2 Jaꞌ junoj ánima cꞌam snaꞌbꞌal, chi chichon scꞌul, jaꞌ jun chichoncꞌulal tuꞌ chi iꞌon cꞌal pax el skꞌinal.

3 Ey bꞌey chi wil ebꞌ pena snaꞌbꞌal, eyman chi yamcha oc masanil tzetyetal ey tet ebꞌ; jaxa chi yunne eyman chi lawi pax ey tzet ey tet ebꞌ.

4 Cꞌam junoj mactxequel chi colwa yin yuninal ebꞌ. Jaꞌ yet chi apni oc ebꞌ sattaj ebꞌ yaaw, cꞌamxa cꞌal yeloc apnoj ebꞌ, tumi eyto mac chi colon el ebꞌ.

5 Jaꞌ yet chi elol sat yawo ebꞌ, jacꞌal ebꞌ ánima lalan scam yu wail chi loꞌon eytoj tet ebꞌ, chi seyxa cꞌal eltej ebꞌ xol-laj teꞌ qꞌuix. Jaꞌ ebꞌ cꞌam tzet ey niꞌoj tet chi iꞌontoj sbꞌeomal ebꞌ.

6 Jaꞌ syaꞌtajilal tiꞌ man xol oj pojoj chi tita; jaꞌ syaꞌtajilal man yul oj txꞌotxꞌ tiꞌ chi aoloj.

7 Junne wal chi yiꞌtej syaꞌtajilal ebꞌ ánima yibꞌan, jaxca chi yun yeltej tzꞌitna stzakꞌakꞌ xol junoj kꞌakꞌ.

8 Jaꞌ tinaniꞌ jaach Job, ta jain queytuꞌ chi wun jaxca jaach tiꞌ, eyman mi chi snaꞌ sbꞌa jin cꞌul sattaj Dios.

9 Jaꞌ Dios caw qꞌueyubꞌtaj xacꞌal yoc tzet chi skeꞌ yu, cꞌamxa chi bꞌischa jantaj tzet chi yunne.

10 Jaꞌ Naj chi aontej nabꞌ yibꞌan txꞌotxꞌ txꞌotxꞌ, queytuꞌ chi yun yoc yal masanil awo.

11 Jaꞌ Dios chi iꞌon a can ebꞌ ánima yeynajil chi yute sbꞌa, catuꞌ chi colwa yetoj ebꞌ eyoc xol syaꞌilal.

12 Jaꞌ Dios chi uchontoj snaꞌbꞌal ebꞌ jelan, yet watxꞌ cꞌam chi eloc jaxca tzet chi snaꞌ ebꞌ.

13 Jaꞌ Dios chi tenon oc tucan ebꞌ jelan yin spenail, yet watxꞌ cꞌam chi eloc jaxca tzet chi snaꞌ ebꞌ jelan yin spenail.

14 Jaꞌ yet chuman cꞌu chi telcꞌotoj ebꞌ, jaxca tol akꞌbꞌalil chi ecꞌabꞌ ebꞌ, tuxa cꞌal chi ecꞌ matxatxoj ebꞌ.

15 Jaꞌ Dios chi colon el ebꞌ okꞌbꞌal cꞌul yeoc yul skꞌabꞌ ebꞌ chi etnen ánima, chi col-le el ebꞌ yul skꞌabꞌ ebꞌ penawom yu Naj.

16 Jaꞌ Naj eyoc yipoj scꞌul ebꞌ tol cꞌamxa yip, yuxan chi tzꞌini ey ebꞌ penawom.

17 Watxꞌ yet ebꞌ ánima tol jaꞌ Dios chi akꞌon cuenta; yuxan manche ja wintajne el stenchebꞌal Naj ey yipal yibꞌan masanil tzetyetal.

18 Ta jaꞌ Dios chi akꞌon yasoj junoj mactxequel, jacꞌalaꞌ Naj chi anten pax ebꞌ. Ta jaꞌ Dios chi aon oc syaꞌilal junoj mactxequel, jaꞌ Naj chi akꞌon pax waꞌxoj scꞌul ebꞌ.

19 Ecꞌal el, oj jaach col-le cꞌaltaꞌ el yu Naj tet junoj ey smey, man oj ẍaꞌ jul syaꞌilal ja wibꞌan.

20 Jaꞌ yul stiempoal wail oj jaach col-le el yul skꞌabꞌ camich yu Naj, jaꞌ yet oj jul jowal xol ebꞌ ánima oj jaach col-le el yul skꞌabꞌ camich yu Naj.

21 Jaꞌ Dios oj jaach colon el tet ebꞌ alom kꞌumale, catuꞌ man oj jaach xiw yet oj jul syaꞌtajilal.

22 Jaꞌ yet oj jul wail cꞌal jowal, tucꞌal oj jaach tzeewoj, catuꞌ man oj jaach xiw tet noꞌ xol-laj teꞌal noꞌ.

23 Jaꞌ xol ja mulnail cꞌam chꞌen chꞌen oj jaach etnen oj. Jaꞌ noꞌ chiꞌwawom noꞌ, cꞌam cꞌal tzet oj jaach yute noꞌ.

24 Tzalacꞌulal cꞌal ja we yetoj jantaj tzetyetal ey bꞌey ja na, jaꞌ yet oj ja bꞌison noꞌ ja jobꞌbꞌeal noꞌ tzꞌajan cꞌal yeecꞌ noꞌ.

25 Caw ecꞌal sbꞌisil ebꞌ ja wicꞌaal oj chꞌibꞌ jaxca an cꞌultaj ey satlaj txꞌotxꞌ.

26 Caw icham winaj jaachxa yet oj jaach camoj, jaxca chi yun skꞌuple a junoj topan ixim tiriw tol kꞌanxa.

27 Jaꞌ jelanil chi cu cuyoni tol jaxca tuꞌ yeocoj, yu jun tuꞌ, yuxan chi cam ja naꞌon yibꞌan, ẍi naj Elifaz, tet naj Job.