2 Jaach jin Diosal, cꞌam ojabꞌ cha waoc jin penail tiꞌ wibꞌan, al ey jin tzet yinal jix oc jin penail.

3 Jaach jix jin ja wakꞌ pitzcꞌu aoj, ¿tumi watxꞌ wetnele chi yabꞌ ja cꞌul, cꞌal jin ja wintajnen can eloj, catuꞌ jaxa yetoj ebꞌ penawom chach colwa ocoj?

4 Tumi laan ja wilon jaxca kilon jaon ánima jon tiꞌ.

5 Tumi txenne ja kꞌinal jaxca keoc jaon cambꞌeal ánima jon tiꞌ.

6 Yu jun tuꞌ, ¿tzet yuxan cha seyecꞌ jin mul yetoj jin penail?

7 Caxcꞌal mi ja wotaj tol cꞌam jin penail, cꞌam junoj mactxequel chi skeꞌ jin scolon el yul ja kꞌabꞌ.

8 Jaach jix jin ja waꞌne yetoj ja kꞌabꞌ, jal tinaniꞌ chi yoche ja cꞌul chin ja wakꞌ qꞌueyeloj.

9 Naꞌtej tol yin txꞌotxꞌ txꞌotxꞌ jix jin ja waꞌne; jaꞌ tinaniꞌ, ¿tumi oj jin ja waoc yin pojojal junelxa?

10 Tol jix ja waꞌne jun jin mimanil tiꞌ jaxca chi yun swaꞌxi noꞌ queso yet chi paabꞌi noꞌ lech.

11 Jaach jix ja wakꞌ pitzcꞌu oc jin bꞌajil yin jin txꞌanil, jix ja waon cꞌal pax oc jin chiꞌbꞌeal cꞌal jin tzꞌuumal yin.

12 Jix ja wakꞌ wiquisal, jix ja wakꞌon cꞌal pax ja watxꞌcꞌulal win, teynebꞌil jin ja wu, yuxan iquis jin tocꞌal ecꞌoj.

13 Jaꞌ wan tzetyetal tuꞌ tucꞌaltaꞌ ewan cꞌuan yeoc yin ja naꞌbꞌal, chi naꞌcha el wu tol jaꞌ wan tuꞌ naꞌan cꞌaltaꞌ oc win ja wu.

14 Tꞌanan jaach oc win yet cha wilaꞌ ta chi oc jin penail, yet watxꞌ chin ja wakꞌ cꞌal cuenta yu bꞌey chi oc jin penail tuꞌ.

15 Ta ey jin penail, okꞌbꞌal jin cꞌul. Ta watxꞌ cꞌal jin bꞌeybꞌal, cꞌam cꞌaltaꞌ chin oc yin watxꞌcꞌulal ja sattaj, yutol caw chin qꞌuixwi yet chin naꞌontej jin yaꞌilal.

16 Ta chi wiꞌa can jin bꞌa, jaxam la jin ja wujten cꞌal ecꞌ jaxca chi yun yujten ecꞌ ẍiꞌbꞌe noꞌ icham león, quey mi tuꞌ chin ja wute.

17 Chim ja sey wanojxa ebꞌ chi alon win. Chim tit sjowal ja cꞌul win; jaxca xacꞌal mi stit bꞌululoj ebꞌ soldado yin yakꞌon jowal.

18 ¿Tzet yuxan jix jin ja chaꞌ aloj? Toloj wal jix jin cam yet cꞌamto junoj mactxequel chin iloni.

19 Toloj wal asan cꞌal yet jix jin el yin jin txutx catuꞌ jix jin iꞌletoj bꞌey chi mujle ebꞌ camom, yet watxꞌ ma cꞌaltaꞌ txeclo eloj ta ey mac jix ali el yul yibꞌankꞌinal tiꞌ.

20 Yajbꞌan tol txenne chꞌan jin kꞌinal, toloj wal chin ja waoc yin watxꞌcꞌulal. Eloj yin ja cꞌul tol chin ja waoc yin tzalacꞌulal,

21 yet cꞌamto chin too bꞌey cambꞌal xol kꞌejkꞌinal bꞌey tol manxa oj jin meltzotej junelxa.^a

22 Jaꞌton tituꞌ ewan cꞌuan ye cantoj, jaxca tol moyan yili, bꞌey tol jaꞌ sajkꞌinal tiꞌ jaxca xacꞌal kꞌejkꞌinal yeocoj, ẍi naj Job.