Jaꞌ Skꞌane Naj Lemuel
31
Jaꞌ skꞌane naj rey Lemuel, jaꞌton bꞌey cuybꞌil can naj yu xutx. Jix yalon naj jaxca tiꞌ: Jaꞌ ix jin txutx alnen can wan kꞌane tiꞌ ey jin:2 Jaach wuneꞌ, jaꞌ Dios jix jaach akꞌon ey jin, yu spajtzebꞌaloj jin txa jix walaꞌ. ¿Tzet to wal junoj tzetyetal watxꞌ walon ey jaach?
3 Cꞌam ojabꞌ cha wetne el ja bꞌa yin ebꞌ ix ix; jaꞌ yu ebꞌ ix tuꞌ, yuxan ecꞌal ebꞌ rey chi etex eloj.
4 Jaach Lemuel, man watxꞌoj ta tol oj ja wucꞌ teꞌ an caw wal jow. Man pax smoo oj yuqꞌuen an ebꞌ ja wet yaawilal ja wetoj,
5 ta cꞌamaj, chi too can qꞌueycꞌulal ley ja wu, catuꞌ cha wetnen ebꞌ yeynajil ánima.
6 Jaꞌ ojabꞌ ebꞌ eyoc yin syaꞌilal chi uqꞌuen teꞌ an tuꞌ. Jaꞌ ojabꞌ ebꞌ eyoc yin bꞌiscꞌulal chi uqꞌuen teꞌ an caw jow,
7 yet watxꞌ chi qꞌueytoj yin snaꞌbꞌal ebꞌ yu tzet chi yute sbꞌa, cꞌamxa chi snaꞌtej smebꞌail ebꞌ, cꞌal syaꞌilal ebꞌ.
8 Kꞌanabꞌan yu ebꞌ cꞌam chi skeꞌ yalon sbꞌa sattaj ebꞌ yaaw; colwaan yin ebꞌ cꞌam mac chi coloni.
9 Kꞌanabꞌan yin ja waꞌnen yeoc junoj kꞌane yin sjichanil; colel ebꞌ okꞌbꞌal cꞌul yeocoj, cꞌal ebꞌ yeynajil, ẍi ix xutx naj Lemuel tuꞌ tet.
Chi Al-le Watxꞌ Kꞌane Yin Ix Ix Ey Snaꞌbꞌal
10 Jaꞌ junoj ix istile watxꞌ snaꞌbꞌal, man subꞌo oj yilcha ocoj; ecꞌbꞌan yeloc apnoj ix yintaj chꞌen chꞌen caw wal miman stool.
11 Caw yipcꞌule yeoc ix yu yichamil, yutol caw tzꞌajan cꞌal ye tzetyetal yul sna ix.
12 Caw chi yakꞌ tzalabꞌoj scꞌul yichamil, yin masanil tiempo.
13 Chi too ix sman lana yetoj txꞌal lino; caw chi tzala ix yet chi swaꞌnen smulnail.
14 Jaxca junoj teꞌ barco chi too yiꞌtej ijatz caw naat, queytuꞌ yeoc ix, caw naat chi bꞌet yiꞌtej tzetyetal chi skꞌanbꞌalne yin smulnail.
15 Jaꞌ yet cꞌam tocꞌal chi sajbꞌi chi a waanoj, catuꞌ chi cꞌoli yakꞌon low yuneꞌ cꞌal ebꞌ yakꞌomal servil eyecꞌ yetoj.
16 Chi too ix yil junoj txꞌotxꞌ, catuꞌ chi smanoni, jaꞌ yetoj chꞌen tumin chi yiꞌ yin xon tuꞌ, jaꞌton chi yakꞌbꞌalne yet chi yawon uva.
17 Chi yakꞌ wal yip ix smulna sicꞌlebꞌil.
18 Chi cam wal yiloni, tzet utbꞌil chi yun sbꞌey xon; chi mulna cꞌualil cꞌal akꞌbꞌalil.
19 Chi swaꞌne txꞌal, catuꞌ chi ẍemoni.
20 Naꞌan cꞌal ebꞌ mebꞌa yu, cꞌal ebꞌ cꞌam tzetyetal ey tet yet chi oc yopiso yu junjun cꞌu.
21 Cꞌam chi xiw ix yu ebꞌ yuneꞌ yet ey siic, yutol caw watxꞌ spichil masanil ebꞌ eyocoj.
22 Chi swaꞌne xoow ix, jaꞌ an kꞌap caw watxꞌ chi yaoc spichiloj.
23 Jaꞌ naj yichamil ix, caw otajbꞌil naj bꞌey sdespacho yul sconobꞌ, tol eyoc naj stzꞌajiloj ebꞌ mimej winaj yeoc bꞌey yul conobꞌ tuꞌ.
24 Chi swaꞌne an xotile ix, yetoj kꞌalile, catuꞌ chi xonon ix tet ebꞌ txonwom.
25 Caw jelan snaꞌbꞌal ix, catuꞌ miman yeloc apnoj ix yul sat ebꞌ ánima; cꞌam tzet chi snaꞌ ix yu tzet chi skꞌanbꞌalne yet yecal.
26 Caw jelan skꞌanabꞌi, yin cꞌal camcꞌulalil chi yun scuywai.
27 Ey cꞌal oc yilon tzet chi yun sbꞌeytoj masanil stzetyetal bꞌey sna, cꞌam bꞌey tucꞌal chi ecꞌ tiempo yu, cꞌam bꞌey chi sloꞌ cꞌal skꞌanbꞌalnen tzetyetal tol man yetoj.
28 Jaꞌ ebꞌ yuneꞌ, cꞌal yichamil, chi yal watxꞌ kꞌane ebꞌ yin, chi yalon ebꞌ jaxca tiꞌ:
29 Ecꞌal ton ebꞌ ix ix watxꞌ sbꞌeybꞌal; asan xin, tol asanne jaach yel xacꞌal watxꞌ ja bꞌeybꞌal yintaj masanil ebꞌ ix ix tuꞌ, ẍi ebꞌ tet ix.
30 Jaꞌ ebꞌ ix ix watxꞌ yili yetoj smimanil, ey bꞌey tol montebꞌal cꞌal yeoc ebꞌ ix. Jaꞌ swatxꞌil yili sat, jun txolan chi qꞌuexchatoj; jal pax ix ix tol ey yeloc apnoj Jehová yul sat xin, smoo wal tol miman yeloc apnoj ix.
31 Alwej watxꞌ kꞌane yin ix sattaj masanil conobꞌ; al-le ojabꞌ watxꞌ kꞌane yin ix yu masanil tzetyetal chi yunne.