¡Okꞌbꞌal cꞌul conobꞌ Nebo, tuxa oj uchcha eyoj! Jacꞌalaꞌ pax conobꞌ Quiriataim, tuxa oj eyqꞌueyoj, yeynajil xacꞌal oj uteleoj. Tuxa oj uchle ey smuroal sat txꞌotxꞌ.

2 Tuxa oj lawoj ey yipalil conobꞌ Moab. Jaꞌ bꞌey conobꞌ Hesbón, jatuꞌ chi snaꞌ wan scajat tzet oj yun slawi ey conobꞌ Moab yin junelne. Jacꞌalaꞌ cꞌal pax conobꞌ Madmén, oj lawoj eyoj; jaꞌ jun jowal tuꞌ, man oj oc tucanoj.

3 Jaꞌ bꞌey conobꞌ Horonaim oj el yaw ebꞌ: Oj yalon ebꞌ jaxca tiꞌ: ¡Lalan cu cami, lalan cu lawi eyoj!

4 Jaꞌ Moab tuxa jix lawi eyoj; chi abꞌle tacꞌal yel aw bꞌey conobꞌ Sóar.

5 Caw wal chi okꞌ ebꞌ, chi el yal sat ebꞌ yokꞌi, chi atoj bꞌey txꞌotxꞌ wonan Luhit. Jal ebꞌ chi eytoj bꞌey Horonaim, caw chi el yaw ebꞌ yu syaꞌilal tzet lalan yunen tuꞌ.

6 ¡Jaꞌ mac chi to skeꞌ scolon sbꞌa, el ojabꞌ aoj! ¡Scol ojabꞌ sbꞌa! ¡Laan ojabꞌ xacꞌal chi yute sbꞌa ebꞌ jaxca noꞌ xol-laj teꞌal bꞌuru bꞌey txꞌotxꞌ cusiltaj txꞌotxꞌ!

7 Jaꞌ Moab, tol asan smulnail cꞌal sbꞌeomal eyoc yipoj scꞌul, jaꞌjun oj tzajitoj. Jaꞌ jun sdiosal chi yij Quemós, oj iꞌletoj yin presowomal, yetoj cꞌal ebꞌ eyoc yin yakꞌomaloj xaambꞌal, cꞌal ebꞌ winaj tol miman yeloc apnoj.

8 Jain caw Jehová jin chi walaꞌ: Jaꞌ jun jowal tuꞌ oj apnoj oc bꞌey masanil conobꞌlaj yul yet Moab, cꞌam junoj oj elcanoj. Jaꞌ tzet ey bꞌey jobꞌelaj, cꞌal bꞌey pananlaj, oj uchcha can ey masanil.

9 Jaxca tol oj elol xicꞌ ebꞌ a Moab, yet chi ela ebꞌ. Jaꞌ masanil conobꞌlaj ey yul yet Moab tuꞌ, oj lawoj eyoj. Cꞌamxa mactxequel oj caey ecꞌ tituꞌ, ẍi Jehová.

12 Jain wal caw Jehová jin chi walaꞌ: Tol oj jul scꞌual yet oj jin chejon wan winaj tol oj iꞌletoj ebꞌ a Moab bꞌey wanxa conobꞌ, jaxca wal chi yun qꞌuexle el vino yul sneetal. Oj uchle can lawoj sconobꞌ ebꞌ, tol tzꞌinini xacꞌal oj yun canoj, jaxca chi yun smakꞌle can poꞌo sneetal vino tol cꞌamxa tzet eey yul.

13 Yu jun tuꞌ, yuxan jaꞌ ebꞌ a Moab tuꞌ oj yakꞌ caabꞌcꞌulal ebꞌ yin jun sdiosal chi yij Quemós, jaxca ton wal jix yun yakꞌon caabꞌcꞌulal ebꞌ Israel yin jun sdiosal eyoc bꞌey conobꞌ Betel, tol jaꞌ eyoc yipoj scꞌul ebꞌ.

14 Cꞌam ojabꞌ chi yal ebꞌ a Moab jaxca tiꞌ: Jaon tiꞌ, caw jelan jon, mimanbꞌil jon, tol akꞌom jon jowal, man ojabꞌ ẍi oj ebꞌ.

15 Tuxa oj apnoj oc jun oj akꞌon lawoj ey conobꞌ Moab, yetoj wanxa conobꞌlaj; oj cam ebꞌ achꞌe tol caw ey yip caan tituꞌ. Jaꞌ jun tuꞌ chi yal Naj Rey, tol Jehová yoc sbꞌi, Naj Yaaw yibꞌan masanil.

16 Tuxa oj jul scꞌual syaꞌilal yibꞌan Moab, tuxa oj jul jun uchlebꞌail yibꞌan.

17 Jaꞌ jantaj jex caan jex scawilal Moab, cꞌal mac jex je yotaj tzet utbꞌil chi yun sbꞌinalei, okꞌanwej yu, catuꞌ che yalon jaxca tiꞌ: Jaꞌ smimanbꞌilal conobꞌ Moab oj lawi eyoj, cꞌamxa yipalil cꞌamxa bꞌey chi bꞌinale ecꞌoj, je chi.

18 Jex a conobꞌ Dibón, bꞌejwej can je meynen je bꞌa, yeynajil ojabꞌ che yute je bꞌa, yutol jaꞌ mactxequel chi akꞌon lawoj Moab, lalan yapni oc je yin, lalan yuchon ey smuroal je conobꞌ.

19 Jex a conobꞌ Aroer, ocanwej tucan bꞌey stiꞌlaj bꞌe, catuꞌ che yiloni. Kꞌanlewej tet ebꞌ a Dibón jix cancan yin yiquisal, tzet jix ecꞌtoj tituꞌ.

20 Jaꞌ Moab yeynajil xacꞌal yeocoj, eyoc yin xiwcꞌulal. Okꞌanwej yu syaꞌilal jix jul yibꞌan. Alwej el bꞌey stiꞌlaj jaꞌ miman Arnón tol jaꞌ Moab tuxa jix lawi eyoj, ẍi Jehová.

25 Jaꞌcaw Jehová chi aloni: Jaꞌ yipalil Moab tuxa jix lawi eyoj; jaꞌ stecꞌanil tuxa jix uchcha eyoj.

26 Chi yalon pax Jehová jaxca tiꞌ: Somchanajxa el snaꞌbꞌal ebꞌ a Moab, yutol pit cꞌaltaꞌ chi yute sbꞌa ebꞌ ey jin. Tzeele ojabꞌ ebꞌ yu ebꞌ ánima, jaxca chi yun stzeele junoj uqꞌuem an chi sbꞌalecꞌ sbꞌa xol xaaw.

27 Jex a Moab, naꞌwejtej, tol jix je tzee ebꞌ a Israel, jix je yal bꞌuchwal kꞌane yin ebꞌ, jaxca xacꞌal elkꞌom yeoc ebꞌ yul je sat.

28 Je masanil jex a Moab, bꞌejwej can je conobꞌlaj; asiꞌwej caey satlaj chꞌen, jaxca noꞌ cuateꞌ, yutol jaꞌ tituꞌ ey sweyubꞌ noꞌ.

29 Wotaj jantaj yeoc smeynebꞌail ebꞌ a Moab. Caw jow ebꞌ, asanxane ebꞌ miman yeloc apnoj snaꞌoni. Caw chi ecꞌ xacꞌal ebꞌ yibꞌan.

30 Jain Jehová jin, wotaj tol caw chi mimanbꞌane sbꞌa ebꞌ, caw naꞌbꞌacꞌal, cꞌam niꞌoj tzet chi yiꞌ ebꞌ yu smeynebꞌail ebꞌ tuꞌ.

31 Yu jun tuꞌ, yuxan chin okꞌi, chi cus jin cꞌul yu conobꞌ Moab, jaxca yu ebꞌ ánima bꞌey Quir-haréset.

32 Caw oj ecꞌbꞌantoj wokꞌ yu conobꞌ Sibmá, yintaj pax chi yun wokꞌ yu ebꞌ a Jazer. Yutol jaꞌ yawo uva chi bꞌey stoo cꞌal bꞌey junxa skꞌaxepal ecꞌtoj jaꞌ mar, chi apni taꞌcꞌal oc bꞌey jaꞌ naabꞌ jaꞌ yul yet Jazer. Jaꞌ tinaniꞌ tuxa jix jul ebꞌ oj akꞌon lawoj ey an uva, yetoj cꞌal satlaj awo tol ekꞌomxa.

33 Cꞌamxa aw yet tzalacꞌulal chi oc bꞌey xol awo yet Moab. Cꞌamxa vino bꞌey scꞌuanbꞌal, cꞌamxa mac chi tecꞌwi el yal uva, cꞌamxa bꞌit yet tzalacꞌulal chi oqui.

34 Jaꞌ ebꞌ ánima bꞌey Hesbón chi el yaw ebꞌ yu syaꞌilal. Chi apni taꞌcꞌal oc yel yaw ebꞌ bꞌey Elealé, cꞌal bꞌey Jahas. Chi apni taꞌcꞌal oc yel yaw ebꞌ a Sóar masantaꞌcꞌal bꞌey Horonaim cꞌal bꞌey Eglat-selisiya. Tol tax jix tantoj jaꞌ snukꞌ jaꞌ bꞌey Nimrim.

35 Jain Jehová jin chi walaꞌ: Jaꞌ bꞌey Moab oj wakꞌ lawoj ebꞌ ánima chi oc yin eyilal yin yakꞌon xaambꞌal ebꞌ bꞌey wan wonan naat eyaoj, cꞌal yin yakꞌon tzꞌaꞌ incienso ebꞌ tet sdiosal.

36 Jaxca yokꞌ chꞌen flauta chi xuꞌle yu cuscꞌulal, jaxca tuꞌ chi yun wokꞌ yu ebꞌ a Moab, jaꞌton yu ebꞌ ánima bꞌey Quir-haréset, yutol jaꞌ sbꞌeomal ebꞌ jix syambꞌa, tuxa jix lawi eyoj.

37 Masanil ebꞌ tuxa jix stzujel xil sjolom, catuꞌ jix stzujon cꞌal pax el xil stiꞌ ebꞌ. Masanil ebꞌ jix smakꞌ yasoj skꞌabꞌ, jaxa cꞌal an eel pichile eyoc yu ebꞌ masanil, yu xꞌoxon el ebꞌ, tol caw chi cus scꞌul ebꞌ.

38 Jaꞌ masanil bꞌey yibꞌanlaj na bꞌey Moab cꞌal bꞌey masanil yul-laj scalleal conobꞌ, asanxane cuscꞌulal chi abꞌlei, yutol jain Jehová jin chi walaꞌ tol jix wakꞌ lawoj Moab jaxca chi yun smakꞌle poꞌo junoj txꞌotxꞌ xi cꞌamxa yopiso.

39 Jaꞌ conobꞌ Moab, caw kocꞌ xacꞌal jix yun cantoj, okꞌanwej yu, caw yeynajil jix yun cantoj, tuxa jix uchchatoj. Masanil nacionlaj ey scawilal chi bꞌuchwa ebꞌ yin, caw chi xiwa ebꞌ yiloni, ẍi Jehová.

40 Chi yalon cꞌal pax Jehová jaxca tiꞌ: Jaꞌ jun chi jowi oc yin conobꞌ Moab, tuxa jix oc jucna yin jaxca xacꞌal junoj noꞌ chii tol jeneni xacꞌal yapni ocoj.

41 Oj eyqꞌuey wan conobꞌlaj tol watxꞌ yeoc smuroal yul skꞌabꞌ ebꞌ oj jul etnentoj tuꞌ. Jaꞌ yet jun cꞌual tuꞌ, jaꞌ ebꞌ soldado yet conobꞌ Moab, tuxa cꞌal oj xiwa ebꞌ jaxca junoj ix ix tol lalanxa swaꞌxi scꞌul yu unin.

42 Jaꞌ conobꞌ Moab, manxa nación oj yun canoj, yutol jix smimanbꞌane sbꞌa jin sattaj jain Jehová jin tiꞌ.

43 Yu jun tuꞌ, yuxan chi wal jaxca tiꞌ: Jaꞌ ebꞌ caan bꞌey Moab, laan oj yun ebꞌ jaxca noꞌ noꞌ chi ujtele yu ebꞌ ujtem noꞌ, caw ey xacꞌal smey yeyqꞌuey ebꞌ yul junoj jolan, ma yul junoj yaal.

44 Jaꞌ mactxequel oj ela tet ebꞌ chi ujten ecꞌ tuꞌ, oj eyqꞌuey ebꞌ yul junoj jolan. Jaꞌ mactxequel oj atej yul jolan tuꞌ, oj oc yul yaal. Yutol jain Jehová jin tiꞌ, oj watoj syaꞌilal naꞌbꞌilxa wakꞌon yibꞌan conobꞌ Moab.

45 Jaꞌ ebꞌ lalan yelaoj, cꞌamxa yip ebꞌ, oj toj ebꞌ sey bꞌey oj scol sbꞌa bꞌey Hesbón. Jaꞌ bꞌey Hesbón tuꞌ, jaꞌton sconobꞌal naj rey Sihón, oj eltej xaj kꞌakꞌ catuꞌ oj bꞌey cꞌal stoi. Oj yakꞌ cꞌal tzꞌaꞌ masantaꞌcꞌal oj apnoj bꞌey smoonal, cꞌal bꞌey masanil sjolomlaj wonan bꞌey yul snación wan caw chi smeyne sbꞌa tuꞌ.

46 Okꞌbꞌal jex cꞌul jex a Moab, jex conobꞌ Quemós, tuxa jix jex lawi eyoj. Jaꞌ ebꞌ je yuninal tuxa jix iꞌletoj ebꞌ yin presowomal.

47 Jain Jehová jin chi walaꞌ: Ey jun cꞌual, oj wiꞌ meltzo ebꞌ conobꞌ Moab tiꞌ junelxa, ẍi Jehová.