4 Jaꞌ ebꞌ scꞌaal naj Job tuꞌ, bꞌeybꞌalnebꞌil cꞌal yu ebꞌ tol chi yaoc kꞌin ebꞌ yet chi tzꞌajna yabꞌilal junjun ebꞌ bꞌey sna, yin xolilal chi yun yaon oc kꞌin ebꞌ tuꞌ, chi yawte cꞌaltej oxwan yanabꞌ ebꞌ low yetoj. 5 Jaꞌ yet chi lawi yaon oc jayebꞌoj cꞌual skꞌin ebꞌ tuꞌ, chi txali naj Job yu ebꞌ yuninal tala ey ebꞌ chi oc spenail, chi a waan naj yet skꞌinibꞌalil, catuꞌ chi yakꞌon xaambꞌal naj yu junjun ebꞌ, yu yakꞌle tan spenail yibꞌan ebꞌ. Yutol chi snaꞌ naj tala chi oc spenail ebꞌ yuninal tuꞌ, tala ey ebꞌ chi bꞌuchwa yin Dios yin snaꞌbꞌal; jaxca cꞌal tuꞌ chi yun naj Job junjuntaj cꞌal el.

6 Ey jun cꞌual jix syambꞌa oc sbꞌa ebꞌ ángel sattaj Jehová bꞌey satcan, jaꞌton ebꞌ chi akꞌon servil; jaꞌ yet tuꞌ jix apni cꞌal pax oc jun ángel tol pena snaꞌbꞌal xol ebꞌ, jaꞌton Satanás. 7 Jix skꞌanle Jehová tet jaxca tiꞌ:

—¿Bꞌeytuꞌ jix jaach titocoj? ẍi tet.

Jix yalon Satanás jaxca tiꞌ:

—Jix jin tit bꞌey yul yibꞌankꞌinal yet chi ecꞌ jin joymone masanil sat txꞌotxꞌ txꞌotxꞌ, ẍi.

8 Jix yalon pax Jehová tet jaxca tiꞌ:

—¿Jix mi ja wil yin naj jin chejabꞌ chi yij Job? Tol cꞌam junojxa laan yetoj bꞌey sat txꞌotxꞌ tuꞌ, caw watxꞌ snaꞌbꞌal, caw watxꞌ sbꞌeybꞌal, ey weloc apnoj yul sat, catuꞌ chi steyne sbꞌa, cꞌam chi yatoj sbꞌa xol spenail, ẍi Dios.

9 Jix takꞌwi Satanás jaxca tiꞌ:

—Jix wil yin naj Job tuꞌ an, man cꞌal naꞌbꞌa oj tol watxꞌ xacꞌal chach yute yakꞌon servil. 10 Jaach tiꞌ cꞌam chi yal ja cꞌul tol ey junoj mactxequel chi tenoni, tumi wal chi tenle niꞌoj yetoj masanil ebꞌ caan yetoj yul sna xin, tam wal tzetyetal ey yul skꞌabꞌ naj ja wu; jaach tiꞌ cha wakꞌ cꞌal ja yaxilal yibꞌan masanil tzetyetal chi yunne, ilaꞌ tol nonaj xacꞌal el sat txꞌotxꞌ tuꞌ yu sjobꞌbꞌeal noꞌ. 11 Yuxan ta jaꞌ tinaniꞌ cha wiꞌecꞌ masanil tzetyetal ey yul skꞌabꞌ naj tuꞌ, catuꞌ oj ja wiloni ta tol man oj jaach bꞌuchle yu, ẍi Satanás.

12 Jix takꞌwi Jehová tet Satanás jaxca tiꞌ:

—Quey ojabꞌ tuꞌ chi yun xin, il cꞌal tzet cha wute ja bꞌa yetoj masanil tzetyetal ey yul skꞌabꞌ naj Job tuꞌ; asan xin, cꞌam cha waoc syaꞌilal yin naj, ẍi Jehová tet.

Jix lawi tuꞌ xin, jix el Satanás sattaj Jehová.

13 Ey jun cꞌual xin, yet lalan wal slow ebꞌ scꞌaal cꞌal ebꞌ scutzꞌin naj Job bꞌey sna naj bꞌabꞌel winaj, 14 jaꞌ yet tuꞌ, jix apni oc jun yakꞌomal servil bꞌey sna naj Job, jix yalon jaxca tiꞌ:

—Lalan wal cu kꞌuwi txꞌotxꞌ yetoj noꞌ wacax, jal noꞌ bꞌuru xin, lalan slow noꞌ bꞌey cu cawilal tuꞌ. 15 Jaxa wal jix yunne, jix jul ebꞌ Sabeo yelkꞌanetoj noꞌ wacax ebꞌ, catuꞌ jix tejle can cam ebꞌ naj mulnawom tuꞌ yu ebꞌ, asanxane jin jain tiꞌ jix jin elcanoj, yet chi jul walon jun tiꞌ ja wabꞌe, ẍi naj.

16 Cꞌam tocꞌal chi lawi skꞌanabꞌ naj tuꞌ, catuꞌ jix apni oc junxa naj, jix yalon tet Job jaxca tiꞌ:

—Jix eytej kꞌakꞌ bꞌey satcan, yuxan jix cam masanil ebꞌ naj ilom meꞌ yetoj cꞌal noꞌ meꞌ tuꞌ, asanxane jin jain tiꞌ jix jin colcha can el yet chi jul walon ja wabꞌe, ẍi naj.

17 Cꞌam tocꞌal chi lawi skꞌanabꞌ junxa naj tuꞌ, jix apni oc junxa naj yet yox, jix yalon jaxca tiꞌ:

—Oxebꞌ wal bꞌulan ebꞌ Caldeo jix oc yakꞌon jowal kin jon, jix yelkꞌanetoj masanil noꞌ camello ebꞌ, jix tejle can cam ebꞌ naj yilomal noꞌ camello tuꞌ yu ebꞌ. Asanxane jin jain tiꞌ jix jin colcha can el yet chi jul walon ja wabꞌe, ẍi naj tet Job.

18 Cꞌam tocꞌal chi lawi skꞌanabꞌ junxa naj tuꞌ, catuꞌ jix apni oc junxa naj, jix yalon jaxca tiꞌ:

—Jaꞌ ebꞌ naj ja cꞌaal cꞌal ebꞌ ix ja cutzꞌin, lalan wal slow ebꞌ bꞌey sna naj ja bꞌabꞌel cꞌaal, 19 catuꞌ jix tit jun miman kaꞌeꞌ bꞌey yetcꞌulal txꞌotxꞌ cusiltaj txꞌotxꞌ. Junelne jix eyqꞌuey na yibꞌan ebꞌ ja wuninal tuꞌ. Jix cam ebꞌ masanil. Asanxane jin jain tiꞌ jix jin colcha can el yet chi jul walon ja wabꞌe, ẍi naj.

20 Jaꞌ yet jix yabꞌen oc naj Job jaxca tuꞌ, catuꞌ jix a waanoj, caw jix cusa scꞌul naj sicꞌlebꞌil, yuxan jix stziltoj spichil, cꞌal stzujon el xil sjolom, catuꞌ jix ey noan yin eyilal tet Dios, 21 jix yalon jaxca tiꞌ:

—Cꞌam tzet iꞌbꞌil oc wu yet jix jin jul bꞌey yul yibꞌankꞌinal tiꞌ, cꞌam cꞌal pax tzet oj wiꞌtoj yet oj jin el bꞌey yul yibꞌankꞌinal tiꞌ. Jaꞌ Jehová jix akꞌon masanil ey jin, jacꞌalaꞌ pax Naj chi iꞌon ecꞌ ey jin, yuxan al-le ojabꞌ watxꞌ kꞌane tet Jehová, ẍi naj Job.

22 Caxcꞌal mi tol caw miman syaꞌtajilal jix jul yibꞌan Job, ma cꞌaltaꞌ yal pena kꞌane yin Dios.