Jix Yal Jehová Tol Oj Eyqꞌuey Conobꞌ Babilonia
50
Jaꞌ kꞌane jix al-le yin Babilonia, jaꞌton sconobꞌal ebꞌ Caldeo. Jaꞌ Jehová jix alon tet Jeremías, jaꞌton jun ẍejabꞌ Dios:2 Alwej el jun skꞌaneal tiꞌ; akꞌwej yotajne el masanil conobꞌlaj. Iꞌwej a je bandera, Alwej eloj, cꞌam ojabꞌ chex xiw je yalon ecꞌoj tol jaꞌ Babilonia oj eyqꞌueyoj. Jaꞌ jun comon dios Bel oj el sqꞌuixwil, catuꞌ oj makꞌle poꞌotoj jun comon dios chi yij Marduc. Caw kocꞌ xacꞌal oj yun cantoj sdiosal ebꞌ Babilonia, yutol oj makꞌle poꞌo wan echele tuꞌ.
3 Jaꞌ bꞌey yetcꞌulal norte oj tit jun nación yin, caw cusiltaj txꞌotxꞌ oj yun cantoj jun conobꞌ tuꞌ. Cꞌamxa ánima oj caey bꞌey, tam wal noꞌ noꞌ, yutol oj ujtele sajlemtoj masanil, ẍi Dios.
Oj Meltzo Pax Ebꞌ Israel Junelxa
4 Jix yalon Jehová jaxca tiꞌ: Jaꞌ yet bꞌakꞌin, jaꞌ ebꞌ Israel cꞌal ebꞌ a Judá, oj okꞌ ebꞌ, catuꞌ oj yaon oc sbꞌa ebꞌ yul jin kꞌabꞌ junelxa. 5 Oj skꞌanlen ecꞌ ebꞌ jun sbꞌeal Sión, jaꞌ tituꞌ oj toj ebꞌ, oj yalon ebꞌ jaxca tiꞌ: Watxꞌ tol chi cu meltzowej bꞌey Jehová. Junne xacꞌal ojabꞌ chi cu eecꞌ yetoj, cu waꞌne junoj cu wa kꞌane yetoj yin junelne, tol cꞌam ojabꞌxa bꞌakꞌin chi too qꞌueycꞌulal ku, ẍi ebꞌ, oj yalon ebꞌ.
6 Jaꞌ ebꞌ jin conobꞌ tiꞌ, laan ebꞌ jaxca noꞌ meꞌ tol qꞌueynajtoj, yutol man watxꞌoj chi yun yil-le yu yilomal, yuxan chi qꞌuey cantoj ebꞌ bꞌey sjolomlaj wonan. Jaxca noꞌ chi ecꞌ cꞌal bꞌey sjolomlaj wonan, niẍtejal chi too qꞌueycꞌulal scolal noꞌ yu. 7 Jaꞌ yet chi ẍaꞌlen sbꞌa noꞌ yetoj scajat, catuꞌ chi makꞌle cam noꞌ. Queyton tuꞌ yeoc ebꞌ jin conobꞌ tiꞌ: Chi yalon scajat ebꞌ tuꞌ yin jaxca tiꞌ: Jaon tiꞌ cꞌam chi oc cu penail yin jun tiꞌ, yutol jaꞌ ebꞌ jix oc spenail tet Jehová, Naj chi akꞌon low ebꞌ, jun Dios bꞌey jix yaoc ebꞌ smam icham yipoj scꞌul, ẍi ebꞌ, oj yalon ebꞌ.
8 Jex jin conobꞌ, elanwej bꞌey Babilonia, jaꞌton sconobꞌal ebꞌ Caldeo, jaex chex el yin sbꞌabꞌelal, jaxca chi yun stoo noꞌ chiw chi ijbꞌan noꞌ meꞌ.
9 Yutol oj wiꞌtej jun miman bꞌulan ebꞌ conobꞌ bꞌey yetcꞌulal norte, yet oj jul yakꞌon jowal yin Babilonia. Oj oc joyan ebꞌ yin, oj eyqꞌuey yu ebꞌ, yutol caw jelan yakꞌon jowal ebꞌ. Jaꞌ yet chi julwa ebꞌ, cꞌam junoj sjulbꞌal ebꞌ tucꞌal oj etex eloj.
10 Jain Jehová jin chi walaꞌ, tol oj elkꞌaneletoj stzetyetal ebꞌ Caldeo yu ebꞌ. Oj yelkꞌanetoj masanil tzetyetal chi yoche ebꞌ.
Oj Eyqꞌuey Conobꞌ Babilonia
11 Jal jex jaex Caldeo jex tiꞌ, jix jex tzala yet jix je yelkꞌane stzettaj yetal ebꞌ jin conobꞌ. Yet tuxa cꞌal chex a tꞌujna jaxca junoj noꞌ kꞌopo wacax chi a tꞌujna yibꞌan an cꞌultaj, catuꞌ chi el je yaw jaxca yokꞌ noꞌ che.
12 Yu jun tuꞌ, yuxan caw qꞌuixwiltaj oj yun cantoj je conobꞌ bꞌey alinaj jex. Slawubꞌal xacꞌal oj yun can yintaj wanxa nación. Tajin txꞌotxꞌ xacꞌal oj yun cantoj, cꞌamxa tzetyetal ey bꞌey.
13 Yutol oj tit sjowal jin cꞌul je yin, oj cancan yin tol cꞌamxa mactxequel oj caey can sat. Cusiltaj txꞌotxꞌ xacꞌal oj yun canoj. Jaꞌ mactxequel oj ecꞌ tituꞌ, tuxa cꞌal oj xiwcan a ebꞌ yu syaꞌilal oj jul yibꞌan.
14 Masanil mactxequel iꞌbꞌil oc sjulbꞌal, oc ojabꞌ joyan yin Babilonia, catuꞌ chi julwa yin, cꞌam ojabꞌxa chi oc tucan sjulwa yin, yutol tuxa jix oc spenail tet Jehová.
15 El ojabꞌ aw yet jowal je yu bꞌey masanil yinlaj conobꞌ tuꞌ. Lalan yeyqꞌuey Babilonia, lalan yeyqꞌuey storreal, lalan stenle ey wejlabꞌoj smuroal, je chi yet oj je yaon el je yaw tuꞌ. Jain Jehová jin tiꞌ, jix jul scꞌual jin pajtzen jin bꞌa yin Babilonia tiꞌ. Pajtzewej cꞌal pax je bꞌa jaex tiꞌ, jaxca wal jix yun yetnele wanxa nación yu, quey ojabꞌ tuꞌ che yute pax jaex tiꞌ.
16 Cꞌamxa junoj mactxequel che yakꞌ can bꞌey Babilonia, tam wal mac chi awwi ey awo, tam wal mac chi yambꞌan a sat awo. Jaꞌ yet oj yilon ebꞌ yoc jun jowal tuꞌ, jaꞌ ebꞌ txꞌoj conobꞌal oj meltzotoj ebꞌ bꞌey sconobꞌ. Junjun xacꞌal ebꞌ oj tojcan bꞌey xꞌotxꞌ bꞌey caan cꞌaltaꞌa, ẍi Jehová.
Oj Meltzotej Ebꞌ Israel
17 Jix yalon Jehová jaxca tiꞌ: Jaxca noꞌ meꞌ qꞌueynajtoj, tol ujtebꞌil oc yu noꞌ bꞌalam, queytuꞌ yeoc ebꞌ Israel. Bꞌabꞌel jix akꞌle eyqꞌuey ebꞌ yu naj sreyal Asiria; jix lawi tuꞌ, jaꞌ Nabucodonosor sreyal Babilonia jix akꞌon xacꞌal lawoj el ebꞌ. 18 Yu jun tuꞌ, yuxan jain Jehová jin tiꞌ, Tol chi skeꞌ wu masanil, jain sDiosal jin Israel chi walaꞌ: Oj waoc syaꞌilal naj sreyal Babilonia, yetoj cꞌal masanil ebꞌ caan yul sconobꞌal, jaxca wal jix wun yetoj naj sreyal Asiria. 19 Oj wakꞌon meltzo ebꞌ Israel bꞌey xꞌotxꞌ junelxa; oj sloꞌ masanil jantaj tzetyetal ebꞌ wan chi chꞌibꞌ bꞌey Carmelo, cꞌal bꞌey Basán. Oj sloꞌ jantaj cꞌal chi yoche ebꞌ, wan chi chꞌibꞌ bꞌey siiquil txꞌotxꞌ yul yet Efraín, cꞌal bꞌey yul-laj yet Galaad. 20 Jain Jehová jin chi walaꞌ, tol jaꞌ yet jun cꞌual tuꞌ, oj seyle il spenail ebꞌ Israel, cꞌal Judá, manxa oj ilcha ocoj; yutol oj wakꞌ lawoj spenail mactxequel oj to cancan yin yiquisal, ẍi Jehová.
Syaꞌilal Yibꞌan Babilonia
21 Jix yalon Jehová jaxca tiꞌ: Jain Jehová jin, jain chex jin chejtoj: Akꞌwej jowal yin ebꞌ ey yul yet Merataim, yetoj cꞌal masanil ebꞌ caan bꞌey Pecod. Ujtewej ebꞌ, catuꞌ che makꞌon cam ebꞌ, masantaꞌcꞌal chi lawi el masanil ebꞌ. Jijewej masanil jin chejbꞌanil.
22 Caw chi abꞌle sbꞌilwi yoc jowal bꞌey jun nación tuꞌ, caw pilan jix yun slawi eyoj.
23 Jaꞌ Babilonia jix smakꞌ poꞌo masanil yul yibꞌankꞌinal; jaxa pax tinaniꞌ, oj makꞌle poꞌotoj, kocꞌ xacꞌal oj yun cantoj. Caw wal pena xacꞌal oj yabꞌ masanil nacionlaj yet oj yilon oc ebꞌ tzet oj yun cantoj Babilonia.
24 Jain Jehová jin jix jin waꞌne ey jun yaal sattaj Babilonia. Ma xacꞌal yiltej sbꞌa tzet jix yun yeyqꞌuey yul jun yaal tuꞌ, yutol caw jix yiꞌel snaꞌbꞌal ebꞌ win.
25 Jix jin jajeltej masanil mitxꞌkꞌabꞌe yet jowal yaman ecꞌ wu, jix wiꞌeltej wan mitxꞌkꞌabꞌe tuꞌ, yu jin txꞌoxon el sjowal jin cꞌul, yutol ey jun jin mulnail sowalil oj yiꞌ sbꞌa bꞌey sconobꞌ ebꞌ Caldeo tiꞌ.
26 Yal cꞌal bꞌey chex oc je yakꞌon jowal yin ebꞌ. Jajwej bꞌey yaman ecꞌ sloꞌbꞌe ebꞌ. Yambꞌawej oc bꞌulan stzettaj yetal ebꞌ, catuꞌ che yakꞌon lawoj. Cꞌamxa niꞌoj chi cancan je yu.
27 Makꞌwej cam masanil soldado ebꞌ, cꞌam ojabꞌ che yakꞌ mimancꞌulal yin ebꞌ. Okꞌbꞌal cꞌul ebꞌ, tuxa wal chi jul scꞌual syaꞌilal ebꞌ, ẍi Jehová.
28 Ey ebꞌ ket Israelal chi ela bꞌey Babilonia, catuꞌ chi jul ebꞌ bꞌey Sión, chi yalon ebꞌ tzet jix yun spajtzen Jehová cu Diosal yin ebꞌ a Babilonia, yu tzet jix yun ebꞌ yin snail scalubꞌal.
29 Chi yalon Jehová jaxca tiꞌ: Awtewej masanil ebꞌ chi julwa yetoj mitxꞌkꞌabꞌe yet jowal, yet chi oc ebꞌ julwa yin Babilonia. Ocanwej joyan yin, yet watxꞌ cꞌamxa mac chi eli. Pajtzewej tet ebꞌ jaxca wal smooal chi yun ẍaꞌon ebꞌ. Jaxca wal jix el yunen ebꞌ, queytuꞌ che yute ebꞌ, yutol junelne caw pit jix yute sbꞌa ebꞌ ey jin, jain Jehová jin, sDiosal jin Israel.
30 Yu jun tuꞌ, yuxan jain Jehová jin chi walaꞌ, tol jaꞌ ebꞌ achꞌe a Babilonia oj ey can bꞌulan ebꞌ yul-laj scalleal conobꞌ tuꞌ. Jaꞌ ebꞌ soldado oj makꞌle cam masanil ebꞌ yet jun cꞌual tuꞌ, ẍi Jehová.
31 Jain Jehová Yaaw jin yibꞌan masanil chi walaꞌ: Tol oj tit jin jowal je yin tinaniꞌ, yutol caw wal jow jix je yute je bꞌa. Tuxa jix jul scꞌual yet chi jul syaꞌilal je yibꞌan.
32 Jex ánima tol mimejtaj che yute je bꞌa, oj jex telcꞌotoj. Tumi eyto mactxequel oj jex iꞌon a waanoj. Oj waoc skꞌakꞌal masanil je conobꞌal tuꞌ. Oj lawoj el masanil yinlaj yu jun kꞌakꞌ tuꞌ, ẍi Jehová.
33 Jaꞌ Jehová Naj Yaaw yibꞌan masanil, jaꞌ jix alon jaxca tiꞌ: Jaꞌ conobꞌ Israel, cꞌal conobꞌ Judá lalan yabꞌen syaꞌil ebꞌ bꞌey chi etex ebꞌ tinaniꞌ; eyoc ebꞌ preso yu wan scajat ebꞌ tuꞌ, cꞌamxa chi jajcha el ebꞌ. 34 Jain Jehová, yaaw jin tiꞌ, oj jin colel ebꞌ, catuꞌ oj jin naꞌon pax oc yin ebꞌ yin sjichanil. Oj wakꞌon jin watxꞌcꞌulal tet jin conobꞌ tiꞌ, jal pax ebꞌ conobꞌ Babilonia xin, asanxane xiwcꞌulal oj watoj yibꞌan ebꞌ, ẍi Jehová.
35 Chi yalon cꞌal pax Jehová jaxca tiꞌ: Oc ojabꞌ jowal yin Babilonia, cꞌal yin masanil ebꞌ caan bꞌey, cꞌal yin ebꞌ yaaw yeoc xol ebꞌ, yetoj cꞌal yin ebꞌ jelan chi yute sbꞌa.
36 Oc ojabꞌ jowal yin ebꞌ naꞌom el kꞌane yaloni, joybꞌoj ojabꞌ a sat ebꞌ jelan yakꞌon jowal.
37 Makꞌwej cam ebꞌ soldado tol lalan sbꞌilwi a yu xiwcꞌulal. Makꞌwej cam noꞌ che tokꞌnen oc carruaje. Makꞌwej cam ebꞌ soldado tol manbꞌiltej eecꞌ colwa yetoj ebꞌ, laan xacꞌal chi yun can ebꞌ jaxca ebꞌ ix ix. Iꞌwejtoj sbꞌeomal ebꞌ, elkꞌanewejtoj masanil.
38 Tan ojabꞌ a jaꞌ jaꞌ, catuꞌ chi tajcantoj masanil, yutol jaꞌton jun conobꞌ bꞌey chi oc eyilal tet wan comon dios tol yaabꞌetaj yili ocoj. Jaꞌ yu wan tuꞌ, yuxan cꞌamxa cꞌal snaꞌbꞌal ebꞌ ánima.
39 Yu jun tuꞌ, yuxan jaꞌ bꞌey conobꞌ Babilonia tuꞌ, jaxa cꞌal noꞌ xol-laj teꞌal noꞌ oj eecꞌoj, jaxa noꞌ ooj cꞌal noꞌ avestruz oj caey ecꞌ tituꞌ. Cꞌamxa bꞌakꞌin oj to caey ecꞌ ánima tituꞌ. 40 Jain Jehová jin chi walaꞌ tol laan xacꞌal oj wute can Babilonia jaxca Sodoma cꞌal Gomorra, yetoj cꞌal wanxa conobꞌlaj ey scawilal tuꞌ, tol jix wuch lawoj ey yin junelne. Cꞌam cꞌal mactxequel oj caey ecꞌ tituꞌ.
41 Yutol ey wan ebꞌ soldado chi tit bꞌey norte. Yetoj wanxa ebꞌ rey bꞌey wanxa nación caw jelan yakꞌon jowal ebꞌ, tol lalan syambꞌan sbꞌa ebꞌ stit yin jowal.
42 Iꞌbꞌil oc sjulbꞌal ebꞌ, yetoj cꞌal chꞌen lanza. Yel xacꞌal jow ebꞌ, cꞌamxa niꞌoj smimancꞌulal ebꞌ. Laan xacꞌal yel yaw ebꞌ jaxca sbꞌilwi jaꞌ mar, catuꞌ eyoc ebꞌ yibꞌan che. Watxꞌ xacꞌal yeoc ebꞌ yet chi jul ebꞌ yakꞌon jowal yin Babilonia.
43 Jaꞌ yet oj yabꞌen naj sreyal Babilonia jun tuꞌ, tuxa cꞌal oj sicbꞌoj el skꞌabꞌ naj yu xiwcꞌulal; tuxa cꞌal oj oc can yin xiwcꞌulal cꞌal yin syaꞌilal jaxca junoj ix ix tol lalan swaꞌxi scꞌul yu unin.
44 Oj jin jul jaxca junoj noꞌ bꞌalam chi eltej lemna xol-laj txꞌotxꞌ eltzabꞌ bꞌey stiꞌlaj jaꞌ Jordán, chi aapnoj bꞌey chi low noꞌ meꞌ, catuꞌ chi ujtele sajlemtoj noꞌ yu. Queywal tuꞌ oj yun wujten sajlemtoj ebꞌ a Babilonia tuꞌ, jaꞌ yet tuꞌ, oj waoc jun yaaw tituꞌ, jun tol sicꞌbꞌilxa el wu. ¿Mac junoj laan yipalil wetoj? ¿Mac junoj chi skeꞌ steelen sbꞌa wetoj? ¿Mac junoj yaaw chi skeꞌ stecꞌbꞌan sbꞌa jin sattaj? 45 Abꞌwej wal tzet jix yun jin naꞌbꞌalne el jain Jehová jin tiꞌ yin Babilonia, jun sconobꞌal ebꞌ Caldeo: Tol tax oj iꞌletoj yuninal ebꞌ, catuꞌ oj uchcha ey scalubꞌal ebꞌ yibꞌan. 46 Caw oj bꞌilwoj txꞌotxꞌ txꞌotxꞌ yet oj eyqꞌuey Babilonia tuꞌ, catuꞌ oj abꞌle tacꞌal yel aw bꞌey wanxa nación, ẍi Jehová.