Chi yalon ix kꞌopo:
8
Jaach achꞌe, toloj wal jin no jaach an,toloj wal junne ime jix cu tzꞌubꞌuꞌ. Tol oj wal jaxca tuꞌ, jaꞌ yet chach jin chaꞌon bꞌey yul-laj calle, chim skeꞌ jin tzꞌubꞌon el ja tiꞌ, catuꞌ cꞌam mi mactxequel chi alon jin kꞌumal ja wetoj.
2 Chim skeꞌ jaach wiꞌontoj bꞌey sna ix jin txutx, chach mi wiꞌoctoj yul na tuꞌ, jaach mi wal chach oc jin cuyomaloj. Jain mi wal caw chi wakꞌ vino manxa jantajoj swatxꞌil ja wuqꞌue, cꞌal yal teꞌ jin granada.
3 Jaꞌ ja qꞌuexan kꞌabꞌ chi waoctoj yalan jin jolom, jaxa ja watxꞌ kꞌabꞌ chi oc lakꞌan win, ẍi ix.
Chi yalon naj achꞌe:
4 Jex kꞌopo a Jerusalén, akꞌwej je tiꞌ ey jin, tol cꞌam ojabꞌ che tenel sweyan ix jin camcꞌulnebꞌil tuꞌ masantaꞌcꞌal jaꞌ ix oj el sweyan, ẍi naj.
Yet Swaj Tujan Bꞌit
Chi yalon ebꞌ ánima:
5 ¿Mactxequel jun ix chi tit bꞌey txꞌotxꞌ cusiltaj txꞌotxꞌ, tol chi eytej pajan sjolom xicꞌ naj camcꞌulnebꞌil tuꞌ? ẍi ebꞌ.
Chi yalon naj achꞌe:
Jaꞌ bꞌey yich jun teꞌ mansan, jaꞌ tituꞌ jix jin xibꞌte el ja weyan. Jaꞌ tituꞌ titnaj syaꞌil scꞌul ix ja txutx yet jix jaach ali.
Chi yalon ix kꞌopo:
6 Cꞌam ojabꞌ cha waoc ja camcꞌulal yin junojxa ix ix; asanne ojabꞌ win cha waon ja camcꞌulal. Cꞌam ojabꞌ junojxa mactxequel cha lakꞌecꞌoj; asanne ojabꞌ jin chin ja lakꞌaꞌ. Jaꞌ cu camcꞌulal kin junjun jon, ey ojabꞌ yip jaxca yipal camich. Jaxca ojabꞌ smujbꞌanil ebꞌ camom tol cꞌamxa chi sbꞌejel jantaj tzet mitxꞌbꞌil yu, quey ojabꞌ tuꞌ yeoc cu camcꞌulal. Laan ojabꞌ jaxca stzakꞌakꞌ tol caw chi a xaj.
7 Jaꞌ masanil jaꞌ mar, cꞌam ojabꞌ chi tzaji yakꞌon tan jun cu camcꞌulal tiꞌ; tam wal yipal jaꞌ mimej jaꞌ, cꞌam chi skeꞌ yakꞌon tanoj. Ta ey mac chi yalte masanil tzetyetal ey bꞌey sna yin smanon jun camcꞌulal tiꞌ, tucꞌal mi chi bꞌuchle can eloj, ẍi ix.
Chi yalon ebꞌ sno ix kꞌopo tuꞌ:
8 Ey jun ix kanabꞌ tol tzunan unin, tol cꞌamto yim ix. ¿Tzet watxꞌ oj kun yetoj ix jon ta chi jul skꞌanomal ix?
9 Kꞌinaloj ta laan ix jaxca junoj muro, ta jaxca tuꞌ, chim cu waꞌne a caabꞌoj torre plata yinlaj ix. Ma laan ix jaxca junoj puerta, chim skeꞌ cu majchen ey ix yetoj chemteꞌ tol kꞌuteꞌ cꞌal eloj, ẍi ebꞌ naj.
Chi yalon ix kꞌopo:
10 Jain tiꞌ, laan jin jaxca junoj muro; jal wim xin, laan jaxca torre, yuxan caw wal chi tzala scꞌul naj jin camcꞌulnebꞌil wetoj.
11 Jaꞌ naj rey Salomón, ey jun yawbꞌen uva naj bꞌey Baal-hamón. Jix yakꞌ can yul skꞌabꞌ wan ebꞌ chi teynen jun mulnail tuꞌ. Jaꞌ yet oj syambꞌa a sat an uva ebꞌ tuꞌ, oj yakꞌ 1,000 chꞌen tumin plata junjun ebꞌ tet naj ey yet jun mulnail tuꞌ.
12 Ey ojabꞌ junoj 1,000 tujan chꞌen splata naj Salomón tuꞌ, cꞌal junoj 200 yet ebꞌ naj chi teynen jun mulnail tuꞌ; jal jin jain tiꞌ xin, ey jin awbꞌen uva yul wet jin txꞌojli; asan jin chin naꞌ tzet chi wute an wet tuꞌ, ẍi ix.
Chi yalon naj achꞌe:
13 Jaach jin camcꞌulnebꞌil chi woche chi wabꞌ yul ja nukꞌ, yutol ey jaach ecꞌ xol ja wawo. Catuꞌ chi yochen cꞌal pax ebꞌ cu watxꞌil ánima, tzet utbꞌil yoc yul ja nukꞌ, ẍi naj.
Chi yalon ix kꞌopo:
14 Jaach jin camcꞌulnebꞌil, yelcꞌulal chach tit jin cꞌatan an; akꞌ ani yet chach tita jaxca junoj noꞌ scꞌultajil che, ma jaxca junoj noꞌ yuneꞌ scꞌultajil che chi tit bꞌey txꞌotxꞌ tzalquiltaj bꞌey chi awle teꞌ incienso, ẍi ix.