niꞌoj yeloc apnoj, yetoj cꞌal ebꞌ syaawil ebꞌ soldado.

27 Jaꞌ yet 27 yoc yet lacawebꞌ xꞌaaw yet 37 abꞌil xa yiꞌletoj naj rey Joaquín yin presowomal bꞌey Babilonia, catuꞌ jix oc naj Evil-merodac yin reyal bꞌey Babilonia. Jaꞌ yet sbꞌabꞌel abꞌil yoc naj yin reyal tuꞌ, jix xꞌoxon swatxꞌcꞌulal tet naj Joaquín, jix yiꞌon eltej bꞌey yul preso.

28 Caw yel xacꞌal watxꞌ jix yute snaꞌbꞌal yin naj, yintaj wanxa ebꞌ rey eyoc yul preso bꞌey Babilonia tuꞌ.

29 Jix qꞌuexon el spichil naj Joaquín chi skꞌan yul preso tuꞌ, catuꞌ jix low yetoj naj rey yin jantaj tocꞌal tiempoal iquis ecꞌoj.

30 Catuꞌ jix akꞌle cꞌal masanil tzet jix skꞌanbꞌalne naj masantaꞌcꞌal jix camtoj naj yu naj sreyal Babilonia.