Jaꞌ Tzet Jix Al-le Can Yin Conobꞌ Amón
49
Jaꞌ tzet yalnaj can Jehová yibꞌan conobꞌ Amón, yet jix yalon can jaxca tiꞌ:¿Tumi cꞌam ebꞌ yicꞌaal Israel chi skeꞌ smajon can oc txꞌotxꞌ txꞌotxꞌ tiꞌ? ¿Tzet yu, yuxan tol jaꞌ wan ánima chi oc eyilal tet jun comon dios chi yij Milcoma caan bꞌey xꞌotxꞌ ebꞌ yicꞌaal Gad? ¿Tzet yu, yuxan tol jaꞌ ebꞌ Amonita chi caey bꞌey wan conobꞌ tuꞌ?
2 Yuxan jain Jehová jin chi walaꞌ tol oj apnoj scꞌual, tol oj abꞌle yel aw yet jowal bꞌey conobꞌ Rabá, jaꞌton jun smiman conobꞌ ebꞌ Amonita. Tuxa cꞌal oj a can bꞌulan spoꞌoilal, oj tzꞌaꞌtoj masanil yaldeail yu kꞌakꞌ. Jain Jehová jin chi walaꞌ tol queytuꞌ oj yun yiꞌon pax ecꞌ xꞌotxꞌ ebꞌ Israel junelxa.
3 Jex a conobꞌ Hesbón, ocanwej yin cuscꞌulal, yutol jaꞌ conobꞌ Ai tuxa jix lawi eyoj. Jex ix a conobꞌ Rabá, ocanwej yin cuscꞌulal. Pichwej je bꞌa yetoj an eel pichile, catuꞌ chex okꞌi. Ecꞌanwej jininoj yul je conobꞌ yu je cuscꞌulal. Makꞌwej yasoj je mimanil, yutol jaꞌ je diosal chi yij Milcom, oj iꞌletoj yin presowomal, yetoj ebꞌ eyoc yin yakꞌomal xaambꞌal tet, cꞌal yetoj ebꞌ ánima tol mimej yopiso.
4 ¿Tzet yu, yuxan che meyne je bꞌa yu txꞌotxꞌ je txꞌotxꞌ tol yaax sat bꞌey jobꞌelaj, bꞌey chi chꞌibꞌ masanil awo? Asan je bꞌeomal yaman ecꞌ bꞌulanoj, jaꞌ eyoc yipoj je cꞌul, yuxan che yal jaxca tiꞌ: ¿Mac wal oj skeꞌ yakꞌon jowal kin? je chi, che yaloni.
5 Jain Jehová, yaaw jin yin masanil chi walaꞌ: Tol oj watoj xiwcꞌulal je yibꞌan, yutol masanil ebꞌ conobꞌ eecꞌ je cawilal oj yakꞌ jowal ebꞌ je yin. Junjun jex xacꞌal jaex tiꞌ, oj jex ujtele sajlemtoj, cꞌamxa mactxequel oj skeꞌ jex syambꞌan ocoj.
6 Jain Jehová jin chi walaꞌ: Tol jaꞌ yet slawubꞌal, oj wiꞌ pax a can conobꞌ Amón tiꞌ junelxa, ẍi Jehová.
Jaꞌ Tzet Albꞌilcan Yibꞌan Conobꞌ Edom
7 Jaꞌ kꞌane jix yal Jehová, Naj Yaaw yin masanil yin Edom:
¿Tumi cꞌamxa junoj mac ey snaꞌbꞌal bꞌey conobꞌ Temán? ¿Tumi cꞌamxa chi naꞌcha tzet chi yute sbꞌa ebꞌ jelan? ¿Tuxa mi jix qꞌueyel masanil sjelanil ebꞌ tuꞌ?
8 Jex a Dedán, elanwej aoj; asiꞌwej, ewbꞌawej el je bꞌa yul-laj chꞌen nachꞌen, yutol oj wakꞌ lawoj ey sconobꞌ naj Esaú tiꞌ. Tuxa jix apni oc scꞌual yet oj waon oc syaꞌilal yibꞌan.
9 Jaꞌ yet chi yambꞌale an uva, ey bꞌey chi cancan junjunxa mool an. Jaꞌ yet chi apni oc ebꞌ elkꞌom yet akꞌbꞌalil, asan tzetyetal sowalil chi oc yu ebꞌ, chi yiꞌtoj ebꞌ.
10 Jal jin jain tiꞌ cꞌamxa niꞌoj tzetyetal oj wakꞌcan bꞌey sconobꞌal Esaú tuꞌ. Wotaj masanil tol cꞌam bꞌey oj skeꞌ je yewbꞌan el je bꞌa. Jaꞌ masanil ebꞌ je yuninal, ebꞌ je yican cꞌal yetoj ebꞌ caan je cawilal, oj lawoj ey ebꞌ. Cꞌamxa mactxequel oj cancanoj.
11 Can ojabꞌ ebꞌ je yuninal yin mebꞌail, oj jin teyne ebꞌ; cꞌal ebꞌ ix ix camnajxa yichamil, chi skeꞌ jin yaon oc ebꞌ yipoj scꞌul, ẍi Jehová.
12 Jix yalon Jehová jaxca tiꞌ: Ey ebꞌ man smoo oj chi yabꞌ syaꞌil, jaꞌ tinaniꞌ sowalil oj yabꞌ syaꞌil ebꞌ yu sjowal jin cꞌul, jaxca tol oj yucꞌ vino ebꞌ tol caw jow. Jaex tiꞌ, ¿tumi che naꞌ tol man oj je yabꞌ syaꞌil? Sowalil oj je yabꞌ syaꞌil yu sjowal jin cꞌul. 13 Yutol jain Jehová jin chi wakꞌ jin tiꞌ: Jaꞌ conobꞌ Bosrá oj cancan yin cusiltaj txꞌotxꞌ, caw oj xiwa ebꞌ ánima yilon ocoj, oj bꞌuchwa ebꞌ yin cꞌal yintajne el ebꞌ. Jal wanxa conobꞌlaj yul yet Edom, oj uchcha can ey ebꞌ yin junelne, ẍi Jehová.
14 Jix al-le jun kꞌane tiꞌ ey jin yu Jehová: Lalan yaontej jun ẍejabꞌ yu jul yalon el bꞌey xol-laj nación: Yambꞌawej je bꞌa, catuꞌ chex too yin Edom, Akꞌwej lista je bꞌa yet chex too yin jowal, ẍi.
15 Jex a Edom, yel xacꞌal yeynajil oj jex wute yintaj masanil conobꞌ, cꞌamxa je yeloc apnoj yul sat masanil ánima.
16 Jaex cꞌal oc che yetne je bꞌa yu je meynebꞌail; tumi ey mac chi xiw ey jex jaxca je naꞌon tuꞌ. Jaꞌ bꞌey yul-laj sjatilal chꞌen mimej nachꞌen bꞌey sjolomlaj wonan, jatuꞌ chex caeyi. Jain Jehová jin chi walaꞌ, caxcꞌal tol jaꞌ tituꞌ chex caey bꞌey yel xacꞌal naat eyaoj, jaxca chi yun noꞌ chii, chi swaꞌne oc sweyubꞌ noꞌ tituꞌ, sowalil oj jex wiꞌeytej.
17 Jaꞌ masanil mactxequel oj ecꞌ bꞌey Edom tuꞌ, tuxa cꞌal oj xiwcan aoj, cꞌal sqꞌueya scꞌul ebꞌ yu jun miman syaꞌilal oj jul yibꞌan ebꞌ tuꞌ. 18 Jain Jehová jin chi walaꞌ: Laan xacꞌal oj yun slawi ey conobꞌ Edom, jaxca jix yun slawi ey conobꞌ Sodoma, cꞌal Gomorra, yetoj wanxa conobꞌ ey scawilal tuꞌ. Cꞌamxa mactxequel oj meltzotoj caey junelxa tituꞌ, tam wal eyto mactxequel tol tucꞌal oj ecꞌ jayebꞌoj xa cꞌual. 19 Jaxca wal junoj noꞌ bꞌalam chi eltej bꞌey xol-laj eltzabꞌ bꞌey stiꞌlaj jaꞌ Jordán, chi aapnoj lemna bꞌey chi low noꞌ meꞌ, catuꞌ chi ujtele sajlem cantoj noꞌ, jaxca wal tuꞌ oj yun wapni oc bꞌey conobꞌ Edom, queytuꞌ oj yun yela ebꞌ ánima bꞌey sat xꞌotxꞌ tuꞌ, catuꞌ oj waon oc jun yaaw tituꞌ, jun tol sicꞌbꞌil el wu. ¿Mac wal txequel junoj chi skeꞌ slaanbꞌane sbꞌa yipalil wetoj? ¿Mactxequel chi skeꞌ steelen sbꞌa wetoj? ¿Mac junoj yaaw chi skeꞌ stecꞌbꞌan sbꞌa jin sattaj? 20 Abꞌwej tzetyetal tuxa jix jin naꞌ yibꞌan Edom, jain Jehová jin tiꞌ. Yetoj tzetyetal tuxa jix jin naꞌ yibꞌan ebꞌ caan bꞌey Temán: Tol oj iꞌletoj yuninal ebꞌ, catuꞌ oj uchle ey sna ebꞌ yibꞌan. 21 Caw oj bꞌilwoj txꞌotxꞌ txꞌotxꞌ yet oj eyqꞌuey Edom tuꞌ. Oj el yaw ebꞌ skꞌanon jin colwal, oj apnoj tacꞌal oc yel yaw ebꞌ bꞌey jaꞌ Cajin Mar. 22 Jaꞌ wan scajat ebꞌ tuꞌ oj apnoj oc lemna ebꞌ yin conobꞌ Bosrá, jaxca wal junoj noꞌ chii, chi apni oc jupupoj. Jaꞌ yet jun cꞌual tuꞌ, jaꞌ ebꞌ soldado bꞌey Edom, caw oj xiwa ebꞌ jaxca junoj ix ix tol lalan swaꞌxi scꞌul yu unin, ẍi Jehová.
Jaꞌ Tzet Albꞌilcan Yibꞌan Conobꞌ Damasco
23 Kꞌane jix yal Jehová yibꞌan ebꞌ a Damasco:
Jaꞌ ebꞌ a conobꞌ Hamat cꞌal Arpad, manxa animaoj ye scꞌul ebꞌ, yutol pena xacꞌal yoc kꞌane jix apni oc tet ebꞌ. Tuxa jix jowbꞌi xiwcꞌulal yin ebꞌ; cꞌamxa chi skeꞌ yeecꞌ niꞌoj ebꞌ yin tzalacꞌulal.
24 Jaꞌ ebꞌ bꞌey Damasco, cꞌamxa yip ebꞌ, lalan snaꞌon ebꞌ tol oj ela ebꞌ. Asanxane xiwcꞌulal, bꞌiscꞌulal cꞌal syaꞌilal ey xol ebꞌ jaxca junoj ix ix lalan swaꞌxi scꞌul yu unin.
25 Jaꞌ jun conobꞌ caw bꞌinabꞌil tuꞌ, jun conobꞌ tol eyoc yin tzalacꞌulal, tuxa jix cancan yin cuscꞌulalil.
26 Jain Jehová Yaaw jin yibꞌan masanil chi walaꞌ: Jaꞌ yet jun cꞌual tuꞌ, Jaꞌ ebꞌ achꞌe tuxa cꞌal oj ey can latzꞌan ebꞌ bꞌey yul-laj calle; oj cam pax masanil ebꞌ soldado.
27 Oj waoc skꞌakꞌal smuroal conobꞌ Damasco, oj jin nuscantoj wan spalacio naj Ben-adad, ẍi Jehová.
Jaꞌ Tzet Albꞌilcan Yibꞌan Conobꞌ Quedar Cꞌal Conobꞌ Hasor
28 Jaꞌ tzet jix yal Jehová yin ebꞌ ey yul yet Quedar, cꞌal yin ebꞌ syaawil conobꞌ Hasor, jaꞌton wan jix yakꞌ eyqꞌuey Nabucodonosor, naj sreyal Babilonia.
Jex a Babilonia asiꞌ akꞌwej jowal yin conobꞌ Quedar. Akꞌwej lawoj jun tujan ánima yetcꞌulal bꞌey chi aol cꞌu.
29 Iꞌwej ecꞌ smeꞌ ebꞌ, cꞌal skꞌap na ebꞌ yetoj jantaj smitxꞌkꞌabꞌ ebꞌ. Iꞌwej ecꞌ scamello ebꞌ, catuꞌ che yaon el je yaw: Masanil xacꞌal, caw ey xacꞌal xiwcꞌulal, je chi tet ebꞌ.
30 Jain Jehová jin chi walaꞌ: Elanwej aoj mac jex caan jex bꞌey conobꞌ Hasor. Asiꞌwej, cꞌubꞌawej el je bꞌa, yutol jaꞌ Nabucodonosor, sreyal Babilonia tuxa jix snaꞌ tzet oj jex yute.
31 Jain Jehová jin chi wal tet ebꞌ a Babilonia jaxca tiꞌ: Asiꞌwej akꞌo jowal yin jun conobꞌ tol cꞌam tzet chi snaꞌ niꞌoj, tol yin tzalacꞌulal eyecꞌoj, cꞌam spuertail sconobꞌ eyocoj, cꞌam niꞌoj tzet chi teynen ebꞌ, caw asanne ebꞌ eey xꞌojli.
32 Asiꞌwej, catuꞌ che yelkꞌanetej scamello ebꞌ, cꞌal swacax ebꞌ, jin chi tet ebꞌ. Yal cꞌal bꞌeytuꞌ oj watoj syaꞌilal yibꞌan ebꞌ, cꞌal ebꞌ chi stzujel xil sjolom, oj sajlem cantoj ebꞌ.
33 Jaꞌ conobꞌ Hasor caw cusiltaj txꞌotxꞌ xacꞌal oj yun cantoj yin junelne, asanxane noꞌ ooj, oj caey ecꞌ tituꞌ. Cꞌamxa mactxequel oj caey tituꞌ, tam wal eyto mac oj ecꞌoj, ẍi Jehová.
Jaꞌ Tzet Albꞌilcan Yin Conobꞌ Elam
34 Jaꞌ yet jix ẍaꞌon el yich yakꞌon reyal naj Sedequías bꞌey Judá, jaꞌ yet tuꞌ jix kꞌanabꞌ Jehová tet naj Jeremías yin conobꞌ Elam:
35 Jain Jehová, yaaw jin yibꞌan masanil chi walaꞌ: Tol oj jin makꞌ kꞌatoj sjulbꞌal ebꞌ soldado a Elam, jaꞌton wan smitxꞌkꞌabꞌ ebꞌ yet jowal tol caw eyoc yipoj scꞌul.
36 Oj wiꞌtej junoj jowal yin jun conobꞌ tiꞌ, jaxca junoj miman kaꞌeꞌ, yal cꞌal bꞌey chi tita. Yal cꞌal bꞌey oj iꞌletoj ebꞌ; cꞌamxa junoj nación bꞌey man oj apnoj oc ebꞌ scꞌubꞌa el sbꞌa.
37 Jain Jehová jin chi walaꞌ tol tuxa cꞌal oj bꞌilwoj ebꞌ a Elam sattaj wan scajat ebꞌ oj akꞌon camoj. Oj watoj syaꞌilal cꞌal uchlebꞌail yibꞌan yu sjowal jin cꞌul. Oj apnoj oc jowal xol ebꞌ masantaꞌcꞌal oj lawoj ey ebꞌ.
38 Jain Jehová jin chi walaꞌ, tol oj wakꞌ Yaawilal tituꞌ. Oj wakꞌ makꞌle cam ebꞌ rey cꞌal ebꞌ eyoc yin yaawil bꞌey conobꞌ Elam tuꞌ.
39 Jain caw Jehová jin chi walaꞌ, tol jaꞌ yin slawubꞌal tuꞌ, oj wiꞌ pax a can conobꞌ Elam tiꞌ junelxa, ẍi Dios.