Oj Qꞌueyle El Babilonia
51
Jix yalon Jehová jaxca tiꞌ:Oj watoj jun miman jow kaꞌeꞌ yibꞌan Babilonia, cꞌal yin ebꞌ Caldeo, oj akꞌle lawoj ey ebꞌ yu.
2 Jaxca wal chi yun xuꞌle el skꞌail ixim tiriw yu kaꞌeꞌ, Queytuꞌ oj utele Babilonia yu ebꞌ scajat; cꞌamxa junoj mactxequel oj caey can ecꞌ bꞌey xꞌotxꞌal yu ebꞌ. Jaꞌ yet oj apnoj oc scꞌual yet oj lawoj ey ebꞌ, yal xacꞌal bꞌey oj tit wan scajat ebꞌ tuꞌ yakꞌon jowal yin ebꞌ.
3 Swaꞌne ojabꞌ sjulbꞌal ebꞌ julwawom. Ya ojabꞌ oc majbꞌal sat julbꞌal ebꞌ xaamscꞌul. Cꞌam ojabꞌ smimancꞌulal ebꞌ yin ebꞌ achꞌe bꞌey Babilonia; lawoj ojabꞌ ey soldado ebꞌ yin junelne.
4 Jaꞌ yul-laj sconobꞌal ebꞌ Caldeo, tol oj ey can telan smimanil ebꞌ ánima makꞌbꞌil cam bꞌey yul-laj scalleal conobꞌ tuꞌ.
5 Caxcꞌal mi tol jaꞌ Israel cꞌal Judá, yel xacꞌal jix oc spenail ebꞌ ey jin, cꞌam tocꞌal chi wiꞌel ebꞌ yin jin cꞌul jain Jehová, Tol chi skeꞌ wu masanil, sDiosal jin ebꞌ, yutol ey wipalil.
6 Elanwej bꞌey Babilonia tiꞌ, yet watxꞌ man jaex junoj jex oj jex cam yu spenail ebꞌ jix yaocoj. Yutol jix jul yorail jin pajtzen jaxca wal smooal ẍaꞌon ebꞌ.
7 Jix jin kꞌanbꞌalne Babilonia yu waon oc sjowal jin cꞌul yibꞌan masanil nacionlaj. Jaꞌ Babilonia tiꞌ, laan yeoc yul jin kꞌabꞌ jaxca wal junoj copa tol oro bꞌey jix wakꞌ ucꞌwoj an masanil ebꞌ ánima yul yibꞌankꞌinal tiꞌ. Jaꞌ yet jix yuqꞌuen masanil nacionlaj jun vino tuꞌ, catuꞌ jix joybꞌi sat ebꞌ yu.
8 Yin wal eymanil jix yun yeyqꞌuey Babilonia tiꞌ. Okꞌanwej yu, iꞌwejtej ambꞌal; oj kilaꞌ ta tol oj to ancha oj, ẍi Jehová.
9 Jaꞌ ebꞌ txꞌoj nacional caan tituꞌ chi alon jaxca tiꞌ: Tuxa jix kaoc ambꞌal yin Babilonia, cꞌamxa chi anchai. Can ojabꞌi. Junjun jon cꞌal toonwej bꞌey cu conobꞌ, yutol jaꞌ spenail jun conobꞌ tiꞌ, tuxa jix aapnoj bꞌey satcan, chi a taꞌcꞌal apnoj bꞌey xol asun, ẍi ebꞌ.
10 Chi yalon ebꞌ Israel cꞌal ebꞌ a Judá jaxca tiꞌ: Lalan spajtzen Jehová yu tzet jix cu uteleoj. Toonwej, kalwej el bꞌey Sión tzetyetal tuxa jix yun Naj cu Diosal, ẍi ebꞌ.
11 Jix akꞌle yun ebꞌ sreyal Media yu Jehová, yutol naꞌbꞌilxa yu, tol oj yakꞌ lawoj Babilonia. Queytuꞌ oj yun spajtzen sbꞌa Naj yu tzet jix utele stemplo yu ebꞌ. Chi al-le tet ebꞌ soldado jaxca tiꞌ: Waꞌnewej je julbꞌal. Awej oc je majbꞌal sat julbꞌal xam je cꞌul.
12 Iꞌwej a je bandera yin too je yakꞌon jowal bꞌey smuroal conobꞌ Babilonia, ẍi. Watxꞌ ojabꞌ chi yun yoc joyan ebꞌ soldado yin conobꞌ tuꞌ. Oc ojabꞌ steynemal. Jelan cꞌal che yute je bꞌa yet che yewbꞌa el je bꞌa yet che yakꞌon eyqꞌuey ebꞌ soldado chi eltej yakꞌon jowal je yin, yutol lalan oj yun tzet naꞌbꞌil yu Jehová yin ebꞌ caan bꞌey Babilonia.
13 Jal jex jaex tiꞌ, jex a Babilonia, jex tol caan jex bꞌey snanlaj jaꞌ mimej jaꞌ, jex tol caw bꞌeom jex. Tuxa jix jul scꞌual je lawi ey yin junelne.
14 Jaꞌ Jehová, Naj ey yipalil, tuxa jix yakꞌ stiꞌ: Tol oj yakꞌ noel yul je nación tiꞌ yu ebꞌ je cajat, jaxca xacꞌal yecꞌ noꞌ kochiꞌ noꞌ; oj el yaw ebꞌ yet oj jex yakꞌon eyqꞌuey ebꞌ, ẍi Jehová.
Bꞌit Yin Alo Watxꞌ Kꞌane Tet Dios
15 Jaꞌ Jehová jix waꞌnen txꞌotxꞌ txꞌotxꞌ tiꞌ yetoj yipalil; yetoj sjelanil jix swaꞌne yul yibꞌankꞌinal tiꞌ; yetoj sjelanil jix sjenbꞌantoj satcan.
16 Jaꞌ Jehová chi aloni, yet chi nilili sbꞌilwi cꞌu, cꞌal yet chi tit nabꞌ. Chi yiꞌa asun bꞌey slawubꞌal txꞌotxꞌ txꞌotxꞌ tiꞌ. Jaꞌ chi akꞌon a kopna raya bꞌey xol yaxnabꞌ; jaꞌ chi iꞌon eltej kaꞌeꞌ bꞌey yaman oc yu.
17 Jal ebꞌ ánima, yel xacꞌal cꞌam niꞌoj snaꞌbꞌal ebꞌ. Caw qꞌuixwiltaj chi yun ebꞌ yu wan echele chi swaꞌne ebꞌ. Jaꞌ wan echele tuꞌ, cꞌam spixan; tucꞌal chi yakꞌ qꞌueytoj sbꞌa ebꞌ ánima yin.
18 Jaꞌ wan tzetyetal tuꞌ, cꞌam niꞌoj yeloc apnoj ebꞌ. Caw smoo tol chi intajnele eloj. Jaꞌ yet oj jul scꞌual, oj akꞌle lawoj ebꞌ yu Jehová.
19 Caw qꞌueyubꞌtaj yeoc snaꞌbꞌal sDiosal Jacob, jaꞌ jix waꞌnen masanil tzetyetal. Jaꞌ jix sicꞌon el Israel yin yoc can sconobꞌoj. Jaꞌ Jehová, yaaw yeoc yibꞌan masanil, jaxca tuꞌ yoc sbꞌi.
Jaꞌ Babilonia Jaxca Tol Smitxꞌkꞌabꞌ Jehová Yeocoj
20 Jix yalon Jehová jaxca tiꞌ: Jaꞌ Babilonia jaxca tol jin majbꞌal sat julbꞌal yeocoj, jin mitxꞌkꞌabꞌ yet jowal. Jaꞌ yu, yuxan jix wakꞌ lawoj ey wan conobꞌlaj. Jaꞌ yetoj jix wakꞌ lawoj ey ebꞌ ey yopiso.
21 Jaꞌ yetoj jix wakꞌon lawoj ey noꞌ che yetoj cꞌal ebꞌ eyoc yibꞌan che tuꞌ, cꞌal yetoj carruaje.
22 Jix wakꞌon lawoj ey ebꞌ winaj, ebꞌ ix ix, ebꞌ icham winaj, ebꞌ achꞌe, yetoj cꞌal ebꞌ ix kꞌopo.
23 Jix wakꞌon cꞌal pax lawoj ey noꞌ meꞌ yetoj steynemal. Jix wakꞌon cꞌal pax lawoj ebꞌ mulnawom, yetoj noꞌ wacax chi kꞌuwi txꞌotxꞌ. Jix wakꞌon cꞌal pax lawoj ey ebꞌ gobernador, yetoj cꞌal ebꞌ eyoc yin yopiso.
Syaꞌilal Yibꞌan Babilonia
24 Jain Jehová jin chi walaꞌ: Jaex tiꞌ oj je yil jin spajtzen tet ebꞌ Babilonia, cꞌal tet ebꞌ Caldeo jaxca wal smooal ẍaꞌon ebꞌ yu spenail jix yun ebꞌ bꞌey Sión.
25 Jain Jehová jin chi walaꞌ: Jain tiꞌ caw eytej sjowal jin cꞌul yin Babilonia; jaꞌ jun tuꞌ, laan jaxca junoj miman wonan chi akꞌon lawoj masanil sat txꞌotxꞌ txꞌotxꞌ tiꞌ. Jaꞌ yetoj wipalil oj jin tenecꞌ bꞌulnaoj, oj tojcan bꞌulna spoꞌoilal sat pacꞌan; yuxan jaꞌ Babilonia tuꞌ, laan xacꞌal oj yun can jaxca junoj wonan tol tzꞌaꞌnajtoj.
26 Jain Jehová jin, chi walaꞌ: Tol cꞌamxa junoj chꞌen chꞌen xol spoꞌoilal oj to kꞌanle yet oj waꞌnele a junojxa na. Cusiltaj txꞌotxꞌ xacꞌal oj yun can conobꞌ Babilonia yin junelne.
27 Iꞌwej a txꞌoxbꞌanil yet jowal yin Babilonia. Xuꞌwej chꞌen trompeta yet chi jul masanil nacionlaj yakꞌon jowal. A ojabꞌ waan ebꞌ a Ararat, ebꞌ a Miní, cꞌal yetoj ebꞌ a Asquenaz yakꞌon jowal yin. Sicꞌwej oc junoj yaaw chi ijbꞌan jowal tuꞌ. Toj ojabꞌ noꞌ che yin jowal, jaxca wal chi yun stoo bꞌuloloj noꞌ kochiꞌ noꞌ, tol manxa jantajoj sbꞌisil.
28 Yakꞌ ojabꞌ lista sbꞌa masanil nacionlaj yet chi oc yin jowal. Tit ojabꞌ ebꞌ sreyal Media, ebꞌ gobernador ebꞌ mimej yaaw, yetoj cꞌal masanil ebꞌ ánima bꞌey yul junjun conobꞌ, ẍi Jehová.
29 Oj bꞌilwoj a txꞌotxꞌ txꞌotxꞌ tiꞌ, oj tzicoꞌtaneleoj, yutol oj yiꞌ sbꞌa tzetyetal naꞌbꞌil yu Jehová. Jaꞌ yet oj oc can Babilonia yin cusiltaj txꞌotxꞌal, cꞌamxa mac oj caey sat.
30 Jaꞌ ebꞌ soldado yet Babilonia, cꞌamxa tzet oj yal ebꞌ. Tuxa cꞌal oj can ebꞌ yul-laj scuartel, cꞌamxa yip ebꞌ, laan xacꞌal oj yun can ebꞌ jaxca ebꞌ ix ix. Catuꞌ oj yilontej ebꞌ, tol lalanxa yeyqꞌuey sconobꞌ ebꞌ, lalanxa yakꞌle tzꞌaꞌ masanil na.
31 Txololi xacꞌal oj yun sjul ebꞌ chejabꞌ yalon tet naj sreyal Babilonia tol lalan yeyqꞌuey sconobꞌ tuꞌ yin junelne.
32 Jaꞌ scajat ebꞌ eyoc ebꞌ smajon bꞌey chi kꞌaxbꞌo ecꞌtoj ebꞌ ánima yul-laj jaꞌ. Oj akꞌle tzꞌaꞌ scuartel ebꞌ soldado, yuxan oj oc xiwcꞌulalil yin ebꞌ akꞌom jowal tuꞌ.
33 Jaꞌ Jehová Naj ey yipalil, sDiosal Israel, jaꞌ chi alon jaxca tiꞌ: Jaꞌ ebꞌ a Babilonia, laan ebꞌ jaxca ixim tiriw watxꞌ xa yeoc yul junoj tecꞌbꞌal, tuxa wal chi apni oc tiempo stecꞌle eltej, ẍi Jehová.
34-35 Jaꞌ ebꞌ a Jerusalén, conobꞌ Sión, chi yal ebꞌ jaxca tiꞌ: Jaꞌ Nabucodonosor sreyal Babilonia, kocꞌ xacꞌal jix cu yutetoj, qꞌuisisi xacꞌal jix yute can yul cu conobꞌ, jaxca xacꞌal junoj secꞌ cꞌamxa tzet eey yul. Jix cu tukꞌle eytoj yu jaxca junoj noꞌ miman noꞌ ey bꞌey yul-laj jaꞌ mar. Jix yakꞌ no scꞌul yu masanil tzetyetal ey, ey jon, jantaj tzetyetal ma xa yoche scꞌul, tuxa cꞌal jix skꞌojcan eloj. ¡Stoolane ojabꞌ el Babilonia jaxca wal smooal jix cu yute! ¡Stoolane ojabꞌ el ebꞌ Caldeo, yu ebꞌ ánima jix smakꞌ cam ebꞌ cu xol! ẍi ebꞌ.
Jaꞌ Tzet Albꞌilcan Yin Ebꞌ A Jerusalén
36 Chi yal Jehová tet ebꞌ a Jerusalén jaxca tiꞌ: Jain oj jin oc yin jin naꞌon oc yin sjichanil, jain oj jin pajtze tet ebꞌ chi jowi oc je yin. Tajin xacꞌal oj wute cantoj masanil jaꞌ naabꞌ jaꞌ, yetoj cꞌal jaꞌ snukꞌ jaꞌ ey bꞌey Babilonia.
37 Tuxa cꞌal oj a can bꞌulan spoꞌoilal; asanxane noꞌ ooj oj caey ecꞌ tituꞌ, cꞌamxa mactxequel oj to caey ecꞌoj. Tuxa cꞌal oj xiwa ebꞌ ánima cꞌal sbꞌuchwa ebꞌ yin.
38 Oj el yaw ebꞌ Babilonia jaxca noꞌ bꞌalam, oj el cꞌal pax yaw ebꞌ jaxca noꞌ yuneꞌ bꞌalam.
39 Jain Jehová jin chi walaꞌ: Yajbꞌan chi kꞌaxna a ebꞌ yu tzalacꞌulal, oj jin waꞌne junoj loꞌbꞌe tet ebꞌ, oj wakꞌ ucꞌwoj an ebꞌ, oj el yaw ebꞌ yu tzalacꞌulal. Oj lawoj tuꞌ, oj weya ebꞌ yin junelne, catuꞌ cꞌamxa bꞌakꞌin oj el sweyan ebꞌ.
40 Oj wiꞌontoj ebꞌ bꞌey oj makꞌle cam ebꞌ, jaxca chi yun yiꞌletoj noꞌ yuneꞌ meꞌ, noꞌ chiw, cꞌal noꞌ icham meꞌ bꞌey chi makꞌle camoj, ẍi Jehová.
Oj Akꞌle Eyqꞌuey Babilonia
41 Jaꞌ Babilonia tol bꞌinabꞌil yul yibꞌankꞌinal tiꞌ, oj eyqꞌueyoj. Tuxa cꞌal oj xiwa wan nacionlaj yet oj yilon oc ebꞌ.
42 Jaxca wal tol jaꞌ jaꞌ mar oj toj secna yibꞌan Babilonia, oj mujitoj ebꞌ yu jaꞌ.
43 Tzꞌinini xacꞌal oj yun cantoj sconobꞌ jaxca txꞌotxꞌ cusiltaj txꞌotxꞌ, junelne cꞌamxa mactxequel oj caey ecꞌoj.
44 Jix yalon Jehová jaxca tiꞌ: Oj waoc syaꞌilal yibꞌan Bel, jaꞌton jun sdiosal Babilonia. Oj wakꞌ xae atej tzetyetal tuxa jix stuqꞌueytoj, manxa oj jul il-le yu wanojxa nación, catuꞌ oj eyqꞌuey smuroal Babilonia tuꞌ.
45 Jex jin conobꞌ, elanwej tituꞌ, colwej je bꞌa tet sjowal jin cꞌul chi jul yibꞌan jun conobꞌ tuꞌ.
46 Cꞌam ojabꞌ chex oc il, cꞌam ojabꞌ chex xiw yu masanil wan kꞌane chi ecꞌ al-le yul jun conobꞌ tuꞌ. Jaꞌ yul junjun abꞌil, txꞌoj cꞌal tzet chi bꞌinalei, asanxane jowal cꞌal xiwcꞌulal chi bꞌinalei, ey xacꞌal oc ebꞌ yaaw yin jowal.
47 Queytuꞌ oj yun sjul scꞌual waon oc syaꞌilal yibꞌan wan sdiosal Babilonia. Masanil nación tuꞌ oj el sqꞌuixwil ebꞌ, oj no can el yul conobꞌ yu smimanil ebꞌ ánima oj camoj.
48 Jain Jehová jin chi walaꞌ: Jaꞌ satcan cꞌal yul yibꞌankꞌinal tiꞌ, yetoj cꞌal masanil tzetyetal ey bꞌey, caw oj tzalabꞌoj a yet oj eyqꞌuey conobꞌ Babilonia, yet oj tit bꞌey yetcꞌulal norte jun mac oj akꞌon lawoj ey tuꞌ.
49 Oj eyqꞌuey Babilonia tuꞌ, yu cꞌal ebꞌ ánima jix yakꞌ cam bꞌey Israel, cꞌal yu jantaj ánima jix yakꞌ cam bꞌey yul yibꞌankꞌinal, ẍi Jehová.
Jaꞌ Tzet Jix Al-le Tet Ebꞌ Israel Eyecꞌ Bꞌey Babilonia
50 Chi yal Jehová tet ebꞌ Israel eyecꞌ bꞌey Babilonia: Jantaj jex oj jex colcha can el xol jowal oj oc tituꞌ, elanwej aoj. Cꞌam ojabꞌxa chex cancan tituꞌ. Caxcꞌal naat ey can je txꞌotxꞌ cꞌal je conobꞌ, awej oc je naꞌbꞌal win jain Jehová jin tiꞌ; naꞌwej cꞌal pax tej Jerusalén.
51 Jaex tiꞌ che yal jaxca tiꞌ: Caw wal chi cu qꞌuixwi yet chi kabꞌen tzet chi yal ebꞌ kin. Qꞌuixwiltaj kili chi yun kabꞌeni, yutol jaꞌ ebꞌ txꞌoj conobꞌal jix octoj ebꞌ bꞌey snail scalubꞌal Jehová, tol tax jix octoj ebꞌ yul wan yaliẍ cuartolaj tol asan Dios ey yet, je chi.
52 Yuxan jain Jehová jin chi walaꞌ: Tol oj jul jun scꞌual, catuꞌ oj waon oc syaꞌilal yibꞌan sdiosal ebꞌ a Babilonia, cꞌal bꞌey masanil yul-laj conobꞌ; caw oj el yaw jantaj ebꞌ ánima oj lawoj el yet jun cꞌual tuꞌ.
53 Jain Jehová jin chi walaꞌ: Caxcꞌal chi atoj Babilonia bꞌey satcan, caxcꞌal tol naat chi yute swaꞌnen a smuroal yinlaj sconobꞌ, oj watoj ebꞌ scajat ebꞌ tuꞌ yin, yet chi akꞌle lawoj ey ebꞌ, ẍi Jehová.
Jix Qꞌueyle El Conobꞌ Babilonia
54 Oj abꞌle tacꞌal yel aw bꞌey Babilonia, oj abꞌle slawi ey masanil tzetyetal bꞌey yul sconobꞌal ebꞌ Caldeo.
55 Jaꞌ Jehová oj akꞌon lawoj ey Babilonia, cꞌamxa bꞌey oj bꞌinale ecꞌoj. Jaꞌ wan scajat ebꞌ tuꞌ, oj bꞌilwoj a ebꞌ jaxca chi yun sbꞌilwi jaꞌ jaꞌ, caw oj bꞌilwoj yeyqꞌuey ebꞌ yibꞌan jun conobꞌ tuꞌ.
56 Chi yalon Jehová jaxca tiꞌ: Oj jul ebꞌ yakꞌon lawoj ey Babilonia, oj michꞌcha masanil ebꞌ soldado catuꞌ oj makꞌle kꞌatoj sjulbꞌal ebꞌ. Yutol jain Jehová, Dios jin toni, tol chin pajtze tet junjun jaxca wal smooalil.
57 Jain Rey jin tiꞌ, Jehová yoc jin bꞌi, yaaw jin yibꞌan masanil, jain chi walaꞌ: Jaxca tol oj wakꞌ ucꞌwoj an ebꞌ yaaw yeoc bꞌey Babilonia tuꞌ, ebꞌ jelan snaꞌbꞌal, yetoj ebꞌ gobernador, yetoj ebꞌ mimej yopiso, cꞌal ebꞌ soldado akꞌom jowal, catuꞌ oj tit sweyan ebꞌ yin junelne. Manxa oj el sweyan ebꞌ, jin chi.
58 Jain Jehová tol ey wipalil yibꞌan masanil, jain chi walaꞌ: Tol jaꞌ jun smuroal conobꞌ Babilonia tol caw pim yeocoj, oj uchchatoj yin junelne, oj tzꞌaꞌtoj mimej spuertail. Caw naꞌbꞌacꞌal jix mulna oc wan nacionlaj yin; jaꞌ jantaj mulnail bꞌey jix cꞌuumbꞌi ebꞌ, tucꞌal oj tzꞌaꞌtoj, ẍi Jehová.
Jix Iꞌletoj Skꞌane Naj Jeremías Bꞌey Babilonia
59 Jaꞌ yet scan abꞌil yoc naj Sedequías yin reyal bꞌey Judá, jix yalon Jeremías, naj ẍejabꞌ Dios, wan kꞌane tet Seraías scꞌaal Nerías, yitxiquin Maaseías. Jaꞌjun naj Seraías tuꞌ yetoj naj Sedequías yet jix too ebꞌ bꞌey Babilonia, jaꞌ naj a cuenta yiloni cꞌal bꞌey chi can naj rey, yet chi bꞌey stoo ebꞌ. 60 Jaꞌ naj Jeremías tuꞌ, tol xax yakꞌ tzꞌibꞌele jantaj tzetyetal jix al-lei, jaꞌton wan tol tꞌinan oj jul yibꞌan conobꞌ Babilonia tuꞌ. 61 Jix yalon naj tet Seraías: Jaꞌ yet oj jaach apnoj bꞌey Babilonia, caw oj cam ja wawten a masanil wan kꞌane tiꞌ. 62 Catuꞌ oj ja walon jaxca tiꞌ: Jaach Jehová jin Diosal jaach, jix ja walaꞌ tol oj ja wuch lawoj jun conobꞌ tiꞌ, tol cꞌamxa ánima oj meltzotej titiꞌ, tam wal noꞌ noꞌ, tol cusiltaj txꞌotxꞌ xacꞌal oj yun cantoj yin junelne, ja chi. 63 Jaꞌ yet chi lawi ja wawten a wan kꞌane tiꞌ, catuꞌ cha kꞌalon can oc junoj chꞌen chꞌen yin an juun tiꞌ, catuꞌ cha bꞌejon eytoj yul jaꞌ Éufrates, 64 catuꞌ cha walon jaxca tiꞌ: Queyton tuꞌ oj yun yeyqꞌuey Babilonia, cꞌamxa bꞌakꞌin oj a waan junelxa, yu jantaj syaꞌilal oj jul yibꞌan yu Jehová, ja chi, ẍi Jeremías.
Jaꞌ titiꞌ chi lawi can skꞌane naj Jeremías.