Pit jix yute sbꞌa Sedequías tet naj sreyal Babilonia. 4 Jaꞌ yet laonebꞌ cꞌu yoc yet laonebꞌ xꞌaaw yet bꞌalonebꞌ abꞌil yoc naj Sedequías yin reyal, jix tit Nabucodonosor sreyal Babilonia yin Jerusalén yetoj ebꞌ soldado. Jix jul oc joyan ebꞌ yin conobꞌ tuꞌ yetoj ebꞌ soldado, catuꞌ jix swaꞌnen ey bꞌulan sbꞌa ebꞌ bꞌey sattaj eltoj conobꞌ tuꞌ. Jix swaꞌne swalubꞌ ebꞌ bꞌey yinlaj conobꞌ yet chi yakꞌon eyqꞌueyoj. 5 Joybꞌil xacꞌal a jun conobꞌ tuꞌ, masantaꞌcꞌal jix tzꞌajna jusluqꞌuebꞌ abꞌil yoc Sedequías yin reyal. 6 Jaꞌ yet bꞌalonebꞌxa cꞌual yoc yet scan xꞌaaw yet jun abꞌil tuꞌ, jix jul wal jun miman wail bꞌey yul conobꞌ tuꞌ; cꞌamxa niꞌoj tzet chi sloꞌ ebꞌ ánima. 7 Jix sjolon jun jolan ebꞌ soldado a Caldeo yin smuroal conobꞌ tuꞌ. Caxcꞌal joybꞌilxa a conobꞌ tuꞌ yu ebꞌ soldado, jaꞌ yet akꞌbꞌalil jix ela naj rey yetoj masanil ebꞌ soldado. Jatuꞌ jix ecꞌ eltoj ebꞌ bꞌey snan xol yawo ebꞌ rey, jix ecꞌ el apnoj ebꞌ bꞌey jun puerta bꞌey snan xol caabꞌ muro. Queytuꞌ jix yun yoc ebꞌ yul sbꞌeal bꞌey jun panan chi apni oc bꞌey jaꞌ Jordán. 8 Jix ilchatej ebꞌ, catuꞌ jix ujtele naj rey Sedequías yu ebꞌ soldado yet Babilonia. Jaꞌ bꞌey yacꞌalil Jericó, jix michꞌcha ebꞌ yu ebꞌ. Jix bꞌejlecan naj yu masanil ebꞌ soldado, catuꞌ jix sajlemtoj ebꞌ. 9 Jix michꞌcha ey naj rey Sedequías tuꞌ yu ebꞌ soldado tuꞌ, jix yiꞌontoj ebꞌ yul skꞌabꞌ naj sreyal Babilonia eyecꞌ bꞌey Riblá, bꞌey yul yet conobꞌ Hamat. Jaꞌ tituꞌ jix yal Nabucodonosor tzet oj utele naj Sedequías. 10 Sattaj wal Sedequías tuꞌ jix makꞌle cam ebꞌ scꞌaal, cꞌal yetoj ebꞌ yaaw yeoc bꞌey Judá tuꞌ. 11 Jal pax Sedequías tuꞌ xin, jix chejle iꞌle eltej sbꞌakꞌ sat, jix kꞌal-le ey yetoj chꞌen cadena, catuꞌ jix iꞌletoj preso bꞌey Babilonia. Jaꞌ tituꞌ jix cami.

12 Jaꞌ yet laonebꞌ yoc yet sjoꞌ xꞌaaw yet 19 abꞌil xa yoc Nabucodonosor yin reyal bꞌey Babilonia, jix apni oc Nabuzaradán bꞌey Jerusalén. Sat yaaw yeoc yintaj naj rey Nabucodonosor, catuꞌ yaaw yeoc xol ebꞌ chi teynen naj rey tuꞌ. 13 Jaꞌ jix jul akꞌon tzꞌaꞌ templo yetoj spalacio ebꞌ rey, cꞌal yetoj sna ebꞌ mimej yaaw yeoc bꞌey conobꞌ tuꞌ. 14 Masanil ebꞌ soldado jaꞌjun yetoj tuꞌ, jix smakꞌey smuroal conobꞌ Jerusalén ebꞌ tuꞌ. 15 Catuꞌ jix iꞌletoj ebꞌ ánima yu Nabuzaradán bꞌey Babilonia, jaxca ebꞌ eyto can ecꞌ yul conobꞌ tuꞌ, yetoj cꞌal ebꞌ jix yaoc sbꞌa yetoj naj sreyal Babilonia, cꞌal yetoj junxa bꞌulan ebꞌ conobꞌ tuꞌ. 16 Jaxa cꞌal jaywanxa ebꞌ caw mebꞌa jix cancanoj, yu smulna ebꞌ cꞌal yawon uva ebꞌ.

17 Jaꞌ ebꞌ soldado yet Babilonia tuꞌ jix makꞌon poꞌo masanil mitxꞌkꞌabꞌe tol chꞌen bronce cꞌal eloj bꞌey templo tuꞌ; jaxca yoyal, cꞌal yichlaj, yetoj cꞌal jun miman pila yet jaꞌ. Catuꞌ jix yiꞌontoj masanil chꞌen bronce tuꞌ ebꞌ bꞌey Babilonia. 18 Jix yiꞌon cꞌal pax toj wan sneetal bꞌey chi yambꞌale chꞌen stikꞌakꞌil taan, cꞌal pala, cꞌal wanxa chꞌen chi lotꞌon atej tzetyetal, cꞌal wan mimej palangana, cꞌal chꞌen cucharón cꞌal masanil mitxꞌkꞌabꞌe tol chꞌen bronce chi kꞌanle yet chi oc eyilal. 19 Jacꞌalaꞌ cꞌal pax naj yaaw yeoc xol ebꞌ soldado tuꞌ, jix yiꞌtoj wan mitxꞌkꞌabꞌe tol oro yetoj cꞌal chꞌen plata: Jaxca wan palangana, cꞌal sneetal stzꞌaꞌ kꞌakꞌ, cꞌal mimej secꞌ bꞌey chi yambꞌale chꞌen stikꞌakꞌil taan, cꞌal tzejtebꞌal, cꞌal cucharón, yetoj wan vaso bꞌey chi ale ey vino chi akꞌle yin ofrendail. 20 Ma naꞌcha eloj jantaj wal yalil wan tzetyetal tol bronce chꞌen cꞌal el tuꞌ, jaꞌton wan yakꞌnaj waꞌxoj naj rey Salomón bꞌey templo, jaꞌton caabꞌ oy, yetoj cꞌal jun miman pila bꞌey chi yambꞌale jaꞌ jaꞌ, yetoj cꞌal lacawebꞌ yechel icham wacax chi mitxꞌon ey yich jun pila tuꞌ. 21 Junjun cꞌal oy tuꞌ, ecꞌbꞌan 8 metro steel, yetoj nanoj swaj metro yin; jolan yul, catuꞌ ey 7 centímetro spimal. 22 Junjun cꞌal wan oy tuꞌ eyoc smajil ẍumuc, ecꞌbꞌan caabꞌ metro steel, catuꞌ chꞌen bronce cꞌal eloj. Jaꞌ yinlaj tuꞌ eyoc srejail tol bronce cꞌal eloj, ey xacꞌal oc yechel sat teꞌ granada yelawiloj. Laan cꞌal yeoc caabꞌ oy tuꞌ. 23 Jaꞌ yin junjun srejail eyoc 100 yechel sat teꞌ granada yin, jaꞌ bꞌey miman txequel, ey 96 eyocoj.

24 Jaꞌ naj syaawil ebꞌ soldado chi yij Nabuzaradán jix mitxꞌon Seraías, naj sat yakꞌomal xaambꞌal, cꞌal Sofonías, naj yet scaabꞌ yakꞌomal xaambꞌal, cꞌal yetoj oxwan ebꞌ chi teynen stiꞌ templo. 25 Jaꞌ xol ebꞌ ánima eyto can ecꞌ bꞌey Jerusalén tuꞌ, jix iꞌletoj jun syaawil ebꞌ soldado yetoj jujwanxa winaj eyoc yin yopiso yakꞌon servil naj rey bꞌey conobꞌ tuꞌ, jun sat tzꞌibꞌlom yeoc xol ebꞌ soldado (jaꞌ inen oc slistail ebꞌ,) yetoj cꞌal pax 60 ebꞌ a conobꞌ tol mimej yopiso bꞌey yul sconobꞌal tuꞌ. 26-27 Jaꞌ Nabuzaradán jix iꞌontoj masanil wan tuꞌ bꞌey sattaj naj sreyal Babilonia, jaꞌ tituꞌ eyecꞌ bꞌey Riblá, yul scuenta conobꞌ Hamat. Jaꞌ tituꞌ jix yal naj sreyal Babilonia tol chi makꞌle cam ebꞌ.

Queytuꞌ jix yun yiꞌle el conobꞌ Judá bꞌey yul snación. 28 Jaꞌ sbꞌisil ebꞌ ánima jix iꞌletoj yu Nabucodonosor tuꞌ, jaꞌton ebꞌ tiꞌ: Jaꞌ yet sjuj abꞌil xa yoc yin reyal, ey 3,023 ebꞌ ánima bꞌey Judá jix iꞌletoj; 29 jaꞌ yet 18 abꞌil xin, jix iꞌletoj 832 ebꞌ a Jerusalén; 30 jaꞌ yet 23 abꞌil xin, catuꞌ jix iꞌletoj junxa 745 ebꞌ a Judá yu Nabuzaradán. Yu jun tuꞌ, jix aapnoj sbꞌisil ebꞌ jix iꞌletoj tuꞌ yin 4,600 ebꞌ yin masanil.

31 Jaꞌ yet 25 yoc yet lacawebꞌ xꞌaaw yet 37 abꞌil xa yiꞌletoj naj rey Joaquín yin jaxca presowomal bꞌey Babilonia tuꞌ, jaꞌ yet tuꞌ jix oc naj Evil-merodac yin reyal bꞌey Babilonia. Jaꞌ yet bꞌabꞌel abꞌil yoc naj yin reyal tuꞌ, jix xꞌoxon swatxꞌcꞌulal tet naj Joaquín, jix yiꞌon eltej bꞌey yul preso tuꞌ. 32 Caw yel xacꞌal watxꞌ jix yute snaꞌbꞌal yin naj, yintaj wanxa ebꞌ rey eyoc yul preso bꞌey Babilonia tuꞌ. 33 Jix sqꞌuexon el spichil naj Joaquín chi skꞌan yul preso tuꞌ, catuꞌ jix low yetoj naj rey yin jantaj tocꞌal tiempoal iquis ecꞌoj. 34 Catuꞌ jix akꞌle cꞌal masanil tzetyetal jix skꞌanbꞌalne naj yu naj sreyal Babilonia masantaꞌcꞌal jix camtoj naj.