—¿Bꞌeytuꞌ jix jaach titocoj? ẍi tet.

Jix takꞌwi Satanás jaxca tiꞌ:

—Jix jin tit bꞌey yul yibꞌankꞌinal yet chi ecꞌ jin joymone masanil sat txꞌotxꞌ txꞌotxꞌ, ẍi.

3 Catuꞌ jix yalon Jehová tet jaxca tiꞌ:

—¿Jix mi ja wil yin naj jin chejabꞌ chi yij Job? Tol cꞌam junojxa laan yetoj bꞌey sat txꞌotxꞌ tuꞌ, caw watxꞌ snaꞌbꞌal, caw watxꞌ sbꞌeybꞌal, caw ey weloc apnoj yul sat, catuꞌ chi steyne sbꞌa, cꞌam chi yatoj sbꞌa xol spenail. Ja wu yuxan jix wakꞌ lawoj masanil tzetyetal ey yul skꞌabꞌ naj, caxcꞌal jix wun jaxca tuꞌ, ma yetnetoj snaꞌbꞌal, ẍi Jehová.

4 Jix takꞌwi Satanás tet Jehová jaxca tiꞌ:

—Ta tol cꞌam chi tenle smimanil junoj mactxequel, ¡tumi ey tzet chi snaꞌ! Bꞌejan scꞌul ánima chi lawi el masanil stzettaj yetal yu scolon can el scawil. 5 Ta tol cha ten smimanil tuꞌ tinaniꞌ, catuꞌ oj ja wiloni ta tol man oj bꞌuchwa naj ja win, ẍi Satanás.

6 Jix takꞌwi Jehová tet Satanás jaxca tiꞌ:

—Quey ojabꞌ tuꞌ xin, chi skeꞌ cha naꞌ tzet cha wute smimanil tuꞌ, asan tol cꞌam ja walon ja wet ja wakꞌon camoj, ẍi Dios.

7 Queytuꞌ jix yun yel Satanás tuꞌ sattaj Jehová, jix yaon oc jun yaꞌbꞌil yel xacꞌal yaꞌ yin smimanil naj Job, jix too tacꞌal bꞌey yin yajan masantaꞌcꞌal bꞌey sjolom. 8 Yu jun tuꞌ xin, jix too ey chotan naj Job bꞌey xol chꞌen stikꞌakꞌil taan, jix yiꞌon a jun spoꞌoilal xi yet chi xalon ecꞌ yin. 9 Jal ix yistil naj xin, jix yalon tet jaxca tiꞌ:

—¿Tumi chi yoche ja cꞌul tol watxꞌ tocꞌal cha wute ja naꞌbꞌal? Bꞌuchwaan can yin Dios, catuꞌ chach cam xacꞌal, ẍi ix tet naj.

10 Jix takꞌwi naj Job jaxca tiꞌ:

—Jaach ix, laan wal ja kꞌanabꞌ jaxca ebꞌ ix ix cꞌam yeloc apnoj Dios yul sat. Tol jix cu chaꞌ swatxꞌilal tet Dios, ¿tumi man oj cu chaꞌ pax syaꞌtajilal chi yakꞌ Dios? ẍi naj Job.

Yu tuꞌ xin, caxcꞌal mi eyoc syaꞌilal yin naj, ma cꞌaltaꞌ yal pena kꞌane naj Job tuꞌ yin Dios.

11 Ey oxwan ebꞌ swatxꞌil ánima naj Job, jaꞌton: Elifaz caan bꞌey Temán, yetoj Bildad caan bꞌey Súa, yetoj cꞌal Sofar caan bꞌey Naamat. Jaꞌ yet jix yabꞌen oc ebꞌ yu wan syaꞌtajilal jix oc yibꞌan naj Job tuꞌ, jaꞌ yet tuꞌ jix swa alne ebꞌ yet chi too yilon ecꞌ ebꞌ, yu xꞌoxon el scuscꞌulal ebꞌ yetoj cꞌal smimancꞌulnele naj Job tuꞌ yu ebꞌ.

12 Eyto wal yapni oc ebꞌ, catuꞌ jix yilontoj yin Job ebꞌ, ian xacꞌal ma naꞌcha naj yu ebꞌ, yuxan jix okꞌa ebꞌ, jix yaon el yaw ebꞌ. Caw jix oc ebꞌ yin cuscꞌulal, jix stzilontoj spichil ebꞌ, jix stiẍon a pojoj ebꞌ, jix eyqꞌuey yibꞌan sjolom ebꞌ. 13 Catuꞌ jix ey chotan ebꞌ sat txꞌotxꞌ yetoj naj, jujebꞌ cꞌual cꞌal jujebꞌ akꞌbꞌal jix eecꞌ ebꞌ yetoj tituꞌ, cꞌam cꞌal junoj bꞌelan kꞌane jix yal ebꞌ, yutol caw jow yakꞌon syaꞌilal naj Job tuꞌ jix yiloc ebꞌ.