2 Jaꞌ tzetyetal je yotaj jaex tiꞌ, wotaj cꞌal pax jain tiꞌ; man xacꞌal yeynajil jin oj je yintaj.

3 Yuxan chi woche chin kꞌanabꞌ yetoj Dios, Naj chi skeꞌ yu masanil, jaꞌ yetoj chi woche chin teele jin bꞌa.

4 Jaex tiꞌ, tucꞌal che majche el junoj tzetyetal yel yetoj je lekꞌtiꞌal tuꞌ; laan jex yetoj ebꞌ anwam cꞌam niꞌoj chi skeꞌ yanwai.

5 Toloj wal chex tzꞌini eyoj, asan jaxca tuꞌ chi txeclo eloj tol ey je naꞌbꞌal.

6 Chaꞌwej je yabꞌ tzet oj walaꞌ, yet oj walon tzet utbꞌil wal yeoc jin naꞌbꞌal.

7 ¿Chim la je naꞌ tol oj jex colwa yin Dios yetoj je lekꞌtiꞌal tuꞌ? ¿chim la je naꞌ tol ey tzet oj akꞌle ey jex yu je lekꞌtiꞌal tuꞌ.

8 ¿Tumi oj skeꞌ je yaon oc je bꞌa yetoj Dios tuꞌ che naꞌ? ¿Ma che yoche chex colwa yin Dios tuꞌ je naꞌoni?

9 ¿Tzet wal oj jex eloc che naꞌ, ta chi naꞌle oc je yin yu Dios? ¿Oj mi wal skeꞌ je yetnen Naj jaxca che yute junoj ánima?

10 Caxcꞌal tucꞌal che yaoc je bꞌa yetoj Dios yin ewantajil, oj jex tzule cꞌaltaꞌ yu Naj.

11 Jaꞌ yipalil Naj oj jex akꞌon xiwaoj.

12 Jaꞌ wan peyxa scuybꞌanil ebꞌ cu mam icham che yalaꞌ, cꞌam niꞌoj yopiso jaxca chꞌen stikꞌakꞌil taan. Ta asan yin wan scuybꞌanil ebꞌ kichmam tuꞌ chi kaoc cu naꞌbꞌal, laan wal yetoj tol jaꞌ txꞌotxꞌ chi kaoc yin smuroal oj cu conobꞌ.

13 Jal tinaniꞌ xin, tzꞌin cꞌal je chi, yutol oj jin kꞌanabꞌ niꞌoj; tit ojabꞌ wibꞌan yu wan jin kꞌane oj wal tiꞌ.

14 ¿Tzet chi wiꞌ yin jin colon el jin cawil tiꞌ? Yel xacꞌal mi watxꞌ tol chi waoc jin bꞌa yul skꞌabꞌ Naj eyxa smey yipalil.

15 Caxcꞌal mi jaꞌ Dios chin akꞌon camoj, oj wa cꞌal oc Naj yipoj jin cꞌul. Oj jin col cꞌaltaꞌ jin bꞌa sattaj Naj.

16 Tala cꞌuxan jaꞌ yin jun tuꞌ oj jin col jin bꞌa, yutol jaꞌ junoj penawom cꞌam chi stecꞌbꞌa sbꞌa yoc sattaj Dios.

17 Chi cam wal je majon je yabꞌ xin, yin tzet oj yun waloni.

18 Tuxa jix jin naꞌ yu tzet oj wute jin colon jin bꞌa, wotaj tol watxꞌ oj jin elocoj.

19 Ta ey mactxequel chi skeꞌ yaloni tol ey jin penail, chi skeꞌ jin tzꞌini eyoj catuꞌ chin cam xacꞌal.

20 Jaach jin Diosal, ey caabꞌ tzetyetal chin kꞌan ey jaach, jaxca tuꞌ xin, chi skeꞌ woc ja sattaj:

21 Kꞌojbꞌilxa ja waon oc jin yaꞌilal tiꞌ, catuꞌ cꞌam ojabꞌxa chin ja xibꞌte yetoj ja wipal.

22 Awte jin, catuꞌ oj jin takꞌwoj ey jaach; ma xin, jain bꞌabꞌel chin kꞌanabꞌ ey jaach, catuꞌ chach takꞌwi cꞌal pax ey jin an.

23 Al ey jin, ¿bꞌeytuꞌ eyoc jin penail jix el wuneni? ¿bꞌeytuꞌ ecꞌnaj chi wute jin bꞌa cha wilaꞌ?

24 ¿Tzet yuxan cha webꞌa el ja bꞌa ey jin? ¿tzet yuxan jaxca xacꞌal junoj ebꞌ pena snaꞌbꞌal chin ja wute?

25 Laan jin jaxca junoj xaj teꞌ chi iꞌletoj yu kaꞌeꞌ, ma jaxca chꞌim cꞌam yeloc apnoj. Yu jun tuꞌ, ¿tzet yuxan chin ja xibꞌte catuꞌ chin ja wujten ecꞌoj?

26 Caw yaꞌ yoc tzet cha wal ey jin chi wabꞌe, cha kꞌanlen ey jin, yu bꞌey jix oc jin penail yet tax jix jin titoc yin wachꞌeal.

27 Jaxca tol eyoc chꞌen cadena yin wajan ja wu, catuꞌ tꞌanan jaach cꞌal oc yin wajan bꞌey chin eqꞌui.

28 Yu jun tuꞌ, lalanxa jin lawi ey jaxca junoj xil xanabꞌe ma jaxca junoj xil pichile tol tuxa chi oc noꞌ ii yin.