3 yel xacꞌal mi chi ecꞌbꞌantoj yalil yintaj yarenail stiꞌ jaꞌ mar. Yu jun tuꞌ, yuxan yin xacꞌal eymanil jix yun walon wan kꞌane tiꞌ.

4 Yutol jaꞌ Dios chi skeꞌ yu masanil, jaxca tol jix low sjulbꞌal yin jin mimanil. Jaꞌ jun sjulbꞌal tuꞌ caw ey svenenoal stiꞌ, tuxa jix oc joyan syaꞌilal yin jin mimanil tiꞌ yu Naj.

5 ¿Tumi chi el yaw noꞌ bꞌuru ta ey yan noꞌ? ¿Tumi chi el yaw noꞌ icham wacax ta ey tzet chi sloꞌ noꞌ?

6 ¿Mactxequel chi loꞌon junoj loꞌbꞌe ta cꞌam yatzꞌamil? ¿Tumi watxꞌ sloꞌi sajil jos ta tol cꞌam chi akꞌle ta oj?

7 Yutol jaꞌ wan tzetyetal tol cꞌam taꞌ chi ẍaꞌ jin cꞌul jin loꞌoni, jaꞌ wan tuꞌ chin loꞌ junjun cꞌu tinaniꞌ.

8 Toloj wal chi el yin scꞌul Dios yakꞌon tzetyetal chin kꞌanaꞌ; toloj wal chi yakꞌ tzetyetal chi woche.

9 Toloj wal chi el yin scꞌul Dios chin qꞌueyle eloj, catuꞌ chin lawi xacꞌal el yin junelne.

10 Caxcꞌal mi chi wabꞌ syaꞌil yu jin yaꞌilal cꞌal yu jin cuscꞌulal tiꞌ, caw chin tzala cꞌaltaꞌ an, yutol chi waoc Dios yipoj jin cꞌul, yutol chi waoc ẍejbꞌanil yin jin cꞌul, jaꞌton sley Naj Tol Jaxa Cꞌal Ocoj.

11 Cꞌamxa wip chi wabꞌe, ianxa cꞌam chi techa jun syaꞌilal tiꞌ wu; manxa yilaloj iquis jin ecꞌoj.

12 ¿Tumi laan scawil jin mimanil tiꞌ jaxca chꞌen chꞌen, ma jaxca chꞌen bronce, toloj wal jaꞌ chꞌen eyoc jin chiꞌbꞌealoj?

13 Cꞌamxa chi skeꞌ jin colon jin bꞌa yul wet, cꞌam cꞌal pax junoj mac chi colwa wetoj.

14 Jaꞌ junoj mactxequel eyoc xol syaꞌilal, smoo wal tol chi camcꞌulnele yu swatxꞌil ánima, caxcꞌal mi cꞌam yeloc apnoj Dios yul sat jun ánima tuꞌ.

15 Jal jex jaex jin watxꞌil ánima jex tiꞌ, tucꞌal chi jul je txꞌem tac jin cꞌul; laan jex jaxca junoj jaꞌ elom jaꞌ chi tantoj yet cꞌamxa nabꞌ.

16 Tat xacꞌal yili sat jaꞌ yet chi bꞌey jaꞌ, calan ye yetoj cheew cꞌal sajbꞌacom.

17 Jaꞌ yet chi uli a chꞌen cheew tuꞌ, catuꞌ chi tantoj jaꞌ elom jaꞌ tuꞌ, jaꞌ yet chi jowbꞌi yajan cꞌu, catuꞌ chi tan xacꞌal a jaꞌ.

18 Jaꞌ ebꞌ ánima tucꞌal chi ecꞌabꞌi chi too ebꞌ stiꞌlaj bꞌe yet chi seyon ecꞌ jaꞌ ebꞌ yuqꞌueꞌ, cꞌuancꞌulal chi bꞌeytoj ebꞌ bꞌey cusiltaj txꞌotxꞌ catuꞌ chi cam ebꞌ tituꞌ.

19 Jaꞌ ebꞌ txonwom bꞌey conobꞌ Temá cꞌal ebꞌ bꞌey Sabá, chi sey cꞌal ecꞌ jaꞌ ebꞌ;

20 jaꞌ yet chi apni oc ebꞌ bꞌey stiꞌlaj jaꞌ tol eyoc yipoj scꞌul ebꞌ tuꞌ, tajin txꞌotxꞌ xacꞌal yili, tuxa cꞌal chi tac can a scꞌul ebꞌ.

21 Queywal tuꞌ je yeoc jaex tiꞌ yul jin sat; yutol jaꞌ yet che yilon oc jin yaꞌilal, tucꞌal chex xiwaoj.

22 Jal jin jain tiꞌ, tumi ey tzetyetal chin kꞌan ey jex. Cꞌam cꞌal tumin chin kꞌan ey jex yet chin colchai.

23 ¿Tumi chin kꞌan je colwal yet chin colcha el yul skꞌabꞌ ebꞌ jin cajat chin etneni ma yul skꞌabꞌ ebꞌ elkꞌom makꞌom cam ánima?

24 Akꞌwej jin cuybꞌanil, oj jin chaꞌ wabꞌ ey jex. Txꞌoxwej ocoj catuꞌ che yalon oc jin penail tuꞌ yin jin sat.

25 ¡Tumi ey mac chi yintajne el junoj naꞌbꞌale tol watxꞌ! Jal jex jaex tiꞌ, pena cꞌal tzet che yal win yin tol cꞌam tzet yual.

26 ¿Tumi che yoche che teele je bꞌa wetoj yu jin kꞌane jix walaꞌ? Yutol jaꞌ skꞌane junoj mac eyoc xol syaꞌilal ey mi bꞌey cꞌam yeloc apnoj tzet chi yalaꞌ.

27 Jaex tiꞌ, caw sajachtaj xacꞌal che yute ebꞌ mebꞌa unin tol camnajxa smam cꞌal xutx; tol chi ẍaꞌ je cꞌul je txonon el ebꞌ je watxꞌil ánima.

28 Ocanwej tꞌanan yin jin sat, ta tol tucꞌal chin xija wan kꞌane tiꞌ ey jex.

29 Bꞌejwej je yalon wan kꞌane tuꞌ win an. Tol oj wal che yaoc yin je cꞌul tol yel tzet chi walaꞌ.

30 ¿Tumi che naꞌ tol lekꞌtiꞌ jin jain tiꞌ? ¿tumi cꞌam chi skeꞌ snaꞌcha el wu tzetyetal man watxꞌoj che naꞌ?