Jaꞌ jun libro tiꞌ jix tzꞌibꞌelecan yet abꞌil 2000-1800 a.C.

Man kotajoj mac jix tzꞌibꞌeni. Jaꞌ bꞌey jun txꞌotxꞌ txꞌotxꞌ chi yij Us, jix tzꞌibꞌelecanoj.

Job sbꞌi jun libro tiꞌ, jaꞌ titiꞌ tzꞌibꞌebꞌilcan skꞌaneal jun winaj chi yij Job. Jaꞌ naj Job tuꞌ caw watxꞌ sbꞌeybꞌal naj, bꞌeom pax naj, ecꞌal yuninal naj jix ali yetoj yistil, caw miman yeloc apnoj naj xol ebꞌ yuẍtaj. Asan xin, ey wal jun miman syaꞌilal jix jul yibꞌan naj. Junne cꞌual jix yun slawi el masanil jantaj tzetyetal ey yul skꞌabꞌ naj. Jix lawi scam ebꞌ scꞌaal cꞌal ebꞌ scutzꞌin naj. Jix lawi tuꞌ, jix oc pax jun yaꞌbꞌil yin smimanil naj, jaꞌton chi yaltej bꞌey capítulo 1 yetoj capítulo 2.

Jal bꞌey capítulo 3 masantaꞌcꞌal chi apni oc bꞌey capítulo 37, chi yaltej tzet jix yun steelen sbꞌa naj Job yetoj ebꞌ yamigo. Jaꞌ tzet chi snaꞌ wan yamigo naj tuꞌ, tol chi akꞌle smimanil scꞌul naj yu ebꞌ yaloni, jaxa jix yun xin, tol jix steele a sbꞌa naj yetoj ebꞌ. Jaꞌ snaꞌon ebꞌ yamigo naj tuꞌ, tol yu spenail naj yuxan jix jul jun syaꞌilal tuꞌ yibꞌan yu Dios. Jix yalon naj Job tol watxꞌ sbꞌeybꞌal naj, jichan cꞌal snaꞌbꞌal. Cꞌam cꞌal chi ẍaꞌ yabꞌ ebꞌ yamigo naj tuꞌ, tol caw ey mi spenail naj chi yewbꞌa el snaꞌon ebꞌ. Yuxan caw jix stecꞌbꞌa sbꞌa naj Job yaloni tol man yu oj spenail naj yuxan chi jul jun syaꞌilal tuꞌ yibꞌan. Jix txali naj tet Dios, yet watxꞌ chi abꞌle tzet chi yal naj, yutol man smoo oj chi jul jun syaꞌilal tuꞌ yibꞌan naj. Yuxan jix yoche naj Job, tol jaꞌ Dios chi txꞌoxon el sattaj ebꞌ ánima, tol yel watxꞌ sbꞌeybꞌal naj, yutol ey cꞌal oc snaꞌbꞌal naj yin Dios. Yuxan jix yal Dios tet naj, jix skꞌanlen Dios jantaj wan tzetyetal tet naj, yet watxꞌ chi yotajne eloj tol ey yipalil Dios, caw jelan, yin cꞌal sjichanil chi yun swaꞌnen yeoc junoj tzetyetal. Queytuꞌ jix yun snaꞌcha el yu naj, tol ey wan kꞌane tol man smooal oj jix yal naj yin Dios.

Jaꞌ bꞌey capítulo 38 masantaꞌcꞌal chi apni oc bꞌey capítulo 42:6, jaꞌ tituꞌ chi yaltej wan tiꞌ.

Jaꞌ bꞌey capítulo 42:7 chi apni bꞌey versículo 17, jatuꞌ chi yaltej tol jix snaꞌ sbꞌa naj Job yu wan kꞌane jix yal Dios, yuxan jix waꞌxi scꞌul naj xol syaꞌilal tuꞌ. Jaꞌ yet jix ecꞌ eltoj jun syaꞌilal yibꞌan naj tuꞌ, manxa jantajoj tzet jix akꞌle tet naj yintaj yet yalantoj. Yu jun tuꞌ, yuxan jix tzule ebꞌ yamigo naj Job tuꞌ yu Dios, yutol cꞌam chi naꞌcha el yu ebꞌ tzet chi yal yeloc apnoj jun syaꞌilal eyoc yibꞌan naj Job tuꞌ. Jal pax naj Job tuꞌ xin, yotaj naj sicꞌlebꞌil tol caw miman yeloc apnoj Dios yintaj masanil tzetyetal.