2 jaxca junoj eyoc yin yakꞌomaloj servil, tol chi yoche xacꞌal chi ey numomoj, jaxca wal junoj mulnawom chi yoche chi ẍaꞌ stool yin eymanil.

3 Queytuꞌ jix wute jin bꞌa xol jin yaꞌilal tiꞌ, caw ecꞌal xꞌaaw jix el waw, junjun cꞌal akꞌbꞌal ey jin cꞌal oc yin syaꞌilal.

4 Jaꞌ yet chin ey telanoj, caw miman yul akꞌbꞌal chi wabꞌe. Caw chin cꞌuumbꞌi ey telanoj, chin meltzo ecꞌ bꞌal-labꞌoj masantaꞌcꞌal yet chi sajbꞌi eloj, catuꞌ chin naꞌoni: Janicꞌ wal oj jin a waanoj, jin chi.

5 Caw nonaj el jin mimanil tiꞌ yu noꞌ yaax jaꞌ, catuꞌ chi el lecꞌlabꞌoj sat jin yaꞌbꞌil, caw chi el spoowal.

6 Lalanxa sjul cꞌananoj slawubꞌal jin kꞌinal jaxca yecꞌ julna junoj teꞌ sjulbꞌal ebꞌ chemon kꞌap; cꞌamxa tzetyetal eyoc yipoj jin cꞌul.

7 Jaach jin Diosal, naꞌ jintej, tol jaꞌ jin kꞌinal tiꞌ, laan jaxca cꞌal yet chi yiꞌon skaꞌeꞌ junoj mactxequel jaxca tuꞌ yeoc jin kꞌinal, tumi eyto bꞌakꞌin oj wil tzalacꞌulal titiꞌ.

8 Jaꞌ mac chin ilon tinaniꞌ cꞌamxa bꞌey oj yil win ebꞌ. Oj jin seyle ecꞌ yu ebꞌ, cꞌamxa bꞌey oj jin ilcha yu ebꞌ titiꞌ.

9-10 Jaxca wal yecꞌ bꞌakꞌakꞌoj asun catuꞌ chi qꞌueyaoj, queytuꞌ chi yun can junoj mactxequel chi eytoj bꞌey chi mujle ebꞌ camom: Cꞌamxa bꞌakꞌin chi meltzotej ebꞌ titiꞌ, oj tojcan qꞌueycꞌulal yu ebꞌ tol yican to sbꞌa yetoj ebꞌ.

11 Yu jun tuꞌ, yuxan man oj oc tucan yel waw ey jaach. Oj wal jin bꞌa yu jin yaꞌilal tiꞌ, yutol lalan wabꞌen syaꞌil.

12 ¿Jaach jin Diosal, tumi oj jin ela jaxca junoj noꞌ lagarto chi ecꞌ bꞌey yul-laj jaꞌ mar, yuxan tol tꞌanan jaach cꞌal oc win?

13 Jaꞌ yet chin naꞌoni tol oj jin xew wal niꞌoj bꞌey jin txꞌat, tala chi oc tucan jin yaꞌilal yu chin wey niꞌoj,

14 jaxa chi yun pax oj, asan weyich cha wakꞌ wilaꞌ, chin ja xibꞌte yet chin ilwan eyoj.

15 Yel xacꞌal mi watxꞌ tol chin sutꞌle camoj; chi woche xacꞌal chin cami.

16 Cꞌamxa chi skeꞌ wu, cꞌamxa chi woche chin iquisbꞌi ecꞌoj. Manche xa jin ja wetne, yutol jaꞌ jin kꞌinal tiꞌ laan jaxca yet chi yiꞌon skaꞌeꞌ junoj mactxequel.

17 ¿Tzet wal keloc apnoj jaon ánima jon tiꞌ, yuxan miman xacꞌal keloc apnoj yul ja sat? ¿tzet yuxan cha wakꞌ xacꞌal bꞌiscꞌulal ku jon?

18 ¿Tzet yuxan teynebꞌil jin ja wu junjun cꞌu, catuꞌ chin ja wakꞌon cꞌal porobꞌal yin junjun txolan?

19 ¿Tzet yuxan tol cꞌam cha wiꞌel ja sat win, yet watxꞌ chi skeꞌ jin bꞌukꞌon eytoj niꞌoj yal jin tiꞌ?

20 Jaach jin Diosal, yilomal ebꞌ ánima ja weocoj. Ta chi oc jin penail ¿tumi cha wabꞌ syaꞌil yu? ¿tzet yuxan tol chin ja waoc sattaj ja julbꞌal? ¿Tumi al weoc ey jaach jaxca junoj ijatz?

21 ¿Tumi cꞌamxa cꞌal cha wakꞌ mimancꞌulal yibꞌan jin penail? ¿tumi cꞌamxa cꞌal cha wakꞌ tan jin penail jix oqui? Tuxa wal lalan jin too ey telan xol pojoj; oj jin ja seyecꞌoj, manxa oj jin ilcha ja wu yutol camnaj jin xa, ẍi naj Job.