8
Jix yalon naj Bildad a Súa jaxca tiꞌ:2 ¿Bꞌakꞌin oj a bꞌej ja kꞌanabꞌ jaxca tuꞌ? Jaꞌ wan ja kꞌane cha wal tuꞌ, laan jaxca junoj kaꞌeꞌ nabꞌ caw jow.
3 Jaꞌ Dios, Naj chi skeꞌ yu masanil, cꞌam bꞌakꞌin chi sqꞌuextoj sjichanilal, cꞌam bꞌey chi yiꞌecꞌ smajul stzetyetal junojxa ánima.
4 Jaꞌ ebꞌ ja wuninal tuꞌ tucꞌaltaꞌ ey bꞌey jix oc spenail ebꞌ tet Dios, yuxan jix ale oc syaꞌilal yibꞌan ebꞌ jaxca wal smooalil.
5 Aoc ja bꞌa yul skꞌabꞌ Dios, Naj tol chi skeꞌ yu masanil, catuꞌ cha kꞌanon tet tol chi okꞌ scꞌul Naj ja win.
6 Ta tol watxꞌ ja naꞌbꞌal chi yilaꞌ, ta watxꞌ cꞌal cha wute ja bꞌa, oj takꞌwoj Naj ey jaach, oj yakꞌon masanil tzetyetal ey jaach jaxca yet yalantoj.
7 Jaꞌ ja bꞌeomal yet yalantoj, manxa laan oj jaxca tzetyetal oj ja chaꞌ tet yin slawubꞌal.
8 Kꞌanle ja wabꞌ tzet jix yal ebꞌ jix ecꞌle yet yalantoj, cuy sjelanil ebꞌ ánima yet peyxa tuꞌ.
9 Jaon tiꞌ jaxca tol ewito cꞌal jix cu ali, tumi ey niꞌoj tzet kotaj. Jaꞌ cu kꞌinal bꞌey sat txꞌotxꞌ tiꞌ laan cꞌal jaxca junoj enele chi ecꞌtoj.
10 Jaꞌ ebꞌ ánima yet peyxa tuꞌ, caw miman bꞌey chi skeꞌ jaach scuyon ebꞌ yin masanil tzetyetal.
11 Jaꞌ teꞌ junco yetoj teꞌ papiro, asan bꞌey stiꞌlaj jaꞌ chi chꞌibꞌ teꞌ.
12 Ta chi tantoj jaꞌ jaꞌ, bꞌabꞌel chi tajtoj teꞌ yintaj wanxa teꞌ teꞌ, caxcꞌal unin to teꞌ, cꞌamto chi skeꞌ stzokꞌle a teꞌ.
13 Queytuꞌ oj yun ebꞌ ánima pena tzet chi el yuneni, ebꞌ tol chi too qꞌueycꞌulal Dios yu, tuxa cꞌal chi lawi can ey jantaj tzetyetal eyoc yipoj scꞌul ebꞌ.
14 Jaꞌ tzet chi yaoc yipoj scꞌul ebꞌ tuꞌ, laan jaxca xꞌalil noꞌ xim.
15 Ta tol chi yoche ebꞌ chi oc mitxꞌan yin jun xꞌalil xim tuꞌ, tumi ey niꞌoj yip; ta tol chi oc tꞌunan ebꞌ yin xꞌalil xim tuꞌ, ¿tumi man oj tꞌinchatoj?
16 Jaꞌ ebꞌ pena snaꞌbꞌal laan ebꞌ jaxca sat an yaax cꞌultaj chi el tzicna yu yajan cꞌu, catuꞌ chi pujcantoj xol-laj awo,
17 chi too xeꞌ snanlaj chꞌen, catuꞌ chi chꞌibꞌa yibꞌan.
18 Ta ey mac chi tokꞌon atej xeꞌ an, cꞌamxa mactxequel otajneni ta tol jaꞌ tituꞌ jix atej an.
19 Queytuꞌ chi yun slawi eyoj, txꞌojxa an cꞌultaj chi aol bꞌey chi jokꞌle atej an tuꞌ.
20 Jaꞌ Dios, cꞌam bꞌey chi bꞌejlecan junoj ebꞌ watxꞌ snaꞌbꞌal yu, cꞌam pax chi colwal tet ebꞌ pena tzet chi el yuneni.
21 Jaꞌ Dios oj jaach akꞌon tzeewoj junelxa cꞌal ja woc yin tzalacꞌulal junelxa yu.
22 Jal pax ebꞌ chi jowi oc ja win xin, tuxa cꞌal oj can ebꞌ yin qꞌuixwilal; jaꞌ sna ebꞌ penawom tuꞌ, oj lawoj eyoj, ẍi naj Bildad.