Jaꞌ jun libro tiꞌ, jix tzꞌibꞌelecan yet abꞌil 940-931 a.C.

Jaꞌ naj Salomón jix tzꞌibꞌencanoj, jaꞌton yet jix lawi stiempoal skꞌinal naj yul yibꞌankꞌinal tiꞌ. Eclesiastés sbꞌi jun libro tiꞌ, chi yal yeloc apnoj, “jun mac chi kꞌanabꞌi, ma junoj chi ijbꞌan junoj bꞌulan ánima”. Jaꞌ naj jix tzꞌibꞌencan jun libro tiꞌ, chi yaltej naj yu tzet chi snaꞌ junoj mactxequel, tzet pax chi eloc ebꞌ ánima. Chi yalon pax tej tol man naatiloj chi ecꞌ ebꞌ ánima bꞌey yul yibꞌankꞌinal tiꞌ. Caw ecꞌal el chi yalaꞌ, tol jaꞌ tzet chi yoche cu cꞌul, cꞌam chi eloc jaxca chi yun cu naꞌon tuꞌ.

Jaꞌ naj jix tzꞌibꞌen jun libro tiꞌ, chi yaltej tol ecꞌal chi eloc tzet chi cu naꞌ, jaꞌton tzalacꞌulal, bꞌeomal, yetoj jelan naꞌbꞌaleal, jaꞌ yin wan tiꞌ jix naꞌcha el yu naj, tol man smoo oj ey yeloc apnoj wan tuꞌ yul cu sat. Ma naꞌcha el yu naj tzet wal yu, yuxan jix cu waꞌnele yu Dios. Jacꞌal tzet chi yal naj tol sowalil chi cu mulnai, chi kakꞌon tzalabꞌoj cu cꞌul yetoj tzet chi yakꞌ Dios ey jon. Caw miman cꞌal tzet chi yaltej jun libro tiꞌ yu jantaj tzet chi ecꞌ eltoj kibꞌan jaon ánima jon tiꞌ. Chi yalon pax tej yu tzet chi yun kaon oc Dios yin cu cꞌul ta tol ey cu caabꞌcꞌulal. Jaꞌ chi txꞌoxon tzet yeoc cu naꞌbꞌal, tzet chi yoche Dios chi kunne, ey ojabꞌ yeloc apnoj cu kꞌinal yul cu sat. Yu jun tuꞌ, yuxan caw ecꞌal mac chi aloni tol laan jun libro tiꞌ jaxca junoj chꞌen nen bꞌey chi kil cu sat. Tzꞌibꞌebꞌilcan jun libro tiꞌ yul An Biblia, yet watxꞌ chi kilaꞌ tzet kili yetoj cu bꞌeybꞌal, yutol chi yil Dios masanil tzet chi cu waꞌne.