Jaꞌ jun libro tiꞌ jix tzꞌibꞌelecan yet abꞌil 410-450 a.C.

Ecꞌal mac jix tzꞌibꞌen jun libro tiꞌ. Jix tzꞌibꞌele bꞌey yul yibꞌankꞌinal tiꞌ, yet watxꞌ chi yaltej jantaj skꞌaneal satcan cꞌal bꞌey yul yibꞌankꞌinal tiꞌ. Salmos sbꞌi jun libro tiꞌ, chi yal yeloc apnoj tol chi oc bꞌit yetoj wan mitxꞌkꞌabꞌe yet bꞌit tol ey xꞌanil. Yuxan queytuꞌ yoc sbꞌi jun libro tiꞌ. Caw naatil jix yiꞌtoj yet jix tzꞌibꞌelecanoj, yutol cꞌuancꞌulal jix yun swaꞌxi oc skꞌaneal wan bꞌit tuꞌ. Yuxan jaꞌ jix skꞌan ebꞌ conobꞌ Israel yet chi bꞌitni ebꞌ, cꞌal yet chi oc ebꞌ yin eyilal tet Dios.

Jaꞌ yet jix bꞌeycꞌaltej tiempo, jix juncꞌunele ey yetoj wanxa libro tol otajbꞌil yu ebꞌ Israel, tol jaꞌ skꞌane Dios tzꞌibꞌebꞌil ey yul an. Jaꞌ jun libro Salmos tiꞌ, ecꞌal tujan tzet tzꞌibꞌebꞌil ey yul: Ey bꞌit, ey alo watxꞌ kꞌane tet Dios, ey txa yu skꞌanle scolwal Dios, ey txa yu skꞌanle mimancꞌulal, ey bꞌit yet alo yu diosal yu swatxꞌcꞌulal Dios, ey pax txa yu skꞌanletej syaꞌilal yibꞌan ebꞌ pena snaꞌbꞌal. Jaꞌ bꞌey wan txa tiꞌ, ey bꞌey junne mac chi txali yet chi oc eyilal, ey pax txa yu ebꞌ sconobꞌ Dios. Jix skꞌanbꞌalne pax Jesús jun libro Salmos tiꞌ. Caw ecꞌal bꞌey chi bꞌinale yul An Nuevo Testamento. Jix kꞌanbꞌalnele jun libro tiꞌ yu ebꞌ bꞌabꞌel creyente yet jix el yich iglesia.

Ey joebꞌ tujan yeoc jun libro tiꞌ, yet chi el yich bꞌabꞌel tujan bꞌey Salmos 1 masantaꞌ 41. Yet scaabꞌ tujan, chi el yich bꞌey Salmos 42 masantaꞌ bꞌey 72. Yet yox tujan, chi el yich bꞌey Salmos 73 masantaꞌ chi apni bꞌey 89. Yet scan tujan, chi el yich bꞌey Salmos 90 masantaꞌ chi apni bꞌey 106. Yet sjoꞌ tujan chi el yich bꞌey Salmos 107 masantaꞌ chi apni bꞌey 150, jaꞌton titiꞌ chi lawi can jun libro tiꞌ.