3 Asan xin, jain tiꞌ ey cꞌal pax jin naꞌbꞌal, man xacꞌal yeynajil oj jin je yintaj jaex tiꞌ. ¿Mac junoj man yotaj oj masanil wan che yal tuꞌ?

4 Caxcꞌal cꞌam jin mul jain tiꞌ, caxcꞌal mi cꞌam jin penail, caxcꞌal jix yabꞌ Dios tzet jix jin kꞌan yet yalantoj, jaxa tinaniꞌ, jaꞌ ebꞌ jin watxꞌil ánima chin tzeele yu ebꞌ an.

5 Jaꞌ ebꞌ caw watxꞌ yeocoj, chi yintajne can el ebꞌ mac okꞌbꞌalcꞌule yeocoj, jaꞌton mac tuxa chi eyqꞌueyi.

6 Jaꞌ ebꞌ elkꞌom, tzalacꞌulal cꞌal yeoc ebꞌ bꞌey caan ebꞌ; jaꞌ ebꞌ chi txꞌemontej sjowal scꞌul Dios, cꞌam tzet chi iꞌon ebꞌ; tam wal ey tzet chi iꞌon jantaj tzet ey yul skꞌabꞌ ebꞌ yu Dios.

7 Kꞌanle tet noꞌ noꞌ cꞌal tet noꞌ tzꞌiquin; chi skeꞌ jaach scuyon noꞌ.

8 Kꞌanle cꞌal pax ja wabꞌ tet noꞌ sat txꞌotxꞌal noꞌ cꞌal tet noꞌ pescado ey yul-laj jaꞌ mar, chi skeꞌ yakꞌon ja jelanil noꞌ.

9 ¿Bꞌeytet junoj wan noꞌ tuꞌ man yotaj oj tol jaꞌ Jehová jix waꞌneni?

10 Jaꞌ yul skꞌabꞌ Dios, jatuꞌ ey yiquisal masanil tzetyetal tol iquis.

11 Jaꞌ cu tiꞌ chi abꞌlen tzet utbꞌil scawxi cu loꞌbꞌe; quey pax tuꞌ cu txiquin, chi yabꞌtej tzet utbꞌil yoc kꞌane.

12 Jaꞌ ebꞌ icham winaj, eyxa snaꞌbꞌal ebꞌ, yutol mimanxa stiempoal ebꞌ, yuxan eyxa sjelanil ebꞌ.

13 Jal pax Dios xin, tucꞌaltaꞌ tol jelan, caw ey snaꞌbꞌal, ey cꞌal pax yipalil yin yunen tzet chi snaꞌ.

14 Jaꞌ tzetyetal chi yuchey Dios, tumi eyto mac chi skeꞌ scaꞌ waꞌnen aoj; jaꞌ mactxequel chi majchele ey yu Dios, cꞌam mactxequel chi skeꞌ sjajon eltej.

15 Ta jaꞌ chi mitxꞌon oc tucan nabꞌ, chi tajel masanil tzetyetal; ta chi sbꞌejeytej nabꞌ Naj xin, chi kꞌubꞌchacantoj txꞌotxꞌ txꞌotxꞌ tiꞌ yu.

16 Jaꞌ Dios ey yipalil, yotaj masanil jelanil; jaꞌ yul skꞌabꞌ eyoc ebꞌ chi etnen ánima, cꞌal ebꞌ chi etnele cꞌal pax oj.

17 Jaꞌ Naj chi akꞌon qꞌueyel snaꞌbꞌal ebꞌ aom oc naꞌbꞌale, catuꞌ chi oc can ebꞌ juez yin cꞌam snaꞌbꞌal.

18 Chi cancan ebꞌ rey yin tol cꞌamxa yopiso yu, chi oc can ebꞌ yin yakꞌomaloj servilal yu.

19 Chi iꞌle can el ebꞌ yakꞌomal xaambꞌal yin yopiso yu Naj, catuꞌ chi yakꞌon eyqꞌuey ebꞌ ey yopiso.

20 Yetoj cꞌal pax ebꞌ aom oc naꞌbꞌale tol yipcꞌule yeocoj, tuxa cꞌal chi tzꞌini can ey ebꞌ, catuꞌ chi iꞌle ecꞌ sjelanil ebꞌ icham winaj yu Dios.

21 Jaꞌ Dios chi akꞌon intajnele can el ebꞌ miman yeloc apnoj yul sat ebꞌ ánima. Jaꞌ ebꞌ ey yip, chi elcan yip ebꞌ.

22 Chi yakꞌ txeclo a jantaj tzetyetal tol ewan cꞌuan yeocoj, catuꞌ chi yiꞌon eltej bꞌey sajkꞌinal jantaj tzetyetal tol ey xol kꞌejkꞌinal.

23 Jaꞌ chi iꞌon a can sbꞌisil ebꞌ nacionlaj, chi yakꞌon pax lawoj, chi sajlem cantoj ebꞌ yu, catuꞌ chi skeꞌ syambꞌan pax oc ebꞌ junelxa.

24 Jaꞌ chi iꞌon el sjelanil ebꞌ syaawil conobꞌ, yuxan jaxca tol chi qꞌueycan ecꞌ ebꞌ bꞌey txꞌotxꞌ cusiltaj txꞌotxꞌ bꞌey tol cꞌamxa bꞌe.

25 Tuxa cꞌal chi ecꞌ matxatxoj ebꞌ xol kꞌejkꞌinal, tuxa cꞌal chi tzꞌeytzꞌon ebꞌ jaxca chi yun sbꞌey ebꞌ uqꞌuem an.