Jaꞌ jun libro tiꞌ jix tzꞌibꞌelecan yet abꞌil 700-680 a.C.

Jaꞌ naj Isaías jix tzꞌibꞌencan bꞌey Jerusalén. Jaꞌ naj Isaías tuꞌ, ẍejabꞌ Dios yeocoj. Jaꞌ sbꞌi naj eyoc yin jun libro tiꞌ. Jaꞌ naj Isaías tuꞌ, jix caey ecꞌ naj bꞌey Jerusalén yet tax 700 abꞌil a.C.

Jaꞌ jun libro tiꞌ, ey caabꞌ tujan yeocoj. Jaꞌ capítulo 1 masantaꞌcꞌal chi apni oc bꞌey capítulo 39, chi yaltej yu conobꞌ Judá yet eyecꞌ yet jun tiempoal caw ey smey, yet ian jix yakꞌ jowal ebꞌ Asiria yin ebꞌ Judá. Jaꞌ yet jun tiempoal tuꞌ, jix yal naj ẍejabꞌ Dios tol man yu oj yipal ebꞌ Judá yuxan jix eyqꞌuey ebꞌ Asiria tuꞌ, yutol caw ey spenail ebꞌ, ma yaoc scꞌul ebꞌ yin Dios.

Jaꞌ wan cuybꞌanile jow yaloni, jaꞌ jix yal naj Isaías tet ebꞌ ánima tuꞌ. Ey pax wan txꞌoxbꞌanile jix xꞌox naj tet ebꞌ. Jaꞌ yetoj wan tuꞌ jix yakꞌle naj yiꞌon meltzo ebꞌ ánima yet chi oc ebꞌ yin eyilal tet Dios. Jix yalon naj tet ebꞌ, ta cꞌam chi ẍaꞌ ebꞌ yabꞌ tzet chi yal Dios, oj jul syaꞌilal yibꞌan ebꞌ. Jix yalon pax naj yu jun yicꞌaal naj rey David oj jul yakꞌ watxꞌcꞌulal cꞌal tzalacꞌulal bꞌey yul yibꞌankꞌinal tiꞌ.

Jaꞌ bꞌey capítulo 40 masantaꞌ bꞌey capítulo 66, jaꞌ titiꞌ chi yal yu ebꞌ Israel tol oj paxtej ebꞌ iꞌbꞌiltoj jaxca presowomal bꞌey Babilonia. Jaꞌ yet oj eloc jun tuꞌ, oj txeclo eloj tol man laan oj Jehová yetoj sdiosal wanxa nación. Jaꞌ wan capítulo tiꞌ, chi yal pax oj tol jaꞌ conobꞌ Israel ẍejabꞌ Jehová yeocoj yet chi yalon el watxꞌ kꞌane. Caw ecꞌal versículo chi aloni, tol oj yabꞌ syaꞌil jun ẍejabꞌ Jehová yu cu penail jaon ánima jon tiꞌ. Caw ecꞌal pax wan cuybꞌanile chi aloni tol jaꞌ ebꞌ sconobꞌ Dios, sowalil jichan chi yute snaꞌbꞌal ebꞌ, chi jijen scꞌual xewilal ebꞌ yetoj cꞌal swa kꞌane Dios jix yakꞌ can yetoj ebꞌ.