3 Ta chi koche chi cu teele cu bꞌa yetoj Dios, jaꞌ yin junoj mil kꞌanlebꞌal chi yakꞌ ey jon, tumi ey junoj jon oj skeꞌ cu pajtzen tet.

4 Yutol jaꞌ Dios caw miman yeoc sjelanil, cꞌal yipalil. ¿Mac junoj chi skeꞌ stecꞌbꞌan sbꞌa sattaj Naj, catuꞌ cꞌam tzet chi ioni?

5 Jaꞌ Dios chi yakꞌ bꞌilwoj mimej wonan yu sjowal scꞌul, chi yuchon eyoj, yin cꞌam cꞌal bꞌey chi yalaꞌ yuxan jaxca tuꞌ chi yunne.

6 Jaꞌ chi akꞌon bꞌilwoj a txꞌotxꞌ txꞌotxꞌ cꞌal yakꞌon bꞌilwoj a yichlaj txꞌotxꞌ txꞌotxꞌ.

7 Jaꞌ Naj chi skeꞌ yalon tet cꞌu ta tol cꞌam chi aoloj, chi skeꞌ smajchen el sat weycan yet cꞌam chi koplabꞌi.

8 Tumi ey mac jix colwa yetoj yet jix swaꞌnen satcan, asanne chi tenon oc tucan sat jaꞌ mar yet chi a pomna sat jaꞌ.

9 Jaꞌ Dios jix waꞌnen wan weycan, jun chi yij miman Osa, Orión, yetoj Motz yetoj wan bꞌulquiltaj weycan chi ecꞌtoj yetcꞌulal sur.

10 Ecꞌal tzetyetal qꞌueyubꞌtaj xacꞌal chi yun Dios, jaꞌton wan tzettaj yetal tol cꞌam junoj mactxequel chi skeꞌ snaꞌcha el yu.

11 Ta chi ecꞌ Dios jin cꞌatan, tumi oj skeꞌ wilon oc yin, ta chi ecꞌ tituꞌ tumi oj naꞌcha el wu.

12 Ta ey tzetyetal chi yiꞌecꞌ Naj tet junoj, ¿Mactxequel oj skeꞌ stenon oc tucan Naj? ¿mactxequel oj skeꞌ skꞌanlen tet tzet chi yunne?

13 Ta tol chi tit sjowal scꞌul Dios, cꞌam junoj mac chi skeꞌ stenon oc tucanoj. Jaꞌ ebꞌ eyoc yetoj jun noꞌ chi yij Rahab ey yul jaꞌ mar,^a tuxa cꞌal chi ey mocꞌan ebꞌ yu xiwcꞌulal sattaj Naj.

14 ¿Bꞌeytuꞌ oj wiꞌoc jin kꞌane yet chin pajtzen skꞌane Dios?

15 Caxcꞌal mi cꞌam jin penail, cꞌam cꞌaltaꞌ chi skeꞌ jin takꞌwi tet Naj; tol jin juezal yeocoj, asan tol chin kꞌan tet tol chi okꞌ scꞌul Naj win.

16 Kꞌinaloj ta chi wawte Naj, chi takꞌwi Naj ey jin, cꞌam chi waoc yin jin cꞌul tol chin ẍaꞌ kꞌanabꞌ yetoj.

17 Jaxa tala chi yunne, chin yakꞌ lawoj el yetoj junoj miman kaꞌeꞌ yaxnabꞌ, jacꞌal mi jaꞌ sjowbꞌi jin yaꞌilal.

18 Cꞌamxam chi skeꞌ wiꞌon wip yin junoj txolan, chim yiꞌ xacꞌal yip jin yaꞌilal tiꞌ.

19 Ta chi cu kꞌanle tet: ¿Mactxequel yel xacꞌal ey yip? ta cu chi tet: Jain ton tiꞌ, ẍim Dios. Ta chi koche chi kabꞌe mac yel chi yalaꞌ, ¿mactxequel oj skeꞌ stecꞌbꞌan sbꞌa jin sattaj? ẍim Naj.

20 Ta chi walaꞌ tol caw watxꞌ jin, jaxa jin kꞌane chi txꞌoxon eloj tol ey jin penail. Ta chi walaꞌ tol cꞌam niꞌoj jin penail, jaꞌcaw Dios chi aloni tol man yeloj.

21 Caxcꞌal mi cꞌam jin penail jain tiꞌ, caw cꞌam yeloc apnoj yul jin sat; cꞌamxa chi yal jin cꞌul chin iquisbꞌi cꞌal ecꞌoj.

22 Jaꞌ chi wute jin naꞌoni, tol laan xacꞌal el masanil. Jaꞌ Naj chi akꞌon qꞌueyel ebꞌ ey spenail, yetoj cꞌal ebꞌ cꞌam spenail.

23 Ta chi jul camich yibꞌan masanil ebꞌ ánima, tumi ey tzet chi snaꞌ Dios yet chi lawi el ebꞌ ánima cꞌam spenail.

24 Chi cancan jun yul yibꞌankꞌinal tiꞌ yul skꞌabꞌ ebꞌ penawom yu Naj, catuꞌ chi majchele el sat ebꞌ juez yu; ta manaj Dios chi unen jaxca tuꞌ, ¿mac pax txequel xin?

25 Eyman xacꞌal chi bꞌeytoj jin kꞌinal, cꞌamxa cꞌal niꞌoj tzalacꞌulal chi wilaꞌ.

26 Laan wal sbꞌey jin kꞌinal jaxca chi yun sbꞌey teꞌ barco yibꞌan jaꞌ mar, jaxca cꞌal chi yun stoo xuyuyoj noꞌ chii yet chi too smitxꞌon ẍiꞌbꞌe.

27 Ta chi woche chi too qꞌueycꞌulal jin yaꞌilal tiꞌ wu, catuꞌ chin oc can yin tzalacꞌulal,

28 chi xiw cꞌal jin cꞌul yu jin yaꞌilal tiꞌ, yutol wotaj tol jaꞌ Dios cꞌam chin yal watxꞌil.

29 Ta ey jin penail yul sat Naj, cꞌam niꞌoj weloc apnoj yu chi wakꞌ wip walon jin bꞌa watxꞌil.

30 Caxcꞌal mi chin txꞌael jin kꞌabꞌ yetoj xawon catuꞌ chin txꞌaon el jin bꞌa yetoj yal taan,

31 jaꞌ Dios chin aon cꞌal eytoj xol sokꞌom. Jaꞌ jin pichil pena xacꞌal yeoc win chi wabꞌe.

32 Jain tiꞌ man oj skeꞌ jin spajtzen jin bꞌa tet Dios, yutol man animaoj. Man oj skeꞌ wiꞌontoj Dios sattaj ebꞌ juez yet chin waꞌnen yeoc junoj kꞌane yetoj.

33 Toloj wal ey junoj mac chi skeꞌ yoc cu nan yetoj Dios, yet chi skeꞌ yaontej skꞌabꞌ kibꞌan cu cawanil.

34 Tol oj wal ey junoj chi skeꞌ yalon tet Naj yet chi oc tucan jin yaꞌilal tiꞌ, cꞌal yoc tucan jin xibꞌtele yu.

35 Ta jaxca tuꞌ, chim skeꞌ jin kꞌanabꞌ yetoj masanil jin cꞌul, yutol cꞌam jin xiwcꞌulal, cꞌam pax jin penail chi yabꞌ jin cꞌul.