2 Jaxca tiꞌ yalon Jehová: Jaꞌ bꞌey norte oj tit wal jun miman bꞌulan ebꞌ soldado, jaxca wal junoj miman jaꞌ tol chi el yul sbꞌe stita. Oj yakꞌ lawoj el masanil jun nación tiꞌ, yetoj masanil tzetyetal ey bꞌey, cꞌal jantaj conobꞌlaj. Jaꞌ masanil ebꞌ caan bꞌey sconobꞌ ebꞌ Filisteo tiꞌ, oj el yaw ebꞌ. Masanil ánima oj el yaw yu syaꞌilal.

3 Jaꞌ yet oj yabꞌen sbꞌilwi stit yajan noꞌ che ebꞌ, cꞌal yabꞌen sbꞌilwi stit carruaje ebꞌ, caw oj pax yip ebꞌ, jaꞌ ebꞌ mame cꞌal ebꞌ txutxe oj sbꞌejcan yuninal ebꞌ.

4 Yutol jix jul scꞌual yet chi akꞌle lawoj ebꞌ Filisteo. Oj lawoj ey ebꞌ chi colwa yin conobꞌ Tiro cꞌal yin Sidón, ẍi Jehová.

Jaꞌ Jehová oj akꞌon lawoj el ebꞌ Filisteo, jaꞌton masanil ebꞌ titnaj bꞌey Creta snan xol jaꞌ mar.

5 Jaꞌ masanil ebꞌ ánima bꞌey Gaza oj stzujel xil sjolom ebꞌ yu cuscꞌulal; tuxa cꞌal oj qꞌueya scꞌul ebꞌ, tzꞌin xacꞌal ẍi ebꞌ ánima bꞌey Ascalón. Jaex caan jex bꞌey yacꞌalil stiꞌlaj jaꞌ mar. ¿Bꞌakꞌin oj bꞌej je makꞌon yasoj je mimanil yu je txꞌoxon el je cuscꞌulal?

6 ¡Ay, jaꞌ yespada Jehová! ¿Bꞌakꞌin wal oj oc tucanoj? ¡Toloj wal chi ale eytoj chꞌen espada yul stzꞌuumal junelxa, catuꞌ chi oc tucanoj, cꞌamxa tzet chi yun chꞌen!

7 Asan xin ¿Tzet wal oj yun yoc tucanoj? Tol jaꞌ Jehová jix aloni tol jaxca tuꞌ chi yunne, tol jaꞌcaw jix aloni, tol chi oc jowal yin conobꞌ Ascalón cꞌal yin masanil ebꞌ bꞌey stiꞌlaj jaꞌ mar.