4 Toloj wal jaꞌ jun cꞌual tuꞌ jix oc can yin akꞌbꞌalil, toloj wal ma sajbꞌoj a yet jun cꞌual tuꞌ yu Dios.

5 Toloj wal ey junoj miman kꞌejkꞌinal jix ale oc yibꞌan yet watxꞌ kꞌejkꞌinal cꞌal yili, ma junoj miman kꞌejin asun jix majchen eloj, yet watxꞌ jix jul xiwcꞌulal yet jun cꞌual tuꞌ.

6 Toloj wal jix oc xacꞌal can kꞌejkꞌinal yet jun akꞌbꞌal tuꞌ, jaxa jun cꞌual tuꞌ ma oc sbꞌisiloj scꞌual jun xꞌaaw cꞌal jun abꞌil tuꞌ.

7 Toloj wal cꞌam mac jix ali yet jun akꞌbꞌal tuꞌ, toloj wal cꞌam aw yet tzalacꞌulal jix oc yet jun akꞌbꞌal tuꞌ.

8 Toloj wal jix bꞌuchle can el jun akꞌbꞌal tuꞌ yu ebꞌ tzajan scꞌul, ebꞌ tol chi skeꞌ sucbꞌi ey noꞌ Leviatán yu.^a

9 Toloj wal ma aol cꞌu, cꞌal jun miman weycan yet jun skꞌinibꞌal tuꞌ, toloj wal ma aol sajkꞌinal yet chi echbꞌanele stit sjajil yichcan.

10 Caw pena jun akꞌbꞌal tuꞌ, tol ma stenoc tucan yet jix jin ali, yet watxꞌ ma wil jantaj syaꞌilal cꞌal cuscꞌulal tiꞌ.

11 ¿Tzet yuxan ma jin cam xacꞌal yet ey jin oc yin jin txutx, ma xin jaꞌ ojabꞌ yet jix jin ali jix jin cami?

12 ¿Tzet wal yu, yuxan jix jin ey yibꞌan sjolom peneque yet jix jin chaꞌle jul yet jix jin ali, yetoj ime jix jin tzꞌubꞌuꞌ?

13 Toloj wal jix jin cami; lalan mi jin wey yin tzalacꞌulal tinaniꞌ; yin watxꞌcꞌulal mi chi yun jin xewi,

14 yetoj ebꞌ rey cꞌal ebꞌ ey yopiso, jaꞌton ebꞌ jix waꞌnen a mimej icham na, tol eyqꞌueynajxa uchna tinaniꞌ,

15 ma xin, yetoj ebꞌ mimej yaaw tol jix yakꞌ no spalacio yetoj chꞌen oro cꞌal yetoj plata.

16 ¿Tzet yuxan ma jin mujle jaxca junoj unin tucꞌal chi eli, jaxca junoj unin tol camnajxa yet chi ali?

17 Jaꞌ bꞌey chi mujle ebꞌ camom, jaꞌ tituꞌ chi lawi can yetne ánima ebꞌ penawom, jaꞌ tituꞌ chi ilcha xewilal yu ebꞌ chi cꞌuumbꞌi.

18 Jaꞌ tituꞌ chi xew ebꞌ jaxca preso yeoc yu mulnail, cꞌamxa bꞌey oj yabꞌ yel yaw ebꞌ chi teynen mulnail.

19 Jaꞌ tituꞌ eyecꞌ ebꞌ miman yeloc apnoj cꞌal ebꞌ yeynajil, jun laan xacꞌal yeoc ebꞌ. Jaꞌ tituꞌ eyecꞌ ebꞌ jajchanajxa el yin yakꞌomaloj servil.

20 ¿Tzet yuxan chi yakꞌ Dios sajkꞌinal yil ebꞌ chi yetne scꞌul? ¿Tzet yuxan chi yakꞌ Dios yiquisal ebꞌ tol eyoc yin syaꞌilal.

21 Ey mactxequel chi yoche scꞌul chi cami, cꞌam cꞌal chi cam pax oj, caxcꞌal chi seyecꞌ scamichal jaxca chi yun seyle ecꞌ bꞌeomal tol ewan yeocoj?

22 Jaꞌ stzalacꞌulal junoj ánima chi chaꞌlo yu, jaꞌton yet chi too can xacꞌal can smimanil bꞌey chi mujle canoj.

23 ¿Tzet yuxan jacꞌalaꞌ cꞌal yakꞌle jin cawil yu Dios, yin tol man wotaj oj bꞌey chi caꞌ jin toocoj, jaxca tol majan jin sat yu Dios?

24 Cꞌamxa chi woche chin lowi, cꞌamxa chi yal jin cꞌul chi wucꞌ jaꞌ yu okꞌil yu jin yaꞌilal.

25 Jaꞌ masanil xiwcꞌulal eyoc wibꞌan, yel xacꞌal chi ecꞌbꞌantoj sjul wibꞌan.

26 Cꞌamxa cꞌal bꞌey chin xew niꞌoj, man xacꞌal watxꞌoj weocoj. Cꞌamxa watxꞌcꞌulal jix chaꞌlo wu, asanxane cꞌal syaꞌilal chi wilaꞌ.