11
Jix yalon naj Sofar a Naamat jaxca tiꞌ:2 Jaꞌ masanil wan comon kꞌane tuꞌ smoo tol chi pajtzelei; man yu oj tol ey miman kꞌane chi al-lei, yuxan watxꞌ xacꞌal jun chi alon tuꞌ.
3 ¿Chim la ja naꞌ yutol caw jelan ja kꞌanabꞌi catuꞌ oj cu tzꞌini ey jon? ¿Chim la ja naꞌ tol cꞌamxa mactxequel oj skeꞌ spajtzen wan ja bꞌuchwal kꞌane cha wal tuꞌ?
4 Jaach tiꞌ cha wal ja bꞌa watxꞌil sattaj Dios, cha waloni tol cꞌam ja penail, catuꞌ cha waloni tol ey jaach oc yin cuybꞌanile caw yel.
5 Toloj wal jaꞌ skꞌane Dios chi spajtzen wan kꞌane cha wal tuꞌ.
6 Jaꞌ Naj chi skeꞌ xꞌoxon el jun jelanilal tuꞌ ey jaach, jun tol ewan cꞌuan yeocoj, jaꞌton wan tol caw yaꞌtaj snaꞌcha eloj. Queyton tuꞌ oj yun ja wiloni tol jaꞌ Dios cꞌamto chi yakꞌ syaꞌilal ja wibꞌan jaxca smooalil.
7 ¿Chim la ja naꞌ tol tzꞌajanoj naꞌcha el sjelanil Dios tuꞌ ja wu, Naj chi skeꞌ yu masanil?
8 ¿Tzet wal yetal oj skeꞌ ja wu, yutol jaꞌ jun jelanil tuꞌ yel xacꞌal naat ey yintaj satcan, yel xacꞌal naat ey yich yintaj sjolanil junoj xabꞌ?
9 Yel xacꞌal miman yeoc yintaj txꞌotxꞌ txꞌotxꞌ, catuꞌ yel xacꞌal miman sat yintaj jaꞌ mar.
10 Ta tol jaꞌ Dios chach awten yet chi snaꞌon oc ja win, ¿mac wal junoj chi skeꞌ stenon oc tucan Naj?
11 Yotaj Dios mactxequel ebꞌ lekꞌtiꞌ, chi yil masanil spenail, ¿cꞌam ojabꞌ cha naꞌ tol man yotaj oj Dios?
12 ¿Tumi oj skeꞌ yin junoj noꞌ bꞌuru chi ali junoj ánima yetoj jelan naꞌbꞌale, yuxan cꞌam pax chi skeꞌ yoc jelan naꞌbꞌale yin junoj cꞌam snaꞌbꞌal.
13 Ta cha waoc Dios yin ja cꞌul catuꞌ chach oc tean tet,
14 ta tol ey ja penail eyoc ja wibꞌan, watxꞌ tol cha wiꞌel ja bꞌa yalan, cꞌam ojabꞌ cha chaꞌ octoj jun spenail tuꞌ yul ja na.
15 Ta jaxca tuꞌ, caw watxꞌ ja wili sattaj Dios, cꞌamxa bꞌey oj jul ja xiwcꞌulal, catuꞌ oj jaach caey ecꞌ yin tzalacꞌulal, cꞌamxa bꞌey oj jaach xiwoj.
16 Queytuꞌ oj yun stoo qꞌueycꞌulal masanil wan ja yaꞌilal tuꞌ ja wu, jaxca chi yun stantoj junoj jaꞌ jaꞌ.
17 Caxcꞌal mi jix jaach can xol kꞌejkꞌinal yu jun ja yaꞌilal tuꞌ, jal tinaniꞌ oj jaach bꞌeytoj yin tzalacꞌulal, jaxca wal tol chuman cꞌu bꞌey ey jaach ecꞌoj.
18 Oj jaach caey ecꞌ yin tzalacꞌulal yutol ey tzet eyoc yipoj ja cꞌul. Jaꞌ Dios oj jaach teynenoj, oj jaach wey yin tzalacꞌulal.
19 Cꞌam mactxequel oj jaach xibꞌten yet oj jaach xewoj. Ecꞌal mactxequel oj jaach jul ilon ecꞌoj, yet chi oc ebꞌ yin ja watxꞌil animaoj.
20 Jal ebꞌ penawom naꞌbꞌa xacꞌal oj seyecꞌ ebꞌ tzet oj yun scolcha ebꞌ; manxa oj ilcha yu ebꞌ bꞌey oj skeꞌ yewbꞌan el sbꞌa ebꞌ. Asanxane camich tꞌanan oc yin ebꞌ, ẍi naj Zofar tet Job.