Jun Bꞌabꞌel Kꞌane Jix Oqui
(Job 4–14)
4
Jix yalon naj Elifaz a Temán tet naj Job jaxca tiꞌ:2 Jaach Job, kꞌinaloj chi cu kꞌanabꞌ ja wetoj tinaniꞌ, pena mi cha wabꞌe, asan xin, ma cꞌal techa wu ta tucꞌal chi wabꞌ tzet cha walaꞌ.
3 Yutol ecꞌal mac bꞌey jix ja wakꞌ jun cuybꞌanile tiꞌ, catuꞌ jix ja waon oc yip snaꞌbꞌal ebꞌ cꞌam yip snaꞌbꞌal.
4 Jix ja wakꞌ snaꞌbꞌal ebꞌ qꞌueynajtoj snaꞌbꞌal, catuꞌ jix ja mitxꞌon oc tucan ebꞌ tol tuxa chi eyqꞌueyi.
5 Jal tinaniꞌ, jaꞌ yet jix oc jun ja yaꞌilal tiꞌ yel xacꞌal cꞌam niꞌoj ja tecꞌanil.
6 Ilaꞌ tol caw jijem jaach tet Dios, caw watxꞌ ja bꞌeybꞌal ja waloni. ¿Tzet to wal yuxan cha wakꞌ caabꞌcꞌulal yin Dios tinaniꞌ?
7 Naꞌ ton abꞌ yibꞌan, ¿tumi eyxa bꞌey chi jul syaꞌilal yibꞌan junoj cꞌam spenail?
8 Jaꞌ chi yun wilon jain tiꞌ, tol jaꞌ mactxequel chi bꞌeybꞌalne spenail, jaxca spenail chi yun tuꞌ, jaꞌ chi jul yibꞌan.
9 Jaꞌ Dios chi yatoj sjowal scꞌul yibꞌan ebꞌ jaxca junoj cajxuchum kaꞌeꞌ, catuꞌ chi qꞌueyle el ebꞌ yu yin junelne.
10 Caxcꞌal mi jaꞌ ebꞌ penawom laan ebꞌ jaxca noꞌ icham león chi el yaw, jaꞌ Dios chi akꞌon tzꞌini ey noꞌ, jaxca chi yun stzꞌini ey noꞌ yet chi makꞌle eltej yee noꞌ.
11 Cꞌamxa chi skeꞌ slow noꞌ, chi cam noꞌ yu wail, jal noꞌ yuneꞌ tuxa cꞌal chi sajlem cantoj noꞌ. Queytuꞌ chi utele ebꞌ yu Dios.
12 Yin xacꞌal cꞌuancꞌulalil jix apni oc jun kꞌane tiꞌ yin jin txiquin, ian xacꞌal ma wabꞌocoj.
13 Jaꞌ yet akꞌbꞌalil yet chi tit numna sweyan ebꞌ ánima, ey jun jin weyich jix oqui.
14 Jix jul can xiwcꞌulal win an; masanil sbꞌajil jin mimanil jix bꞌilwi aoj.
15 Ey jun jaxca spixan ánima jix wabꞌ yeqꞌui, sicꞌlabꞌinaj xacꞌal yecꞌ matxatxoj yin jin sat, tuxa cꞌal jix a waan xil jin jolom yu.
16 Jix jul oc linan jin cꞌatan jix wabꞌe, ma cꞌal wiloc yin. Tucꞌal chi sason yul snukꞌ jix wabꞌe, jix yalon jaxca tiꞌ:
17 Jaꞌ junoj ánima tol cambꞌeal yei, ¿tumi chi skeꞌ yaloni tol watxꞌ xacꞌal chi yute sbꞌa sattaj Dios? ¿Tumi chi skeꞌ yaloni tol cꞌamxa cꞌal niꞌoj spenail sattaj Naj mac jix waꞌneni?
18 Tol tax jaꞌ Dios cꞌam chi yaoc yipoj scꞌul yin ebꞌ ẍejabꞌ ey bꞌey satcan; ilaꞌ tax ey ebꞌ ángel chi ilcha spenail yin.
19 Jaxca tam ebꞌ ánima tol txenne yipalil ebꞌ, laan ebꞌ jaxca junoj xaan na, tol yibꞌan pojoj waꞌnebꞌil aoj. Chi skeꞌ cꞌal stecꞌle ey ebꞌ jaxca junoj noꞌ tzolol.
20 Watxꞌ yet chi kꞌinibꞌi jal yet yeycꞌualil chi lawi eyoj; chi cam yin junelne, tumi ey junoj mactxequel oj cus yu.
21 Chi lawi yiquisal jaxca chi yun yeyqꞌuey junoj kꞌap na yet chi kꞌupletoj xꞌanil, queytuꞌ yeoc skꞌinal ebꞌ ánima, eyman chi ecꞌ eloj. Cam cꞌal chi ilcha sjelanil Dios yu ebꞌ catuꞌ chi camtoj ebꞌ, ẍi jun kꞌane tuꞌ jix wabꞌe.